Sa Yehova Alikondetwe Pali Ndimwe?

1. Ino basebenshi bakwe Yehova bamwi bashomeka balalinyumfwa buyani?

CILAYUMINISHA kushiba ayi Yehova alikondetwe pa bantu bakwe! Baibo ilaamba ayi: ‘Yehova alakondwa mubantu bakwe.’ (Kulu. 149:4) Nacibi boobo, cimwi ciindi inga twalefuka akutalika kuliipusha ayi, ‘Sa ncakwiila Yehova alikondetwe pali ndime?’ Baanji baambwa mu Baibo abo bakasebensela Yehova cakushomeka, cimwi ciindi bakalinga kulinyumfwa ayi taakondetwe pali mbabo.—1 Samwe. 1:​6-10; Jobo 29:​2, 4; Kulu. 51:11.

2. Ino mbantu ba buyani bapa kwaamba ayi Yehova akondwe?

² Baibo ilatondesha patuba ayi Yehova inga wakondwa pa bantu batamaninite. Munshila nshi? Tulyeelete kushoma muli Yesu Klistu akubombekwa. (Joni 3:16) Na twacita boobo tulatondesha kubantu boonse ayi twakaana kushibiibi shesu alimwi twakashomesha kucita kuyanda kwakwe Lesa. (Milimo 2:38; 3:19) Yehova alasangalala abuumbi na twaciita shintu ishi kwaamba ayi tube abushicibusa anguwe. Na twacita nsheenga twacikonsha kwaamba ayi tutolelele kucita kweelana anshotwakamushomesha, Yehova alakondwa pali ndiswe alimwi tulaba abushicibusa buyumu anguwe.—Kulu. 25:14.

3. Ino njimiipusho nshi yotatwe njeshi tucane shikumbulo?

³ Ano ino nceebonshi cimwi ciindi bamwi inga balinyumfwa ayi Lesa taakondetwe pali mbabo? Ino Yehova alatondesha buyani ayi alikondetwe pali ndiswe? Alimwi ino Mwineklistu inga wacita buyani kwaamba ayi anooshoma cakutatoonsha ayi Lesa alikondetwe pali nguwe?

SHIPA KWAAMBA AYI BAMWI BANOLINYUMFWA AYI LESA TAAKONDETWE PALI MBABO

4-5. Nabi kwaamba ayi inga twalinyumfwa ayi taakuwo mbotubete, ino nciinshi nceenga twashoma cakutatoonsha?

⁴ Kuswabo kubwanike, sobaanji twakalinyumfwawo kale ayi taakuwo mbotubete. (Kulu. 88:15) Mukwesu waliina lya Adrián wakaamba ayi: “Lyoonse ndalinyumfwa ayi taakuwo mbombete. Ndyendakalinga mwanike, ntokwiibaluka ndyendakalinga kupaila ayi bamumukwashi wangu bakekale mu Paladaiso, nabi kwaamba ayi nebo ndakalinga kutoonsha na ndaakukalaamo.” Ba Tony abo batana kukomenena mumukwashi wa Bakamboni, bakaamba ayi: “Bashali bangu tabakwe kundwitaawo kale ayi balinsuni nabi ayi balikondetwe pali ndime. Ici cakampa kulinyumfwa ayi taakuwo ncondakalinga kucita cakalinga kubasangalasha.”

⁵ Na cimwi ciindi katulinyumfwa ayi taakuwo mbotubete, tunokwiibaluka ayi Yehova mwiine ngwaakatusenya kuli nguwe. (Joni 6:44) Alabona shibotu muli ndiswe swebo nsheenga tatuboni, alimwi alitwishi kabotu mbotubete. (1 Samwe. 16:7; 2 Maka. 6:30) Aboobo inga twamushoma na waamba ayi tulayandika abuumbi.—1 Joni 3:​19, 20.

