Napparsimasumik isumagin­nittutut nuannaar­tuarsin­naavutit

1-2. Jehovap pisariaqar­titsisunik isumaginnittut qanoq misigis­suseqarfigai? (Ussatit 19:17) (Aamma assit takukkit).

“NULIARALU ukiut 32-t sinnerlugit katissimareerpugut,” qatanngut Koreamiu Jin-yeolimik atilik taama oqarpoq. “Ukiut tallimat kingulliit napparsimangaarmat ikiortariaqarsimavara. Parkinsonimik nappaateqarami timaa qerattartarpoq. Nuliannguara asasupilussuuara isumagerusungaarlugulu. Uagutsinni napparsimmaviup siniffiutaani sinittarpoq. Unnuit tamaasa sanianiillunga tasiorluta siniler­tarpugut.”

² Asasannik napparsimasumik – assersuutigalugu angajoq­qaannik, aappannik, qitornannik ikinngutin­nilluunniit – isumagin­nittuuit? Soorunami taanna asagakku ikiorusungaarpat. Aamma Jehova asagakku taamaaliorputit. (Tim 1. 5:4, 8; Jaak 1:27) Ilungersor­nitilli immaqa allat maluginiarneq ajorpaat. Ilaannikkut immaqa misigisarputit kisivit ilungersuallutit. Allat takusarpaat qungujulasutit, nalusarpaalli kisimiik­kaangavit qullilisartutit. (Tuss 6:7) Qanoq misiginersutit allat maluginiar­tanngik­kaluaraat Jehovap nalunngilaa. (Aamma takuuk Mosesimik 2. 3:7). Qullilisarnitit asasannillu salliutsitsinerit naleqar­tingaarpai. (Tuss 56:9; 126:5) Jehovap ikiuisarnerit imminut ajunngitsuliornertut isigaa neriorsorlutillu iliuuserisatit tamaasa pillugit akilerumaarlutit. – Ussatit 19:17 atuaruk.

3. Sooq Teerap isumaginissaa Aaperaamut Saaramullu unamminiar­narsimassava?

³ Biibilimi angutit arnallu utoqqarnik napparsimasunil­luunniit isumagin­nittorpassuit eqqaaneqarput. Aaperaat Saaralu eqqarsaatigeriakkit. Illoqarfitsik Uri qimammassuk ataataat, Teera, 200-t missaannik ukioqarpoq. Utoqqaagaluarluni aallaqataavoq. 960 kilometerisut isorartutigisumut Kaaranniliarput. (Mos 1. 11:31, 32) Qularnanngilaq Aaperaap Saarallu Teera asagaat, angalatil­lutilli utoqqarmik isumaginninneq oqitsuin­naasimanavianngilaq. Ilimanarpoq qatigattuut siutituullu angalanerminni atorsimassagaat. Teeramut tamanna imaannaan­ngitsuusimassaaq. Takorloor­narporlu Aaperaat Saaralu qasungaar­tarsimassasut. Jehovalli pisariaqar­titaannik nakussatsis­simassavai. Aamma illit asasannik ikiuininni pisariaqar­titannik nakussatsis­savaatit. – Tuss 55:23.

4. Allaaserisami matumani suna sammissavarput?

⁴ Asasannik isumagin­ninninni nuannaartuuneq iluaqutigisinnaavat. (Uss 15:13) Eqqaamajuk ilungersunar­torsioraluarlutit nuannaarun­naartariaqan­nginnavit. (Jaak 1:2, 3) Nuannaarneq attatiin­narsinnaaq­qullugu qanoq iliorsinnaavit? Nuannaarnermut pissutaasut eqqaamajuaq­qullugit Jehova qinnuigisaruk. Aamma iliuutsit allat iluaqutigisin­naavatit. Taakkualu ilaat allaaserisami matumani sammissavagut. Aamma paasinias­savarput allat qanoq ikiuussinnaasut. Siullertut sammissavarput nuannaarnerup pingaaruteqassusia aamma sooq tamanna oqitsuin­naanngitsoq.

