Kurugana ekamo lyosiuyungwa

APA ava va pe siuyungwa, sinzi sovantu kusitjanga nasinye, kutamekera ketwaromo dogoro kehageso. Ngendeseso zangesi kugusa novili dononzi.

Yimo o liwapaikire yiuyungwa yoge ngoso? Ono hara kulironga nkedi zoureru? Nsene o lironga omu ava wapaike ekamo lyosiuyungwa, kapi ngo hepa hena kutjanga nayinye. Eyi ngayi ku pa siruwo sokugwanena po mokuliwapaikira kukagava siuyungwa. Siuyungwa soge kapi tupu ngasi kara ureru mokusigava nye hena ngasi tovara mokusipurakena ntani ngasi korangeda unene vapurakeni woge.

Yiuyungwa yanavenye eyi ava gava mombungakriste, muuyungi kumupa ekamo lyosiuyungwa. Nampili ngoso, kapisi yimo ayi horoka ngoso kombinga zoyiuyungwa yapeke. Kuvhura va ku pe sirongwa ndi siparatjangwa selike. Ndi kuvhura va ku pe o gave siuyungwa va gusa mosimbapiratjangwa songandi. Poyiruwo yimwe kuvhura va ku pe ko mavyukiso gongandi tupu. Wa hepa kuwapaika ekamo lyanyamoge koyiuyungwa yangoso.

Sihonena sina kara pepenuno 41 kuvhura si ku pe egano kuhamena omu ava rugana ekamo lyosiuyungwa lyesupi. Koneka asi nkenye egano lyomulyo kuna tamekere korumoho rosipepa ntani kuna li tjanga monondanda dononene. Konhi zankenye egano lyomulyo kuna didilike ko magano aga gana kulikwatesa ko. Yitwa yimwe yokugwederera ko mokukatunga po magano kuna yi didilike konhi zomagano aga. Konakona ekamo lyosiuyungwa eli nawa. Koneka asi magano gavali gomulyo kwa liza nosiparatjangwa. Diva hena asi yitwa eyi yina kara konhi kapi yina karere ko mawoko-woko. Nye, nkenye simwe kukwatesa ko magano gomulyo.

Nsene kuna kuwapaika ekamo lyosiuyungwa, alyo kuvhura li dire kumoneka ngwendi lina lyosihonena. Nye nsene o kwata egano nompango da hamena mo, ngayi ku vatera mokuwapaika yiruganeso yoge ntani nokuliwapaikira siuyungwa sosiwa posiruwo sokugwanena po. Ngapi omu no vhura kuyirugana?

Konakona nokuhorowora ntani nokuwapaika

Wa hepa siparatjangwa. Siparatjangwa kapisi sirongwa tupu sokulikarera esi nazi vhura kukwatera mo nkango zimwe. Aso kuna kara ntjima-ntjima zegano eli ono hara kugava, ntani kulikida rupe omu ono hara kuzogera sirongwa soge. Nsene vana ku pe siparatjangwa, konakona nawa nkenye nkango zomulyo. Nsene to ka tunga po siparatjangwa sina hamene moyimbapiratjangwa, si liwapaikira oku ono tura siparatjangwa soge momagano. Ano nsene kuna ku pe sirongwa selike, nyamoge wa hepa kuhorowora siparatjangwa. Nampili ngoso, komeho zokuyirugana, nayi ka wapa mokukarugana epaparo. Liwapaikira mokutambura magano gomape.

Ngomu ono kugusa nontambo edi, lipura nyamoge asi: ‘Morwasinke sirongwa esi sina karere nomulyo kovapurakeni vange? Yisinke sitambo sange?’ Kapisi si kare tupu sokukondjera kumana siuyungwa soge ndi sokugava siuyungwa sokuhafesa, nye mokuninkira vapurakeni woge va gwanene mo uwa. Nsene sitambo soge sina wapa, si tjanga. Si lidiworokesa nkenye apa ngomu ono kuliwapaikira.

Konyima zokudimburura sitambo soge ntani ono horowora siparatjangwa sosiuyungwa soge nasinye (ndi ono konakona omu siparatjangwa sosiuyungwa soge sina lizi nositambo soge), kuvhura o rugane epaparo eli lina demenene unene posiuyungwa soge. Papara magano aga naga vhura kukara nomulyo kovapurakeni woge. Wa ha demenena komagano gomanzi, nye papara magano gokulikarera gokuvhura kupukurura nokuvatera. Wa hepa kuyereka epaparo lyoge. Kuvhura ngo kare nomauzera gomanzi kupitakana aga no vhura kuruganesa, yipo nye asi wa hepa kuhorowora.

