Boklisto ya solo ekozala ndenge nini lobi?

BATO nyonso bakondimela boklisto ya solo to ekokufa? Boklisto ya solo etikalaki pɛto lokola mwinda oyo ezali kongɛnga na kati ya mokili oyo ya molili to te? Mituna oyo etali mpe biso lelo oyo.

Yesu asalelaki lisese moko ya pɛtɛɛ mpe amonisaki ete ntango kaka akolona milona ya boklisto ya solo, monguna Satana akoya mpe kosala mosala na ye. (Matai 13:24, 25) Na yango, ezalaki te bizaleli ya bato nde ebongolaki boklisto ya solo na boumeli ya mwa bankama ya bambula nsima ya mosala ya Yesu awa na mabelé. Ezalaki monguna moko, Satana, nde asalelaki mayele wana mabe. Lelo oyo, mangomba ya boklisto ezali se kokoba na bambeba na yango ya kala mpe ezali kobuka mbuma mabe na yango.​—2 Bakolinti 11:14, 15; Yakobo 4:4.

Mayele mabe mpo na kobebisa boklisto ya solo

Yesu asakolaki ete mateya na ye ekobebisama. Alobaki boye: “Bokonzi ya likoló ekómi lokola moto moko oyo alonaki milona ya malamu na elanga na ye. Wana bato bazalaki kolala mpɔngi, monguna na ye ayaki mpe alonaki matiti mabe na katikati ya blé, mpe alongwaki.” Likambo ya kokamwa, ntango basali ya moto yango bayebisaki ye likambo mabe oyo esalemaki mpe basɛngaki ye ndingisa ya kolɔkɔta matiti mabe yango, alobaki na bango boye: “Te; noki te wana bozali kolɔkɔta matiti mabe, bokopikola blé elongo na yango. Bótika yango nyonso mibale ekola esika moko tii na bobuki mbuma; mpe na eleko ya kobuka mbuma nakoyebisa babuki-mbuma ete, Liboso bólɔkɔta matiti mabe mpe bókangisa yango mabokemaboke mpo na kotumba yango, na nsima bóbanda koyanganisa blé na kati ya ndako na ngai ya kobomba biloko.”​—Matai 13:24-30.

Ndenge Yesu ye moko alimbolaki, na lisese na ye, moto oyo alonaki blé na elanga elakisi Yesu, mpe milona oyo alonaki elakisi baklisto ya solo. Monguna oyo alonaki matiti mabe katikati ya blé ezali “Zabolo.” Matiti mabe emonisi batyoli-mibeko, bapɛngwi oyo bakosaka ete bazali basaleli ya Nzambe. (Matai 13:36-42) Ntoma Paulo abakisaki makambo mosusu mpo na komonisa ndenge likambo yango esengelaki kosalema. Alobaki boye: “Nayebi ete nsima ya kokende na ngai, bambwa mabe ya zamba bakokɔta na kati na bino mpe bakosalela etonga makambo na boboto te, mpe uta na kati na bino mpenza mibali bakobima mpe bakoloba makambo oyo etɛngamá mpo na kobenda bayekoli bálanda bango.”​—Misala 20:29, 30.

Boklisto ya solo ebebisami

Lisese ya Yesu mpe makambo oyo ntoma Paulo asakolaki ekokisamaki? Ɛɛ. Bato oyo balingá bokonzi bakómaki kotambwisa lisangá ya Yesu mpe kosalela yango mpo na kokokisa bamposa na bango moko. Liboso, Yesu ayebisaki bayekoli na ye ete: “Bozali bato ya mokili te.” (Yoane 15:19) Kasi, bato wana oyo balingá bokonzi basalaki boyokani na bakonzi mpe babimisaki mangomba oyo ezalaki kosungama na Leta; mangomba yango ekómaki na nguya makasi mpe na bozwi mingi. Mangomba yango ezalaki koteya “makambo oyo etɛngamá.” Na ndakisa, bazalaki koteya bato básambelaka Leta mpe bándima ata kokufa na bitumba mpo na yango. Ezali mpo na yango nde bato oyo bazalaki komibenga baklisto bakendeki na Palestine kobundisa Bamizilma mpe babomaki bato oyo bango bazalaki komona ete bazali bapakano. Lisusu, babundaki bitumba na “bandeko” na bango ya lingomba mpe babomaki bango. Na ntembe te, bamikɔtisaki na politiki mpe balingaki bazalani na bango te.​—Matai 22:37-39; Yoane 15:19; 2 Bakolinti 10:3-5; 1 Yoane 4:8, 11.