6. Ino mutumwi Paulo wakalinga kulinyumfwa buyani pashilubo nshaakacita kaatana kuba Mwineklistu?

⁶ Katutana kwiiya cancine, sobamwi twakacita shintu shibiibi isho sheenga shatupa kulinyumfwa cibiibi nabi pacecino ciindi. (1 Pit. 4:3) Nabibo Beneklistu bashomeka bamwi bacilwana lipenshi lya kusuna kucita shilubo. Sa amwebo cimwi ciindi mulalinyumfwa ayi Yehova inga taamulekeleliiwo? Na ubo mbocibete, inga mwayuminishikwa kushiba ayi basebenshi bakwe Yehova bamwi bashomeka abalo bakalinyumfwawo kale boobo. Kucakubonenaako, mutumwi Paulo wakalinga kulinyumfwa ayi taakuwo mbwaabete na wayeeya pashintu shitabete kabotu nshaakacita. (Loma. 7:24) Kwalo, Paulo wakaana kushilubo nshaakacita akubombekwa. Nacibi boobo, wakalyaamba ayi “nshiindi mutumwi nabi womwi” alimwi ayi “nebo ndeendaawo kubica.”—1 Koli. 15:9; 1 Timo. 1:15.

7. Ino nshiinshi nshotweelete kwiibaluka pashilubo nshotwakacita kale kale?

⁷ Ishiwesu wakwiculu wakatushomesha ayi alaakutulekelela na twaana. (Kulu. 86:5) Aboobo na twaana cancinencine pashilubo nshotwakacita, inga twashoma ayi Yehova nshaakaamba nshancine alimwi watulekelela.—Kolo. 2:13.

8-9. Ino inga twacita buyani kwaamba ayi tucileeke kulinyumfwa ayi tulayandika kucita shiinji kwaamba ayi tusangalashe Yehova?

⁸ Soonse tulisuni kusebensela Yehova kushika peela nkusu shesu. Nacibi boobo, bamwi inga balinyumfwa ayi inga tabacikonshi kucita shiinji kwaamba ayi Lesa akondwe pali mbabo. Nankashi waliina lya Amanda wakaamba ayi: “Liinji ndayeeya ayi kusebensela Yehova kushika peela nkusu shangu cilaamba ayi lyoonse ndayandika kucita shiinji. Aboobo liinji ndalilangila kucita shiinji kwiinda nsheenga ndacikonsha. Lyalo na ndaalilwa kucita boobo, ndayeeya ayi Yehova taakondetwe pali ndime bweenka anebo mbontakondetwe.”

⁹ Ino inga twacita buyani kwaamba ayi tucileeke kulinyumfwa ayi tulayandika kucita shiinji kwaamba ayi tusangalashe Yehova? Munokwiibaluka ayi Yehova tayumininibo pacintu comwi. Taatulangili kucita shintu nsheenga tatucikoonshi. Alalumba pashintu shoonse nshotumucitila kulilabo na twamusebensela kushika peela nkusu shesu. Alimwi amuyeeye pashakubonenaako shamu Baibo sha baabo bakasebensela Yehova camoyo woonse. Kucakubonenaako, amuyeeye pali Paulo. Wakasebensa cankusu kwamyaaka iinji kweenda mishinso ilaamfu akutalika mabungano aanji. Ano sa ndyaakatalika kwaalilwa kucita shiinji muncito yakushimikila ceebo cabukaalo mbwaakalingaamo, cilaamba ayi Lesa taakalinga kukondetwe pali nguwe? Sobwe. Wakatolelela kucita nsheenga wacikonsha, alimwi Yehova wakamupa shoolwe. (Milimo 28:​30, 31) Aswebo nsheenga twacikonsha kucita muncito yakwe Yehova inga shaaluka. Sombi ciyandika kuli nguwe nceeco citupa kwaamba ayi tumusebensele. Amuleke ano tubandike nshila shimwi Yehova mbwaatondesha ayi alikondetwe pali ndiswe.