Dimburura magano gomulyo aga wa hepa kuzogera yipo o tunge siparatjangwa soge nokusikisa mo sitambo soge. Ago ngaga kara etateko lyekamo lyosiuyungwa soge. Magano gomulyo gangapi ga hepa kukara? Nampo gavali gana gwanene konzogera zonsupi, ano gatano kuvhura kugwanena po nampili kosiuyungwa sovili zimwe. Nsene ngaga sesupa magano goge gomulyo, vapurakeni woge ngava vhura kugadiworoka.

Konyima zokutura siparatjangwa nomagano gomulyo momagano goge, wapaika mauzera aga wa gwana mepaparo lyoge. Tokora asi mauzera musinke gana lizi nomagano goge gomulyo. Horowora mauzera aga naga nkondopeka siuyungwa soge. Nsene to horowora matjangwa gokukwatesa komagano gomulyo, didilika magano aga naga ku vatera mokuteda ko komatjangwa ogo monkedi zongwa. Tura nkenye egano konhi zegano lyomulyo oku lina hamene. Nsene mauzera gamwe kapi gana kuliza nankenye magano goge gomulyo, ga gusa po nampili ga kare asi mawa, ndi ga tura moupungwiro womapukururo goge ngo ga ruganese kosiuyungwa sopeke. Horowora tupu magano gomulyo unene. Nsene no horowora gomanzi, ayo ngayi ku ninkisa o uyunge kugenderera ntani nokudira kugazeresa nawa. Ayo ya wapa mokupwagesa magano gomasesu aga naga kara nomulyo kovapurakeni woge ntani nokugazeresa nawa. Wa ha pitakanesa siruwo soge.

Posiruwo esi, nsene kapi wa yi rugana simpe, wapaika magano goge ga likwame. Mutjangi gEvangeli Rukasa yimo ga rugene. Pokupapara maumbangi gomanzi gokuhamena kosirongwa sendi, age kwa ga wapaikire ‘moomu ga likwama-kwama.’ (Ruk. 1:3) Kuvhura o wapaike siuyungwa soge kuliza nomalikwamo goyihorokwa ndi yiparatjangwa, nampo sihorokwa noyitundwamo ndi udigu ntani nekohononopo lyawo, kuliza neyi nayi vhura kukutompoka mokusikisa mo sitambo soge. Wa ha runga-runga magano goge. Vapurakeni woge va hepa kukwama nawa siuyungwa soge, kapisi va singanyekere mokukwatakanesa magano. Mauzera aga ono kugava ga hepa kuninkisa vapurakeni va kwate egano eyi ono kuuyunga. Ngomu ono kuwapaika magano goge, gazadara ko omu nasi ka zuvhika siuyungwa soge kovapurakeni woge. Awo kuvhura va kwate egano elikwamo lyomagano gosiuyungwa soge ndi? Ngayi va tumangeda va rugane ko yuma kweyi vana zuvhu, kuliza nositambo soge ndi?

Makura, wapaika etwaromo eli nali koka elituromo lyovapurakeni woge kosirongwa soge ntani eli nali va likida asi eyi no ka zogera kuna kara nomulyo unene kwawo. Kutjanga nontanto dononsesu dokuhova kuvhura yi ku vatere. Mokuhulisa, wapaika ehageso lyokukorangeda eli lina lizi nositambo soge.

Nsene o livinduka kuliwapaikira ekamo lyosiuyungwa soge, ngo kara nosiruwo sokugwanena po mokusiwapukurura komeho ngo ka si gave. Ove kuvhura kumona hepero zokuruganesa sihonena ndi sifanekeso ndi silimonena mokukwatesa ko magano gamwe. Nsene o ruganesa sihorokwa santaantani ndi yininke yimwe yomomukunda kuvhura yi vatere vapurakeni woge va mone nawa mulyo gomagano ogo. Ngomu ono kuruguruka mo mosiuyungwa soge, kuvhura ngo dimburure nompito dokuwapukura mapukururo ga lize novapurakeni woge. Ngendeseso zokukonakona nokuwapukurura mapukururo kwa kara nomulyo mokuninkisa siuyungwa si kare sina wapa.

Vauyungi vamwe kuvhura va hepe madidiliko gomanzi kupitakana vamwe. Nye nsene o wapaika siuyungwa soge nomagano gomulyo gomasesu, nokugusa mo eyi yokudira kugakwatesa ko, ntani nokutura magano goge melikwamo, ngo ya yi dimburura asi konyima zosiruwo, kapi hena ngo hepa kutjanga nayinye posipepa. Ee, omu tupu ayi popere siruwo! Ntani ewapo lyosiuyungwa soge ngali runduruka. Ayo ngayi likida asi ove sili kuna kugwanena mo uwa melirongo lyoSikora zoUkareli.