Honena vakaume vaJehova wovanene

1-3. (a) Morwasinke natu uyungira asi kuvhura tu kare vakaume vaKarunga? (b) Wolye natu ka zogera mosirongwa esi?

MOBIBELI, Abirahamu kwa mu tumbura yikando yitatu asi mukwawo zaKarunga. (2 Histoli 20:7; Jesaya 41:8; Jakopo 2:23) Yige gelike va tumbura kuvyukilira moBibeli asi mukwawo zaKarunga. Oyo ngoso kutanta asi Abirahamu gelike ga kere kaume kaJehova ndi? Hawe. Bibeli kulikida asi natuvenye kuvhura kukara vakaume vaKarunga.

² MoNonkango daKarunga kwa tumbura mo yihorokwa yoyinzi kuhamena vagara novakadi wovalimburukwi ava va tjilire Jehova nokupura mwendi nokukara vakaume vendi wovanene. (Resa Episarome 25:14.) Awo kwa hamena ‘kombunga zonene zonondipo’ ezi ga tumbwire Paurusa. Vantu ava wokulisiga-siga kwa kere vakaume vaKarunga.—Vahebeli 12:1.

³ Ngesi tatu ka zogera vakaume vaJehova vatatu ava va tumbura moBibeli: (1) Rutu, mufisayendi gomulimburukwi gomoMowaba (2) Hisikiya, hompa goVajuda, ntani (3) Mariya, zinyaJesus gokulinunupika. Yisinke natu lirongera ko omu va ya kere vakaume vaKarunga?

KWA LIKIDIRE EHARO LYANARUNYE

4, 5. Etokoro musinke lyedigu ga hepere kutura po Rutu, ntani morwasinke lya karerere udigu? (Tara efano pepenuno 9.)

⁴ Naomi novangumweyi zendi, Rutu naOrupa, kwa tundire moMowaba va ze koIsraeli. Morugendo rwawo, Orupa ta tokora kutengura kembo lyawo koMowaba. Nye Naomi kwa tokomenene kutengura kosirongo sawo, Israeli. Yisinke ga hepere kurugana Rutu? Age ga hepere kutura po etokoro lyedigu. Ta tengura kembo lyawo koMowaba a ka kare nekoro lyendi ndi ta kara nangumweyi zendi, Naomi, yipo va ze koBeterehema?—Rutu 1:1-8, 14.

⁵ Ekoro lyaRutu kwa kere moMowaba. Age ga vhulire kutengura kwawo, yipo va ka mu pakere mbili. Age ga divire vantu womoMowaba neraka lyawo nompo zawo. Naomi kapi ga tumbwidilire Rutu yininke nayinye oyo. Ntani Naomi ga kere nosinka asi nampo koBeterehema kapi nga ka gwana mugara ndi embo. Yipo ga tanterere Rutu a tengure koMowaba. Ngomu tuna yi mono pefano, Orupa kwa ‘tengwire kombunga zendi nokwakarunga gwendi.’ (Rutu 1:9-15) Nye Rutu kwa tokwere kusiga mbunga zendi noyikarunga yawo yoyimpempa.

6. (a) Etokoro musinke ga tulire po Rutu? (b) Morwasinke Bowasa ga tanterere Rutu asi a gwane egameno mwaJehova?

⁶ Ayo kumoneka asi Rutu kwa lirongerere kwamugara gwendi ndi kwaNaomi kuhamena Jehova. Age ga lirongere asi Jehova ga lisiga noyikarunga yomoMowaba. Age kwa here Jehova ntani ga yi divire asi Jehova ga fira kumuhara nokumukarera. Yipo Rutu ga tulire po etokoro lyewa. Age kwa tanterere Naomi asi: “Mbunga zoge, name zange ngazi kara, ano Karunga goge, name Karunga gwange nga kara.” (Rutu 1:16) Apa atu gazara eharo lyaRutu kwaNaomi, ayo kututetukisa unene. Nye unene po eharo lyaRutu lyokuhara Jehova. Eyi ya tetukisire hena Bowasa, ogu ga ya pandadekere Rutu asi a ‘gwane egameno’ mwaJehova. (Resa Rutu 2:12.) Nonkango daBowasa edi ga ruganesere kutudiworokesa omu sidiragona asi gwana egameno momavava gazinyaso. (Episarome 36:7; 91:1-4) Mokulifana, Jehova kwa poperere Rutu nokumupa mfuto zokuzulilira kepuro lyendi. Rutu kapi ga liverere ketokoro lyendi.

