Biibilimi sorpiaat ajoqersuutigineqarpat? qanoq neqeroorutigineqarsinnaasoq
Atuagaq Biibilimi sorpiaat ajoqersuutigineqarpat? qanoq neqeroorutigineqarsinnaanersoq assigiinngitsunik siunnersuuteqarpoq. Siunnersuutit atukkit ilinnut naleqqusarlugit, oqaluussiffigisartakkamut aallarniut naleqqussaruk atuakkamilu sammineqartut oqaloqateqarnermut aallarniutaasinnaasut ilisimalluakkit. Aamma saqqummiusseriaatsit allat oqaluussisarfimmi kinguneqarluartartut atorneqarsinnaapput.
Ajunaarnerit/Naalliuutit
◼ “Ajunaartoqaraangat inuppassuit qularilertarpaat Guuteqarnersoq, Guuteqarpallu inuit naalliuutaat maluginerai eqqarsaatigilertarpaat. Aamma illit taamatut eqqarsarnikuuit? [Pulaakkat oqaaseqarli. Taava 1 Petrusi 5:7 aamma qupp. 11-mi immikkoortoq 11 atuakkit]. Atuakkami matumani sammineqarpoq Guutip inuiaat naalliuutaat qanoq peerluinnarumaarai.” Apeqqutit qupp. 106-imi aallaqqaataatungaanniittut takutikkit.
Biibili
◼ “Inuit ilaasa Biibili eqqartoraangamikku oqariartaaseq ‛Guutip oqaasia’ atortarpaat. Atuakkap inunnit allanneqartup Guutip oqaasianik taaneqarnera naleqqunnersoq eqqarsaatiginikuuiuk? [Pulaakkat oqaaseqarli. Taava 2 Petrusi 1:21 aamma qupp. 19-imi immikkoortoq 5 atuakkit]. Atuakkami matumani Biibili atorlugu apeqqutit uku akineqarput.” Apeqqutit qupp. 6-imiittut takutikkit.
◼ “Nalitsinni inuit paasissutissat aatsaat taama amerlatigisut pisinnaalersimavaat. Kisianni siunnersuutit ingerlalluarnissatsinnut pilluarnissatsinnullu iluaqutaasut sumi pissarsiarisinnaavavut? Illit qanoq isumaqarpit? [Pulaakkat oqaaseqarli. Taava 2 Timotheusi 3:16, 17 aamma qupp. 23-mi immikkoortoq 12 atuakkit]. Atuakkami matumani allaatigineqarpoq Guutip iluarisaanik uagutsinnullu iluaqutaasumik qanoq inooriaaseqartoqarsinnaasoq.” Ungalusaq assiliartaalu qupp. 122-123-miittut takutikkit.
Ilaqutariit
◼ “Tamatta ilaqutariittut pilluartuunissarput soqutigisarparput, ilaa? [Pulaakkat oqaaseqarli]. Ilaqutariinniittut tamarmik qanoq ilaqutariinnik pilluarnerulersitseqataasinnaanerat Biibilimi eqqartorneqarpoq — tassa Guutip asannittuliorneranik ilaarsinikkut.” Efesosimiut 5:1, 2 aamma qupp. 135-imi immikkoortoq 4 atuakkit.
Inissaqarniarneq
◼ “Sumiiffiit ilarpassuini iluameersumik inissaqarnissamut akisaqarnissaq ajornarsiartorsimavoq. Isumaqarpit siunissami kikkut tamarmik pitsaasumik inissaqalerumaartut? [Pulaakkat oqaaseqarli. Taava Esaja 65:21, 22 aamma qupp. 34-mi immikkoortoq 20 atuakkit]. Atuakkami matumani Guutip neriorsuutaa taanna qanoq eqquutissasoq sammineqarpoq.”
Jehova Guuti
◼ “Guutimik upperinnittorpassuit taassumunnga qanillerusupput. Nalunngiliuk taassumunnga qanilleqqulluta Biibilimi kajumissaarneqartugut? [Pulaakkat oqaaseqarli. Taava Jaaku 4:8a aamma qupp. 16-imi immikkoortoq 20 atuakkit]. Atuagaq manna iluaqutaasussaavoq Biibili atorlugu Guuti pillugu ilinniartitsinissamut.” Apeqqutit qupp. 8-mi aallaqqaataatungaaniittut takutikkit.
