Yɛɛ Mala yɛ Naa le Kiisaŋndaŋ Chɔulabaa?

1-2. (a) Kiisaŋnda kuɛɛ paaliaŋ yɛ buɛiyaa Chɛhowaa lepum? (b) Yɛɛ naŋ cho yɛ pɛɛku o buŋgɛi hei niŋ?

O YƆŊ bɛɛ aa bɛnduaa yuuwa ɔɔ feleŋguaa naŋ cho ni, mi naa kpou nɔ kiisaŋndaŋ teleŋndaŋ lapum.a Le tamaseliiyo, yiyaŋndɔ a feleŋgɔnɔ cho kindiŋndo le Chɛhowa piɛiyo, kɛ mbo nɔ kiisaŋndo maa te Chɛhowa buulaŋ pɛ a ndu okɔɔ kpeekpeiyo. Le hei, mbo wa yiyaŋndo te o tiu niŋ pɛ ba mbo sɔla yiŋɔɔ. Yiyaŋndɔ vɛlɛ a puaapilɛnɔ kaasoŋnɔɔ, o tosa kɛɛsiaa le Chɛhowa kɛsioo wana tasoo o yoomu ndɔɔ niŋ a teleŋ o wa feleŋgɔnɔ wo, kɛ o tul sulta chieeŋndo kɔɔli le wo. Kɛ le mɛɛ o nɔ lɛ nyɛsɔlaa tau le yuŋgu ndɔɔ nyɛm nda hauba woŋ kioo le yɛ, naapum mbo kandu dɔɔ yiyaŋndo maa, o tosa kɛɛsiaa kɛndɛ a teleŋ o wa feleŋgɔnɔ wo le. Ɔɔ yiyaŋndɔ vɛlɛ a ndepilɛnɔ yuu nɔ lɛ mayoomu tau le tosaa maa paandu le wo. Naapum mi keŋ tosa mbo tambu kɔl tau. Baa a nyunaŋ niŋ pa nyunalaŋ ndaŋ: ‘Baa Chɛhowa buulaŋ pa a ya kpeekpei? Baa mi Chɛhowa che pa salala ya cho soliŋndo le ndu piɛiyo laŋ la sɔvɛ? Baa mi Chɛhowa soliŋ ndɔ ya pa kpeku?’

² Te o yɔŋ pɛ miŋ sɔla mulilaŋ le nyunala waa nuaa le, mi keŋ tosa mi laalaŋ naa o Chɛhowa niŋ yɔŋyɔla, nduyɛ pɛŋ miŋ pɛŋgi ndu piɛiyo. O buŋgɛi hei niŋ, ŋ cho pɛɛku mɛɛ yiyaŋndo o sawala Baabuiyo choo mala naa, te yɔŋ pɛ miŋ kiisaŋ maa, (1) te Chɛhowa buulaŋndɔ pɛ a naa, (2) te kɛɛsiaala naŋ tosa le ndu piɛiyo o paandoo niŋndaŋ la wa pa la sɔvɛ, (3) ɔɔ te ŋ cho wɔ pɛ wana sɔvɛ ndu o hɔl.

YƐƐ MALA YƐ NAA LE KIISAŊNDAŊ SOLIŊNDO O KƆL?

3. Ɔɔ nɛiyo opilɛ o naŋ soliŋ kiisaŋndaŋ o kɔl lo?

³ Nɛiyo opilɛ o mala naa le kiisaŋndaŋ soliŋndo o kɔl lo, cho Diom Mɛlɛkaa pɛɛkoo le nyunala naalaŋ mulioo ni. Te ŋ tosa keŋ pɛ, ŋ cho yoomuaŋ sɔla, miŋ kendu o Mɛlɛka piɛiyo niŋ, nduyɛ miŋ wa a bɛɛndiaŋ le “simndaŋ yi o laalaŋ naa choo.”—1 Kɔliŋ. 16:13.