NUANNAAR­TUARNISSAQ SOOQ AJORNAKUSOORSINNAASOQ

5. Asasannik isumagin­ninninni sooq nuannaar­tuunissat pingaaruteqarpa?

⁵ Ilungersunartut kisiisa eqqarsaatigisarutsigit nikallungalersin­naavugut suliassatsinnullu nukissaarulluta. (Uss 24:10) Qasunitsinnilu ikiuerusuk­kaluarluta saamasuujun­naarsin­naavugut. Isumagin­ninniar­nitsinni suut nuannaarun­naarsitsisin­naappat?

6. Sooq isumaginnittut ilaat nukissaaruttarpat?

⁶ Nukissaarunneq. Qatanngut arnaq Leahmik atilik ima oqarpoq: “Ulloq ingerlal­luaraluaraangal­luunniit misigis­sutsikkut nanertisimasarpunga. Ullup naanerani nukissaarutivit­tarpunga. Ilaannikkullu allaat SMS-ip akinissaanut nukissaqarneq ajorpunga.” Allat naammattumik sinissinnaaneq ajorput. Qasuersaar­nissartillu pisariaqar­tikkaluarlugu qasuersaan­ngitsoor­tarlutik. Qatanngut arnaq Inésimik atilik ima oqarpoq: “Sakiga arnaq isumaginiarlugu akunnerit marlukkaarlugit unnuakkut makittariaqar­tarpunga. Taamaattumik sinilluarneq ajorpunga. Uigalu ukiut arlallit feeriar­nissamut periarfis­saqarnikuun­ngilagut.” Ilaasa piffissaq tamaat asasartik isumagisaramikku ikinngutiminnik peqateqar­nissaminnut Jehovamullu kiffartornermi suliassanut assigiin­ngitsunut naaggaar­tariaqartarput. Tamatuma kingunerisaanik ilaat kiserliulertarput iliuusererusutatillu tamaasa iliuuserisin­naanngin­namikkit nikallungalersin­naallutik.

7. Sooq isumaginnittut ilaat nikallungalertarpat?

⁷ Naammattumik ikiuisiman­ngitsutut misigineq aliasunnerlu. Qatanngut arnaq Jessicamik atilik ima oqarpoq: “Ataataga asasara ikiorniarlugu iliuuseqar­nerusariaqartutut misigiuaan­narpunga. Qasuersaaraangamalu namminis­sarsiortutut misigisarpunga.” Ilaasa naammattumik iliuuseqar­tarnerlutik isumakuluutigisarpaat. Ilaannik­kulluunniit isumaqalersin­naasarput inuup taassuma isumagiin­narnissaa nukissaqarfiginagu. Immaqa qasugaangamik inussiar­niitsumik oqaaseqar­toortarput iliuuseqar­toorlutil­luunniit. Tamakkulu tamaasa nikalluutigisin­naavaat. (Jaak 3:2) Ilisarisimasaq peqqiil­liartorluni allanngoriartortoq isigalugu alianartaqaaq. Qatanngut Barbaramik atilik ima oqarpoq: “Ikinngutiga asasara ullut tamaasa ajorsiar­tuinnartoq isigalugu uannut artornar­torujussuuvoq.”

8. Qujamasunnermik ersersitsilaaginnarneq qanoq sunniuteqarsinnaava?

⁸ Ilaat misigisarput ikiuinertik qujamasuutigineqan­ngitsoq. Amerlaner­tigummi imminut tunulliullutik suliatik pillugit nersualaar­neqarneq ajorput. Taamaattumik qujamasunnermik ersersitsilaaginnarneq qiimmas­saataasin­naasarpoq. (Kol 3:15) Qatanngut Melissamik atilik ima oqarpoq: “Ilaannikkut qasusangaarama qullilisarpunga. Ikiortakkamali iliuuserisakka pillugit qujaffigigaangannga qiimmat­tarpunga! Taamaat­toqaraangat aqaguani ikiueqqin­nissannut nukissaqaleq­qittarpunga.” Qatanngut angut Ahmadumik atilik oqaluttuarpoq qujamasunnermik ersersitsivigineqartarneq imminut qanoq sunniuteqartartoq. Nuliami soraluaa niviarsiarannguaq noqartartuusoq imminni najugaqartoq isumagisarpaat. Ahmadu ima oqarpoq: “Naak ikiorniarlugu qanoq iliuuseqar­tiginerput paasilluarsin­naanngik­kaluaraa asanerarluta allanniarsarigaangami qujamasun­niniluunniit ersersik­kaangagu qamuuna nuannaajum­mertarpugut.”

