Bolingo ya mama moko epai na bana na ye

AZALAKI bobele koyengayenga, azalaki na nsuki mikuse, kɔndɔkɔ moko oyo azalaki na nkombo te elongo na bana na ye mitano bazalaki kosala makasi mpo ete bakoka kobika kati na babalabála na ɛ́sti ya engumba New York. Asalaki ndako na ye na esika moko ya kobongisa mituka esika yango ezalaki kozika mbala na mbala. Azalaki koluka bilei kati na ekunde ya bato ya mpembeni mpo na koleisa bana na ye oyo bazalaki naino kokóla.

Makambo malingaki kobongwana na ntɔ́ngɔ́ ya mwa 29 Mársi 1996 na ngonga ya 6:06. Mɔ́tɔ moko ya mbalakaka ezikisaki esika yango ya kobongisa mituka. Ndako ya libota ya kɔndɔkɔ ezikaki. Kompanyi moko ya koboma mɔ́tɔ, Ladder Company 175 eyaki mpe mosika te ebomaki mɔ́tɔ. David Giannelli, moko na babomi-mɔ́tɔ, ayokaki kolela ya bana ya kɔndɔkɔ. Akutaki bana misato kati na bango na libándá ya ndako, mwana mosusu mwa mosika na ngambo mosusu ya balabála, mpe mwana ya mitano na ngambo mosusu ya nzela. Bana yango bazalaki mpenza mike mpo ete bákoka kokima bango moko. Giannelli amonaki ete kozika ya mwana mokomoko ekeseneki, basusu bazelaki ntango molai liboso ya kolongolama na esika bazalaki wana mama na bango azalaki komema bango moko nsima na mosusu.

Lisoló kati na zulunalo Daily News ya New York na mwa 7 Apríli 1996, lipesaki lapólo oyo mpo na bolingo mpe komibazabanza mama yango amonisaki: “Giannelli akutaki mama na esika moko ya mpembeni alɛmbi mpenza na mpasi, mpe ntango amoni ye motema na ye ebɛtaki na mbala moko. Miso na ye makangamaki mpo na milinga. Makaka na ye mazikaki mingi mpenza. Mpota ya mɔ́tɔ ezalaki mpe na elongi na ye, na matoi mpe na makolo. Giannelli azwaki ekwokolo moko. Na boboto nyonso atyaki mama elongo na bana na ye na kati. Giannelli alobaki ete ‘akokaki kútu kofungola miso na ye te. Kasi azalaki komama bana na ye moko nsima na mosusu mpe kotánga bango.’”

Ntango bakómaki na North Shore Animal League, ndako moko ya kobatela banyama, likambo yango lipesaki mawa mingi. Lisoló likóbaki boye: “Bankisi mpo na kobundisa kozika epesamaki. Tiyó moko oyo etondaki na antibiotiques etyamaki na nzoto ya mama. Antibiotiques ya mputulu etyamaki likoló ya bampota ya kozika. Na nsima atyamaki kati na bomboni ya mpema mpo na kosunga ye ete apema wana basáli ya ndako wana ya kobatela banyama bazalaki kozela na mitema likoló . . . Nsima ya ngonga 48, elombe atɛlɛmaki. Miso na ye oyo mazikaki mafungwamaki mpe minganga bamonaki mbeba moko te.”

Kanisá naino. Omimonisa lisoló ya mama yango ya mpiko kati na makanisi na yo, elongo na kobanga oyo kɔndɔkɔ ezalaka na yango mpo na mɔ́tɔ, komikɔtisáká kati na milinga, na ndako oyo ezalaki kozika mpo na kobikisa bana na ye oyo bazalaki kolela. Kokɔta mbala moko mpo na komema bana na ye esengelaki kozala likambo ya kokamwa; nzokande kosala yango mbala mitano, mbala moko na moko na mpasi ya kozika mɔ́tɔ oyo ezalaki kobakisama na makolo na ye mpe na elongi, ezali mpenza likambo ya kokamwa! Nyama yango ya mpiko epesamaki nkombo Scarlett mpamba te kozika emonisaki ete lomposo na nsé ezalaki ngóla to motane.

Ntango lisoló yango ya kosimba motema litali bolingo ya mama moko epai na bana na ye lipanzanaki na mokili mobimba longwa na North Shore Animal League, telefone ebandaki kolela ntango nyonso. Koleka bato 6 000 longwa mosika na Japon, na Pays-Bas, mpe na Afrique du sud babéngaki mpo na kotuna kolɔngɔ́nɔ́ ya Scarlett. Bato soko 1 500 basɛngaki ete bázwa Scarlett mpe bana na ye. Na nsima mwana moko akufaki.

Scarlett asimbaki mitema ya bato mingi na mokili mobimba. Ezali kokamwisa yo soki mitema ya bamilió ya bamama lelo oyo basopaka zemi to babomaka bana na bango nsima ya kobotama, babulunganisami te na ndakisa ya Scarlett oyo etali bolingo ya mama epai na bana na ye.

[Maloba mpo na kolimbola eutelo ya bafɔtɔ na lokasa 15]

North Shore Animal League