4. Vɛɛ naŋ ‘mɛɛndiaŋ yɛ nyɛ o nyɛ le sinaa te o bɛnda pɛ’? (1 Tɛsaloniaŋ 5:21)

⁴ Nuawɔ 1 Tɛsaloniaŋ 5:21. Kɛsiŋ o kɔl maa Baabuiyo dɛɛniaa naa maa, naŋ ‘mɛɛndiaŋ nyɛ o nyɛ le miŋ che te o bɛnda pɛ.’ Vɛɛ naŋ tosa yɛ hei? Te o yɔŋ pɛ miŋ yeema sinaa te nyɛ naŋ laalaŋndo cho pɛ tonya, o bɛnda miŋ yaasiaa Baabuiyo miŋ sina nyɛ o dimi a ndu okɔɔ wo. Le tamaseliiyo, yiyaŋndɔ a feleŋgɔnɔ nɔ kiisaŋndo maa te Mɛlɛka che wɔ ndu pɛ wana sɔvɛ. Baa o nɔ pa mbo keleŋa chɛlɔɔ maa Chɛhowa buulaŋ a ndu le? Sako. Kɛ, o nɔ mbo ‘mɛɛndiaŋ nyɛ o nyɛ le sinaa te o bɛnda pɛ,’ sanaa a yaasiaa tosaa le sinaa yiyaŋ Chɛhowaa.

5. Vɛɛ naŋ sina yɛ yiyaŋ Chɛhowaa a bahawɛi naa okɔɔ?

⁵ Te ŋ wa pɛ diomndaŋ veeloo o Baabuiyo niŋ, mi i wa naŋ chaa Chɛhowa cho “suɛi” o naalo ni. Kɛ le yiyaŋ Chɛhowaa sinaa a suɛi pum okɔɔ, mɛɛ miŋ dɔu sɛmbɔɔ le yaasiaa tosaa. Ŋ nɔ miŋ handu kɔllo le diomndaŋ veeloo o buŋgaŋ Baabui chiɛɛliaŋ a bahawɛi naa wo niŋ. Ŋ nɔla miŋ soliŋ yaula naalaŋ kpeku le yaasiaa tosaa a bahawɛi koŋ okɔɔ. (Polo. 2:​3-6) Ŋ nɔ miŋ nyuna Chɛhowa o piɛileŋ niŋ le mbo mala naa, miŋ sina yiyaŋ ndɔɔ a suɛi keŋ okɔɔ. Okoŋ miŋ tofa sawala mandaala Baabuiyo, a silala sɔvɛ mala naa a bahawɛi koŋ okɔɔ laŋ. Ŋ tiu vɛlɛ ba miŋ sɔla tɔnɔɔ tau, te ŋ yaasiaa pɛ a wanaa Baabuiyo soo a nda okɔɔ wa, a ndaa nɔ bahawɛila pilɛ laŋ maa naa wa.

6. Vɛɛ bɔŋaŋnda naalaŋ la mala yɛ naa le kiisaŋndaŋ soliŋndo o kɔl?

⁶ Mi Chɛhowa soliŋ vɛlɛ bɔŋaŋnda naalaŋ kpeku le suɛi o naalo. Te ŋ wa pɛ kɔlaŋ lɔɔlɔɔ o bɔŋaŋndaŋ, mi mulila naŋ tuei laŋ, vɛlɛ a sɔɔŋ nda yɔŋgu woŋ, wa nyɛ kpeekpei naŋ yeema le naa malaa miŋ chɔulaba bahawɛila naalaŋ ndo ni. (Polo. 27:17) Ŋ yaasiaŋndɔ niko nyɛ kpeekpei mala naa le kiisaŋndaŋ lapum soliŋndo o kɔl lo.

