ಅಧಿವೇಶನದ ಮರುಜ್ಞಾಪನಗಳು
ಕಾರ್ಯಕ್ರಮದ ಸಮಯ: ಸಭಾಂಗಣದ ಬಾಗಿಲು ಬೆಳಿಗ್ಗೆ 8:00 ಗಂಟೆಗೆ ತೆರೆಯುತ್ತದೆ. ಮೂರೂ ದಿನ ರಾಜ್ಯ ಸಂಗೀತ ಬೆಳಿಗ್ಗೆ 9:20ಕ್ಕೆ ಆರಂಭವಾಗುತ್ತದೆ. ಆಗ ಎಲ್ಲರೂ ತಮ್ಮ ತಮ್ಮ ಸೀಟುಗಳಲ್ಲಿ ಕೂತುಕೊಳ್ಳಬೇಕು. ಇದು ಕಾರ್ಯಕ್ರಮ ಗೌರವಾನ್ವಿತ ರೀತಿಯಲ್ಲಿ ಆರಂಭವಾಗಲು ನೆರವಾಗುತ್ತದೆ. ಕಾರ್ಯಕ್ರಮ ಶುಕ್ರವಾರ, ಶನಿವಾರದಂದು ಸಂಜೆ 5:00ಕ್ಕೆ ಹಾಗೂ ಭಾನುವಾರದಂದು ಸಂಜೆ 4:00ಕ್ಕೆ ಕೊನೆಗೊಳ್ಳುತ್ತದೆ.
ಗೀತೆಯ ಮೂಲಕ ಯೆಹೋವನನ್ನು ಸ್ತುತಿಸಿ: ಪ್ರಾಚೀನ ಕಾಲದಲ್ಲಿ ದೇವಜನರು ಸಂಗೀತ ಮತ್ತು ಹಾಡಿನ ಮೂಲಕ ಯೆಹೋವನನ್ನು ಸ್ತುತಿಸುತ್ತಿದ್ದರು. ಆಗಿನಿಂದ ಈಗಿನವರೆಗೂ ಹಾಡು ಮತ್ತು ಸಂಗೀತ ಸತ್ಯ ಆರಾಧನೆಯ ಪ್ರಾಮುಖ್ಯ ಭಾಗವಾಗಿವೆ. (ಕೀರ್ತ. 28:7) ಪ್ರಾದೇಶಿಕ ಅಧಿವೇಶನದ ಪ್ರತಿಯೊಂದು ಸೆಷನ್‌ ಸಂಗೀತದೊಂದಿಗೆ ಪ್ರಾರಂಭವಾಗುತ್ತದೆ. ಇದು ಹಿನ್ನೆಲೆಯಾಗಿ ನುಡಿಸಲಾಗುವ ಸಂಗೀತವಾಗಿದ್ದರೂ, ಯೆಹೋವನ ಬಗ್ಗೆ ಕಲಿಯಲು ಮತ್ತು ಆತನನ್ನು ಆರಾಧಿಸಲು ನಮ್ಮ ಮನಸ್ಸನ್ನು ಸಿದ್ಧಗೊಳಿಸುತ್ತದೆ. ಆದ್ದರಿಂದ ಸೆಷನ್‌ ಅಧ್ಯಕ್ಷನು ಸಂಗೀತ ಆರಂಭವಾಗುತ್ತದೆ ಎಂದು ಹೇಳುವಾಗ ನಾವು ನಮ್ಮ ಸ್ಥಳದಲ್ಲಿ ಕುಳಿತುಕೊಳ್ಳಬೇಕು. ಆ ಸಮಯದಲ್ಲಿ ಗಣ್ಯತೆಯಿಂದ ಆ ಸಂಗೀತವನ್ನು ಕೇಳಿಸಿಕೊಳ್ಳಬೇಕೇ ಹೊರತು ಮಾತಾಡಬಾರದು. ಹೀಗೆ ಮಾಡಿದರೆ ಈ ಸಂಗೀತ ತಯಾರಿಸಲು ಕೆಲಸ ಮಾಡಿದ ಎಲ್ಲ ಸಹೋದರ ಸಹೋದರಿಯರಿಗೆ ನಮ್ಮ ಗಣ್ಯತೆ ತೋರಿಸುತ್ತೇವೆ. ಇವರೆಲ್ಲರೂ ವರ್ಷಕ್ಕೆ ಎರಡು ಬಾರಿ ಸ್ವಂತ ಖರ್ಚಿನಿಂದ ನ್ಯೂಯಾರ್ಕಿನ ಪ್ಯಾಟರ್‌ಸನ್‌ಗೆ ಹೋಗಿ ನಮಗೋಸ್ಕರ ಸುಂದರ ಸಂಗೀತವನ್ನು ತಯಾರಿಸುತ್ತಾರೆ. ಈ ಸಂಗೀತವನ್ನು ಕೇಳಿಸಿಕೊಂಡ ನಂತರ ಅಧಿವೇಶನಕ್ಕೆ ಬಂದವರೆಲ್ಲರೂ ಸೇರಿ ರಾಜ್ಯ ಗೀತೆಯನ್ನು ಹಾಡಿ ಯೆಹೋವನನ್ನು ಸ್ತುತಿಸುತ್ತೇವೆ.
ಪಾರ್ಕಿಂಗ್‌: ಪಾರ್ಕಿಂಗ್‌ ಸೌಕರ್ಯಗಳಿರುವ ಎಲ್ಲ ಅಧಿವೇಶನ ಸ್ಥಳಗಳಲ್ಲಿ ಮೊದಲು ಬಂದವರಿಗೆ ಮೊದಲ ಆದ್ಯತೆಗನುಸಾರ ವಾಹನಗಳಿಗೆ ಉಚಿತ ಪಾರ್ಕಿಂಗ್‌ ವ್ಯವಸ್ಥೆ ಇರುತ್ತದೆ. ಸಾಮಾನ್ಯವಾಗಿ ಪಾರ್ಕಿಂಗ್‌ ಮಾಡಲು ಸಾಕಷ್ಟು ಸ್ಥಳ ಇರುವುದಿಲ್ಲ. ಹಾಗಾಗಿ ಸ್ನೇಹಿತರು ಮತ್ತು ಸಂಬಂಧಿಕರು ಬೇರೆ ಬೇರೆ ಕಾರಿನಲ್ಲಿ ಬರುವ ಬದಲು ಒಂದೇ ಕಾರಿನಲ್ಲಿ ಬನ್ನಿ.
ಸೀಟು ಹಿಡಿಯುವುದು: ಪ್ರತಿದಿನ ಬೆಳಿಗ್ಗೆ ಸಭಾಂಗಣದ ಬಾಗಿಲು ತೆರೆದಾಗ ಸೀಟು ಹಿಡಿಯಲು, ಹಾಜರಾದ ಇತರರೊಂದಿಗೆ ಸ್ಪರ್ಧೆಗೆ ಇಳಿಯಬೇಡಿ. ಇತರರ ಕಡೆಗೆ ಪರಿಗಣನೆ ತೋರಿಸಿ. ಅವರಿಗಾಗಿ ನಿಮ್ಮ ಇಷ್ಟಗಳನ್ನು ತ್ಯಾಗ ಮಾಡಲು ಮುಂದಾಗಿರಿ. ನಮ್ಮಲ್ಲಿ ಸ್ವತ್ಯಾಗ ಮನೋಭಾವ ಇರುವುದಾದರೆ ನಾವು ನಿಜ ಕ್ರೈಸ್ತರೆಂದು ಗುರುತಿಸಲ್ಪಡುತ್ತೇವೆ ಜೊತೆಗೆ ಇದನ್ನು ಗಮನಿಸಿದ ಇತರರು ದೇವರನ್ನು ಮಹಿಮೆ ಪಡಿಸುತ್ತಾರೆ. (ಯೋಹಾ. 13:34, 35; 1 ಕೊರಿಂ. 