Azali kosepela na “bolongi elongo na Mwana-Mpate”

NA MOKANDA moko oyo Ndeko Carey Barber akomaki na 1971, alobelaki mbula 50 oyo asilaki kolekisa na mosala ya Nzambe; akomaki boye: “Bambula oyo nalekisi na mosala ya Yehova ezalaki malamu mingi. Kosala elongo na basaleli na ye; kobatelama liboso ya bato mabe ya mokili ya Satana; elikya ya bolongi elongo na Mwana-Mpate, Yesu Klisto; komona bolingo ya Yehova, nyonso wana epesaka kimya mpe esengo oyo ebatelaka motema mpe elendisaka elikya ya bolongi ya nsuka.”

Mbula 6 na nsima, Ndeko Barber, oyo azalaki mopakolami na elimo, akómaki na Lisangani ya Mikóló-Bakambi ya Batatoli ya Yehova. Na boumeli ya mbula 30 oyo elandaki, akobaki kosala na mokano ya ‘kolonga elongo na Mwana-Mpate.’ Akokisaki mokano yango na ndenge atikalaki sembo tii liwa na ye mokolo ya lomingo 8 Aprili 2007; azalaki na mbula 101.​—1 Bakolinti 15:57.

Ndeko Barber abotamaki na Angleterre na 1905 mpe azwaki batisimo na engumba Winnipeg, na Canada, na 1921. Mbula mibale na nsima, batindaki ye ná lipasa na ye Norman na Brooklyn, na New York, mpo na kopesa mabɔkɔ na mosala moko ya sika. Na ntango wana, basaleli ya Yehova bazwaki bibongiseli mpo bákóma kobimisa bango moko mikanda mpo na kosakola nsango malamu ya Bokonzi na “mabelé mobimba.” (Matai 24:14) Moko na misala ya liboso oyo bapesaki Ndeko Barber ezalaki ya kotambwisa mwa masini moko ya konyata mikanda. Na kati ya biloko oyo babimisaki, ezalaki na badosye ya makambo oyo bandeko bazalaki kosamba na Tribinale Monene ya États-Unis. Na nsima, Ndeko Barber akómaki kosala na biro oyo etalelaka mosala ya kosakola.

Formasyo oyo Ndeko Barber azwaki na mosala yango esalisaki ye mingi ntango akómaki mokɛngɛli-motamboli na 1948; azalaki kotambwisa mayangani mpe kotala bandeko na masangá ya wɛsti ya États-Unis. Alobaki ete azalaki kosepela mingi na mopɛpɛ ya libándá ntango azali kosakola. Mosala yango esalisaki Ndeko Barber ayebana na bandeko mingi. Lokola azalaki mayele mpe na molende na mosala ya kosakola, yango esalisaki ye mingi ntango akɔtaki na kelasi ya 26 ya Gileadi, eteyelo ya Watchtower mpo na mateya ya Biblia. Na kelasi yango, ayebanaki na Sydney Lee Brewer, ndeko-mwasi moko oyo autaki na Canada. Ntango kelasi esilaki, babalanaki mpe basalaki mwa mobembo mpo na kotala masangá ya Chicago, na etúká ya Illinois. Mwasi na ye asalisaki ye mingi mpe alendisaki ye mingi na boumeli ya mbula koleka 20 oyo asalaki lokola mokɛngɛli-motamboli.

Bato oyo bazwaki libaku ya kokutana na Ndeko Barber mpe baoyo bayebaki ye ntango azalaki mokɛngɛli-motamboli to na boumeli ya mbula 30 oyo azalaki na Lisangani ya Mikóló-Bakambi babosanaka te masukulu na ye oyo ezalaki kosimba motema. Tozali mpenza kosepela na ‘bolongi na ye elongo na Mwana-Mpate.’