TE A KIISAŊ PƐ MAA CHƐHOWA BUULAŊ A NUM TE

7. Nyuna yɛɛ waŋnda nyuna yɛ lepum?

⁷ A nyunaŋ niŋ pa aa: ‘Baa Chɛhowa buulaŋ pa kpeekpei a ya?’ Te o yɔŋ pɛ ma yiyaŋ maa a cho wana sɔvɛ le, mi keŋ tosa ma che ndi ikala le Chɛhowa, Wana toosiaa nyɛ o nyɛ fee wo siiŋguuwo chaŋ num. Naapum nyɛ pilɔɔ hoo kpe yɔŋnuŋ a masaa Deeve ni. Mbo yiyaŋ maa, i cho bɔɔ suɛi kɔndɔfili le sinaa maa, mi Chɛhowa che naa waŋnda chieeya a sɔvɛ. Lelaŋ, mbo nyunaŋ aa: “Oo Chɛhowa, yɛɛ kpeekpei wanachioo cho yɛ le ma kɛsi ndu hɔlteŋ choo? Yɛɛ kpeekpei chuauwaa ŋwaŋnda chiee cho yɛ le ma buulaŋ le nda?” (Sam 144:3) Kuɛɛ kpeekpei ŋ tofa yɛ le muli nyunaa hoo sɔlaa?

8. A mɛɛ Saamiɛɛ Tasoo 16:​6, 7, 10-12 dimi yɛ, yɛɛ Chɛhowa cha yɛ waŋndo niŋ?

⁸ O Baabuiyo niŋ miŋ pɛɛku maa, mi Chɛhowa che wanaa waŋnda che maa a cho a sɔvɛ le wa, wanaa sɔvɛ. Le tamaseliiyo, mi Chɛhowa viam Saamiɛɛ o yuŋgu Chɛɛse wo lo, le mbo kɔ pɔya puaa nduaa opilɛ le mbo huŋ simnuŋ masaa le Isɔluɛi. O puaa ŋɔmaa waa Chɛɛse ndoo nɔ wa tɛɛŋ, mbo chuuŋgiaa puaa a ŋɔmmɛu diompilɛ le mi Saamiɛɛ ndoo che nda. Kɛ, Deeve pɔmbɔ nda lumndo ve loŋ te.b A koŋ kpou, Deeve Chɛhowa ndoo hɛli ni. (Nuawɔ Saamiɛɛ Tasoo 16:​6, 7, 10-12.) Mi Chɛhowa cha wana suu Deeve wa o kɔllo niŋndo. Nduyɛ mbo sina maa poombɔ feleŋgɔnɔ hoo kaala ndu tau.

9. Le yɛɛ ŋ nɔ yɛ ma nɔ tiindaŋndo maa, Chɛhowa buulaŋ a num okɔɔ? (Tofa vɛlɛ fotueiyo.)

⁹ Yiyaŋndɔ a nyɛ Chɛhowa tosal num niŋ o paandoo niŋndo, le chɔmndo maa a cho wana sɔvɛ wo. Mbo ke num sila kpeekpei mala num le bahawɛi numndo solioo wo. (Sam 32:8) Hei chɔm ni maa, o sina a num okɔɔ nyɛkɛndɛi. (Sam 139:1) Te a dɔu pɛ sila Chɛhowaa o wali niŋ nduyɛ ma che mɛɛ o mala num yɛ, a cho tiindaŋndo nɔ maa o buulaŋ kpeekpei a num okɔɔ. (1 Kolo. 28:9; Walta. 17:​26, 27) Mi Chɛhowa che sɛmbɛ ŋ nɔ le ndu piɛiyo wo. Mbo che kaala numnda kɛndɛlaŋ, nduyɛ o nɔ yeemɛi le mbo wa chaŋ num. (Chɛlui. 17:10) Lelaŋ, o yeema num ma chɛl le ma simnuŋ chaŋ ndɔ.—1 Chɔŋ 4:19.