YEHOVA MBWAATONDESHA AYI ALIKONDETWE PALI NDISWE

10. Ino inga twacita buyani kwaamba ayi tunyumfwe Yehova kaatulwiita ayi alikondetwe pali ndiswe? (Joni 16:27)

¹⁰ Wakatupa Baibo. Yehova alacana nshila shakutondesha ayi alibasuni bantu bakwe alimwi alikondetwe pali mbabo. Malembo alaamba pashiindi shobilo Lesa ndyaakalwiita Yesu ayi ngu Mwanaakwe ngwasuni abuumbi alimwi alikondetwe pali nguwe. (Mate. 3:17; 17:5) Sa inga mwasuna Yehova kumulwiita ayi alikondetwe pali ndimwe? Yehova taabandiki andiswe kuswa kwiculu, sombi alabandika andiswe kwiinda mu Maswi akwe. Inga “twanyumfwa” Yehova kaatulwiita ayi alikondetwe pali ndiswe na twabelenga maswi Yesu ngakaamba alembetwe mumabuku a Makani Abotu. (Amubelenge Joni 16:27.) Yesu wakalinga kukonkela mibo ya Baishi cakumaninina. Aboobo na twabelenga maswi Yesu ngaakalwiita bashikwiiya bakwe bashomeka akwaamba ayi alikondetwe pali mbabo nabi kwaamba ayi tabakalinga kumaninitewo, tunoyeeya ayi Yehova atolwiita ndiswe maswi ayo.—Joni 15:​9, 15.

11. Ino nceebonshi kwiinda mumapensho tacaambi ayi Yehova taakondetwe pali ndiswe? (Jemusi 1:12)

¹¹ Alatupa nshetuyandika. Yehova alisunishishi kutucafwa, mbuli kutupa nshetuyandika lwakumubili. Sombi cimwi ciindi alasuminisha kwaamba ayi shintu shibiibi shitucitikile bweenka mbwaakacita kuli Jobo. (Jobo 1:​8-11) Na tutokwiinda mumapensho teshi kwaamba ayi Yehova taakondetwe pali ndiswe. Sombi mapensho alatupa coolwe cakutondesha Yehova mbotumusuni ambotucinka manungo muli nguwe. (Amubelenge Jemusi 1:12.) Alimwi ndyeshi tukanokwiinda mumapensho, tulaakubona mbwaatusuni ambwaatucafwa kuliyumya.

12. Ino nshiinshi nsheenga tweeya kushakacitikila ba Dmitrii?

¹² Amuyeeye pashakacitikila mukwesu waliina lya Dmitrii uyo ukala ku Asia. Incito yakamana alimwi taakwe kucikonsha kucana ncito imwi kwamyeenshi iinji. Aboobo wakasalawo kutondesha ayi alacinka manungo muli Yehova kwiinda mukunosebensa cankusu muncito yakushimikila kwiinda ambwaakalinga kusebensa incito kaitana kumana. Pakeenda myeenshi iinji kaatacani ncito. Lyalo wakaciswa cakwaamba ayi wakalingabo wapabulo. Wakatalika kuyeeya ayi teshi musankwa na mushali uli kabotu alimwi wakalinga kutoonsha na Yehova alikondetwe pali nguwe. Lyalo bushiku bumwi macolesha, mwanaakwe mwanakashi wakapulinta lipepa pakalinga maswi ngotucana pa Isaya 30:15 apo paamba ayi: ‘Nkusu shanu shilaakuba mukukalikana akutondesha lushomo.’ Wakaleta lipepa ilyo pabulo mpobakalinga kulete akubalwiita ayi, “Dadi, na mwalinyumfwa cibiibi, munookwiibaluka lilembo ili.” Ba Dmitrii bakesa mukushiba ayi kwiinda mulucafwo lwakwe Yehova, mukwashi wabo wakalinga kucite shakulya shikwene, shakufwala amwakukala. Bakaamba ayi: “Cintu ncondakalinga kweelete kucita, nkutolelela kukalikana akushoma muli Lesa.” Amwebo na mutokwiinda mulipenshi lya mushobo uyu, inga mwashoma ayi Yehova alamubikilako maano alimwi alaakumucafwa kuliyumya.

