“လဲလိာ် သုတၢ်ဆိကမိၣ်တဖၣ်​ ဒ်သိး သုကဆီတလဲထီၣ်​ သုသးအဂီၢ်”

၁-၂. ပဘျၢထံဝံၤလံနာ်က့ ပကဘၣ်ဆဲးမၤဒံး မနုၤလဲၣ်.

ညီနုၢ်န့ၣ်​ နမၤပျီနဟံၣ်​ ပှဲၤဘျီလဲၣ်. ဘၣ်သ့ၣ်သ့ၣ်​ ဖဲနလဲၤထီၣ်ဟံၣ်သီသီခါန့ၣ်​ နကမၤပျီအီၤ မူာ်မူာ်နီၢ်နီၢ်. ဘၣ်ဆၣ်​ လၢခံ နမ့ၢ်တမၤပျီအီၤလၢၤဘၣ်န့ၣ်​ တၢ်ကကဲထီၣ်သးဒ်လဲၣ်. နသ့ၣ်ညါတၢလီၤ. တၢ်ကမူၣ်​ ဟဲထီၣ်ဝဲ ဒီးနဟံၣ်​ ဘၣ်အၢကဒါက့ၤချ့မး. ဒ်သိးနဟံၣ်​ ကဖျါကဆှဲကဆှီအဂီၢ် နကဘၣ်​ မၤပျီအီၤ ဒီးမၤကဆှီအီၤထီဘိ.

^၂ ပတၢ်ဆိမိၣ်​ ဒီးပတၢ်ပာ်သးစ့ၢ်ကီး ပကဘၣ်​ ကျဲးစၢးမၤဂ့ၤထီၣ်အီၤထီဘိ. တချုးလၢ ပဘျၢထံ ဒံးဘၣ်န့ၣ်​ ပကျဲးစၢး ဆီတလဲပသး ဒီးပ “မၤကဆှီထီၣ်​ ပသးလၢ တၢ်ခဲလၢာ်လၢ အမၤဘၣ်အၢ ပဖံးပညၣ်​ ဒီးပသူၣ်ပသး.” (၂ ကရံၣ်သူး ၇:၁) ခဲအံၤနာ်က့ ပကဘၣ်မၤထွဲ တၢ်မၢဖိပီလူး အတၢ်ဟ့ၣ်ကူၣ်လၢ ပကဘၣ်​ “ဆီတလဲ [ပ]သးထီဘိ.” (အ့းဖ့းစူး ၄:၂၃) ဘၣ်မနုၤအဃိ ပကဘၣ်ကျဲးစၢး ဆီတလဲပသး ထီဘိလဲၣ်. ခီဖျိလၢ ဟီၣ်ခိၣ်အတၢ်ပာ်သူၣ်ပာ်သး ဒိၣ်စိလၢပဖီခိၣ်​ ချ့မးအဃိ ပကဲထီၣ်​ ပှၤတကဆှီလၢယဟိဝၤယွၤ အမဲာ်ညါသ့. ပတဘၣ်သး ကဲထီၣ်ကၠဲန့ၣ်ဘၣ်​ ဒီးပဘၣ်သးဆဲးမၤ ယဟိဝၤယွၤ အတၢ်ဘၣ်သးအဃိ ပကဘၣ်သမံသမိးလီၤက့ၤ ပတၢ်ဆိကမိၣ်, ပတၢ်ပာ်သး ဒီးတၢ်လၢပလီကီတဖၣ်​ ထီဘိ.

ဆဲး “လဲလိာ် သုတၢ်ဆိကမိၣ်တဖၣ်”

၃. ပကဘၣ်​ “လဲလိာ် [ပ]တၢ်ဆိကမိၣ်” န့ၣ်အဲၣ်ဒိးတဲဝဲ အခီပညီဒ်လဲၣ်. (ရိမ့ၤ ၁၂:၂)

^၃ ပကဆီတလဲ ပတၢ်ဆိကမိၣ်အဂီၢ် ပကဘၣ်မၤဒ်လဲၣ်. (ဖး ရိမ့ၤ ၁၂:၂.) ကြံးအတၢ်ကတိၤ လၢအမ့ၢ် “လဲလိာ် သုတၢ်ဆိကမိၣ်တဖၣ်” န့ၣ်အဲၣ်ဒိးတဲစ့ၢ်ကီးလၢ “ပကဘၣ်​ ဘှီဘၣ်ထီၣ်က့ၤ ပတၢ်ဆိကမိၣ်.” ဘၣ်ဆၣ်​ ပဘှီဘၣ်ထီၣ်က့ၤ ပတၢ်ဆိကမိၣ်န့ၣ်​ တအဲၣ်ဒိးတဲဝဲ ပမၤတၢ်လၢအဂ့ၤ ထဲတဘျီဘၣ်. ဒ်သိးဒီး ပမၤထွဲ ယဟိဝၤယွၤ အတၢ်ဘျၢကန့ၢ်အဂီၢ် ပကဘၣ်​ သမံသမိးလီၤက့ၤပသးနီၢ်ကီၢ် ဒီးပကဘၣ်​ ဆဲးဆီတလဲပသး ဒီးပတၢ်ဆိကမိၣ်ထီဘိ.

၄. ဒ်သိးဟီၣ်ခိၣ်အတၢ်ပာ်သး ဒီးအတၢ်ထံၣ်​ တဒိၣ်စိလၢ ပဖီခိၣ်တဂ့ၤအဂီၢ် ပကဘၣ်မၤဒ်လဲၣ်.