TE A KIISAŊ PƐ MAA KƐƐSIAALA Ŋ TOSA O PAANDOO NIŊNDAŊ LAA BƐNDA LE

10. Te o yɔŋ pɛ miŋ yiyaŋ a kɛɛsiaala naŋ tosa o paandoo niŋnda okɔɔ, nyunala kuɛɛ huŋ yɛ naa lepum o kɔl?

¹⁰ Teleŋndaŋ lapum, mi waŋnda apum yiyaŋ a kɛɛsiaala ndaa tosa laŋ okɔɔ, nduyɛ ma kiisaŋ te kɛɛsiaala laŋ laa bɛnda pɛ. Naapum ma kɛɛsiaa le waltaŋ lapum malɔɔ, ɔɔ yulaleŋ lepum, le halikpeŋ ma tosa tau o Mɛlɛka piɛiyo niŋ. Wɔsiŋ bɔɔbɔɔ hiou niŋ, chɔŋ a teleŋ ndaa tosa kɛɛsiaa koŋ ndo. Nduyɛ lepum, ma yiyaŋ maa chaaŋaa ndaa kɛɛsiaa le walta bɛŋndaŋ tosaa wa, nɔ bahawɛi nyɛsɔlaa lepɛŋ te, vɛlɛ a cho yoomoo tueiyɔɔ yeela. Mi keŋ tosa ma nyunaŋ aa: ‘Baa salala ya soliŋ niŋ le Chɛhowa laŋ la cho pa la sɔvɛ? Ɔɔ baa ya nɔ pa mi yaa tosa wali cheleŋ, le mi yaa sɔla nyɛsɔlaa tau o yoomoo niŋ?’

11. Yɛɛ ndoo tɛɛmbuu yɛ wana poonyiaa Sam 73 kɔllo tau?

¹¹ Te o yɔŋ pɛ maa num bɛɛ nyunaŋ niŋ nyunala waa nuaa, tofawɔ nyɛ wana ŋchondoo poonyiaa o Sam 73 niŋ. Mbo cha wanaa bɔɔbɔɔ yoomoo tueiyɔɔ yeela, ndaa nɔ nyɛm kiɔɔŋ tau, nduyɛ buulaŋ o buulaŋ ve nda le. (Sam 73:​3-5, 12) Mɛɛ o mɛɛndiaŋ nda mbo cha batiuwaa nda cho sɔlaa wo, mi hei tosa mbo yiyaŋ maa sɛmbɛ o cho dɔwɔɔ le Chɛhowa piɛiyo wo, nɔ tɔnɔ o tɔnɔ le. ‘Paaleŋ kpeŋ o wa buulaŋndo’ kanifuule, o wa a kɔl tambɛiyo. (Sam 73:​13, 14) Vɛɛ o looku nyɛ buulaŋ ndɔɔ hoo chɔulaba?

12. A mɛɛ Sam 73:​16-18 dimi yɛ, yɛɛ wana ŋchondoo tosa yɛ le buulaŋ wa ndu o kɔllo solioo?

¹² Nuawɔ Sam 73:​16-18. Mi wana ŋchondoo hoo kua o chiɛi diandaa Chɛhowaa niŋ. Loŋ ndoo tiuba mi ndoo yiyaŋ nyɛkɛndɛi. Mbo bii bila maa, mi che bɛɛ wanaa bɔɔbɔɔ wa yoomoo tueiyɔɔ yeela, kɛ ndaa nɔ tiindaŋ le chilaŋ te. Mɛɛ o bii hei bila, mi keŋ ke ndu kɔl nyuloo. Nduyɛ mbo sina maa, Mɛlɛka piɛiyo kɛsioo nyɛ tase o yoomu naa niŋ, cho kɛɛsiaa sɔvɛ sɔvɛ naŋ tosa wo ni. Fulamakɔɔlioo wa ni, mbo kɛɛsiaŋ o kɔl le hiouwɔɔ lachi a Chɛhowa piɛiyo o yoomu ndɔɔ niŋ.—Sam 73:​23-28.

13. Vɛɛ ŋ saaluŋ yɛ kɔl nyuloo, te o yɔŋ pɛ ma nɔ kiisaŋndo a kɛɛsiaala ŋ tosa o paandoo niŋndaŋ okɔɔ? (Tofa vɛlɛ fotueiyo.)