Emonani ete na boumeli ya bankama ya bambula, mangomba oyo bamibengaka baklisto bamonisaki te boklisto ya solo. Yango wana, ndenge tomonaki na masolo oyo eleki, mangomba yango ezali se kokabwana na mangomba ya mikemike, komikɔtisa na politiki mpe kotyola mibeko ya Nzambe. Misala wana mabe euti na boklisto ya solo te, kasi nde na boklisto ya lokuta oyo Zabolo alonaki. Mangomba yango ya lokuta ezali kokende wapi? Ndenge Yesu amonisaki yango na lisese na ye, mangomba ya lokuta ekokufa kaka mpo ekozanga bandimi te. Kasi, ekosambisama mpe ekobomama.

Baklisto ya solo bazali kongɛnga na kati ya molili

Kasi, liboso ya kolɔkɔta mpe kobebisa “matiti mabe,” elingi koloba boklisto ya lokuta, lisese ya Yesu emonisaki ete likambo mosusu esengelaki kosalema. Na boumeli ya bankama ya bambula, “matiti mabe” yango ekolaki mingi mpe ezipaki “blé,” elingi koloba boklisto ya solo. Kasi, Yesu alobaki ete bakokabola blé ná matiti mabe na eleko ya “bobuki mbuma” mpe alobaki ete bobuki mbuma yango emonisi “bosukisi ya ebongiseli moko ya makambo.” Alobaki lisusu ete: “Na ntango yango bayengebene bakongɛnga makasi lokola moi.” (Matai 13:39-43) Bilembeteli emonisi ete tokómi na mikolo ya nsuka ya ebongiseli ya makambo ya ntango oyo banda Etumba ya Liboso ya mokili mobimba, oyo esalemaki esili koleka mbula 90. (Matai 24:3, 7-12) Maloba wana oyo Yesu alobaki na nsuka ya lisese na ye, yango mpe ekokisamaki?

Baklisto ya solo bakabolami na “matiti mabe” to boklisto ya lokuta. Batatoli ya Yehova bazali ‘kongɛnga makasi lokola moi,’ bazali kosalisa bato mosusu báyeba Yehova, Nzambe ya solo. Batatoli batyolaka mitinda na ye te. Kasi, mbala mingi bato oyo bakómaka Batatoli basalaka mbongwana monene na bomoi na bango mpo bátosa mitinda ya boklisto oyo ezali na Biblia.

Batatoli ya Yehova basalaka makambo ya kosepelisa to masano te na makita na bango, kasi bateyaka nde Biblia kozanga kosɛnga mbongo. Longola yango, balinganaka makasi mpe bazalaka mpenza baninga, bizaleli oyo bakómaka na yango mpo bayekolaka Biblia. Bandimaka ete Nzambe akokokisa mokano na ye ya ebandeli, akokómisa mabelé oyo paladiso mpe bato ya bopɔlɔ bakofanda wana. Kasi, mokili esengeli libosoliboso kopɛtolama na bopusi mabe ya mangomba ya lokuta oyo Biblia ebengi Babilone Monene. Ndenge bisakweli ya Biblia emonisi yango, mosika te Yehova akosala mbongwana wana monene.​—Matai 5:5; Emoniseli 18:9-10, 21.

Ntango bato ya botosi bakosikolama na bokosi ya mangomba ya lokuta, bato nyonso oyo bakofanda awa na mabelé bakosangana na boklisto ya solo mpo na kosambela Yehova. Ezali mpenza elikya kitoko mpo na boklisto ya solo oyo Yesu alonaki. Paladiso lokola oyo ya Edene ekozongisama na mokili moko ya kimya mpe mangomba oyo ezalaki kobimisa bokabwani ekozala te mpo na kobimisa lisusu mobulu kati na bato.

[Elilingi na lokasa 7]

“Monguna na ye ayaki mpe alonaki matiti mabe.”​—Matai 13:25

[Bililingi na lokasa 8]

Tobengi yo na esengo nyonso na Ndako ya Bokonzi ya Batatoli ya Yehova epai bateyaka Biblia kozanga kosɛnga mbongo

[Elilingi na lokasa 9]

“Na nsima bóbanda koyanganisa blé na kati ya ndako na ngai ya kobomba biloko.”​—Matai 13:30