တၢ်မၤလိ ၇
နဖးလံာ်စီဆှံ ကကဲဘျုးအါထီၣ်အဂီၢ် နကဘၣ်မၤဒ်လဲၣ်
“နဖးအီၤန့ၣ် နနၢ်ပၢၢ်ဒ်လဲၣ်.”—လူၤကၣ် ၁၀:၂၆.
တၢ်သးဝံၣ် ၉၇ မူလၢယွၤကလုၢ်ကထါ
တၢ်မၤလိအံၤ အတၢ်တိာ်ပာ်a
၁. လံာ်စီဆှံအရ့ဒိၣ်လၢ ယ့ၣ်ၡူးအဂီၢ်န့ၣ် ပသ့ၣ်ညါဒ်လဲၣ်.
ထံၣ်တမှံကွၢ်လၢ နကနၣ် ယ့ၣ်ၡူးသိၣ်လိတၢ်. ယ့ၣ်ၡူးန့ၣ် အတိၢ်နီၣ် လံာ်စီဆှံဘၣ်ဒီဒူၣ် ဒီးဖဲအသိၣ်လိတၢ်အခါ အတဲထီၣ် လံာ်စီဆှံအဆၢအါဘျီ. အဒိ ပမ့ၢ်ကွၢ် ယ့ၣ်ၡူး တဲတၢ်ကတိၤ အဆိကတၢၢ်ဖဲ အဒိးဘျၢထံဝံၤ ဒီးအတဲတၢ်ကတိၤ အလီၢ်ခံကတၢၢ် ဖဲအတချုးသံဒံးဘၣ်န့ၣ် အယၢၤထီၣ်ဝဲ တၢ်ကတိၤတဖၣ်အံၤလၢ လံာ်စီဆှံအပူၤ.b (၅ မိၤၡ့ ၈:၃; စံးထီၣ်ပတြၢၤ ၃၁:၅; လူၤကၣ် ၄:၄; ၂၃:၄၆) စးထီၣ်လၢ ယ့ၣ်ၡူးဒိးဘျၢထံ တုၤအသံန့ၣ် အိၣ်ဝဲသၢနံၣ်ဒီးတဝာ်. ဖဲန့ၣ်အဆၢကတီၢ် ယ့ၣ်ၡူး ဖးလံာ်စီဆှံ လၢပှၤမဲာ်ညါ, အယၢၤထီၣ်ဝဲ လံာ်စီဆှံအဆၢ ဒီးအၡဲပၠးဝဲ လံာ်စီဆှံအဆၢ.—မးသဲ ၅:၁၇, ၁၈, ၂၁, ၂၂, ၂၇, ၂၈; လူၤကၣ် ၄:၁၆-၂၀.
လၢယ့ၣ်ၡူးအတၢ်အိၣ်မူ ဒီတစိၤန့ၣ် အပာ်ဖျါထီၣ်လၢ အအဲၣ်ကစၢ်ယွၤကလုၢ်ကထါ ဒီးအမၤထွဲဝဲလၢ အတၢ်အိၣ်မူပူၤ (ကွၢ်လံာ်အဆၢ ၂)
၂. ဖဲယ့ၣ်ၡူးဒိၣ်ထီၣ်အခါ အသ့ၣ်ညါ လံာ်စီဆှံအဆၢ ဂ့ၤဂ့ၤဒ်လဲၣ်. (ကွၢ်တၢ်ဂီၤလၢ လံာ်ကုခိၣ်.)
၂ တချုးလၢ ယ့ၣ်ၡူးစးထီၣ်မၤ တၢ်စံၣ်တဲၤတဲလီၤတၢ်မၤဒံးဘၣ်န့ၣ် အဖးဒီးနၢ်ဟူဘၣ် ကစၢ်ယွၤကလုၢ်ကထါ မၢ်မၢ်လီၤ. ဖဲယ့ၣ်ၡူးအိၣ်လၢ ဟံၣ်အခါ အကနၢ်ဟူဘၣ် နီၢ်မၤရံ ဒီးစီၤယိၤသး တဲသကီးတၢ်ဒီး အဟံၣ်ဖိဃီဖိ ဒီးအဝဲသ့ၣ် ယၢၤထီၣ်ဝဲ လံာ်စီဆှံအဆၢတဖၣ်.c (၅ မိၤၡ့ ၆:၆, ၇) ပသ့ၣ်ညါလၢ မုၢ်အိၣ်ဘှံးနံၤကီးနွံဒဲးန့ၣ် ယ့ၣ်ၡူးလဲၤလၢဘူၣ်ဘျီၣ်ဒီး အဟံၣ်ဖိဃီဖိ. (လူၤကၣ် ၄:၁၆) လၢဘူၣ်ဘျီၣ်ပူၤန့ၣ် ဖဲပှၤဖးလံာ်စီဆှံအခါ ယ့ၣ်ၡူးကနၣ်ဝဲ လီၤတံၢ်လီၤဆဲး. လၢခံ ယ့ၣ်ၡူးမၤလိထီၣ်သးလၢ ကဖးတၢ်ကွဲးအသးတဖၣ်န့ၣ် လၢအနီၢ်ကစၢ်. ယ့ၣ်ၡူး မၤဝဲဒ်န့ၣ်အဃိ အသ့ၣ်ညါထီၣ် လံာ်စီဆှံအဆၢဂ့ၤဂ့ၤ, အအဲၣ် ကစၢ်ယွၤကလုၢ်ကထါ ဒီးအမၤထွဲဝဲလၢ အတၢ်အိၣ်မူပူၤ. အဒိ ဖဲယ့ၣ်ၡူးအိၣ် ၁၂ နံၣ်အခါန့ၣ် အတဲတၢ်ဒီး သရၣ်လၢ အသ့ၣ်ညါ စီၤမိၤၡ့ အတၢ်သိၣ်တၢ်သီဂ့ၤဂ့ၤ လၢတၢ်လုၢ်ဟံၣ်ပူၤ. ဒီး “ခီဖျိလၢ [ယ့ၣ်ၡူး] အတၢ်နၢ်ပၢၢ်ဒီး အတၢ်စံးဆၢတဖၣ်အဃိ” သရၣ်လၢ အကနၣ် တၢ်လၢယ့ၣ်ၡူးတဲဝဲတဖၣ်န့ၣ် အဝဲသ့ၣ် “ကမၢကမၣ်ဝဲ.”—လူၤကၣ် ၂:၄၆, ၄၇, ၅၂.