^၄ ဖဲပကဲထီၣ်​ ပှၤလၢပှၤပှဲၤအခါ တၢ်လၢပမၤကိးမံၤဒဲးန့ၣ်​ ကဘၣ်​ ယဟိဝၤယွၤ အသး. ဘၣ်ဆၣ်ခဲအံၤ ပကမၤ ယဟိဝၤယွၤ အတၢ်ဘၣ်သးအဂီၢ် ပကဘၣ်ကျဲးစၢးသပှၢ်. ဖဲရိမ့ၤ ၁၂:၂ န့ၣ်စီၤပီလူး တဲဝဲလၢ ဒ်သိးပကသ့ၣ်ညါ ကစၢ်ယွၤအတၢ်ဘၣ်သး အဂီၢ် ပကဘၣ်ဆီတလဲ ပတၢ်ဆိကမိၣ်. အဆိကတၢၢ် ပကဘၣ်သမံသမိးလီၤက့ၤပသး လီၤဆီဒၣ်တၢ် ဖဲပပာ်လီၤဖီတၢၣ်​ ဒီးပကဆၢတဲာ်တၢ်အခါန့ၣ်​ ပကဘၣ်အိၣ်ဒီး ယဟိဝၤယွၤ အတၢ်ထံၣ်. အဃိ ပတဘၣ်ပျဲလၢ ဟီၣ်ခိၣ်အတၢ်ပာ်သး ဒီးအတၢ်ထံၣ်​ ကဒိၣ်စိလၢ ပဖီခိၣ်ဘၣ်.

၅. ယဟိဝၤယွၤ အမုၢ်နံၤဘူးထီၣ်လံအဃိ ပကဘၣ်​ သံကွၢ်လီၤပသးဒ်လဲၣ်. (ကွၢ်တၢ်ဂီၤ.)

^၅ ဆိကမိၣ်ကွၢ်ဒ်အံၤ. လံာ်စီဆှံ တဲဘၣ်ပှၤလၢ ပကဘၣ်​ “အိၣ်ခိးဒီးကွၢ်လၢ် ယဟိဝၤယွၤ အမုၢ်နံၤ.” (၂ ပ့းတရူး ၃:၁၂) အဃိ ပကဘၣ်သံကွၢ်လီၤပသးလၢ ‘တၢ်လၢယမၤ လၢယတၢ်အိၣ်မူ တနံၤဘၣ်တနံၤန့ၣ်​ ပာ်ဖျါထီၣ်ဝဲလၢ မ့ၢ်ယနာ်လၢ တယံာ်လၢၤဘၣ်​ ဟီၣ်ခိၣ်လၢအအၢအံၤ ကဟးဂီၤကွံာ်ဧါ. တၢ်ကူၣ်ဘၣ်ကူၣ်သ့ လၢယဃုထၢ ဒီးတၢ်ဖံးတၢ်မၤ လၢယမၤန့ၣ်​ အပာ်ဖျါထီၣ်လၢ ယပာ်ဆိ ယဟိဝၤယွၤ အတၢ်မၤ လၢယတၢ်အိၣ်မူပူၤဧါ. မ့ၢ်ယနာ်လၢ ယဟိဝၤယွၤ ကကွၢ်ထွဲ ယဟံၣ်ဖိဃီဖိဧါ မ့တမ့ၢ် မ့ၢ်ယသးကိၢ်တၢ်လၢ နီၢ်ခိအတၢ်လိၣ်ဘၣ်အဂီၢ် ထီဘိဧါ.’ ဖဲယဟိဝၤယွၤ ထံၣ်ဝဲလၢ ပကျဲးစၢးမၤ အတၢ်ဘၣ်သး တမံၤဂ့ၤတမံၤဂ့ၤ အခါ အသးခုဒိၣ်မး.—မးသဲ ၆:၂၅-၂၇, ၃၃; ဖံလံးပံၤ ၄:၁၂, ၁၃.

၆. တၢ်လၢပကဘၣ်​ ဆဲးမၤန့ၣ်​ မ့ၢ်မနုၤလဲၣ်.

^၆ ပကဘၣ်​ သမံသမိးလီၤက့ၤ ပတၢ်ဆိကမိၣ်​ ဒီးဆီတလဲ ပတၢ်ဆိကမိၣ်​ ထီဘိ. စီၤပီလူး တဲဘၣ်​ ပှၤကရံၣ်သူးဖိလၢ “မ့ၢ်သုအိၣ်လၢ တၢ်စူၢ်တၢ်နာ်အပူၤဧါ သုတအိၣ်ဘၣ်ဧါန့ၣ်​ သမံသမိးလီၤက့ၤ သုသးတက့ၢ်. သုနီၢ်ကစၢ်ဒၣ်ဝဲ မ့ၢ်ပှၤဒ်လဲၣ်န့ၣ်​ မၤကွၢ်လီၤသုသးတက့ၢ်.” (၂ ကရံၣ်သူး ၁၃:၅) ပ “အိၣ်လၢ တၢ်စူၢ်တၢ်နာ်အပူၤ” န့ၣ်တမ့ၢ်ထဲ ပထီၣ်တၢ်အိၣ်ဖှိၣ်​ ဒီးဟးစံၣ်တဲၤတဲလီၤတၢ်ဘၣ်. ပကဘၣ်မၤ တၢ်လၢအဂၤအိၣ်ဒံး. ပအိၣ်လၢ တၢ်စူၢ်တၢ်နာ်အပူၤန့ၣ်​ အပၣ်ဃုာ်ဒီး ပတၢ်ဆိကမိၣ်, တၢ်လၢပလီကီ ဒီးပတၢ်ပာ်သး. ဒ်သိးဒီး ပဆီတလဲ ပတၢ်ဆိကမိၣ်​ ကသ့အဂီၢ် ပကဘၣ်ဖး လံာ်စီဆှံ, ပကဘၣ်ဆိကမိၣ်တၢ် ဒ်ယဟိဝၤယွၤ ဒီးဒ်သိးပကမၤ ယဟိဝၤယွၤ အတၢ်ဘၣ်သးအဂီၢ် တၢ်လၢပကဘၣ်​ ဆီတလဲအီၤ မ့ၢ်အိၣ်တမံၤမံၤန့ၣ်​ ပကဘၣ်​ ဆီတလဲက့ၤအီၤ.—၁ ကရံၣ်သူး ၂:၁၄-၁၆.