13:5; 1 ಪೇತ್ರ 2:12) ಕಾರಿನಲ್ಲಿ ನಿಮ್ಮೊಂದಿಗೆ ಪ್ರಯಾಣಿಸಿದವರಿಗೆ ಅಥವಾ ನಿಮ್ಮ ಮನೆಯವರಿಗೆ ಅಥವಾ ನಿಮ್ಮ ಈಗಿನ ಬೈಬಲ್ ವಿದ್ಯಾರ್ಥಿಗಳಿಗೆ ಮಾತ್ರ ಸೀಟುಗಳನ್ನು ಹಿಡಿದಿಡಬಹುದು. ನೀವು ಕಾದಿರಿಸಲು ಬಯಸದ ಸೀಟುಗಳಲ್ಲಿ ಯಾವುದೇ ವಸ್ತುಗಳನ್ನು ಇಡಬೇಡಿ. ಹೀಗೆ ಮಾಡಿದರೆ ಯಾವ ಸೀಟುಗಳು ಖಾಲಿಯಾಗಿವೆ ಎಂದು ಗುರುತಿಸಲು ಇತರರಿಗೆ ಸಹಾಯವಾಗುತ್ತದೆ. ವಯಸ್ಸಾದವರಿಗೆ ಮತ್ತು ಆರೋಗ್ಯ ಸಮಸ್ಯೆ ಇರುವವರಿಗೆ ಸೀಟುಗಳನ್ನು ಕಾದಿರಿಸಲಾಗುತ್ತದೆ. ಅಂಥ ಸೀಟುಗಳು ಸೀಮಿತವಾಗಿರುವುದರಿಂದ ಕುಟುಂಬದವರೆಲ್ಲರೂ ಅವರೊಂದಿಗೆ ಕೂತುಕೊಳ್ಳಬಾರದು. ಆ ಸೀಟುಗಳಲ್ಲಿ ವಯಸ್ಸಾದವರು ಮತ್ತು ಅವರ ಸಹಾಯಕ್ಕಾಗಿ ಒಬ್ಬಿಬ್ಬರು ಮಾತ್ರ ಕೂತುಕೊಳ್ಳಬಹುದು.
ಸಭ್ಯ ಉಡುಪು: ಅಧಿವೇಶನದಲ್ಲಿ ಸೂಕ್ತವಾದ ಮತ್ತು ಸಭ್ಯವಾದ ಉಡುಪನ್ನು ಧರಿಸಬೇಕು. ಲೋಕದಲ್ಲಿ ಸಾಮಾನ್ಯವಾಗಿರುವ ಫ್ಯಾಶನ್‌ ಉಡುಪುಗಳನ್ನು ಧರಿಸಬಾರದು. (1 ತಿಮೊ. 2:9) ಅಧಿವೇಶನ ನಡೆಯುವ ನಗರಕ್ಕೆ ಪ್ರಯಾಣಿಸುವಾಗ, ಅಲ್ಲಿಂದ ಹಿಂದಿರುಗುವಾಗ ಮತ್ತು ಬಿಡುವಿನ ಸಮಯದಲ್ಲಿ ಸಹ ನಮ್ಮ ಉಡುಪು ತೀರ ಮಾಮೂಲಿಯದ್ದಾಗಿರಬಾರದು. ಸಭ್ಯವಾದ ಉಡುಪನ್ನು ಧರಿಸಿದರೆ ಅಧಿವೇಶನದ ಬ್ಯಾಜನ್ನು ಯಾವಾಗಲೂ ಧರಿಸಿಕೊಳ್ಳಲು ಮತ್ತು ಅವಕಾಶ ಸಿಕ್ಕಾಗೆಲ್ಲ ಹಿಂಜರಿಯದೆ ಸಾಕ್ಷಿ ಕೊಡಲು ಸಾಧ್ಯವಾಗುತ್ತದೆ. ಮುಂಬರುವ ಅಧಿವೇಶನಗಳಲ್ಲಿ ನಾವು ಧರಿಸುವ ಸಭ್ಯ ಉಡುಪು ಮತ್ತು ನಮ್ಮ ಉತ್ತಮ ನಡತೆ ಬೈಬಲಿನ ಜೀವ ರಕ್ಷಕ ಸಂದೇಶಕ್ಕೆ ಕಿವಿಗೊಡುವಂತೆ ಪ್ರಾಮಾಣಿಕ ಹೃದಯದ ವ್ಯಕ್ತಿಗಳನ್ನು ಆಕರ್ಷಿಸುತ್ತದೆ ಮಾತ್ರವಲ್ಲ ಯೆಹೋವನಿಗೂ ಸಂತೋಷ ತರುತ್ತದೆ.—ಚೆಫ. 3:17.