၃. လၢတၢ်မၤလိအံၤ ပကတဲသကီး တၢ်မနုၤလဲၣ်.
၃ ပမ့ၢ်ဖးလံာ်စီဆှံ ထီဘိန့ၣ် ပကနၢ်ပၢၢ်လံာ်စီဆှံ ဒီးပကဘၣ်သူၣ်ဘၣ်သး လံာ်စီဆှံ. ဘၣ်ဆၣ် ဒ်သိးပဖးလံာ်စီဆှံ ကကဲဘျုးအါထီၣ်အဂီၢ် ပကဘၣ်မၤဒ်လဲၣ်. ပဟံန့ၢ်တၢ်မၤလိလၢ တၢ်လၢ ယ့ၣ်ၡူးတဲဘၣ် ပှၤကွဲးလံာ်ဖိ, ပှၤဖၤရံၤၡဲ ဒီးပှၤစးဒူၤကဲ အအိၣ်သ့. အဝဲသ့ၣ်န့ၣ် ကဲတၢ်ဘူၣ်တၢ်ဘါခိၣ်နၢ် ဒီးအသ့ၣ်ညါ စီၤမိၤၡ့ တၢ်သိၣ်တၢ်သီ ဒီးဖးလံာ်စီဆှံထီဘိ. ဘၣ်ဆၣ် တၢ်လၢ အဝဲသ့ၣ်ဖးဝဲန့ၣ် တကဲဘျုးလၢ အဝဲသ့ၣ်အဂီၢ်ဘၣ်. အဃိ ယ့ၣ်ၡူးတဲဝဲလၢ တၢ်လၢ အဝဲသ့ၣ်ကဘၣ်မၤဝဲန့ၣ် အိၣ်သၢမံၤ. ဒီးတၢ်လၢ ယ့ၣ်ၡူးတဲအဝဲသ့ၣ်န့ၣ် ကမၤစၢၤပှၤလၢ (၁) ပကနၢ်ပၢၢ် တၢ်လၢပဖး, (၂) ပကထံၣ်န့ၢ် နီၢ်သးတၢ်လုၢ်ဒိၣ်ပှ့ၤဒိၣ် (၃) ပကပျဲလၢ ကစၢ်ယွၤကလုၢ်ကထါ ဘှီဘၣ်ထီၣ်ပှၤ.
ပကဘၣ်နၢ်ပၢၢ် တၢ်လၢပဖး
၄. တၢ်အဒိဖဲ လူၤကၣ် ၁၀:၂၅-၂၉ န့ၣ်သိၣ်လိပှၤ မနုၤလဲၣ်.
၄ ဖဲပဖးလံာ်စီဆှံအခါ ပကဘၣ်နၢ်ပၢၢ် အခီပညီ. ပမ့ၢ်တနၢ်ပၢၢ် တၢ်လၢပဖးအီၤဘၣ်န့ၣ် အဘျုးတအိၣ်လၢ ပဂီၢ်ဘၣ်. ပကကွၢ်သကီး တၢ်အဒိ ဘၣ်ဃး ယ့ၣ်ၡူး တဲသကီးတၢ်ဒီး “ပှၤတဂၤလၢအသ့ စီၤမိၤၡ့ အတၢ်သိၣ်တၢ်သီ.” (ဖး လူၤကၣ် ၁၀:၂၅-၂၉.) ဖဲပိာ်ခွါတဂၤအံၤ သံကွၢ်ယ့ၣ်ၡူးလၢ ဒ်သိးအကန့ၢ်ဘၣ် တၢ်မူအထူအယိာ်အဂီၢ် အကဘၣ်မၤဒ်လဲၣ်အခါ ယ့ၣ်ၡူး မၤစၢၤအီၤဒ်သိး အကထံၣ်န့ၢ် တၢ်စံးဆၢ လၢလံာ်စီဆှံအပူၤ. ဒီးယ့ၣ်ၡူးသံကွၢ်အီၤလၢ “တၢ်ကွဲးအသးလၢ စီၤမိၤၡ့ အတၢ်သိၣ်တၢ်သီအပူၤ အိၣ်ဒ်လဲၣ်. နဖးအီၤန့ၣ် နနၢ်ပၢၢ်ဒ်လဲၣ်.” ပှၤတဂၤန့ၣ် တဲက့ၤယ့ၣ်ၡူးလၢ ပဘၣ်အဲၣ်ကစၢ်ယွၤ ဒီးပှၤလၢပဃၢၤ. (၃ မိၤၡ့ ၁၉:၁၈; ၅ မိၤၡ့ ၆:၅) နာ်က့ ပှၤတဂၤန့ၣ် ဆဲးတဲဝဲလၢ “ပှၤလၢယဃၢၤ အနီၢ်ကီၢ်န့ၣ် မ့ၢ်မတဂၤလဲၣ်.” တၢ်လၢပှၤတဂၤအံၤ တဲဝဲန့ၣ် ပာ်ဖျါထီၣ်ဝဲလၢ တၢ်လၢအဖးဝဲန့ၣ် အတနၢ်ပၢၢ်ဝဲဘၣ်. အဃိ အကဘၣ်မၤထွဲ လံာ်စီဆှံအဆၢ လၢအတၢ်အိၣ်မူပူၤ ဒ်လဲၣ်န့ၣ် အတသ့ၣ်ညါဝဲဘၣ်.
ပမၤဂ့ၤထီၣ်ပတၢ်ဖးလံာ်စီဆှံ ဒီးနၢ်ပၢၢ်အါထီၣ် လံာ်စီဆှံသ့
၅. ပမ့ၢ်ဃ့ထုကဖၣ် ဒီးဖးလံာ်ကယီကယီန့ၣ် ကမၤစၢၤပှၤဒ်လဲၣ်.