7. Yisinke nayi vatera ava ava likata-kata kuligava kwaJehova?

⁷ Vantu wovanzi kulironga kuhamena Jehova nye kapi ava tokora kugwana egameno mwendi. Awo kulikata-kata kuligava kwendi ntani nokugwana ekuho. Nsene nove yimo o lizuvhu ngoso, gazadara ko kweyi o likata-katere. Nkenye muntu ga hepa kutokora kukarera Jehova ndi hawe. (Josuwa 24:15) Ano etokoro lyouhunga kuna kara lyokukarera Karunga gosili. Nsene o ligava kwaJehova, ove ngoso kuna kulikida asi wa yi pura asi age nga ku gamena. Ntani age nga ku vatera o twikire ngorooro kumukarera nampili momaudigu. Eyi yiyo ga rugene Karunga kwaRutu.

“AGE NGA LIMBURUKWA” KWAJEHOVA

8. Singonona ntundiliro zaHisikiya.

⁸ Ntundiliro zaHisikiya kwa lisigire unene nezi zaRutu. Hisikiya kwa tundilire momuhoko ogu gwa ligeve kwaKarunga. Nye kapisi Vaisraeli navenye kwa twikilire kulimburukwa. GuhyaHisikiya, Ahasi, kwa kere hompa gomudona. Age kapi nga fumadeke ntembeli zaKarunga ntani kwa ninkisire vantu va karere yikarunga yoyimpempa. Ahasi nga swakerere vana vendi vamwe momundiro ngonzambo kwakarunga goyimpempa. Hisikiya nga mono yininke eyi yoyidona kutunda kounona wendi.—2 Vahompa 16:2-4, 10-17; 2 Histoli 28:1-3.

9, 10. (a) Morwasinke Hisikiya ngano ga pererere Jehova usima? (b) Morwasinke natu dilira kupa Jehova usima? (c) Morwasinke natu dilira kugazara asi ntundiliro zetu kuvhura kutokora omu ngatu ka kara komeho?

⁹ Sihonena sosidona saAhasi ngano sa ninkisire munwendi Hisikiya a pe Jehova usima. Vamwe ava va lididimikira yininke yoyidona kupitakana Hisikiya, awo kulizuvha asi kuvhura va pe Jehova “usima” ndi mbunga zendi. (Yisewe 19:3) Vamwe kulizuvha asi mapuko aga va tulire vakurona vawo meparu kuvhura kukundama eparu lyovana vawo nalinye. (Hesekiyeli 18:2, 3) Magano ogo usili ndi?

¹⁰ Eparu lyaHisikiya kuyilikida asi oyo kapisi usili. Kwato eyi nayi tu ninkisa tu pe Jehova usima. Age kapisi yige a retesa po yininke yoyidona eyi ayi horokere vantu. (Joba 34:10) Vakurona kuvhura va ronge vana vawo va rugane youhunga ndi yoyidona. (Yisewe 22:6; Vakorosi 3:21) Nye eyi kapi yina kutanta asi ntundiliro zetu kuvhura kutokora omu ngatu ka kara komeho. Morwasinke? Morwa Jehova kwa tu pa emanguruko lyokutura po matokoro, eyi kutanta asi kuvhura tu tokore kurugana youhunga ndi yoyidona. (Deuteronomium 30:19) Ngapi omu Hisikiya ga ruganesere uhwi owo?