ಎಲೆಕ್ಟ್ರಾನಿಕ್‌ ಸಾಧನಗಳು: ನಿಮ್ಮ ಫೋನ್‌ ಅಥವಾ ಇತರ ಎಲೆಕ್ಟ್ರಾನಿಕ್‌ ಸಾಧನಗಳನ್ನು ಇತರರಿಗೆ ಅಡಚಣೆಯಾಗದ ಸೆಟ್ಟಿಂಗ್‌ನಲ್ಲಿಡಿ. ಕ್ಯಾಮೆರಾ, ವಿಡಿಯೋ ರೆಕಾರ್ಡರ್‌, ಟ್ಯಾಬ್‌ ಅಥವಾ ಇತರ ಯಾವುದೇ ಉಪಕರಣಗಳನ್ನು ಉಪಯೋಗಿಸುವಾಗಲೂ ಇತರರಿಗೆ ಅಡ್ಡಿಯಾಗದಂತೆ ನೋಡಿಕೊಳ್ಳಿ. ಕಾರ್ಯಕ್ರಮ ನಡೆಯುತ್ತಿರುವಾಗ ಅನಾವಶ್ಯಕವಾಗಿ ಮೆಸೇಜ್‌ ಅಥವಾ ಮೇಲ್‌ ಕಳುಹಿಸುತ್ತಾ ಇರಬೇಡಿ.
ಮಧ್ಯಾಹ್ನದ ಊಟ: ಮಧ್ಯಾಹ್ನದ ಊಟಕ್ಕಾಗಿ ಅಧಿವೇಶನ ಸ್ಥಳದಿಂದ ಹೊರಗೆ ಹೋಗುವ ಬದಲು ಲಘು ಉಪಹಾರ ತೆಗೆದುಕೊಂಡು ಬನ್ನಿ. ಊಟದ ಬ್ಯಾಗ್‌ ಸೀಟಿನ ಕೆಳಗೆ ಇಡುವಷ್ಟು ಚಿಕ್ಕದಿರಲಿ. ದೊಡ್ಡ ದೊಡ್ಡ ಟಿಫಿನ್‌ಗಳು, ಗಾಜಿನ ಪಾತ್ರೆಗಳನ್ನು ತರಬಾರದು.