၅ ပမ့ၢ်မၤဂ့ၤထီၣ် ပတၢ်ဖးလံာ်ဖးလဲၢ်န့ၣ် ပကနၢ်ပၢၢ် ကစၢ်ယွၤကလုၢ်ကထါ ဂ့ၤထီၣ်အါထီၣ်. ပကကွၢ်သကီး တၢ်ဟ့ၣ်ကူၣ်တနီၤ လၢကမၤစၢၤပှၤ. တချုးလၢ ပဖးလံာ်စီဆှံဒံးဘၣ်န့ၣ် ပကဘၣ် ဃ့ထုကဖၣ်. ပလိၣ်ဘၣ် ယဟိဝၤယွၤ အတၢ်မၤစၢၤ ဒ်သိးပကနၢ်ပၢၢ် လံာ်စီဆှံအဆၢ အဃိ ပကဘၣ် ဃ့အသးစီဆှံ လၢကမၤစၢၤပှၤ ဒ်သိးဒီး ပကသးစၢၢ်ဆၢ တၢ်လၢပဖးအီၤ. ဝံၤဘျီ ပကဘၣ်ဖးအီၤ ကယီကယီ. ပမ့ၢ်ဖးဒ်န့ၣ်န့ၣ် ပကနၢ်ပၢၢ် တၢ်လၢပဖးအီၤဂ့ၤဂ့ၤ. တကးဒံးဘၣ် ဖဲပဖးလံာ်စီဆှံအခါ ပမ့ၢ်ဖးသီၣ်အီၤ မ့တမ့ၢ် ပမ့ၢ်ကနၣ် တၢ်ကလုၢ်လၢ ပှၤသွီလီၤပာ်ဝဲ ဒီးဖးပိာ်အခံန့ၣ် ကကဲဘျုးကၠ့ၤ. ပမ့ၢ်နၢ်ဟူ တၢ်ကလုၢ် ဒီးဖးပိာ်အခံလၢလံာ်ပူၤန့ၣ် ပကနၢ်ပၢၢ်တၢ်လၢပဖး ဒီးပတိၢ်နီၣ်အီၤကညီ. (ယိၤၡူ ၁:၈) နဖးလံာ်စီဆှံ မ့ၢ်ဝံၤန့ၣ် ဃ့ထုကဖၣ်ကဒီးတဘျီ ဒီးစံးဘျုး ယဟိဝၤယွၤလၢ အဟ့ၣ်နၤ အကလုၢ်ကထါ. ဒီးဃ့အတၢ်မၤစၢၤ ဒ်သိးနကမၤထွဲ တၢ်လၢနဖးဘၣ်တဖၣ်.
ပမ့ၢ်ကွဲးနီၣ်တၢ်လၢပဖးအီၤန့ၣ် ပနၢ်ပၢၢ်တၢ်ဂ့ၢ် ကဂ့ၤဒိၣ်ထီၣ် ဒီးပတိၢ်နီၣ်အီၤကဘၣ် (ကွၢ်လံာ်အဆၢ ၆)
၆. ဖဲနဖးလံာ်စီဆှံအခါ နမ့ၢ်သံကွၢ်လီၤနသးလၢ တၢ်သံကွၢ်တဖၣ် ဒီးကွဲးနီၣ်ဃာ် တၢ်ဂ့ၢ်တနီၤန့ၣ် ကကဲဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)
၆ ဒ်သိးဒီး နကနၢ်ပၢၢ် လံာ်စီဆှံဂ့ၤထီၣ်အဂီၢ် တၢ်ဟ့ၣ်ကူၣ် လၢအဂၤ အိၣ်ခံခါဒံး. ဖဲနဖးလံာ်အခါန့ၣ် သံကွၢ်လီၤနသးလၢ တၢ်သံကွၢ်တဖၣ်အံၤ. အဒိ ‘တၢ်ဂ့ၢ်အံၤ အဘၣ်ဃးဒီး မတဂၤလဲၣ်. မတဂၤတဲတၢ်လဲၣ်. အတဲတၢ်ဒီးမတဂၤလဲၣ်. ဘၣ်မနုၤအဃိ အတဲဝဲဒ်န့ၣ်လဲၣ်. တၢ်ဂ့ၢ်အံၤ ကဲထီၣ်သးလၢတၢ်လီၢ်ဖဲလဲၣ် ဒီးလၢအခါဖဲလဲၣ်.’ တၢ်သံကွၢ်တဖၣ်န့ၣ် ကမၤစၢၤနၤလၢ နကနၢ်ပၢၢ်အါထီၣ် တၢ်ဂ့ၢ်လၢနဖးအီၤ. တၢ်ဟ့ၣ်ကူၣ်အဂၤတခါန့ၣ် ဖဲနဖးလံာ်အခါ ကွဲးနီၣ်ဃာ်တၢ်ဂ့ၢ်တနီၤ. ဖဲနကွဲးနီၣ် တၢ်လၢနဖးအီၤအခါ နဘၣ်ဆိမိၣ်ထံအီၤ အဃိ နကနၢ်ပၢၢ်တၢ်ဂ့ၢ်န့ၣ် ဂ့ၤဒိၣ်ထီၣ်. တကးဒံးဘၣ် နမ့ၢ်ကွဲးနီၣ်ဃာ် တၢ်ဂ့ၢ်လၢနဖးန့ၣ် နတိၢ်နီၣ်အီၤ န့ၢ်ယံာ်တစဲး. အဒိ နကွဲးနီၣ်တၢ်ဂ့ၢ် ဒ်သိးဒီး တၢ်သံကွၢ်တနီၤ, တၢ်ဂ့ၢ်လၢနသ့ၣ်ညါထီၣ်, တၢ်ဂ့ၢ်မိၢ်ပှၢ်လၢအရ့ဒိၣ်, နမၤထွဲတၢ်ဂ့ၢ်န့ၣ် ကသ့ဒ်လဲၣ် ဒီးတၢ်ဂ့ၢ်အံၤ ထုးန့ၢ်နသးဒ်လဲၣ်. နမ့ၢ်ကွဲးနီၣ် တၢ်ဂ့ၢ်သ့ၣ်တဖၣ်န့ၣ် နကထံၣ်လၢ ကစၢ်ယွၤကလုၢ်ကထါန့ၣ် အကဲဝဲ တၢ်ကစီၣ်လၢနဂီၢ်.
