Mokanda ya liboso epai ya Bakorinti

10 Bandeko, nalingi bóyeba ete bankɔkɔ na biso bazalaki bango nyonso na nse ya lipata+ mpe bango nyonso bakatisaki mbu.+ 2 Bango nyonso babatisamaki na kati ya Moize na nzela ya lipata yango mpe ya mbu, 3 bango nyonso balyaki bilei ya elimo ya ndenge moko+ 4 mpe bango nyonso bamɛlaki mai ya elimo ya ndenge moko.+ Bazalaki komɛla na libanga ya elimo oyo ezalaki kokende elongo na bango, libanga yango ezalaki komonisa Kristo.+ 5 Kasi, Nzambe asepelaki te na mingi na bango, mpo abomaki bango na esobe.+

6 Makambo wana oyo ekómelaki bango ezali koteya* biso. Tosengeli te kosepela na makambo ya mabe, ndenge bango basalaki.+ 7 Tosengeli te kosambela bikeko, ndenge bamosusu kati na bango basalaki; kaka ndenge ekomamá ete: “Bato bafandaki mpo na kolya mpe komɛla. Bongo batɛlɛmaki mpo na kosakana.”+ 8 Tosengeli te kosala pite,* ndenge bamosusu kati na bango basalaki, na yango bato 23 000 kati na bango bakufaki na mokolo moko.+ 9 Tosengeli te komeka Yehova,*+ ndenge bamosusu kati na bango basalaki, mpe banyoka ebomaki bango.+ 10 Tosengeli te kozala bato oyo bamilelalelaka, ndenge bamosusu kati na bango basalaki,+ na yango anzelu oyo abebisaka abomaki bango.+ 11 Makambo wana oyo ekómelaki bango ezali koteya biso. Ekomamaki mpo ezala likebisi mpo na biso+ baoyo tokómi na bansuka ya makambo ya ntango oyo.

12 Na yango, moto oyo akanisi ete atɛlɛmi akeba ete akwea te.+ 13 Komekama nyonso oyo ekómelaka bino, ekómelaka mpe basusu.+ Kasi Nzambe azali sembo, mpe akotika te ete bómekama koleka oyo bokoki kokangela motema.+ Ntango bomekami, Nzambe akobongisela bino nzela ya kobima mpo bózala na likoki ya koyikela yango mpiko.+

14 Na yango, bandeko na ngai ya bolingo, bókima losambo ya bikeko.+ 15 Nazali koloba na bino lokola na bato oyo bazali na bososoli; bino moko bótala oyo nazali koloba. 16 Kɔpɔ ya lipamboli oyo tozali kopambola, elakisi te kosangana na makila ya Kristo?+ Limpa oyo tozali kobuka, elakisi te kosangana na nzoto ya Kristo?+ 17 Lokola limpa ezali kaka moko, biso, atako tozali mingi, tozali nzoto kaka moko,+ mpo biso nyonso tozali kosangana na kolya limpa wana moko.

18 Bótala oyo bato ya Yisraele basalaka: Ntango balyaka bambeka, basanganaka te na biloko oyo epesami mbeka na etumbelo?+ 19 Na yango, naloba na bino nini? Ete oyo epesami mbeka na ekeko ezali eloko, to mpe ekeko ezali eloko? 20 Te; kasi nazali nde koloba ete biloko oyo bikólo bapesaka mbeka, bapesaka yango mbeka na bademo, kasi na Nzambe te;+ mpe nalingi te ete bósangana* na bademo.+ 21 Bokoki te komɛla kɔpɔ ya Yehova* mpe kɔpɔ ya bademo; bokoki te kolya na “mesa ya Yehova”*+ mpe na mesa ya bademo. 22 To ‘tozali nde koyokisa Yehova* zuwa’?+ Toleki ye na makasi te, boye te?

23 Makambo nyonso epesami nzela; kasi makambo nyonso te nde ezali na litomba. Makambo nyonso epesami nzela; kasi makambo nyonso te nde elendisaka.+ 24 Moto na moto akoba koluka, litomba na ye moko te, kasi oyo ya moto mosusu.+

25 Bólya mosuni nyonso ya nyama oyo etɛkamaka na zando ya misuni, bótuna mituna te mpo na lisosoli na bino, 26 mpo “mabele mpe biloko na yango nyonso ezali ya Yehova.”*+ 27 Soki moto oyo azali mondimi te abengi bino mpo na kolya mpe bondimi kokende, bólya eloko nyonso oyo batye liboso na bino, bótuna mituna te mpo na lisosoli na bino. 28 Kasi soki moto moko alobi na bino ete: “Mosuni oyo epesami mbeka na ekeko,” na bongo bólya yango te mpo na moto yango, mpo moto moko te atungisama na lisosoli.+ 29 Nalingi koloba te lisosoli ya yo moko, kasi lisosoli ya moto mosusu. Mpo na nini lisosoli ya moto mosusu esambisa bonsomi na ngai?+ 30 Mpo ata soki napesi Nzambe matɔndi mpo na bilei mpe nazwi lotomo ya kolya yango, mpo na nini nasala bongo soki yango ekotinda basusu báloba mabe mpo na ngai?+

31 Na yango, ezala bozali kolya to komɛla to kosala eloko nini mosusu, bósalaka makambo nyonso mpo na nkembo ya Nzambe.+ 32 Bókeba ete bókóma te bato oyo bazali kobɛtisa Bayuda, Bagrɛki mpe lisangá ya Nzambe libaku,+ 33 yango nde nazali koluka kosala. Nazali koluka kosepelisa bato nyonso na likambo nyonso oyo nasalaka. Nazali koluka litomba na ngai moko te+ kasi oyo ya bato ebele, mpo bábika.+