“ဒုးအိၣ်ထီၣ်​ လုၢ်လၢ်သကဲာ်ပဝးအသီ”

၇. အ့းဖ့းစူး ၄:၃၁, ၃၂ ဟ့ၣ်ကူၣ်ပှၤလၢ ပကမၤ တၢ်မနုၤလဲၣ်​ ဒီးပကမၤထွဲ တၢ်ဟ့ၣ်ကူၣ်အံၤအဂီၢ် ဘၣ်မနုၤအဃိ တညီဝဲ ထီဘိဘၣ်လဲၣ်.

^၇ ဖး အ့းဖ့းစူး ၄:၃၁, ၃၂. ပကဘၣ်ဆီတလဲ ပတၢ်ဆိကမိၣ်​ တကးဒံးဘၣ်​ ပကဘၣ်​ “ဒုးအိၣ်ထီၣ်​ လုၢ်လၢ်သကဲာ်ပဝးအသီ.” (အ့းဖ့းစူး ၄:၂၄) ပကမၤဒ်န့ၣ်အဂီၢ် ပကဘၣ်​ ကျဲးစၢးဆူၣ်ဆူၣ်. အဒိ ပကဘၣ်​ ကျဲးစၢးမၤလီၤမၢ်ကွံာ် တၢ်သးဟ့လၢအခၣ်, တၢ်သးထီၣ်​ ဒီးတၢ်သူၣ်ဒိၣ်သးဖျိး. နာ်က့ ပလုၢ်လၢ်သကဲာ်ပဝး လၢအတဂ့ၤဘၣ်တဖၣ်အံၤ အိၣ်ပာ်စၢၤဒီးပှၤ ဖၣ်ယံာ်လံအဃိ ပကမၤလီၤမၢ်ကွံာ်အီၤအဂီၢ် တညီဝဲ ထီဘိဘၣ်. လံာ်စီဆှံ တဲဝဲလၢ ပှၤတနီၤန့ၣ်​ “အသးထီၣ်တၢ်ချ့” ဒီးပှၤတနီၤန့ၣ်​ “အသးချ့.” (ကတိၤဒိ ၂၉:၂၂) အဃိ ပှၤတဂၤဂၤ လၢအအိၣ်ဒီး လုၢ်လၢ်သကဲာ်ပဝး လၢအတဂ့ၤဘၣ်တဖၣ်အံၤ အဘျၢထံမ့ၢ်ဝံၤနာ်က့ အကဘၣ်ကျဲးစၢး ဆီတလဲအသးထီဘိ. ခဲအံၤ ပကကွၢ်သကီး တၢ်လဲၤခီဖျိတခါ.

၈-၉. လၢဒီပုၢ်ဝဲၢ်ခွါစတံၤဖ့ၣ်​ အတၢ်လဲၤခီဖျိန့ၣ်​ ပမၤလိန့ၢ်ဘၣ်​ တၢ်မနုၤလဲၣ်.

^၈ အဒိ ဒီပုၢ်ဝဲၢ်ခွါစတံၤဖ့ၣ်န့ၣ်​ အကဲပှၤတဂၤလၢ အသးထီၣ်တၢ်ချ့မး. အတဲဝဲလၢ “ယဘျၢထံဝံၤလံနာ်က့ ဒ်သိး ယတသးထီၣ်တၢ်ချ့ချ့ တဂ့ၤအဂီၢ် ယဘၣ်ပၢၤယသးသပှၢ်. ဘၣ်တဘျီ ဖဲပဟးစံၣ်တဲၤတဲလီၤတၢ် လၢတဟံၣ်ဘၣ်တဟံၣ်အခါ ပှၤတဂၤ ဟုၣ်ဝဲ ယကါကလံၤဒၢ. အဃိ ယလဲၤလူၤအီၤ. ယလူၤအီၤဘူးကချုးဘျီ အတၢၤလီၤ ယကလံၤဒၢ ဝံၤဘျီ အကၠံၣ်ဖးယံၤ. ဖဲယတဲဘၣ်​ ဒီပုၢ်ဝဲၢ်အဂၤလၢ ယန့ၢ်ကဒါက့ၤ ယကါကလံၤဒၢကၠဲလဲၣ်အခါန့ၣ်​ တၢ်အိၣ်ဖှိၣ်သးပှၢ်တဂၤ လၢအဟးစံၣ်တဲၤတဲလီၤတၢ်ဒီးပှၤန့ၣ်​ တဲယၤလၢ ‘စတံၤဖ့ၣ်​ နလူၤပှၤတဂၤန့ၣ်​ မ့ၢ်ချုးန့ၣ်​ နကမၤအီၤကၠဲလဲၣ်.’ တၢ်လၢ ဒီပုၢ်ဝဲၢ်တဂၤအံၤ တဲယၤန့ၣ်​ မၤစၢၤယၤလၢ ယကဆိမိၣ်လီၤက့ၤယသး ဒီးယကပာ်သးမုာ်မုာ်.”b