၇. ပမ့ၢ်ဘၣ်သး နၢ်ပၢၢ်လံာ်စီဆှံဂ့ၤထီၣ်န့ၣ် ပကဘၣ် ပအိၣ်ဒီး တၢ်သ့တၢ်ဘၣ် မနုၤလဲၣ်. (မးသဲ ၂၄:၁၅)
၇ ယ့ၣ်ၡူးတဲဝဲလၢ ပမ့ၢ်ဘၣ်သးနၢ်ပၢၢ် ကစၢ်ယွၤကလုၢ်ကထါန့ၣ် အရ့ဒိၣ်လၢ ပကဘၣ် သ့ပဲာ်ထံနီၤဖးတၢ်. (ဖး မးသဲ ၂၄:၁၅.) တၢ်သ့ပဲာ်ထံနီၤဖးတၢ်န့ၣ် မ့ၢ်ဝဲ ပအိၣ်ဒီး တၢ်သ့တၢ်ဘၣ်လၢ ပကနၢ်ပၢၢ် တၢ်ဂ့ၢ်တခါဘၣ်တခါ အဘၣ်ထွဲလိာ်သးဒ်လဲၣ်, အတဘၣ်ထွဲလိာ်သးဒ်လဲၣ် ဒီးတၢ်ဂ့ၢ်အံၤ အတဖျါလီၤတံၢ်လီၤဆဲးဘၣ်ဒ်လဲၣ်. တကးဒံးဘၣ် ယ့ၣ်ၡူး တဲဝဲလၢ ဒ်သိးပကသ့ၣ်ညါ တၢ်ကဲထီၣ်သး လၢအမၤလၢပှဲၤ ဝံအတၢ်စံးပာ်အဂီၢ် ပကဘၣ် သ့ပဲာ်ထံနီၤဖးတၢ်. အဃိ ဒ်သိးပကနၢ်ပၢၢ် တၢ်ဂ့ၢ်လၢပဖး လၢလံာ်စီဆှံပူၤ ဂ့ၤဂ့ၤအဂီၢ် ပကဘၣ် သ့ပဲာ်ထံနီၤဖးတၢ်.
၈. ဖဲနဖးလံာ်စီဆှံအခါ နပဲာ်ထံနီၤဖးတၢ် ကသ့ဒ်လဲၣ်.
၈ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် ယဟိဝၤယွၤ ဟ့ၣ်အဝဲသ့ၣ်လၢ တၢ်သ့ပဲာ်ထံနီၤဖးတၢ်. အဃိ ဃ့ယဟိဝၤယွၤ အတၢ်မၤစၢၤ ဒ်သိးနကအိၣ်ဒီး တၢ်သ့ပဲာ်ထံနီၤဖးတၢ်. (ကတိၤဒိ ၂:၆) နဃ့ထုကဖၣ်ဝံၤဘျီ နကဘၣ်မၤဒ်လဲၣ်. နကဘၣ် ဆိမိၣ်ထံ တၢ်လၢနဖးအီၤ လီၤတံၢ်လီၤဆဲး ဒီးပာ်သူၣ်ပာ်သးလၢ တၢ်ဂ့ၢ်လၢနဖးအံၤ အဘၣ်ထွဲဒီး တၢ်ဂ့ၢ်အဂၤလၢ နသ့ၣ်ညါပာ်စၢၤန့ၣ်ဒ်လဲၣ်. တကးဒံးဘၣ် နဃုသ့ၣ်ညါတၢ်ဂ့ၢ်လၢ လံာ်လဲၢ်လၢပတၢ်ကရၢကရိ ထုးထီၣ်ဝဲတဖၣ် ဒ်သိးဒီး လံာ်နဲၣ်ကျဲလၢ ယဟိဝၤပှၤအုၣ်အသးတဖၣ် ကဃုသ့ၣ်ညါတၢ်အဂီၢ်သ့. လံာ်လဲၢ်တဖၣ်အံၤ ကမၤစၢၤနၤ ဒ်သိးဒီး နကနၢ်ပၢၢ် လံာ်စီဆှံအခီပညီ ဒီးနကသ့ၣ်ညါထီၣ်လၢ နကဘၣ်မၤထွဲအီၤလၢ နတၢ်အိၣ်မူဒ်လဲၣ်. (ဧ့ၤဘြံၤ ၅:၁၄) ဖဲနဖးလံာ်စီဆှံအခါ နမ့ၢ်အိၣ်ဒီး တၢ်သ့ပဲာ်ထံနီၤဖးတၢ်န့ၣ် နကနၢ်ပၢၢ် လံာ်စီဆှံဂ့ၤထီၣ်.
ဖဲနဖးလံာ်စီဆှံအခါ ဃုကွၢ်နီၢ်သးတၢ်လုၢ်ဒိၣ်ပှ့ၤဒိၣ်
၉. တၢ်မ့ၢ်တၢ်တီ အရ့ဒိၣ်လၢ ပှၤစးဒူၤကဲ တတူၢ်လိာ်ဘၣ်န့ၣ် မ့ၢ်မနုၤလဲၣ်.