ದಾನಗಳು: ಲೋಕವ್ಯಾಪಕ ಕೆಲಸಕ್ಕಾಗಿ ಅಧಿವೇಶನದಲ್ಲಿ ಸ್ವಯಂ ಪ್ರೇರಿತ ದಾನಗಳನ್ನು ನೀಡುವ ಮೂಲಕ ಅಧಿವೇಶನ ಏರ್ಪಾಡುಗಳಿಗಾಗಿ ಕೃತಜ್ಞತೆ ತೋರಿಸಬಲ್ಲೆವು. ನೀವು ಅಧಿವೇಶನದಲ್ಲಿ ಕಾಣಿಕೆಯಾಗಿ ಕೊಡುವ ಚೆಕ್‌ಗಳನ್ನು “The Watch Tower Bible and Tract Society of India”ಗೆ ಸಂದಾಯವಾಗಬೇಕೆಂದು ಗುರುತಿಸಬೇಕು. ಕೆಲವು ಅಧಿವೇಶನಗಳಲ್ಲಿ ಕಾಣಿಕೆಗಳನ್ನು ಡೆಬಿಟ್‌ ಅಥವಾ ಕ್ರೆಡಿಟ್‌ ಕಾರ್ಡ್‌ಗಳ ಮೂಲಕ ಸಹ ಕೊಡಬಹುದು.
ಔಷಧ: ವೈದ್ಯರು ಬರೆದುಕೊಟ್ಟ ಔಷಧವನ್ನೇ ನೀವು ತೆಗೆದುಕೊಳ್ಳಬೇಕಾದಲ್ಲಿ ಅದನ್ನು ದಯವಿಟ್ಟು ಸಾಕಷ್ಟು ಪ್ರಮಾಣದಲ್ಲಿ ತನ್ನಿ. ಅಧಿವೇಶನದ ಸ್ಥಳದಲ್ಲಿ ಅವು ಲಭ್ಯವಿರುವುದಿಲ್ಲ. ಸಕ್ಕರೆ ಕಾಯಿಲೆಯ ಸಿರಿಂಜು, ಸೂಜಿಗಳನ್ನು ಅಧಿವೇಶನ ಸ್ಥಳದಲ್ಲಿ ಮತ್ತು ಹೋಟೆಲಿನಲ್ಲಿರುವ ಕಸದ ಬುಟ್ಟಿಗಳಲ್ಲಿ ಎಸೆಯದೆ ಸೂಕ್ತ ಸ್ಥಳದಲ್ಲಿ ಬಿಸಾಡಿ.
ಸುರಕ್ಷಾ ಕ್ರಮಗಳು: ಜಾರಿ ಅಥವಾ ಎಡವಿಬಿದ್ದು ಗಾಯಮಾಡಿಕೊಳ್ಳದಿರಲು ಸುರಕ್ಷಾ ಕ್ರಮಗಳನ್ನು ತೆಗೆದುಕೊಳ್ಳಿ. ಮಕ್ಕಳು ಅಧಿವೇಶನದ ಸಭಾಂಗಣದಲ್ಲಿ ಓಡದಂತೆ, ಆಟ ಆಡದಂತೆ ನೋಡಿಕೊಳ್ಳಿ. ಪ್ರತೀ ವರ್ಷ ಅಧಿವೇಶನಗಳಲ್ಲಿ ಪಾದರಕ್ಷೆಗಳಿಂದಾಗಿ ಅನೇಕರು ಗಾಯಗೊಳ್ಳುತ್ತಿದ್ದಾರೆ. ಕಾಲಿನ ಗಾತ್ರಕ್ಕೆ ಸರಿಹೊಂದುವ ಸಭ್ಯ ಪಾದರಕ್ಷೆ ಧರಿಸಿದರೆ ಇಳಿಜಾರಿನಲ್ಲಿ, ಮೆಟ್ಟಿಲುಗಳಲ್ಲಿ, ಇನ್ನಿತರ ಸ್ಥಳಗಳಲ್ಲಿ ಸುರಕ್ಷಿತವಾಗಿ ನಡೆಯಲು ಸಾಧ್ಯ.
