Mituna ya batángi

Bomoi na biso etángamá?

Ntango moto moko akufi, bato mosusu balobaka ete mokolo na ye ekoki. Basusu balobaka ete Nzambe nde akataka mokolo oyo tosengeli kokufa. Lisusu, bato yango bamonaka ete tokoki te kokima makambo oyo ekómelaka biso na bomoi. Yo mpe okanisaka bongo?

Okoki komituna boye: ‘Soki tokoki kosala eloko moko te mpo na kobongola makambo ya bomoi na biso, soki Nzambe asilá kobongisa ndenge likambo mokomoko ekosuka, mpo na nini tobondelaka? Lisusu, soki makambo nyonso ya bomoi na biso esilá kotángama, mpo na nini tozwaka bibongiseli mpo na komibatela? Mpo na nini kolata nkamba ya komibatela ntango tozali na motuka? Mpo na nini koboya kotambwisa motuka nsima ya komela masanga?’

Biblia epekisi makambo wana oyo etyaka bomoi ya moto na likama. Na esika ya koteya ete makambo nyonso etángamá, Makomami esɛngaki Bayisalaele bámibatelaka. Na ndakisa, basengelaki kotonga mwa efelo ya libateli na nsamba ya bandako na bango. Ntina na yango ezalaki ya kopekisa moto akwea. Kasi, mpo na nini Nzambe apesaki mobeko yango soki abongisaki ete moto akwea na nsamba mpe akufa?​—Deteronome 22:8.

Ezali boni mpo na baoyo bakufaka na makama to na makambo mosusu oyo bakokaki kosala eloko te mpo na kokima yango? Tokoloba ete yango ezalaki “mokolo” na bango ya kokufa? Te, Mokonzi Salomo, oyo akomaki mpe Biblia amonisi biso ete “ntango ná makambo oyo ekanami te ekwelaka [biso] nyonso.” (Mosakoli 9:11, NW) Na yango ata soki likambo moko ekómeli moto na mbalakaka, tosengeli koyeba ete likambo yango ebongisamaki te.

Nzokande, bato mosusu bamonaka ete Salomo azali bongolabongola, mpo liboso alobaki boye: “Eloko nyonso ezali na ntango na yango, ɛɛ likambo na likambo na ntango na yango na nse ya lola: ntango ya kobotama mpe ntango ya kokufa.” (Mosakoli 3:1, 2, NW) Kasi, Salomo azalaki nde koloba ete makambo nyonso etángamá? Tiká tótalela maloba na ye malamumalamu.

Salomo azalaki te koloba ete mokolo ya kobotama ya moto mpe ya liwa na ye etángamá. Kutu, amonisaki ete kobotama mpe kokufa ezali lokola makambo mosusu nyonso ya bomoi. Ya solo, na bomoi moto akutanaka na makambo ya malamu mpe ya mabe. Abakisaki boye: “Ezali na ntango . . . ya kolela mpe ntango ya kosɛka.” Salomo amonisaki ete makambo yango oyo emonanaka mingi mpe makama mosusu ezali lokola makambo mosusu nyonso ya bomoi ya moto mpe abengaki yango makambo “ya nse ya lola.” (Mosakoli 3:1-8; 9:11, 12) Na yango, mpo na kosukisa amonisaki ete tosengeli te komipesa na makambo ya mokolo na mokolo ya bomoi mpe kobosana Mozalisi na biso.​—Mosakoli 12:1, 13.

Atako Mozalisi na biso ayebi malamu eloko oyo babengi bomoi mpe liwa, atambwisaka makambo ya bomoi na biso te. Biblia ezali koteya ete Nzambe apesi biso nyonso elikya ya kozala na bomoi ya seko. Kasi, akangaka biso na makasi te ete tóndima yango. Kutu, Liloba na ye elobi boye: “Tiká moto nyonso oyo alingi, akamata mai ya bomoi ofele.”​—Emoniseli 22:17.

Ya solo, tosengeli kolinga ‘kokamata mai ya bomoi.’ Na yango, tokoki koloba te ete bomoi na biso etángamá. Bikateli na biso mpe makambo oyo tozali kosala, yango nde ekokata makambo.