Tokelamá mpo na koyekola seko na seko

“Na motó ya moto nyonso ezali na enama moko ya kokamwa mpe ya nguya, oyo esali mpenza liboke, mpe esalaka malamu; mbala nyonso oyo bayekolaka yango lisusu, emonanaka ete makoki na yango esukaka te.”​—⁠TONY BUZAN MPE TERENCE DIXON, BAKOMI YA BABUKU YA SIANSI.

MAKAMBO boni bɔɔngɔ ya moto ekoki koyekola? Tii lelo, bato ya mayele bamitunaka motuna wana mpe bazwaka eyano te. Na buku Buku ya bɔɔngɔ (na Lingelesi), Peter Russell akomi boye: “Mbala nyonso oyo bayekolaka bɔɔngɔ ya moto, bamonaka ete makoki na yango mpe makambo oyo yango ekoki koyekola eleki mosika ndenge oyo bakanisaki liboso.”

Na ndakisa, bɔɔngɔ na biso ezali na makoki mingi mpenza na oyo etali kokanga makambo na motó. Russell alobi boye: “Ndenge bɔɔngɔ ekangaka makambo ezali te lokola tɔnɔ oyo ezali kotonda mokemoke, kasi ezali nde lokola nzete oyo ezali kobimisa bitape mpe bitape yango ezali kobimisa bitape mosusu. Likambo nyonso oyo moto akangi na motó ezali lokola etape ya sika oyo ekobimisa bitape mosusu ya sika. Na yango, makoki ya kokanga makambo na motó ekolaka se kokola. Soki okangi makambo ebele, okozala na likoki ya kokanga lisusu makambo ebele koleka.” Yango ezongisi biso na motuna na biso ya ebandeli: Mpo na nini bɔɔngɔ ya moto ezali na makoki mingi bongo, kasi esalelaka yango te?

Liteya ya evolisyo epesi ata eyano moko te ya malonga. Lokola liteya yango esimbami mpenzampenza na likanisi oyo ete bikelamu ya bomoi oyo eleki makasi nde esengeli kotikala na bomoi, yango ebulunganisaka mpenza bato oyo bakanisaka malamu mpo bayebaka te mpo na nini bɔɔngɔ ya moto ezali na makoki mingi bongo. Na elobeli ya elilingi, mpo na nini kosala motuka ya monene mpo emema kaka pau moko ya zɛlo?

Nzokande, Biblia epesi ndimbola moko ya kokitisa motema oyo ezali pɛtɛɛ mpe ebongi mpenza. Ya liboso, eyebisi biso ete baboti na biso ya liboso​—⁠Adama na Eva​—⁠basalemaki na elilingi ya Nzambe, bazalaki na likoki ya komonisa bizaleli ya kokamwa ya Nzambe. Ya mibale, elimboli ete Nzambe akelaki bango mpo bázala na bomoi​—⁠mpe na bongo báyekolaka​—⁠libela na libela. (Genese 1:​27; 2:​16, 17) Bɔɔngɔ ya moto emonisaka mokano wana ya Nzambe, atako ekomá ya kozanga kokoka mpo na lisumu oyo ekɔtelá bato.​—⁠Baloma 5:⁠12.

Kasi, mokano oyo Nzambe azalaki na yango na ebandeli, ya kokómisa mabelé Paladiso oyo etondi na bato ya kokoka oyo babangaka ye, ekokokisama. Kutu, Yehova apesaki mwana na ye mobotami-se-moko, Yesu Klisto, lokola mbeka mpo na biso mpo tókoka kozwa bomoi ya seko.​—⁠Matai 20:​28; Yoane 3:⁠16.

Bilei oyo eleki malamu mpo na makanisi

Yehova apesá biso mpe Liloba na ye oyo epemami, Biblia mosantu. (2 Timote 3:​16; 2 Petelo 1:⁠21) Lokola buku yango ya ntina mingi ekomamá na nguya ya elimo santu, ezali kolekisa ndelo te koloba ete ezali na bilei oyo eleki malamu mpo na makanisi mpe elimo ya bato. (Nzembo 19:​7-10) Kutu, Yesu ye moko alobaki ete: “Moto asengeli kobika, kaka na mampa te, kasi na liloba nyonso oyo ezali kobima na monɔkɔ ya Yehova.”​—⁠Matai 4:⁠4.

Na yango, ozala elenge to mokóló, mpo na nini te kobomba mwa ntango mokolo na mokolo mpo na kotánga ‘maloba’ kitoko ya Nzambe? Baoyo basalaka bongo mpe basalelaka makambo oyo bayekolaka, bakozwa matomba banda lelo mpe na mikolo ekoya. Ɛɛ, bakoki kozala na elikya ya kozala na bomoi mpe ya koyekola seko na seko, ndenge Nzambe akanaki yango na ebandeli. Oyo nde elikya kitoko!​—⁠Mosakoli 3:​11; Yoane 17:⁠3.

[Elilingi na lokasa 11]

Bɔɔngɔ ya moto emonisaka mokano ya Nzambe ete esalemá mpo na koyekola seko na seko

[Bililingi na lokasa 12]

Biblia ezali na bilei oyo eleki malamu mpo na makanisi na yo