ಮಕ್ಕಳ ತಳ್ಳುಕುರ್ಚಿ ಮತ್ತು ವಿಹಾರಕುರ್ಚಿಗಳು: ಮಕ್ಕಳ ತಳ್ಳುಕುರ್ಚಿ, ವಿಹಾರಕುರ್ಚಿಗಳನ್ನು ಅಧಿವೇಶನ ಸ್ಥಳಕ್ಕೆ ತರಬಾರದು. ಆದರೆ ಹೆತ್ತವರು ತಮ್ಮ ಸೀಟಿನ ಪಕ್ಕದಲ್ಲಿ ಇಡಬಹುದಾದ ಬೇಬಿ ಸೀಟನ್ನು ತರಬಹುದು.
ಸುಗಂಧ ದ್ರವ್ಯಗಳು: ಹೆಚ್ಚಿನ ಅಧಿವೇಶನಗಳು ಹವಾನಿಯಂತ್ರಿತ ಸಭಾಂಗಣಗಳಲ್ಲಿ ನಡೆಯುತ್ತವೆ. ಆದುದರಿಂದ, ಉಸಿರಾಟಕ್ಕೆ ಸಂಬಂಧಿಸಿದ ತೊಂದರೆಗಳಿರುವವರ ಆರೋಗ್ಯಕ್ಕೆ ಹಾನಿಯಾಗದಂತೆ ತೀಕ್ಷ್ಣ ಸುವಾಸನೆಯ ಸೆಂಟ್‌ಗಳನ್ನು ಮಿತವಾಗಿ ಬಳಸಿ. ಹೀಗೆ ಸಹೋದರರ ಕಡೆಗೆ ಪ್ರೀತಿ ತೋರಿಸಿ.—1 ಕೊರಿಂ. 10:24.
ಪ್ಲೀಸ್‌ ಫಾಲೋ-ಅಪ್‌ (S-43) ಫಾರ್ಮ್‌ಗಳು: ಅಧಿವೇಶನದ ಸಮಯದಲ್ಲಿ ಅನೌಪಚಾರಿಕ ಸಾಕ್ಷಿ ನೀಡಿದಾಗ ಸಿಕ್ಕಿದ ಆಸಕ್ತ ವ್ಯಕ್ತಿಗಳ ಕುರಿತು ಮಾಹಿತಿ ಒದಗಿಸಲು ಪ್ಲೀಸ್‌ ಫಾಲೋ ಅಪ್‌ ಫಾರ್ಮನ್ನು ಬಳಸಬೇಕು. ಅವನ್ನು ತುಂಬಿಸಿದ ಮೇಲೆ ಅಧಿವೇಶನದ ಬುಕ್‌ರೂಮ್‌ಗೆ ಅಥವಾ ನಿಮ್ಮ ಸಭೆಯ ಸೆಕ್ರೆಟರಿಗೆ ಕೊಡಬೇಕು.
ರೆಸ್ಟೋರೆಂಟ್‌: ರೆಸ್ಟೋರೆಂಟ್‌ಗಳಲ್ಲಿ ಉತ್ತಮ ನಡತೆ ಮೂಲಕ ಯೆಹೋವನ ಹೆಸರನ್ನು ಮಹಿಮೆಪಡಿಸಿ. ಸಾಕ್ಷಿಗಳಿಗೆ ತಕ್ಕಂಥ ಬಟ್ಟೆ ಧರಿಸಿ. ಅಲ್ಲಿನ ಕೆಲಸಗಾರರಿಗೆ ಟಿಪ್ಸ್‌ ಕೊಡಿ.
ಹೋಟೆಲ್‌ಗಳು:
ದಯವಿಟ್ಟು ಅಗತ್ಯಕ್ಕಿಂತ ಹೆಚ್ಚು ರೂಮ್‌ಗಳನ್ನು ಬುಕ್‌ ಮಾಡಬೇಡಿ. ಹೋಟೆಲ್‌ ಅನುಮತಿಸುವುದಕ್ಕಿಂತ ಹೆಚ್ಚು ಮಂದಿ ರೂಮ್‌ನಲ್ಲಿ ಉಳಿದುಕೊಳ್ಳಬಾರದು.
