Ataatsimeersuaararnissamut saqqummiussassat nutaat
Nalunngilarput Jehova Guutimut asannittariaqarluta tamakkiisumillu tunniusimalluinnartariaqarluta. Silarsuulli Guutimut qanimut attaveqarnerput akornuserniarsaraa. (Juá. 17:14) Ukiumi kiffartuussiffiusumi 2001-mi ataatsimeersuaararnissami „Guuti asasiuk — silarsuup pii pinnagit“-mik qulequtalimmi Jehovamut asanninnitta aalajaallisarnissaanut silarsuullu piinik anersaakkut navianartorsiortitsisinnaasunik akiuunnitsinnut nakussatsilluta ikiussavaatigut. — 1 Juá. 2:15-17.
Jehovamut asanningaarnitta taanna pillugu nalunaajaanissatsinnut kajumilersissavaatigut. Taamaakkaluartorli Guutip innuttaasa akornanni amerlaqisut oqaluussinissaq sapernartittarpaat. Sammisassami „Guutimut asanninnitta oqaluussinissamut killissavaatigut“-mi tusassavavut qanoq ilillutik amerlasuut tamakkiisumik oqaluusseqataanissaminnut ittuutunertik allallu akornutaasinnaasut anigorsimagaat.
Silarsuup maleruagassiasa ajortunngorsimasut qanoq sunnertarpaatigut? Iliuutsit siornatigut ajortutut isigisaasut maanna nalinginnaasutut isigineqalersimapput. Oqalugiaatip „Jehovamut asannittut ajortoq uumigaat“-ip oqalugiaatillu ataqatigiit „Silarsuaq qanoq isigaarput?“-ip kissaatinut kukkusunut naaggaarnitsinnut aalajangersimanitta aalajangiusimaannarnissaanut ikiussavaatigut.
Teokratiimi Atuarfik oqaluussinermullu tunngasunik ataatsimiinneq najoqqutassaalluartut sapaatillu-akunnerani Napasuliaq Alapernaarsuiffik-imi atuaqqissaagassaq eqikkarlugu ilanngunneqassapput. Tamanut ammasumik oqalugiaatip, „Asanninnerup uppernerullu silarsuaq qanoq ajugaaffigaat“-ip Jesusitut silarsuup tatineranut akiuunnissatsinnut nakussatissavaatigut. (Juá. 16:33) Biibilimik atuaqqissaaqatigisartakkatit ataatsimeersuaararnissamut qaaqqukkit. Kuisikkumasut ataatsimeersuaararnissaq sioqqullugu piffissaalluartukkut nakkutilliisoq siulittaasoq, pisariaqartunik piareersaasussaq, oqaloqatigisariaqarpaat.
Ataatsimeersuaararnerup samminerussavaa asanninnitta sammivissaa Jehovap pilluaqqusingaarnera misigeqqullugu. Ataatsimeersuarneq tamaat najuuffigiuk.