¹³ Mi Diom Mɛlɛkaa mala naa le miŋ sɔla kɔl nyulu waa nuaa. Vɛɛ keŋ yɔŋnuŋ yɛ? Yiyaŋndɔ a nyɛm sɔvɛŋ ŋ nɔ woŋ okɔɔ, mɛɛ salala Chɛhowa cho num dɔwɔɔ laŋ la cho nuaa yɛ. Okoŋ ma tuu laŋ, a tɔnɔla wanaa cho Chɛhowa piɛi le wa sɔla o chieeŋndo hoo niŋndaŋ. Tiindaŋ ndaa kpou cho le batiuwaa sɔlaa o chieeŋndo hoo niŋ ni. Kanifuule a nɔ tiindaŋ kɛ kɛ le chilaŋ te. Kɛ num, o faŋaŋ o salala Chɛhowa cho num dɔwɔɔ suŋ suŋ ndaŋ kɔɔli, o mɛi lediom le num hunɔɔ salala cheleŋ dɔwɔɔ tau o chilaŋ niŋ. (Sam 145:16) Yiyaŋndɔ vɛlɛ a hei okɔɔ: Baa num oo tiu pa ba maa sina mɛɛ yoomu numndo ndoo wa niŋ yɛ, te num oo tosa pɛ kɛɛsiaa cheleŋ? Suɛi sɔvɛi ipilɛ cho ni maa, te o yɔŋ pɛ ma tosa kɛɛsiaa le mɛɛ ŋ nɔ kaalaa le Chɛhowa vɛlɛ a wanaa cheleŋ yɛ, mi keŋ tosa ma nɔ nyɛm mala num ma wa a kɔl kɛndɛ teleŋ o teleŋ o yoomoo niŋndoŋ.

TE A KIISAŊ PƐ MAA A CHO WANA SƆVƐ CHƐHOWA O HƆL TE

14. Yɛɛ tosa yɛ lepum mi wanaa bɔɔbɔɔ yiyaŋ maa a cho wanaa sɔvɛ Chɛhowa o hɔl te, nduyɛ nyuna kuɛɛ nda nyunaŋ yɛ?

¹⁴ Wanaa Chɛhowaa a bɔɔbɔɔ tiuba ma tosa tau maa paandu le, le mɛɛ yuuwɛi, kɛndiaa lepɛŋndo, vɛlɛ a namtaleŋ le cho nda paaliaŋndo yɛ. Mi keŋ tosa ma yiyaŋ maa, a cho wanaa sɔvɛ Chɛhowa o hɔl te. Naapum ma nyunaŋ aa: ‘Baa I cho wɔ pa wana sɔvɛ Chɛhowa o hɔl?’

15. Tiindaŋ yɛɛ wana poonyiaa Sam 71 wo ndoo nɔ yɛ?

¹⁵ Wana poonyiaa Sam 71 wo bɛɛ, ndoo nɔ buulaŋ waa nuaa. Lelaŋ mbo piɛi aa: “Kɛɛ ya te yoomuaŋ ma chuu ya pɛ le.” (Sam 71:​9, 18) A koŋ kpou, mi wana ŋchondoo hoo nɔ laalaŋ kala kalaa maa, te o hiou pɛ lachi a Chɛhowa piɛiyo o laalaŋndo choo, o cho wa a ndu latulu, vɛlɛ mbo manda ndu. A mɛɛ wana ŋchondoo pɛɛku yɛ, mi Chɛhowa che sɛmbɛ wanaa cho kindiŋndo le Ndu piɛiyo o laalaŋndo choo wa, mi che bɛɛ a nɔla lɛ tosaa tau maa paandu le.—Sam 37:​23-25.