ತುರ್ತು ಪರಿಸ್ಥಿತಿ ಬಿಟ್ಟು ಬೇರಾವ ಕಾರಣಕ್ಕೂ ಬುಕ್ಕಿಂಗ್‌ ರದ್ದುಮಾಡಬಾರದು. ಒಂದುವೇಳೆ ರದ್ದುಗೊಳಿಸಬೇಕಾದಲ್ಲಿ ಕೂಡಲೆ ಹೋಟೆಲ್‌ನವರಿಗೆ ತಿಳಿಸಿರಿ. (ಮತ್ತಾ. 5:37) ರದ್ದುಗೊಳಿಸಿದ್ದಲ್ಲಿ ಕ್ಯಾನ್ಸಲೇಷನ್‌ ನಂಬರನ್ನು ಪಡೆದುಕೊಳ್ಳಲು ಮರೆಯದಿರಿ.
ದಯವಿಟ್ಟು ನೆನಪಿಡಿ: ಹೋಟೆಲಿಗೆ ದಾಖಲಾಗುವಾಗ ನೀವು ಡೆಬಿಟ್‌ ಅಥವಾ ಕ್ರೆಡಿಟ್‌ ಕಾರ್ಡ್‌ ಬಳಸುವಲ್ಲಿ, ರೂಮ್‌ ಬಾಡಿಗೆಯ ಜತೆಗೆ ಸಂಭಾವ್ಯ ಹಾನಿಗೆಂದು ಹೆಚ್ಚುವರಿ ಹಣವನ್ನು ಹೋಟೆಲಿನವರು ಹಿಡಿದಿಟ್ಟುಕೊಳ್ಳುವುದು ರೂಢಿ. ನೀವಲ್ಲಿಂದ ಹೊರಟು ಲೆಕ್ಕ ಚುಕ್ತಾ ಆಗುವ ತನಕ ಅಂದರೆ ಕೆಲವು ದಿನ ನೀವು ಆ ಹಣ ಬಳಸಲು ಸಾಧ್ಯವಿಲ್ಲ.
ಎಲ್ಲ ಸಾಮಾನನ್ನು ಸಿದ್ಧವಾಗಿಟ್ಟ ಬಳಿಕವೇ ಟ್ರಾಲಿ ತೆಗೆದುಕೊಳ್ಳಿ. ಉಪಯೋಗಿಸಿದ ನಂತರ ಕೂಡಲೆ ಹಿಂದಿರುಗಿಸಿ.
ನಿಮ್ಮ ಸಾಮಾನನ್ನು ಹೊರುವ, ಕೋಣೆ ಶುಚಿ ಮಾಡುವ ಕೆಲಸಗಾರರಿಗೆ ಟಿಪ್ಸ್‌ ಕೊಡಿ.
ಅಪ್ಪಣೆ ಇಲ್ಲದೆ ರೂಮಿನಲ್ಲಿ ಅಡುಗೆ ಮಾಡಬಾರದು.
ಅತಿಥಿಗಳಿಗೆ ಹೋಟೆಲ್‌ನಲ್ಲಿರುವಾಗ ಉಚಿತವಾಗಿ ಸಿಗುವ ಉಪಹಾರ, ಕಾಫಿ ಅಥವಾ ಐಸ್‌ಕ್ಯೂಬ್‌ಗಳನ್ನು ಅಗತ್ಯಕ್ಕಿಂತ ಹೆಚ್ಚು ತೆಗೆದುಕೊಳ್ಳಬೇಡಿ.