၉ လံာ်စီဆှံလၢဧ့ၤဘြံၤကျိာ် အဆိကတၢၢ် ယဲၢ်ကတြူၢ်န့ၣ် ပှၤစးဒူၤကဲတဖၣ် သ့ၣ်ညါဝဲ လီၤတံၢ်လီၤဆဲး ဘၣ်ဆၣ် အဝဲသ့ၣ်တတူၢ်လိာ်ဝဲ တၢ်မ့ၢ်တၢ်တီအရ့ဒိၣ်လၢ အအိၣ်လၢ လံာ်ယဲၢ်ကတြူၢ်န့ၣ်အပူၤဘၣ်. အဒိ ပှၤစးဒူၤကဲတဖၣ်န့ၣ် ဘၣ်သး တဲအါတၢ်ဒီးယ့ၣ်ၡူး ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်. အဃိ ယ့ၣ်ၡူး တဲအဝဲသ့ၣ်လၢ “သုတဖးဘၣ်လၢ လံာ်မိၤၡ့ အပူၤဧီၤ. လၢတၢ်ကွဲးနီၣ် ဘၣ်ဃးဒီး သပှီာ်တၤဆှုၣ်တခိၣ် အပူၤန့ၣ် ကစၢ်ယွၤတဲဘၣ် စီၤမိၤၡ့လၢ ‘ယမ့ၢ် စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤလီၤ.” (မၢ်ကူး ၁၂:၁၈, ၂၆) ပထံၣ်ဘၣ်လၢ ပှၤစးဒူၤကဲတဖၣ် ဖးဘၣ် တၢ်ဂ့ၢ်တခါန့ၣ် တဘျုးဘျီညါ. နာ်က့ ယ့ၣ်ၡူး တဲအဝဲသ့ၣ်ဒ်န့ၣ် အဃိ ပသ့ၣ်ညါဘၣ်လၢ တၢ်မ့ၢ်တၢ်တီအရ့ဒိၣ် ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ် အဝဲသ့ၣ် တတူၢ်လိာ်ဝဲဘၣ်.—မၢ်ကူး ၁၂:၂၇; လူၤကၣ် ၂၀:၃၈.d
၁၀. ဖဲပဖးလံာ်စီဆှံအခါ ပကဘၣ်ဆိမိၣ်ထံ တၢ်ဂ့ၢ်မနုၤလဲၣ်.
၁၀ ပမၤလိန့ၢ်ဘၣ် တၢ်မနုၤလဲၣ်. ဖဲပဖးလံာ်စီဆှံအခါ ပကဘၣ် ဆိမိၣ်ထံလၢ လံာ်စီဆှံတဆၢအံၤ မ့တမ့ၢ် တၢ်ဂ့ၢ်လၢပဖးအံၤ သိၣ်လိပှၤ တၢ်မနုၤလဲၣ်. ပကဘၣ်နၢ်ပၢၢ် တၢ်ဂ့ၢ်လၢအညီတဖၣ် တကးဒံးဘၣ် ပကဘၣ်ဃုသ့ၣ်ညါ တၢ်ဂ့ၢ်လၢ အဒိၣ်အယိာ်. ဒီးပကဘၣ်ဃုစ့ၢ်ကီး လံာ်စီဆှံ အတၢ်ဟံးစုနဲၣ်ကျဲလၢ အလီၤဂာ်ဒ်သိးဒီး တၢ်လုၢ်ဒိၣ်ပှ့ၤဒိၣ်လၢအအိၣ်ခူသူၣ်သး လၢပဃုအီၤ တဘၣ်ညီညီဘၣ်.
၁၁. ပကဃုထံၣ်န့ၢ် နီၢ်သးတၢ်လုၢ်ဒိၣ်ပှ့ၤဒိၣ် လၢလံာ်စီဆှံပူၤအဂီၢ် ၂ တံၤမသ့း ၃:၁၆, ၁၇ မၤစၢၤပှၤကသ့ဒ်လဲၣ်.
၁၁ ဖဲပဖးလံာ်စီဆှံအခါ ပဃုထံၣ်န့ၢ် နီၢ်သးတၢ်လုၢ်ဒိၣ်ပှ့ၤဒိၣ် ကသ့ဒ်လဲၣ်. ပကကွၢ်သကီး တၢ်ဟ့ၣ်ကူၣ်လၢ ၂ တံၤမသ့း ၃:၁၆, ၁၇. (ဖး.) ဖဲန့ၣ်တဲဝဲလၢ “တၢ်ကွဲးအသးခဲလၢာ်န့ၣ် . . . ကဲဘျုးလၢ” (၁) သိၣ်လိနဲၣ်လိတၢ်အဂီၢ်, (၂) သိၣ်ဃီၣ်တၢ်အဂီၢ်, (၃) ဃၣ်လိၤတၢ်အဂီၢ်, (၄) သိၣ်က့ၤသီက့ၤတၢ်အဂီၢ်. တကးဒံးဘၣ် လံာ်စီဆှံအကတြူၢ်လၢ ပတဖးအီၤကြီကြီဘၣ်နာ်က့ ပထံၣ်န့ၢ် တၢ်ဟ့ၣ်ကူၣ်လွံၢ်ခါအံၤသ့. အဒိ ဖဲပဖးလံာ်စီဆှံအခါ ပကဘၣ် ဆိမိၣ်ထံလၢ တၢ်ဂ့ၢ်လၢပဖးတခါအံၤ အသိၣ်လိပှၤ ဘၣ်ဃးဒီး ယဟိဝၤယွၤအဂ့ၢ်, ယဟိဝၤယွၤ အတၢ်တိာ်ပာ် ဒီးလံာ်စီဆှံ အတၢ်ဟံးစုနဲၣ်ကျဲဒ်လဲၣ်. တၢ်ဂ့ၢ်တခါအံၤ မၤစၢၤပှၤလၢ ပကသိၣ်ဃီၣ်လီၤသးဒ်လဲၣ်. ပကဘၣ် ပာ်သူၣ်ပာ်သးလၢ လံာ်စီဆှံအဆၢတဖၣ်အံၤ မၤစၢၤပှၤဒ်သိး ပကသ့ၣ်ညါလီၤက့ၤ ပတၢ်ပာ်သး အိၣ်ဒ်လဲၣ်, ပမၤဂ့ၤထီၣ်က့ၤ ပတၢ်ပာ်သး ကသ့ဒ်လဲၣ် ဒီးပဆဲးတီဒီး ယဟိဝၤယွၤ ကသ့ဒ်လဲၣ်. ဒီးဖဲပဖးလံာ်စီဆှံအခါ ပကဘၣ် ဃုသ့ၣ်ညါလၢ တၢ်ဂ့ၢ်လၢ ပဖးတခါအံၤ အဃၣ်လိၤ မ့တမ့ၢ် အဘှီဘၣ်ထီၣ် တၢ်ထံၣ်ကမၣ် လၢပှၤဂၤတဲဘၣ်ပှၤ ဖဲပဟးစံၣ်တဲၤတဲလီၤတၢ်အခါန့ၣ် ဒ်လဲၣ်. တကးဒံးဘၣ် ပကအိၣ်ဒီး တၢ်ထံၣ် ဒ်သိးဒီး ယဟိဝၤယွၤ အဂီၢ် ပကဘၣ်ဃုကွၢ် တၢ်ဂ့ၢ်လၢအက သိၣ်က့ၤသီက့ၤပှၤ. အဃိ ဖဲပဖးလံာ်စီဆှံအခါ ပမ့ၢ်ဃုကွၢ် တၢ်ဂ့ၢ်လွံၢ်ထံၣ်အံၤန့ၣ် ပကထံၣ်န့ၢ် နီၢ်သးတၢ်လုၢ်ဒိၣ်ပှ့ၤဒိၣ် ဒီဒူၣ်ညါ.