^၉ ဒီပုၢ်ဝဲၢ်ခွါစတံၤဖ့ၣ်​ အတၢ်လဲၤခီဖျိန့ၣ်​ ပာ်ဖျါထီၣ်ဝဲလၢ ပလုၢ်လၢ်သကဲာ်ပဝး လၢအတဂ့ၤဘၣ်န့ၣ်​ ပဆိမိၣ်လၢ အလီၤမၢ်လံ နာ်က့ ပမ့ၢ်တပလီၢ်သးဘၣ်န့ၣ်​ အက့ၤအိၣ်ထီၣ်ကဒါ ညီညီဖိလီၤ. နလုၢ်လၢ်သကဲာ်ပဝး လၢအတဂ့ၤဘၣ်​ မ့ၢ်ဟဲက့ၤအိၣ်ထီၣ်ကဒါန့ၣ်​ သးဆံးတဂ့ၤ. ဒီးတဘၣ်ဆိမိၣ်လီၤနသးလၢ နဖၣ်နးတချုးညါကၠ့ၤတဂ့ၤ. တၢ်မၢဖိပီလူးနာ်က့ တဲဝဲလၢ “ဖဲယအဲၣ်ဒိးမၤ တၢ်လၢအဘၣ်အခါ တၢ်အၢအိၣ်ဒီးယၤ.” (ရိမ့ၤ ၇:၂၁-၂၃) ဒ်တၢ်ကမှံၤ ဒီးတၢ်ကမူၣ်​ ဟဲနုာ်လီၤလၢ ပဟံၣ်ပူၤ သ့ညီမးအသိး ခီဖျိလၢ ပတလၢတပှဲၤဘၣ်အဃိ ပလုၢ်လၢ်သကဲာ်ပဝး လၢအတဂ့ၤဘၣ်တဖၣ်​ အိၣ်ထီၣ်ကဒါက့ၤညီမး. အဃိ ပကဘၣ်​ ကျဲးစၢး ဆီတလဲ ပတၢ်ဆိကမိၣ်​ ဒီးပတၢ်ပာ်သး ထီဘိ. ပမၤကသ့ ဒ်လဲၣ်.

၁၀. ပမၤလီၤမၢ်ကွံာ် လုၢ်လၢ်သကဲာ်ပဝး လၢအတဂ့ၤဘၣ်တဖၣ်​ ကသ့ဒ်လဲၣ်. (၁ ယိၤဟၣ်​ ၅:၁၄, ၁၅)

^၁၀ ဃ့ယဟိဝၤယွၤ လၢကမၤစၢၤနၤ ဒ်သိးဒီး နကမၤလီၤမၢ်ကွံာ် နလုၢ်လၢ်သကဲာ်ပဝး လၢအတဂ့ၤဘၣ်တဖၣ်​ ဒီးနာ်သပှၢ်တၢၢ်လၢ အကမၤစၢၤနၤ. (ဖး ၁ ယိၤဟၣ်​ ၅:၁၄, ၁၅.) နလုၢ်လၢ်သကဲာ်ပဝး လၢအတဂ့ၤဘၣ်တဖၣ်န့ၣ်​ ယဟိဝၤယွၤ တမၤလီၤမၢ်န့ၢ်နၤဘၣ်, ဘၣ်ဆၣ်​ ဒ်သိးဒီး နကမၤလီၤမၢ်ကွံာ်အီၤအဂီၢ် ယဟိဝၤယွၤ မၤစၢၤနၤသ့. (၁ ပ့းတရူး ၅:၁၀) အဃိ ဒ်သိးဒီး ပလုၢ်လၢ်သကဲာ်ပဝး လၢအတဂ့ၤဘၣ်တဖၣ်​ တဟဲက့ၤအိၣ်ထီၣ်ကဒါက့ၤ တဂ့ၤအဂီၢ် ပကဘၣ်မၤထွဲ ဒ်ပဃ့ထုကဖၣ်အသိး. အဒိ ပကဘၣ်ပလီၢ်သး ဘၣ်ဃးဒီး တၢ်လၢပကွၢ် ဒီးတၢ်လၢပဖးတဖၣ်​ လီၤဆီဒၣ်တၢ် အမ့ၢ်ပၣ်ဒီး လုၢ်လၢ်သကဲာ်ပဝး လၢအတဂ့ၤဘၣ်န့ၣ်​ ပကဘၣ်ဟးဆှဲးအီၤ. ဒီးပတဘၣ်​ ပျဲလၢ ပတၢ်မိၣ်န့ၢ်သးလီ လၢအတဂ့ၤဘၣ်တဖၣ်​ ဒိၣ်စိလၢပဖီခိၣ်ဘၣ်.—ဖံလံးပံၤ ၄:၈; ကလီးစဲ ၃:၂.