ಹೋಟೆಲ್‌ ಸಿಬ್ಬಂದಿಯೊಂದಿಗೆ ವ್ಯವಹರಿಸುವಾಗೆಲ್ಲಾ ದೇವರಾತ್ಮದ ಫಲವನ್ನು ತೋರಿಸಿ. ಅವರು ಅನೇಕ ಅತಿಥಿಗಳನ್ನು ನೋಡಿಕೊಳ್ಳಬೇಕಾಗಿರುತ್ತದೆ. ಆದ್ದರಿಂದ ಅವರೊಂದಿಗೆ ದಯೆ, ತಾಳ್ಮೆ, ವಿವೇಚನೆಯಿಂದ ನಡೆದುಕೊಂಡರೆ ಅವರದನ್ನು ಮಾನ್ಯ ಮಾಡುವರು.
ಹೋಟೆಲಿನಲ್ಲಿ ಎಲ್ಲ ಸಮಯ ಹೆತ್ತವರು ಮಕ್ಕಳ ನಿಗಾ ವಹಿಸಬೇಕು. ಈಜುಕೊಳ, ಲಿಫ್ಟ್‌, ಲಾಬಿ ಸೇರಿದಂತೆ ಮತ್ತಿತರ ಕಡೆಗಳಲ್ಲೂ ನಿಗಾ ವಹಿಸಬೇಕು.
ಶಿಫಾರಸು ಮಾಡಲಾದ ಲಾಡ್ಜಿ೦ಗ್‌ ಲಿಸ್ಟ್‌ನಲ್ಲಿರುವ ರೂಮ್‌ ದರಗಳು ದಿನವೊಂದಕ್ಕೆ ತೆರಬೇಕಾದ ಪೂರ್ಣ ಬೆಲೆಯಾಗಿವೆ. ಇದರಲ್ಲಿ ತೆರಿಗೆ ಸೇರಿಲ್ಲ. ಅದನ್ನೂ ನೀವು ಕೊಡಬೇಕಾಗುತ್ತದೆ. ಆದರೆ ನೀವು ವಿನಂತಿಸದ ಅಥವಾ ಬಳಸದ ಯಾವುದಕ್ಕಾದರೂ ಹೆಚ್ಚು ಹಣವನ್ನು ನಿಮ್ಮ ಬಿಲ್‌ಗೆ ಹಾಕಿದ್ದಲ್ಲಿ ಅದನ್ನು ಕೊಡಬೇಡಿ ಮತ್ತು ಈ ವಿಷಯವನ್ನು ಅಧಿವೇಶನದ ರೂಮಿಂಗ್‌ ಡಿಪಾರ್ಟ್‌ಮೆಂಟ್‌ಗೆ ಆದಷ್ಟು ಬೇಗ ತಿಳಿಸಿ.
ಹೋಟೆಲ್‌ ರೂಮ್‌ ಸಂಬಂಧದಲ್ಲಿ ಸಮಸ್ಯೆ ಏಳುವಲ್ಲಿ ಅಧಿವೇಶನದಲ್ಲೇ ರೂಮಿಂಗ್‌ ಇಲಾಖೆಗೆ ತಿಳಿಸಿದರೆ ಅವರು ನಿಮಗೆ ಸಹಾಯ ಮಾಡುತ್ತಾರೆ.
ಸ್ವಯಂ ಸೇವೆ: ಸ್ವಯಂ ಸೇವಕರಾಗಲು ಬಯಸುವವರು ಸ್ವಯಂ ಸೇವಾ ಇಲಾಖೆಯನ್ನು ಸಂಪರ್ಕಿಸಬೇಕು. 16 ವರ್ಷಕ್ಕಿಂತ ಚಿಕ್ಕವರು ತಮ್ಮ ಹೆತ್ತವರ, ಪೋಷಕರ ಇಲ್ಲವೆ ಅವರ ಒಪ್ಪಿಗೆಯಿರುವ ಒಬ್ಬ ಪ್ರೌಢ ವ್ಯಕ್ತಿಯ ನಿರ್ದೇಶನದಡಿ ಸ್ವಯಂ ಸೇವಕರಾಗಿ ಕೆಲಸಮಾಡಬಹುದು.