16. O nɛila kuɛɛ choo bɛnduaa yuuwa cho yɛ a sɔvɛ Chɛhowa o hɔl? (Sam 92:​12-15)

¹⁶ Te bɛndu yuuwo ŋ cho ni, kindiŋ ma che bahawɛi numndo mɛɛ Chɛhowa che ndu yɛ. O nɔla mbo mala num ma hiou lachi a ndu piɛiyo o laalaŋndo choo, mi che bɛɛ a tiu lɛ ba ma tosa sɔɔŋ tau maa paandu le. (Nuawɔ Sam 92:​12-15.) Tuupa ma handu kɔllo o nyɛ ŋ tiuba le tosa le wo choo, kindiŋ ma handu kɔllo o nyɛ ŋ tiuba le tosaa wo choo. Le tamaseliiyo, a tiuba ma luei acheleŋnda yoomuaŋ sanaa a tamasi num kɛndɔɔ, vɛlɛ a yeemɛi ŋ chɔm o nda niŋnde. A suaa vɛlɛ a mɛɛ Chɛhowa mala num niŋ o wɔsila hiou laŋ niŋ yɛ, nduyɛ ma chɔm tiindaŋ kala kala ŋ nɔ o mɛila Chɛhowalaŋ niŋndo. Fɛɛŋ bɛɛ puɛɛnuŋ maa, piɛile ŋ piɛi a kɔl numndo kpou leŋ, le tiuba mi le mala puaapiliaa numnda. (1 Pitɛ 3:12) Mɛɛ mɛɛ bahawɛila naalaŋ la wa, naa kpou nɔ nyɛ naŋ tiuba miŋ ke Chɛhowa, vɛlɛ a chaaŋaa naa wo.

17. Le yɛɛ naŋ nɔ yɛ miŋ fafaŋ tuuŋgaŋndo a acheleŋnda?

¹⁷ Te o yɔŋ pɛ ma tambu kɔl le mɛɛ ŋ tiuba ma tosa tau o wali Chɛhowaa niŋ te yɛ, nɔ tiindaŋndo maa mi Chɛhowa che nyɛ ŋ tiuba le tosaa wo o sɔvɛ. Naapum miŋ kindiŋ le tuuwo nyɛ naŋ tiuba le tosaa wo, a nyɛ acheleŋnda tiuba le tosaa wo. Kɛ, a nɔ ma tosa keŋ kposoŋ te. Le yɛɛ? Kanifuule Chɛhowa tuu naa a acheleŋnda le. (Kalee. 6:4) Le tamaseliiyo, mi Meele ke Chiisu chuɛima chuŋ kɛndiaŋ mapum, nduyɛ baa pila maa nɔ ni. (Chɔŋ 12:​3-5) O baa pilɔɔ choo, mi wɛɛŋ vii pɔnɔɔ wo yɔŋgu tooloo kaniŋ kpalɛiyoŋ ŋmuuŋ o chiɛi Mɛlɛkaa niŋ. (Luku 21:​1-4) A koŋ kpou, mi Chiisu cha kela tiɔɔŋndaŋ ndaŋ la sɔvɛ. Hei chɔm kpendekele maa tamasi Chɛhowa wo Chiisu tol kɔɔli ni. Kanifuule, mi Chɛhowa che nyɛ naŋ tosa wo o sɔvɛ, te o tɔlnuŋ pɛ o kaala naŋ nɔ le ndu wo choo, o yɔŋ bɛɛ miŋ yiyaŋ maa o cho o sɔvɛ le.

18. Yɛɛ cho yɛ naa mala le miŋ chɔulaba kiisaŋnda naalaŋ? (Tofa vɛlɛ kɔfoo hoo, “Mi Diom Mɛlɛkaa Mala Num le Ma Soliŋ Kiisaŋndaŋ o Kɔl.”)

¹⁸ Mi naa kpou nɔ kiisaŋndaŋ teleŋndaŋ lapum. A mɛɛ naŋ pɛɛku yɛ, mi Baabuiyo mala naa le kiisaŋndaŋ soliŋndo o kɔl. Lelaŋ, kindiŋ ma soliŋ kiisaŋndaŋ o kɔl. Keŋ cho num mala ma kindi tiindaŋ numndo. Chɛhowa che num wana sɔvɛ ndu o hɔl. O che salala bɔɔbɔɔ ŋ cho soliŋndo laŋ la sɔvɛ, nduyɛ o cho num fanda o chilaŋ niŋ. Nɔ tiindaŋndo maa mi Chɛhowa che buɛiyaa nduaa cho ndu piɛiyo o laalaŋndo choo wa a sɔvɛ, o kaala nda, vɛlɛ o buulaŋ le nda.