၁၁. ပဒုးအိၣ်ထီၣ်​ လုၢ်လၢ်သကဲာ်ပဝး လၢအသီကန့ၢ်အဂီၢ် ပကဘၣ်မၤဒ်လဲၣ်.

^၁၁ ပပတုာ်ကွံာ် လုၢ်လၢ်သကဲာ်ပဝး လၢအလီၢ်လံၤန့ၢ်နာ်က့ ပကဘၣ်ဒုးအိၣ်ထီၣ်​ လုၢ်လၢ်သကဲာ်ပဝး လၢအသီစ့ၢ်ကီး. ပဒုးအိၣ်ထီၣ်​ လုၢ်လၢ်သကဲာ်ပဝး လၢအသီ သ့ခီဖျိ ပမၤလိ ယဟိဝၤယွၤ အတၢ်ဂ့ၤတၢ်ဝါ ဒီးပာ်လီၤသးလၢ ပကကွၢ်လိအီၤ. (အ့းဖ့းစူး ၅:၁, ၂) အဒိ ဖဲပဖးလံာ်စီဆှံ ဒီးဖးဘၣ်ဃးဒီး ယဟိဝၤယွၤ ပျၢ်ကွံာ်ပှၤဂၤတၢ်ကမၣ်​ အဂ့ၢ်အခါ ပကဘၣ်​ ဆိမိၣ်လီၤက့ၤသးလၢ ‘ယၤန့ၣ်​ ယပျၢ်ပှၤဂၤ တၢ်ကမၣ်ကၠ့ၤဧါ.’ ဒီးပမ့ၢ်ဖးဘၣ်ဃးဒီး ယဟိဝၤယွၤ သးကညီၤ ပှၤဖှီၣ်ဖိယာ်ဖိ အဂ့ၢ်န့ၣ်​ ပကဘၣ်​ ဆိမိၣ်လီၤက့ၤသးလၢ ‘ဒီပုၢ်ဝဲၢ်မုၣ်ခွါတဖၣ်လၢ အလိၣ်ဘၣ်​ တၢ်မၤစၢၤန့ၣ်​ မ့ၢ်ယပာ်ဖျါထီၣ်လၢ ယသးကညီၤအဝဲသ့ၣ်​ ဒီးသးအိၣ်မၤစၢၤ အဝဲသ့ၣ်ကၠ့ၤဧါ.’ ပကဘၣ်​ ကျဲးစၢးဆီတလဲ ပတၢ်ဆိကမိၣ်​ ဒီးဒုးအိၣ်ထီၣ်​ လုၢ်လၢ်သကဲာ်ပဝး လၢအသီထီဘိ. ဒီးပဆီတလဲ ပသးမ့ၢ်တန့ၢ် တဘျီဃီဘၣ်နာ်က့ ပတဘၣ်သးဟးဂီၤဘၣ်.

၁၂. လံာ်စီဆှံမၤစၢၤ ဒီပုၢ်ဝဲၢ်ခွါစတံၤဖ့ၣ်ဒ်လဲၣ်.

^၁၂ ဒီပုၢ်ဝဲၢ်ခွါစတံၤဖ့ၣ်​ လၢပတဲအဂ့ၢ် ဖဲမကၢာ်န့ၣ်​ အသ့ၣ်ညါလီၤသးလၢ အဒုးအိၣ်ထီၣ်​ လုၢ်လၢ်သကဲာ်ပဝးအသီ န့ၢ်ဝဲကယီကယီ. ဒီပုၢ်ဝဲၢ်ခွါစတံၤဖ့ၣ်​ တဲဝဲလၢ “ဖဲယဘျၢထံ ဝံၤအလီၢ်ခံန့ၣ်​ ယထံၣ်ဘၣ်ဒီး တၢ်လၢအမၤပှံၢ်ထီၣ်ယသး တဘျုးဘျီညါ. ယမၤလိဘၣ်လၢ ယတဘၣ်ကနၣ်ဃုာ် ပှၤလၢ အမၤပှံၢ်ထီၣ်ယသးတဖၣ်ဘၣ်​ ဒီးယတဘၣ်​ မၤဆၢအဝဲသ့ၣ်​ နီတမံၤဘၣ်. ခီဖျိလၢ ယမၤထွဲ တၢ်လၢ ယမၤလိဘၣ်အဃိ ယမါဒီးပှၤဂၤတဖၣ်​ ပတြၢၤယၤ. ယဆီတလဲယသး န့ၢ်ကၠဲအံၤန့ၣ်​ တလီၤနာ် နီကၠဲးဘၣ်. ယဆီတလဲယသးန့ၢ်န့ၣ်​ ခီဖျိလၢ လံာ်စီဆှံမၤစၢၤယၤအဃိလီၤ. တမ့ၢ်လၢယနီၢ်ကစၢ် တၢ်ဂံၢ်တၢ်ဘါအဃိဘၣ်.”