13. Ino mbaani mbeenga Yehova wasebensesha kwaamba ayi atulwiite ayi alikondetwe pali ndiswe, alimwi munshila nshi?

¹³ Wakatupa bamakwesu abenankashi. Yehova alasebensesha bamakwesu abenankashi kutulwiita ayi alikondetwe pali ndiswe. Kucakubonenaako, inga wapa kwaamba ayi bamwi baambe maswi ayuminisha paciindi ndyetutoyandika kuyuminishikwa. Ishi nshoshakacitikila nankashi umwi ukala ku Asia paciindi ndyaakalinga mubukaalo buyumu abuumbi. Incito yakamana alimwi wakaciswa abuumbi. Lyalo beebaye bakacita cilubo cinene alimwi bakabakusha pa bunene. Wakaamba ayi: “Nshindakalinga kucishiiwo ishi shoonse ncoshakalinga kucitikila. Ndakayeeya ayi mpashi kuli cibiibi ncondakacita alimwi Yehova taakondetweewo pali ndime.” Nankashi wesu wakasenga Yehova kwaamba ayi amucaafwe kushiba ayi alikondetwe pali nguwe. Ino Yehova wakamucafwa buyani? Wakaamba ayi, “Bamanene bakabandika andime akuncafwa kushiba ayi Yehova acinsuni.” Ndipakeenda ciindi, wakasenga lucafwo alimwi kuli Yehova. Wakaamba ayi, “Bushiku bweenka ubo, ndakatambula nkalata kuswa ku likoto lya bamakwesu abenankashi mulibungano. Ndyendakalinga kubelenga maswi ayuminisha ngobakalemba, ndakalinyumfwa ayi Yehova wakumbula mupailo wangu.” Ncakwiila, liinji Yehova alatulwiita ayi alikondetwe pali ndiswe kwiinda mumaswi abotu bamwi ngeenga batulwiita.—Kulu. 10:17.

14. Ino ninshila nshi aimwi Yehova mbwaatulwiita ayi alikondetwe pali ndiswe?

¹⁴ Alimwi Yehova alatulwiita ayi alikondetwe pali ndiswe kwiinda mukusebensesha bashominyineesu kwaamba ayi batululike na tutoyandika kululikwa. Kucakubonenaako, muciindi ca Beneklistu bakutaanguna, mutumwi Paulo wakalembela bashominyina makalata ali 14. Mumakalata aya, Paulo wakalulika bashominyina cakuteenda mweela sombi munshila yalusuno. Ino nceebonshi Yehova wakatanjilila Paulo kwiilikamo kululika mumakalata ngaakalemba? Yehova ngu Mushali musankwa uli kabotu, alimwi alalulika bana bakwe abo ‘bamusangalasha.’ (Tus. 3:​11, 12) Aboobo na umwi watululika kusebensesha Baibo, tacaambi ayi Yehova wakalala. Sombi cilatondesha ayi acitusuni. (Ebu. 12:6) Ino nshiinshi shimwi sheenga shatucafwa kushiba ayi Yehova alikondetwe pali ndiswe?

SHIMWI SHEENGA SHATUCAFWA KUSHIBA AYI YEHOVA ALIKONDETWE PALI NDISWE

15. Ino mbaani Yehova mbwaapa mushimu usalashi, alimwi ino ici inga catucafwa kushoma nshi?

¹⁵ Yehova alapa mushimu usalashi kubaabo bamusangalasha. (Mate. 12:18) Inga twaliipusha ayi, ‘Sa ndacikonsha kutondesha shisepo shimwi sha mushimu usalashi mubuumi bwangu?’ Sa mulakalika moyo abuumbi kwiinda mbomwakalinga kamutana kushiba Yehova? Cancine ncakwaamba ayi na mweeya kunotondesha bunene shisepo sha mushimu usalashi, mulaakunoshoma cakutatoonsha ayi Yehova alikondetwe pali ndimwe!—Amubone kabokosi kacite mutwi utokwaamba ayi ‘Shisepo Shamushimu Usalashi Shileelikaawo . . . ’

16. Ino mbaani Yehova mbaapa ncito yakushimikila makani abotu, alimwi ino kushiba makani ayo kulamupa kulinyumfwa buyani? (1 Bene Tesalonika 2:4)