ပျဲလံာ်စီဆှံ ဘှီဘၣ်ထီၣ်နၤ
၁၂. ဘၣ်မနုၤအဃိ ယ့ၣ်ၡူးတဲ ပှၤဖၤရံၤၡဲတဖၣ်လၢ “သုတဖးဘၣ်ဧီၤ” လဲၣ်.
၁၂ ပှၤဖၤရံၤၡဲတဖၣ်န့ၣ် အိၣ်ဒီးတၢ်ထံၣ်ကမၣ် ဘၣ်ဃးဒီး လံာ်စီဆှံအဆၢလၢ အဝဲသ့ၣ်ဖးဝဲ အဃိ ယ့ၣ်ၡူး တဲအဝဲသ့ၣ်လၢ “သုတဖးဘၣ်ဧီၤ.” (မးသဲ ၁၂:၁-၇)e ယ့ၣ်ၡူးတဲ ပှၤဖၤရံၤၡဲတဖၣ် ဒ်န့ၣ်န့ၣ် ခီဖျိလၢ ပှၤဖၤရံၤၡဲတဖၣ် တဲဝဲလၢ ယ့ၣ်ၡူး အပျဲၢ်အဘီၣ်တဖၣ် မၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီ. အဃိ ယ့ၣ်ၡူးတဲဖျါထီၣ်ဝဲ တၢ်အဒိခံခါ လၢလံာ်စီဆှံပူၤ ဒီးတဲဖျါထီၣ်ဝဲ လံာ်စီဆှံအဆၢလၢ လံာ်ဟိၤၡ့အပူၤ. အမၤဝဲဒ်န့ၣ် ဒ်သိးကပာ်ဖျါထီၣ်ဝဲလၢ ပှၤဖၤရံၤၡဲ တနၢ်ပၢၢ်ဝဲ မုၢ်အိၣ်ဘှံးနံၤ တၢ်သိၣ်တၢ်သီအဂ့ၢ်ဘၣ် ဒီးအဝဲသ့ၣ် တၢ်သးကညီၤတအိၣ်ဘၣ်. ပှၤဖၤရံၤၡဲတဖၣ်အံၤ ဘၣ်မနုၤအဃိ အဝဲသ့ၣ်တပျဲလၢ လံာ်စီဆှံ ကဘှီဘၣ်ထီၣ်က့ၤ အတၢ်ထံၣ်ဘၣ်လဲၣ်. ခီဖျိလၢ ဖဲအဝဲသ့ၣ် ဖးလံာ်စီဆှံအခါ အဝဲသ့ၣ် ပာ်ထီၣ်ထီသး ဒီးဃုထံၣ်ထဲတၢ်ကမၣ်. ဒီးအဝဲသ့ၣ် အိၣ်ဒီးတၢ်ပာ်သး ဒ်န့ၣ်အဃိ အဝဲသ့ၣ် တနၢ်ပၢၢ် တၢ်လၢအဖးဝဲဘၣ်.—မးသဲ ၂၃:၂၃; ယိၤဟၣ် ၅:၃၉, ၄၀.
၁၃. ဖဲပဖးလံာ်စီဆှံအခါ ပကဘၣ်အိၣ်ဒီး တၢ်ပာ်သးဒ်လဲၣ် ဒီးဘၣ်မနုၤအဃိလဲၣ်.
၁၃ တၢ်လၢယ့ၣ်ၡူးတဲဝဲန့ၣ် ပသ့ၣ်ညါဘၣ်လၢ ဖဲပဖးလံာ်စီဆှံအခါ ပကဘၣ်အိၣ်ဒီး တၢ်ပာ်သးလၢအဘၣ်. ပတဘၣ်လီၤဂာ်ဒီး ပှၤဖၤရံၤၡဲဘၣ်. ပကဘၣ် ဆီၣ်လီၤသး ဒီးသးအိၣ်မၤလိန့ၢ်တၢ်. တကးဒံးဘၣ် ကစၢ်ယွၤကလုၢ်ကထါန့ၣ် ပကဘၣ် “တူၢ်လိာ်အီၤလၢ တၢ်သူၣ်စူၤသးစူၤအပူၤ ဒီးပျဲလၢ ကစၢ်ယွၤကသူၣ်လီၤအီၤ” လၢပသးပူၤ. (ယၤကိာ် ၁:၂၁) ပတၢ်သူၣ်စူၤသးစူၤ မ့ၢ်အိၣ်မၣ် ကစၢ်ယွၤကလုၢ်ကထါ ဘှီဘၣ်ထီၣ်ပှၤန့ၢ်. အဃိ ဖဲပဖးလံာ်စီဆှံအခါ ပမ့ၢ်ပာ်ထီၣ်ထီသး ဒီးဃုထံၣ်ထဲ တၢ်ကမၣ်န့ၣ် ပတမၤလိဘၣ် တၢ်သးကညီၤ, တၢ်ဒိသူၣ်ဒိသး ဒီးတၢ်အဲၣ်အဂ့ၢ်ဘၣ်. ဒီးလံာ်စီဆှံ ဘှီဘၣ်ထီၣ်က့ၤပှၤ တသ့ကၠ့ၤဘၣ်.