NUANNAAR­TUUJUMALLUTIT QANOQ ILIORSIN­NAASUTIT

9. Sooq killissatit ilisimasariaqarpigit?

⁹ Killissatit ilisimakkit. (Uss 11:2) Tamatta piffissarput nukigullu killissaqarput. Taamaattumik iliuuserisin­naasatit nalilersortakkit. Allat naatsorsuutigisaattut iliuuseqar­tuaannarsin­naanngilatit. Tamannalu ajuusaarutigis­sanngilat. Takutiin­narpammi iliuuserisin­naasatit iliuuserisin­naanngisatillu eqqumaf­figisaritit. Aamma allat ikiorusuppatsit ikiorneqarnissat akuerisaruk. Qatanngut angut Jay-imik atilik ima oqarpoq: “Iliuuseqangaarusuk­kaluarluta ullut tamaasa piffissarput nukigullu sinnerlugit iliuuseqarsin­naanngilagut. Killissagut qaanger­naveersaar­tarutsigit nuannaar­nerusin­naavugut.”

10. Ikiuininni suna paasissallugu pingaaruteqarpa? (Ussatit 19:11)

¹⁰ Tunuliaqutaa paasiniaruk. (Ussatit 19:11 atuaruk). Inuup pissusilersor­neranut pissutaasinnaasut paasiniar­tarukkit inussiar­niitsumik oqarfigineqaraangavit eqqissisimaan­narsinnaassaatit. Inuk napparsimasoq siornatigut iliuuserisiman­ngisaan­nakkamisut iliuuseqar­toorsinnaavoq. (Oqal 7:7) Assersuutigalugu inuk napparsiman­ngikkallarami inussiar­nersuullunilu isumassuisuusimasoq akerliuniar­talersinnaavoq. Aamma piumasaqaan­nalersinnaavoq naammagit­taallioqajaalluni kamaqqajaalersin­naalluniluunniit. Nappaataa paasisaqarfiginerugukku ilisimalissavat nappaatini pissutigalugu inussiar­niitsumik oqaaseqar­talersoq iliuuseqar­talerlunilu, imaanngitsoq inuttut taamaat­tuugami. – Uss 14:29.

11. Ullut tamaasa pingaarutillit suut iliuuserisariaqarpigit? (Tussiaat 132:4, 5)

¹¹ Jehovamik ikinnguteqarnerit nukittorsartuaruk. Ilaannikkut pingaar­nerusunut piffissaqarumallutit iliuuserisassat allat kinguar­tittariaqarsin­naavatit. (Flp 1:10) Assersuutigalugu Jehovamik ikinnguteqarnerpit nukittorsarnissaa piffissaqarfigisariaqarpat. Kunngip Daavip Jehovamik guutisiornini pingaar­nerpaatippaa. (Tussiaat 132:4, 5 atuakkit). Illittaaq ulapittaraluarlutit Biibilimik atuartarnissat qinusar­nissallu pingaar­tittariaqarpatit. Qatanngut arnaq Elishamik atilik ima oqarpoq: “Qinusarnikkut tussiaatinillu tuppallersaataasunik eqqarsaatigin­neqqissaarnikkut nuannaalersin­naasarpunga. Qinuneq iluaqutiginerpaasarpara. Ullormut Jehovamut qinukulasarpunga eqqissisimaan­narnissannut ikioqqullunga.”