11. Yisinke ya ninkisire Hisikiya a kare hompa gomuwa goVajuda?

¹¹ Nampili ngomu oguhwe va kere hompa gomudona, Hisikiya ga ya kere hompa gomuwa. (Resa 2 Vahompa 18:5, 6.) Age kapi ga kweme sihonena soguhwe sosidona. Nye age kwa purakenene kovaporofete vaJehova, ngwendi Jesaya naMika ntani Hoseya. Age kwa purakenene komapukururo nokomavyukiso gawo. Eyi kwa mu tumangedere a guse po maudigu aga va retesere po oguhwe. Age kwa zeresere ntembeli nokupura Karunga a gusire po vantu nonzo dawo nokuzonagura po yikarunga yoyimpempa mosirongo. (2 Histoli 29:1-11, 18-24; 31:1) Ano apa hompa gwaAsiliya Senakelibu ga va tjilisire kuhomona Jerusarema, Hisikiya kwa likidire uradi nepuro. Age kwa huguvarere mepopero lyaJehova nokunkondopeka vantu vendi. (2 Histoli 32:7, 8) Konyima, Hisikiya ga ya linenepekere, nye apa ga mu pukwilire Jehova, age ga linunupikire. (2 Histoli 32:24-26) Yosili, Hisikiya sihonena sosiwa esi natu vhura kukwama. Age kapi ga pulisilire ntundiliro zendi zi kundame eparu lyendi. Nye, kwa yi likidire asi age kaume kaJehova.

12. Ngwendi Hisikiya, ngapi wovanzi ava yi likida asi awo vakaume vaJehova?

¹² Naina, mouzuni kuna zura mo nyanya ntani vanona wovanzi kukulira mepata omu vakondi vawo ava dili kuvalikida eharo. (2 Timoteusa 3:1-5) Nampili ngomu Vakriste wovanzi va kulira momapata gangoso, awo kwa tokora kutulisa po ukaume naJehova. Ngwendi Hisikiya, awo kwa yi likida asi erero lyawo kapi ta li vhuru kukundama meho zawo. Karunga kwa tu pa emanguruko lyokutura po matokoro, ano kuvhura tu tokore kukarera Karunga nokumuyerepeka, ngwendi Hisikiya.

“AME NI MUKERELI” GWAJEHOVA

13, 14. Morwasinke situmbukira saMariya sa karerere udigu, nye ngapi omu ga tambwire nonkango daNgabiliyera?

¹³ Apa da pitire po nomvhura dononzi kutunda kwaHisikiya, mukadona gedina Mariya kwa ya kere noukaume wokulikarera naJehova ntani nositumbukira sokulikarera. Age kwa ya kere nezimo nokuhampuruka MunwaKarunga nokumurera. Jehova kwa here Mariya nokumuhuguvara yiyo ga mu pererere situmbukira sangoso. Ngapi omu ga lizuvhire kuhamena situmbukira oso?

¹⁴ Ose rorunzi kuuyunga kuhamena situmbukira sosinene esi ga gwene Mariya. Nye utjirwe musinke nampo ga kere nawo? Pasihonena, muengeli Ngabiliyera kwa tente asi Mariya nga kara nomarutu gavali ga hana kuligwanekera panyama nomugara. Nye Ngabiliyera kapi ga fatwililire ekoro lyaMariya novamusinda vendi omu ngayi horoka. Yisinke ngava gazara apa ngava yi mona? Ngapi omu nga tantera Josefa a yi pure sili asi kapi ga hondera? Ntani, age ga kere nositumbukira sosinene sokurera MunwaKarunga ngomuntu! Ose kapi twa diva yinka eyi ga kere nayo Mariya ntani eyi ga rugene konyima zapa ga uyungire naNgabiliyera. Age kwa tente asi: “Ame ni mukereli gwaHompa. Yi horokere nge tupu moomu ono tanta.”—Rukasa 1:26-38.