ပပျဲလၢ ကစၢ်ယွၤကလုၢ်ကထါ ဘှီဘၣ်ထီၣ်ပှၤဧါန့ၣ် ပကသ့ၣ်ညါလီၤပသးဒ်လဲၣ် (ကွၢ်လံာ်အဆၢ ၁၄)f
၁၄. ပပျဲလၢ လံာ်စီဆှံ ဘှီဘၣ်ထီၣ်ပှၤဧါန့ၣ် ပကသ့ၣ်ညါဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၄ ပမ့ၢ်ပျဲလၢ ကစၢ်ယွၤကလုၢ်ကထါ ဘှီဘၣ်ထီၣ်ပှၤန့ၣ် ပကရ့ဒီးပှၤဂၤဂ့ၤဂ့ၤ. ပှၤဖၤရံၤၡဲတဖၣ်န့ၣ် အဝဲသ့ၣ်တပျဲလၢ ကစၢ်ယွၤကလုၢ်ကထါ ကဘှီဘၣ်ထီၣ်အဝဲသ့ၣ်ဘၣ်. အဃိ အဝဲသ့ၣ် “ပာ်ဒ့ၣ်ပာ်ကမၣ် ပှၤလၢ အတၢ်ကမၣ်တအိၣ်ဘၣ်တဖၣ်.” (မးသဲ ၁၂:၇) ပဝဲစ့ၢ်ကီး မ့ၢ်ပပျဲလၢ ကစၢ်ယွၤကလုၢ်ကထါ ဘှီဘၣ်ထီၣ်ပှၤဧါ တဘှီဘၣ်ထီၣ်ပှၤဧါန့ၣ် ကဖျါထီၣ်ဖဲ ပရ့ဒီးပှၤဂၤ ဒီးပထံၣ်ပှၤဂၤဒ်လဲၣ်အခါ. အဒိ ဖဲပရ့ပှၤဂၤအခါ မ့ၢ်ပတဲဖျါထီၣ်လၢ ပှၤဂၤအတၢ်ဂ့ၤတၢ်ဝါဧါ မ့တမ့ၢ် ပတဲအါလၢ ပှၤဂၤ အတၢ်ဂံၢ်စၢ်ဘါစၢ်ဟီဧါ. မ့ၢ်ပကဲပှၤလၢ အသးကညီၤတၢ် ဒီးသးအိၣ်ပျၢ်ကွံာ် ပှၤဂၤအတၢ်ကမၣ်ဧါ မ့တမ့ၢ် ပကဲပှၤလၢ အပာ်တၢ်ကမၣ်လၢ ပှၤဂၤအလိၤ ဒီးဟံဃာ် ပှၤဂၤအတၢ်ကမၣ်ဧါ. ပမ့ၢ်သံကွၢ်လီၤပသးဒ်အံၤန့ၣ် ကမၤစၢၤပှၤလၢ ပကပျဲလၢ ကစၢ်ယွၤကလုၢ်ကထါ ကဘှီဘၣ်ထီၣ် ပတၢ်ဆိမိၣ်, ပတၢ်ပာ်သး ဒီးတၢ်လၢပမၤ.—၁ တံၤမသ့း ၄:၁၂, ၁၅; ဧ့ၤဘြံၤ ၄:၁၂.
နမ့ၢ်ဖးလံာ်စီဆှံန့ၣ် နကသးခု
၁၅. ယ့ၣ်ၡူးအတၢ်ထံၣ် ဘၣ်ဃးဒီး ကစၢ်ယွၤကလုၢ်ကထါ အိၣ်ဒ်လဲၣ်.
၁၅ ယ့ၣ်ၡူးအဲၣ် ကစၢ်ယွၤကလုၢ်ကထါဒိၣ်မး. ယ့ၣ်ၡူးအတၢ်ထံၣ် ဘၣ်ဃးဒီး ကစၢ်ယွၤကလုၢ်ကထါ အိၣ်ဒ်လဲၣ်န့ၣ် စံးထီၣ်ပတြၢၤ ၄၀:၈ တဲဆိပာ်စၢၤဝဲ. ဖဲန့ၣ်တဲဝဲလၢ “အိ ယကစၢ်ယွၤဧၢ, ယမၤနတၢ်ဘၣ်သးန့ၣ် မၤသးခုယသးဒိၣ်မး. ဒီးနတၢ်သိၣ်တၢ်သီန့ၣ် အိၣ်လၢယသးကံၢ်ပူၤ.” ခီဖျိလၢ ယ့ၣ်ၡူးအဲၣ် ကစၢ်ယွၤကလုၢ်ကထါ အဃိ အသးခု ဒီးအဆဲးမၤ ယဟိဝၤယွၤအတၢ်မၤန့ၢ်ထီဘိ. ပဝဲစ့ၢ်ကီး ပမ့ၢ်အဲၣ် ကစၢ်ယွၤကလုၢ်ကထါ ဒီးဖးအီၤထီဘိန့ၣ် ပကသးခု ဒီးပဆဲးမၤယဟိဝၤယွၤတၢ်မၤ ကန့ၢ်ထီဘိ.—စံးထီၣ်ပတြၢၤ ၁:၁-၃.
၁၆. နဖးလံာ်စီဆှံ ကကဲဘျုးအါထီၣ်အဂီၢ် နကဘၣ်မၤဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “တၢ်လၢယ့ၣ်ၡူးတဲဝဲန့ၣ် ကမၤစၢၤပှၤလၢ ပကနၢ်ပၢၢ် တၢ်လၢပဖး.”)