ဆဲးမၤလီၤမၢ်ကွံာ် တၢ်သးကွံ လၢအတကြၢးတဘၣ်

၁၃. ဒ်သိးပတအိၣ်ဒီး တၢ်သးကွံ လၢအတကြၢးတဘၣ်​ တဂ့ၤအဂီၢ် တၢ်မနုၤကမၤစၢၤပှၤလဲၣ်. (ကလၤတံ ၅:၁၆)

^၁၃ ဖး ကလၤတံ ၅:၁၆. ယဟိဝၤယွၤ ဟ့ၣ်ပှၤအသးစီဆှံ လၢကမၤစၢၤပှၤ ဒ်သိးဒီး ပကမၤတၢ်လၢအဘၣ်. အဃိ ပမ့ၢ်မၤလိ လံာ်စီဆှံန့ၣ်​ ပပျဲလၢ ယဟိဝၤယွၤ အသးစီဆှံ ကမၤစၢၤပှၤ. တကးဒံးဘၣ်​ ပမ့ၢ်လဲၤထီၣ်တၢ်အိၣ်ဖှိၣ်န့ၣ်​ ပကန့ၢ်ဘၣ်​ သးစီဆှံ အတၢ်မၤစၢၤစ့ၢ်ကီး. လၢတၢ်အိၣ်ဖှိၣ်န့ၣ်​ ပရ့ဘၣ်ဒီး ပဒီပုၢ်ဝဲၢ်မုၣ်ခွါတဖၣ်​ လၢအကျဲးစၢး မၤတၢ်လၢအဘၣ်​ ဒ်သိးဒီးပှၤအဃိ ပဂံၢ်ဘါဆူၣ်ထီၣ်ဒိၣ်မး. (ဧ့ၤဘြံၤ ၁၀:၂၄, ၂၅; ၁၃:၇) တကးဒံးဘၣ်​ ပမ့ၢ်ဃ့ကညး ယဟိဝၤယွၤ လၢကမၤစၢၤပှၤ ဒ်သိး ပကမၤနၢၤကွံာ် ပတၢ်ဂံၢ်စၢ်ဘါစၢ်န့ၣ်​ အကဟ့ၣ်ပှၤ အသးစီဆှံ ဒီးအကမၤဆူၣ်ထီၣ်​ ပဂံၢ်ပဘါ. ယဟိဝၤယွၤ အသးစီဆှံ အတၢ်မၤစၢၤန့ၣ်​ တမၤလီၤမၢ်ကွံာ် ပတၢ်သးကွံ လၢအတကြၢးတဘၣ်​ တဘျီဃီဘၣ်. နာ်က့ အကမၤစၢၤပှၤနီၢ်ကီၢ်. အဃိ ကလၤတံ ၅:၁၆ တဲဝဲလၢ ပှၤလၢ အလဲၤတၢ် ဒ်သးစီဆှံ အတၢ်ဟံးစုနဲၣ်ကျဲအသိးန့ၣ်​ အတ “မၤထွဲ တၢ်ဖံးတၢ်ညၣ်​ အတၢ်သူၣ်လီသးကွံ နီတမံၤလၢၤဘၣ်.”

၁၄. ဘၣ်မနုၤအဃိ အရ့ဒိၣ်လၢ ပကဆဲးမၤလီၤမၢ်ကွံာ် တၢ်သးကွံ လၢအတကြၢးတဘၣ်လဲၣ်.

^၁၄ ပမၤတၢ်လၢ ကမၤစၢၤပှၤ ဒ်သိး ပတၢ်ရ့လိာ်သးဒီး ယဟိဝၤယွၤ ကဂ့ၤထီၣ်လံနာ်က့ အရ့ဒိၣ်လၢ ပကဆဲးမၤအီၤဒံး ဒီးပကဘၣ်​ ဆဲးမၤလီၤမၢ်ကွံာ် တၢ်သးကွံ လၢအတကြၢးတဘၣ်​ ထီဘိ. ဘၣ်မနုၤအဃိ ပကဘၣ်မၤဒ်န့ၣ်လဲၣ်. ခီဖျိလၢ ပဒုၣ်ပဒါ လၢအကဲ တၢ်လ့ပစီန့ၣ်​ အဒုးပှၤမၢ်မၢ် ဒ်သိးဒီး ပကမၤကမၣ်တၢ် အဃိ ပကဘၣ်အိၣ်ပလီၢ်သး ထီဘိ. ပဘျၢထံမ့ၢ်ဝံၤနာ်က့ ဘၣ်သ့ၣ်သ့ၣ်​ ပဘၣ်သးမၤဒံး တၢ်လၢပတကြၢးမၤတဖၣ်​ ဒ်သိးဒီး တၢ်တၤကျိၣ်တၤစ့, တၢ်သူကသံၣ်မူၤဘှီး ဒီးတၢ်ကွၢ်တၢ်ဂီၤဘ့ၣ်ဆ့. (အ့းဖ့းစူး ၅:၃, ၄) အဒိ ဒီပုၢ်ဝဲၢ်ခွါသးစၢ်တဂၤ တဲဝဲလၢ “တၢ်တခါလၢ ယမၤလီၤမၢ်ကွံာ်အီၤ ကီဒိၣ်မးန့ၣ်​ အကဲဝဲ ယကၠဲးပှၤပိာ်ခွါ. ယဆိမိၣ်လၢ ယတၢ်တူၢ်ဘၣ်တဖၣ်န့ၣ်​ လီၤမၢ်ကွံာ်ကယီကယီလံ နာ်က့ နီၢ်ကီၢ်အအိၣ်ဒံး.” အဃိ နမၤလီၤမၢ်ကွံာ် နတၢ်သးကွံ လၢအတကြၢးတဘၣ်​ ကန့ၢ်အဂီၢ် တၢ်မနုၤ ကမၤစၢၤနၤလဲၣ်.