15. Morwasinke epuro lyaMariya lya likarerera?

¹⁵ Epuro lyaMariya kwa likarera sili. Age ga liwapaikilire kurugana nkenye eyi va mu pulire ngwendi mukadona gomupika. Age kwa huguvarere asi Jehova nga mu pakera mbili nokumupopera. Ngapi Mariya ga kere nepuro lyokupama ngoso? Ose kapi ava tu reta nepuro. Nye kuvhura tu kare nepuro nsene tu litunga po nokuhundira Karunga a tungike elituromo lyetu. (Vagarata 5:22; Vaefeso 2:8) Mariya kwa rugene unene mokupameka epuro lyendi. Ngapi omu twa yi diva? Ngesi tatu ka zogera omu ga purakenene neyi ga uyungire.

16. Yisinke ayi likida asi Mariya kwa kere mupurakeni gomuwa?

¹⁶ Omu Mariya ga purakenene. Bibeli kutanta asi ‘nkenye muntu a genderere kuzuvha, nye mokuuyunga ta liwora.’ (Jakopo 1:19) Mariya kwa kere mupurakeni gomuwa. Bibeli kulikida asi age kwa purakenene koyininke eyi nga zuvhu, unene po yininke eyi ga lirongere kuhamena Jehova. Age kwa litulilire po siruwo sokuteda ko koyininke yangoso. Sihonena simwe kuna kara pehampuruko lyomukeke Jesus, apa vasita va tanterere Mariya kuhamena nombudi edi va zuvhire komuengeli. Konyima, apa Jesus ga kere nonomvhura 12, age kwa uyungire sininke esi sa tetukisire Mariya. Moyihorokwa nayinye, Mariya kwa purakenene kweyi ga zuvhire nokuyidiworoka ntani nokuteda ko unene.—Resa Rukasa 2:16-19, 49, 51.

17. Yisinke natu lirongera kweyi ga uyungire Mariya?

¹⁷ Eyi ga uyungire Mariya. Bibeli kapi azi tumbura yoyinzi eyi ga uyungire Mariya. Yimwe eyi ga uyungire kuyigwana mwaRukasa 1:46-55. Nonkango odo kulikida asi Mariya kwa divire nawa Matjangwa goRuhebeli. Monkedi musinke? Nonkango daMariya kwa lifana nononkango dekanderero lyaHana, zinya Samwere. (1 Samwere 2:1-10) Ayo kulikida asi Mariya kwa temwininine Matjangwa yikando 20 mombuuyungiso zendi. Ayo kulikida nawa-nawa asi age kwa here kuuyunga usili ou ga lirongere kwaKaume kendi gomunene, Jehova.

18. Mononkedi musinke natu honena epuro lyaMariya?

¹⁸ Ngwendi Mariya, nose poyiruwo yimwe kuvhura tu gwane yitumbukira yokutunda kwaJehova eyi natu gazara asi udigu. Ngano tu kwame sihonena saMariya nokutambura situmbukira ntani nokuhuguvara asi Jehova nga tu vatera. Ntani kuvhura tu honene epuro lyaMariya nsene tu purakena nawa kwaJehova nokuteda ko kweyi twa lironga kumuhamena nositambo sendi. Makura ngatu vhura kutantera ko noruhafo wopeke eyi twa lironga.—Episarome 77:11, 12; Rukasa 8:18; Varoma 10:15.

19. Ngomu tuna kukwama yihonena yokulikarera yepuro, yisinke twa hepa kutokomena?

¹⁹ Ayo kulikida nawa-nawa asi Rutu naHisikiya naMariya kwa kere vakaume vaJehova, ngwendi Abirahamu. Awo kwa kere ruha ‘rombunga zonene zonondipo’ ezi za kara nositumbukira sokukara vakaume vaKarunga. Tu twikireni kukwama sihonena sawo sepuro. (Vahebeli 6:11, 12) Pokurugana ngoso, ose ngatu ndindira nononkondo mfeto zokukara vakaume vaJehova dogoro narunye!