၁၆ ပမ့ၢ်မၤထွဲ ယ့ၣ်ၡူးအဒိအတဲာ် ဒီးတၢ်လၢအတဲဝဲန့ၣ် ကမၤစၢၤပှၤလၢ ပကမၤဂ့ၤထီၣ် ပတၢ်ဖးလံာ်စီဆှံ. အဃိ ဒ်သိးပကနၢ်ပၢၢ်အါထီၣ် လံာ်စီဆှံအဂီၢ် တချုးလၢ ပဖးလံာ်စီဆှံ ဒံးဘၣ်န့ၣ် ပကဘၣ် ဃ့ထုကဖၣ် ဝံၤဘျီဖးအီၤကယီယီ, သံကွၢ်တၢ်သံကွၢ်တဖၣ် ဒီးကွဲးနီၣ် တၢ်ဂ့ၢ်လၢအရ့ဒိၣ်. ပကဘၣ်အိၣ်ဒီး တၢ်သ့ပဲာ်ထံနီၤဖးတၢ် ဒီးဆိမိၣ်ထံ တၢ်ဂ့ၢ်လၢ ပဖးအီၤ လီၤတံၢ်လီၤဆဲး. ပကဘၣ်ဖးစ့ၢ်ကီး လံာ်လဲၢ်လၢ ပတၢ်ကရၢကရိထုးထီၣ်ဝဲ. တကးဒံးဘၣ် ဖဲပဖး လံာ်စီဆှံအဆၢဒိၣ်လၢ ပတဖးအီၤကြီကြီဘၣ်အခါ ပမ့ၢ်ဃုကွၢ် နီၢ်သးတၢ်လုၢ်ဒိၣ်ပှ့ၤဒိၣ် လၢအအိၣ်ခူသူၣ်သးန့ၣ် ပနၢ်ပၢၢ်လံာ်စီဆှံကသ့ ဂ့ၤဒိၣ်ထီၣ်. ဒီးဖဲပဖးလံာ်စီဆှံအခါ ပကဘၣ်ပျဲလၢ ကစၢ်ယွၤကလုၢ်ကထါ ဘှီဘၣ်ထီၣ် ပတၢ်ထံၣ်ဒီးပတၢ်ပာ်သး. ပမ့ၢ်မၤထွဲ တၢ်ဟ့ၣ်ကူၣ်တဖၣ်အံၤန့ၣ် ကကဲဘျုးလၢ ပတၢ်ဖးလံာ်စီဆှံအဂီၢ် ဒီးပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်.—စံးထီၣ်ပတြၢၤ ၁၁၉:၁၇, ၁၈; ယၤကိာ် ၄:၈.
တၢ်သးဝံၣ် ၉၅ တၢ်ကပီၤ ဒံးယံာ်ဒံးကပီၤထီၣ်ဝဲ
a ပှၤကီးဂၤဒဲးလၢ အဘူၣ်ထီၣ်ဘါထီၣ် ယဟိဝၤယွၤန့ၣ် ကျဲးစၢးဖးလံာ်စီဆှံ ကီးနံၤဒဲး. ပှၤအဂၤနာ်က့ ဖးလံာ်စီဆှံကၠ့ၤ. ဘၣ်ဆၣ် တၢ်လၢအဝဲသ့ၣ်ဖးဝဲန့ၣ် အတနၢ်ပၢၢ်ဝဲဘၣ်. ပှၤလၢယ့ၣ်ၡူးအစိၤစ့ၢ်ကီး တနၢ်ပၢၢ်တၢ်လၢ အဖးဝဲဘၣ်. ပမ့ၢ်ဆိမိၣ်ထံ တၢ်လၢ ယ့ၣ်ၡူးတဲ အဝဲသ့ၣ်န့ၣ် ကကဲဘျုးလၢ ပတၢ်ဖးလံာ်စီဆှံအဂီၢ်.
b ဖဲယ့ၣ်ၡူးဒိးဘျၢထံ ဒီးကစၢ်ယွၤ ဒိးဖှူအီၤလၢသးစီဆှံန့ၣ် အနီၣ်ဘၣ်က့ၤ တၢ်ဂ့ၢ်ခဲလၢာ် တချုးလၢ အဟဲလီၤလၢ ဟီၣ်ခိၣ်ချၢဒံးဘၣ်အခါ.—မးသဲ ၃:၁၆.
c နီၢ်မၤရံန့ၣ် အသ့ၣ်ညါ လံာ်စီဆှံအဆၢဂ့ၤဂ့ၤ ဒီးအယၢၤထီၣ်ဝဲအါဘျီ. (လူၤကၣ် ၁:၄၆-၅၅) ဘၣ်သ့ၣ်သ့ၣ် နီၢ်မၤရံဒီးစီၤယိၤသး ကပှ့ၤလံာ်စီဆှံအဂီၢ် အစ့တအိၣ်ဘၣ်. အဃိ ဖဲအဝဲသ့ၣ်လဲၤလၢ ဘူၣ်ဘျီၣ်ခါန့ၣ် ဒ်သိး အဝဲသ့ၣ်တိၢ်နီၣ် လံာ်စီဆှံအဆၢ ကဘၣ်အဂီၢ် ဖဲပှၤဖးလံာ်စီဆှံအခါ အဝဲသ့ၣ်ကနၣ်ဝဲထံထံ.
d ကွၢ်တၢ်ဂ့ၢ်လၢ အခိၣ်တီမ့ၢ်ဝဲ “Draw Close to God—‘He Is the God . . . of the Living’” in the February 1, 2013, issue of The Watchtower.
e ဖဲမးသဲ ၁၉:၄-၆ န့ၣ်ယ့ၣ်ၡူး တဲစ့ၢ်ကီး ပှၤဖၤရံၤၡဲလၢ “သုတဖးဘၣ်ဧီၤ.” ဖဲအံၤန့ၣ် ပထံၣ်ဘၣ်လၢ ပှၤဖၤရံၤၡဲတဖၣ် ဖးဘၣ်ဝဲ ဘၣ်ဃးဒီး ကစၢ်ယွၤတ့လီၤတၢ်အဂ့ၢ်နာ်က့ အဝဲသ့ၣ် တဆိမိၣ်ထံဝဲ ကစၢ်ယွၤ အတၢ်ထံၣ် ဘၣ်ဃးဒီး တၢ်ဆီဟံၣ်ဆီဃီအဂ့ၢ်ဘၣ်.
f တၢ်ဂီၤ အခီပညီ– ဖဲတၢ်အိၣ်ဖှိၣ်ထီၣ်အဆၢကတီၢ် ဒီပုၢ်ဝဲၢ်ခွါလၢ အမၤစၢၤတၢ်လၢ တၢ်ဖီၣ်စဲးန့ၣ် အမၤကမၣ်ဘၣ်တၢ်ဒီဒူၣ်. နာ်က့ တၢ်အိၣ်ဖှိၣ်ဝံၤအလီၢ်ခံ ဒီပုၢ်ဝဲၢ်အဂၤတဖၣ် တသးစၢၢ်ဆၢ တၢ်လၢအမၤကမၣ်ဘၣ်, ဘၣ်ဆၣ် အဝဲသ့ၣ်စံးဘျုးအီၤလၢ အတၢ်ကျဲးစၢးဟီ.