12. Sooq peqqissuunissat eqqumaf­figisariaqarpiuk?

¹² Peqqissuuniarlutit iliuuseqartarit. Inuit ulapittut – soorlu asasaminnik napparsimasumik isumaginnittut – peqqinnartunik nerisas­siorsin­naajumallutik pisiniar­nissaminnut piffissakil­liorsin­naapput. Timikkulli eqqarsar­taatsikkullu peqqissuujumallutik peqqinnartunik nerisaqar­nissaat timersor­tarnissaallu pingaaruteqarpoq. Taamaattumik ulapikkaluarlutit tamakku piffissaqarfiginiar­tariaqarpatit. (Ef 5:15, 16) Aamma qasuerlutit sininniartarit. (Oqal 4:6) Qaratsap sananeqaataanik immikkut ilisimasallit oqarput sinikkaangatta qarasarput imminut katsorsartartoq.a Nakorsat paasisimasaat naapertorlugu inuk naammattumik sinissimagaangami ernumaval­laarunnaarlunilu pissutsini ilungersunartuni eqqissisimanerusartoq.b Aamma ilaannikkut nuannarisannik sammisaqarnissat piffissaqarfigisariaqarpat. (Oqal 8:15) Qatanngut arnaq nassuiaavoq nuannaar­tuarnis­saminut suna iluaqutigisar­nerlugu. Ima oqarpoq: “Silagik­kaangat aniniar­tarpunga seqqinnisaarlungalu. Minnerpaamik qaammammut ulloq ataaseq ikinngutiga ilagalugu nuannarisatsinnik sammisaqar­nissamut pilersaarusior­tarpunga.”

13. Sooq illarneq peqqinnartuua? (Ussatit 17:22)

¹³ Illartarnissat puioqinagu. (Ussatit 17:22 atuaruk; Oqal 3:1, 4) Illarneq timikkut eqqarsar­taatsikkullu peqqinnartuuvoq. Isumagisas­saqartillutit pilersaarutigisattut pisoqan­ngikkaluaraangal­luunniit pissutsini ilungersunartuni qiimaannaruit ilinnut oqinnerussaaq. Ikiukkat illaqatigisin­naagukku immissinnut qaninnerulersin­naavusi.

14. Ikinngummik oqaloqateqarneq qanoq iluaqutigisin­naaviuk?

¹⁴ Ikinngummik oqaloqateqarit. Nuannaar­niarlutit sapinngisannik iliuuseqaraluarlutit ernumas­suteqar­tarsinnaavutit. Taamaat­toqartillugu ikinngutigil­luakkat pisuusutut misigilersitsisan­ngitsoq misigis­sutsitit pillugit oqaluttuukkukku iluaqutigisinnaavat. (Uss 17:17) Pisariaqar­tilluin­nakkannik tusarnaaq­qissaas­savaatit, oqaasiisalu qiimmaal­lannartut nuannaar­nerulersis­sinnaavaatsit. – Uss 12:25.

15. Paratiisi pillugu eqqartueqateqarnerit qanoq nuannaalis­sutigisin­naaviuk?

¹⁵ Takorlooruk paratiisimeeqatigiittusi. Eqqaamajuk utoqqalisoq napparsimasorluunniit naassaan­ngitsumik paarinavian­nginnakku. Taamatut suliaqartarneq Jehovap aallaqqaammulli siunertarinngilaa. (Kor 2. 4:16-18) “Inuunivik” suli atuutilinngilaq. (Tim 1. 6:19) Siunissamili tamatta Jehovap kissaatigisaatut inuussaagut. Asasallu paratiisissami suniarnerlusi eqqartueqatigiit­tarussi nuannaajal­laatigis­savarsi. (Es 33:24; 65:21) Qatanngut arnaq Heatherimik atilik ima oqarpoq: “Napparsimasut isumagisar­takkakka oqarfigikulasarpakka ungasin­ngitsumi mersoqatigiit­talerlutalu arpaqatigiit­talerlutalu cykleqatigiit­talissasugut. Asasatsinnut makititaasunut iffiortarlutalu igasassaagut. Tamatta neriuuterput pillugu Jehova qutsavigisarparput.”

