Mosamalia malamu ya ntango na biso

EUTI NA MOKOMI NA BISO NA MEXIQUE

Mingi na biso tosilá koyoka lisolo ya Biblia oyo elobeli moto moko ya boboto, oyo babengaka ye mingi Mosamalia malamu. (Luka 10:29-37) Na lisese yango, Yesu Klisto alobelaki makambo nyonso oyo Mosamalia asalaki mpo na komonisa ete alingaki mozalani na ye oyo azalaki na mposa ya lisalisi. Basamalia malamu ndenge wana bazali mpe lelo? Tótalela lisolo oyo elandi, oyo euti na Mexique:

Betuel ná libota na ye bautaki mobembo, mpe mwa bakilomɛtrɛ liboso bákóma epai na bango, bamonaki likama moko ya nsɔmɔ ya motuka oyo esalemaki na balabala monene. Batɛlɛmaki mpo na kosalisa bato oyo bazwaki likama. Moko kati na basofɛlɛ oyo basalaki likama yango azalaki monganga, mpe asɛngaki Betuel ná libota na ye bámema mwasi na ye oyo azalaki na zemi mpe bana na bango mibale ya basi na lopitalo ya pene mpo básalisa bango kuna. Basalaki yango, mpe na nsima Betuel azongaki lisusu na esika oyo likama esalemaki mpo na kotala soki bato yango bazalaki na mposa ya lisalisi mosusu.

Betuel alobi boye: “Bapolisi oyo bakɛngɛlaka balabala monene bayaki wana mpe bakangaki monganga yango mpo na ankɛtɛ, mpo moto moko akufaki na likama yango. Monganga yango atunaki ngai mpo na nini nazali kosalisa ye. Nazongisaki ete tozali Batatoli ya Yehova mpe Biblia eteyaka biso ete tosengeli kolinga bazalani na biso. Nayebisaki ye amitungisa te mpo na mwasi na ye mpe bana, mpo tokobatela bango malamu. Na mai na miso, azalaki na botɔndi mingi, mpe apesaki ngai biloko na ye ya valɛrɛ mpo nabombela ye yango.”

Betuel ná libota na ye bamemaki mwasi ya monganga wana mpe bana na ndako na bango mpe babatelaki bango mwa mikolo. Betuel asalelaki libaku wana mpo na kobanda koyekola na bango Biblia. Ntango monganga abimaki, azalaki na botɔndi mingi mpo na Batatoli ya Yehova mpe akómaki kosepela na bango mingi. Alakaki ete bakokoba koyekola Biblia ntango bakozonga epai na bango mpe alobaki ete soki mwasi na ye aboti mwana mobali, bakopesa ye nkombo Betuel. Betuel alobi lisusu boye: “Lelo oyo, nsima ya mbula mibale, tokendaki kotala bango. Nakamwaki mpenza, mpo bazali koyekola Biblia mpe mwana na bango ya mobali bapesá ye nkombo Betuel.”

[Elilingi na lokasa 13]

Betuel