¹⁶ Yehova alapa ncito ya kushimikila makani abotu kubaabo bamusangalasha. (Amubelenge 1 Bene Tesalonika 2:4.) Nankashi waliina lya Jocelyn wakashoma ayi ici ncancine ndyaakalinga kushimikilako bamwi makani abotu. Bushiku bumwi ba Jocelyn ndyebakabuka, bakalinga kulinyumfwa cibiibi. Bakaamba ayi: “Ndakalinyumfwa kubula nkusu alimwi ayi taakuwo mbombete. Sombi ndakalinga kusebensa bupainiya, alimwi bushiku ubu ndakalinga kweelete kuya muncito yakushimikila. Aboobo ndakapaila akuya mukushimikila.” Bushiku ubo ba Jocelyn bakakumanya mwanakashi uli kabotu waliina lya Mary, uyo wakasumina kutalika kwiiya Baibo. Ndipakeenda myeenshi, ba Mary bakaamba ayi bakalinga kupaila kuli Yehova kwaamba ayi abacaafwe, ba Jocelyn ndyebakaya pamishaabo. Ndyebakayeeya pashakacitika, ba Jocelyn bakaamba ayi, “Ndakalinyumfwabo anga Yehova atoondwiita ayi, ‘Ndikondetwe pali ndiwe.’” Kwalo, teshi boonse beenga bakutika ku makani ngotushimikila. Sombi inga twashoma cakutatoonsha ayi Yehova alasangalala na tweelesha cankusu kushimikilako bamwi makani abotu.

17. Ino nshiinshi nshomweeya kuswa kusheesho ba Vicky nshobakaamba pacilubula? (Kulumbaisha 5:12)

¹⁷ Yehova alapa mpindu ya cilubula kubaabo bamusangalasha. (1 Timo. 2:​5, 6) Ano ino mbuyani na tucilinyumfwa ayi Yehova taakondetwe pali ndiswe nabi kwaamba ayi tulashoma mucilubula alimwi twakabombekwa? Munokwiibaluka ayi teshi lyoonse ndyeenga twashoma mbotulinyumfwa, sombi Yehova inga twamushoma. Alabona baabo bashoma mucilubula ayi mbantu baluleme alimwi alabashomesha ayi alaakubapa shoolwe. (Amubelenge Kulumbaisha 5:12; Loma. 3:26) Kukutumana kuyeeya pa cilubula kwakacafwa ba Vicky. Bushiku bumwi pesule lyakukutumana kuyeeyawo abuumbi pa cilubula, mukweelaako bakesa mukwaamba ayi: “Yehova wakalinga kunkalikila moyo kwa ciindi cilaamfu. Sombi cakalinga anga ntoolwiita Yehova ayi: ‘Inga tamutondeshi lusuno kumuntu mbuli ndime. Mulambu wa Mwanaanu inga taufweki pashilubo shangu.’” Kukutumana kuyeeya pacipo ca cilubula kwakabacafwa kutalika kulinyumfwa ayi Yehova alibasuni. Na katukutumana kuyeeya pacilubula tulaakunolinyumfwa ayi Yehova alitusuni alimwi alikondetwe pali ndiswe.

18. Ino nciinshi nceenga twashoma cakutatonsha na twatolelela kusuna Ishiwesu wakwiculu?

¹⁸ Nabi kwaamba ayi inga tweelesha cankusu kukonkela nshotweeya mumutwi uyu, cimwi ciindi inga twalefuka akutalika kutonsha na Yehova alikondetwe pali ndiswe. Na shamushobo uyu shacitika, munokwiibaluka ayi Yehova alikondetwe pa ‘baabo batolelela kumusuna.’ (Jemu. 1:12) Aboobo amutolelele kuyumya bushicibusa bwanu a Yehova akubona nshila mbwatondesha ayi alikondetwe pali ndimwe. Alimwi lyoonse munokwiibaluka ayi Yehova “taabete kulaale aswebo soonse.”—Milimo 17:27.