ALLAT QANOQ IKIUUSSINNAASUT

16. Napparsimasumik isumaginnittoq ilagiin­niittoq ikiorniarlugu qanoq iliorsin­naavugut? (Aamma asseq takuuk).

¹⁶ Uppeqaterput qasuersaar­tissinnaavarput. Immaqa uppeqaterput asasaminik napparsimasumik isumaginnittoq taarserlugu isumagisaanik nakkutigin­nilaarsin­naavugut. Taamaaliorutta uppeqaterput qasuersaar­tilaarlugulu pisariaqar­titaanut periarfis­sissinnaas­savarput. (Gal 6:2) Oqaluus­sisartut ilaat sapaatip-akunneranut kikkut isumagin­nittuus­sanersut pilersaarusiortarput. Qatanngut Nataljamik atilik, uiminik pisussin­naajunnaarsimasumik isumaginnittoq, ima oqarpoq: “Qatanngut angut ataaseq sapaatip-akunneranut ataasiarluni marloriarluniluunniit uagutsin­nukartarpoq uiga ilagiar­torlugu. Oqaluus­seqatigiittarput, oqaloqatigiittarput allaallu filmeqatigiit­tarlutik. Uima ikinngumminik sammisaqaqateqar­tarnini nuannarisorujussuuaa, uangalu piffissaq isumaga malillugu, soorlu pisuttuarlunga, atortarpara.” Immaqa paarsisua qasuerluni sinilluar­niassammat illit unnuinissannik neqeroorsin­naavutit.

17. Isumaginnittoq ataatsimiinnerit nalaanni qanoq ikiorsin­naavarput?

¹⁷ Ilagiittut ataatsimiinnerni ikiuussin­naavugut. Napparsimasumik isumaginnittup ataatsimiinnerni ataatsimeersuar­nernilu asasani isumagisaramiuk pissarsiaqarfigival­laartanngilai. Ataatsimiinnerni taama ittuni ilagiin­niittut piffissap ilaannaaniluunniit paarsaa issiaqatiginiarsin­naavaat. Nakkutigisaq utoqqaappat napparsimal­luniluunniit angerlarsimasariaqarsimappat isumaginnittoq naalagaaf­filersaarfimmi ataatsimiinnermut najuunniassammat taava immaqa angerlarsimaffiani internetikkut ataatsimeeqatigisinnaavat.

18. Isumaginnittoq qanoq allatut aamma ikiorsin­naavarput?

¹⁸ Nersualaarlugillu qinnuttarsin­naavagut. Utoqqaanertat napparsimasunik isumaginnittut akuttun­ngitsumik qiimmas­sariartor­tassavaat. (Uss 27:23) Ilagiin­niittuusugulli tamatta napparsimasunik isumaginnittut paasitit­tarsinnaavagut asagigut iliuuserisaallu tamaasa pingaar­tikkigut. Aamma Jehovamit nakussatsin­neqartaq­qullugit nuannaar­tuaqqul­lugillu qinnuttarsin­naavagut. – Kor 2. 1:11.

19. Suna qilanaar­tuutigaarput?

¹⁹ Ungasin­ngitsukkut Jehovap naalliuutinut aliasun­nermullu pissutaasut tamarluinnaasa suujunnaarsissavai. Nappaatit toqulu atuukkun­naassapput. (Saqq 21:3, 4) “Tusiattoq tuttorsuartut pissigarumaarpoq.” (Es 35:5, 6) Utoqqalinerup kingunerisaanik anniaatit asasattalu utoqqalil­lutillu napparsimasut atugaat “pereersut eqqaamaneerutissapput eqqaaqqin­neqarnatillu”. (Es 65:17) Allaat maanna neriuutitta nuanningaartup eqquunnissaa utaqqitillugu Jehovap ikiortuarumaaraatigut tatigil­luinnarsin­naavarput. Nakussatseq­qulluta qinnugiuarutsigu ‘sutigut tamatigut naammagit­tarluta nuannaarlutalu pinertusaar­nissatsinnut’ ikiorumaarpaatigut. – Kol 1:11.