◼ “Inuppassuit ataatarpooq nalunngilaat. Ataatarpoornermi Guutip aqqata illernartitaanissaa qinnutigineqartarpoq. Guutili qanoq ateqarnersoq eqqarsaatiginikuuiuk? [Pulaakkat oqaaseqarli. Taava Tussiaat 83:19 aamma qupp. 195-imi immikkoortut 2-3 atuakkit]. Atuakkami matumani Jehova Guuti pillugu taassumalu inunnut siunertaa pillugu Biibilimi qanorpiaq ajoqersuuteqarnersoq sammineqarpoq.”
Jiisusi Kristusi
◼ “Nunarsuarmi tamarmi inuit Jiisusi Kristusi pillugu tusagaqarsimapput. Ilaat isumaqarput tassaaginnartoq inuk maluginiarnartoq. Allat Guutitut Ajugaqanngitsutut pallorfigaat. Jiisusip qanoq isigineqarnera pingaaruteqarsoraajuk?” Pulaakkat oqaaseqarli. Taava Johannesi 17:3 aamma qupp. 37-mi immikkoortoq 3 atuakkit. Apeqqutit kapitalip aallaqqaataatungaanniittut takutikkit.
Naassaanngitsumik inuuneq
◼ “Inuit amerlanersaasa inuunertunissartik kissaatigisarpaat. Inuk peqqissoq qanoq sivisutigisumik inoorusussasoraajuk? [Pulaakkat oqaaseqarli. Taava Saqqummersitat 21:3, 4 aamma qupp. 53-imi immikkoortoq 17 atuakkit]. Atuakkami matumani naassaanngitsumik inuulerumalluta qanoq iliorsinnaanersugut aamma neriorsuut taanna piviusunngortinneqarpat pissutsit qanoq ikkumaarnerat sammineqarput.”
Qinuneq
◼ “Guutip qinnutit qanoq akisarnerai eqqarsaatiginikuuiuk? [Pulaakkat oqaaseqarli. Taava 1 Johannesi 5:14, 15 aamma qupp. 170-imi immikkoortut 16-18 atuakkit]. Aamma kapitalimi matumani sooq Guutimut qinusariaqartugut taassumanngalu tusarneqarsinnaajumalluta qanoq iliortariaqartugut nassuiarneqarpoq.”
Sorsunneq/Eqqissineq
◼ “Sumi tamani inuit eqqissineqarnissaa erinigeqaat. Isumaqarpit nunarsuarmi eqqissineqarumaarnera takorluugaannaasoq? [Pulaakkat oqaaseqarli. Taava atuakkit Tussiaat 46:9, 10]. Atuakkami matumani sammineqarpoq Guutip siunertaminik qanoq piviusunngortitsillunilu nunarsuarmi tamarmi eqqissineqartitsinissaa.” Assiliaq qupp. 35-miittoq takutiguk, immikkoortullu 17-21 qupp. 34-miittut oqaloqatigiissutigissigit.
Toqu/Makititsineq
◼ “Inuit ilarpassuisa toqugutta qanoq pisoqarnissaa eqqarsaatigisarpaat. Tamanna paasineqarsinnaasoraajuk? [Pulaakkat oqaaseqarli. Taava Oqaluussisartup oqaasii 9:5 aamma qupp. 58-imi immikkoortut 5-6 atuakkit]. Aamma atuakkami matumani makititsinissap Biibilimi neriorsuutigineqartup toqusunut qanoq sunniuteqarumaarnera nassuiarneqarpoq.” Assiliaq qupp. 75-imiittoq takutiguk.
◼ “Asasamik toqusoqaraangat taassuma takoqqinnissaanik kissaateqarneq pissusissamisoorluinnarpoq, ilaa? [Pulaakkat oqaaseqarli]. Biibilimi neriorsuut tuppallernartoq una maluginiaruk. [Johannesi 5:28, 29 aamma qupp. 71-imi immikkoortut 16-17 atuakkit]. Kapitalimi matumani aamma apeqqutit uku akineqarput.” Apeqqutit qupp. 66-imi aallaqqaataatungaaniittut takutikkit.
Upperisarsiorneq
◼ “Inuppassuit silarsuarmi upperisarsiornerit inuiaat ajornartorsiutaannut aaqqiissutaanatik ajornartorsiutaannut pissutaanerartalerpaat. Isumaqarpit inuit upperisarsiornermit ilorraap tungaanut siulersorneqartut? [Pulaakkat oqaaseqarli. Taava Matthæusi 7:13, 14 aamma qupp. 146-mi immikkoortoq 5 atuakkit]. Kapitalimi matumani pallorfiginninnerup Guutip iluarisaata ilisarnaatai arfinillit sammineqarput.” Qupp. 147 takutiguk.