၁၅. ပသ့ၣ်ညါဘၣ်လၢ တၢ်သးကွံ လၢအတကြၢးတဘၣ်န့ၣ်​ “အဘၣ်စ့ၢ်ကီး ပှၤကိးဂၤဒဲး” အဃိ ဟ့ၣ်ဂံၢ်ဟ့ၣ်ဘါပှၤဒ်လဲၣ်. (ကွၢ်တၢ်ဂီၤ.)

^၁၅ ပှၤလၢအဘၣ်ကျဲးစၢး မၤလီၤမၢ်ကွံာ် တၢ်သးကွံ လၢအတကြၢးတဘၣ်န့ၣ်​ တမ့ၢ်ထဲ နၤတဂၤဘၣ်. လံာ်စီဆှံ တဲဝဲလၢ “တၢ်မၤကွၢ် လၢအဟဲဘၣ်သုန့ၣ်​ မ့ၢ်တၢ်မၤကွၢ်တဖၣ်လၢ အဟဲဘၣ်ပှၤကိးဂၤဒဲးစ့ၢ်ကီး.” (၁ ကရံၣ်သူး ၁၀:၁၃) လံာ်စီဆှံ အတၢ်ကွဲးကျိာ်ထံ လၢအဂၤတဘ့ၣ်​ ကွဲးဝဲလၢ “တၢ်မၤကွၢ် လၢအဟဲဘၣ်သုန့ၣ်​ အဘၣ်စ့ၢ်ကီး ပှၤကိးဂၤဒဲး.” တၢ်ကတိၤတထံၣ်အံၤ ပှၤကွဲးန့ၢ် ခရံာ်ဖိလၢဝ့ၢ်ကရံၣ်သူး. လၢညါ အဝဲသ့ၣ်တနီၤန့ၣ်​ အအဲၣ်ဘၢမါအဲၣ်ဘၢဝၤ, အဲၣ်လိာ်သး ပိာ်မုၣ်သကီးပိာ်မုၣ်​ ပိာ်ခွါသကီးပိာ်ခွါ ဒီးအကဲ ပှၤအီမူၤသံး. (၁ ကရံၣ်သူး ၆:၉-၁၁) ခရံာ်ဖိတဖၣ်အံၤ အဘျၢထံဝံၤနာ်က့ နဆိမိၣ်​ အတၢ်သးကွံ လၢအတကြၢးတဘၣ်န့ၣ်​ လီၤမၢ်ကွံာ် လၢာ်လံဧါ. တလီၤမၢ် ခဲလၢာ်ဒံးဘၣ်. အဝဲသ့ၣ်​ ကဲပှၤလၢ အဘၣ်တၢ်ဒိးဖှူအီၤနာ်က့ အဝဲသ့ၣ်ကဲဒံး ပှၤတလၢတပှဲၤဘၣ်. အဃိ ဒ်သိး အဝဲသ့ၣ်​ ကမၤလီၤမၢ်ကွံာ် အတၢ်သးကွံအဂီၢ် အဝဲသ့ၣ်​ ကဘၣ်ကျဲးစၢးဝဲ ဖၣ်ဆူၣ်ညါ. အဝဲသ့ၣ်အဂ့ၢ်န့ၣ်​ ဒုးသ့ၣ်ညါပှၤလၢ တၢ်တမံၤမံၤလၢ ပဘၣ်ကျဲးစၢး မၤနၢၤအီၤန့ၣ်​ ပှၤအဂၤနာ်က့ ဘၣ်ကျဲးစၢးမၤနၢၤဝဲကၠ့ၤ. အဃိ ပသ့ၣ်ညါဘၣ်လၢ ပကဘၣ်​ ‘အိၣ်ဆၢထၢၣ်​ ဂၢၢ်ဂၢၢ်ကျၢၤကျၢၤလၢ တၢ်နာ်အပူၤ. ဒ်ပသ့ၣ်ညါအသိး ပဒီပုၢ်ဝဲၢ်ခဲလၢာ်လၢ ဟီၣ်ခိၣ်ဒီဘ့ၣ်န့ၣ်​ တူၢ်ဘၣ်စ့ၢ်ကီးတၢ်နးတၢ်ဖှီၣ်​ ဒ်အံၤတဖၣ်.’—၁ ပ့းတရူး ၅:၉.

၁၆. ပတဘၣ်ဆိကမိၣ်​ တၢ်မနုၤဘၣ်လဲၣ်​ ဒီးဘၣ်မနုၤအဃိလဲၣ်.

^၁၆ တဘျီတခီၣ်​ ပဆိမိၣ်လီၤသးလၢ ပတၢ်ဂံၢ်စၢ်ဘါစၢ်န့ၣ်​ ပှၤတဂၤမၣ်​ တနၢ်ပၢၢ်ဝဲဘၣ်. ဒီးပကဆိမိၣ်ဘၣ်လၢ ပမၤလီၤမၢ်ကွံာ် ပတၢ်သးကွံ လၢအတကြၢးတဘၣ်​ တန့ၢ်လၢၤဘၣ်. တၢ်ဆိကမိၣ်ဒ်အံၤန့ၣ်​ အလီၤဘၣ်ယိၣ်​ အဃိ ပတဘၣ်​ ဆိကမိၣ်တၢ်ကၠဲန့ၣ်ဘၣ်. လံာ်စီဆှံ တဲဝဲလၢ “ကစၢ်ယွၤန့ၣ်​ မ့ၢ်ပှၤလၢအကလုၢ်တီ ဒီးအဝဲတဟ့ၣ်အခွဲးလၢ တၢ်ကမၤကွၢ်သု တုၤလၢ သုတူၢ်တကဲလၢၤဘၣ်န့ၣ်ဘၣ်. ဖဲသုဘၣ်တၢ်မၤကွၢ်အခါ အဝဲကအိးဟိထီၣ်ကျဲ ဒ်သိးသုတူၢ်တၢ်ခီၣ်တၢ် ကကဲအဂီၢ်.” (၁ ကရံၣ်သူး ၁၀:၁၃) အဃိ ပတၢ်သးကွံ လၢအတကြၢးတဘၣ်​ မ့ၢ်ဆူၣ်တလၢနာ်က့ ပဆဲးတီဒီး ယဟိဝၤယွၤ သ့ဒံး. တကးဒံးဘၣ်​ ဒ်သိးဒီး ပတမၤတၢ်ကမၣ်တဂ့ၤအဂီၢ် ယဟိဝၤယွၤ မၤစၢၤပှၤသ့.

၁၇. ပတၢ်သးကွံ လၢအတကြၢးတဘၣ်​ မ့ၢ်အိၣ်ထီၣ်န့ၣ်​ ပကဘၣ်မၤဒ်လဲၣ်.

^၁၇ ခီဖျိလၢ ပကဲ ပှၤတလၢတပှဲၤဘၣ်အဃိ ပတၢ်သးကွံ လၢအတကြၢးတဘၣ်န့ၣ်​ ဟဲအိၣ်ထီၣ်သ့. နာ်က့ ပတၢ်သးကွံ လၢအတကြၢးတဘၣ်​ မ့ၢ်အိၣ်ထီၣ်န့ၣ်​ ပကဘၣ်​ မၤလီၤမၢ်ကွံာ်အီၤ တဘျီဃီ. ဒီးပကဘၣ်ကွၢ်လိ စီၤယိၤသး လၢအတမၤဃုာ် စီၤပိၤတံၤဖၢ်အမါ ဒီးအဟးထီၣ်ကွံာ် လၢအအိၣ်​ တဘျီဃီ. (၁ မိၤၡ့ ၃၉:၁၂) ပတၢ်သးကွံ လၢအတကြၢးတဘၣ်န့ၣ်​ ပတဘၣ်​ မၤထွဲအီၤဘၣ်.

ဟ့ၣ်အၡူတဂ့ၤ

၁၈-၁၉. ဒ်သိး ပဆီတလဲ ပတၢ်ဆိကမိၣ်​ ကသ့အဂီၢ် ပကဘၣ်သံကွၢ်လီၤက့ၤပသး ဒ်လဲၣ်.

^၁၈ ပဆီတလဲ ပတၢ်ဆိကမိၣ်န့ၣ်​ အဲၣ်ဒိးတဲဝဲ ပကဘၣ်​ ဆိမိၣ်တၢ်ဒီးမၤတၢ် လၢအဘၣ်​ ယဟိဝၤယွၤအသး. အဃိ ပကဘၣ်ဆိမိၣ်​ ဒီးသံကွၢ်လီၤက့ၤသးထီဘိလၢ ‘တၢ်လၢယမၤန့ၣ်​ မ့ၢ်အပာ်ဖျါထီၣ်လၢ ယနာ်လၢ ပအိၣ်မူဘၣ်လၢ မုၢ်နံၤခံကတၢၢ်ဧါ. ယဒုးအိၣ်ထီၣ်​ လုၢ်လၢ်သကဲာ်ပဝး လၢအသီ န့ၢ်အါထီၣ်လံဧါ. ဒ်သိး ယတမၤဒ် ယတၢ်သးကွံ လၢအတကြၢးတဘၣ်​ တဂ့ၤအဂီၢ် မ့ၢ်ယပျဲ ယဟိဝၤယွၤ အသးစီဆှံ မၤစၢၤယၤဧါ.’

^၁၉ ဖဲနဆိမိၣ်လီၤက့ၤနသး ကၠဲန့ၣ်အခါ နကသ့ၣ်ညါလၢ တၢ်လၢနကဘၣ်မၤဂ့ၤထီၣ်န့ၣ်​ အိၣ်ဒံး အဃိ တဘၣ်သးဆံးတဂ့ၤ. နဆီတလဲနသး န့ၢ်ဒီဒူၣ်လံအဃိ တဘၣ်ဟ့ၣ်အၡူတဂ့ၤ. ဖဲ ဖံလံးပံၤ ၃:၁၆ န့ၣ်ပထံၣ်ဘၣ်​ တၢ်ဟ့ၣ်ကူၣ်​ လၢအတဲဝဲလၢ “ပလဲၤထီၣ်လဲၤထီပာ်စၢၤထဲလဲၣ်​ သနာ်က့ မ်ပဆဲးလဲၤထီၣ်လဲၤထီ ဒ်န့ၣ်ဆူညါတက့ၢ်.” အဃိ နမ့ၢ်ဆဲးမၤထွဲ တၢ်ဟ့ၣ်ကူၣ်တခါအံၤ ဒီးဆဲးဆီတလဲ နတၢ်ဆိကမိၣ်န့ၣ်​ ယဟိဝၤယွၤ ကဆိၣ်ဂ့ၤက့ၤနၤ နီၢ်ကီၢ်.