Kosala na bomoko ekolisaka na elimo

KOSALA na bomoko ezali na ntina mingi mpo na baoyo balingi libota na bango ezala makasi na elimo. Ntango Yehova akelaki mobali ná mwasi ya liboso, abendaki likebi na likambo etali kosala elongo. Eva asengelaki kozala “mosungi” ya Adama. (Gen. 2:18) Na libala, mwasi ná mobali basengeli kosala elongo mpe kopesanaka mabɔkɔ. (Mos. 4:9-12) Mpo na kokokisa mokumba oyo Yehova apesá baboti mpe bana, esɛngaka kosala na bomoko.

Losambo na libota

Barry ná Heidi bazali na bana mitano. Bamonaka ete kopesana mabɔkɔ mpo na koyekola Biblia na libota esalisaka bango bákola na elimo. Barry alobi boye: “Mbala na mbala napesaka bana mikumba mikemike mpo básala na ntango ya boyekoli ya libota. Nasɛngaka bango bálobela mwa masolo oyo euti na Lamuká! Tobongisaka mpe ndenge ya kobanda lisolo na mosala ya kosakola.” Heidi alobi boye: “Mokomoko na biso azalaka na mikano ya elimo oyo alingi kokokisa, mpe mbala na mbala, na boyekoli ya libota, totalaka soki tozali kokokisa mikano yango to te.” Mwasi yango ná mobali na ye bamonaka mpe ete kolekisa bampokwa mosusu kozanga kotala televizyo epesaka mokomoko na kati ya libota libaku ya kotánga.

Makita ya lisangá

Mike ná Denise babɔkɔlaki bana minei. Ndenge nini bazwaki matomba na kosala na bomoko? Mike alobi boye: “Ntango mosusu, ata soki tosali programɛ ya malamu ndenge nini ezalaki kaka kosimba te, kasi tomonaki ete kosala na bomoko esalisaki biso tókómaka na makita na ngonga ya malamu.” Denise alobi boye: “Ntango bana bazalaki kokola, mokomoko azalaki na mosala na ye. Kim, mwana na biso ya mwasi, azalaki kolamba mpe kobongisa mesa.” Mwana na bango Michael alobi boye: “Mokolo nyonso ya mibale, likita ezalaki kosalema na ndako na biso. Tozalaki kokɔmba ndako, kopangusa yango mpe kobongisa bakiti.” Matthew, mwana na bango mosusu, alobi boye: “Na mikolo ya makita, tata azalaki kosala nyonso mpo azonga na ndako na ngonga ya malamu mpo na kobongisa biso mpo na makita.” Litomba nini bazwaki?

Milende yango ezalaki na ntina

Mike alobi boye: “Na 1987, ngai ná Denise tobandaki mosala ya mobongisi-nzela. Na ntango yango, bana na biso misato bazalaki naino na ndako. Mibale kati na bango bakómaki mpe babongisi-nzela, mpe bamosusu bakɔtaki na mosala ya kotonga Betele. Esengo mosusu oyo libota na biso ezwaki ezalaki ya kosalisa bato ndenge na ndenge 40 bámipesa mpe bázwa batisimo. Tozwaki mpe libaku ya kopesa mabɔkɔ na mosala ya botongi, ata mpe na bamboka mopaya.”

Ya solo, kosala elongo na kati ya libota ebotaka mbuma malamu mpenza. Okoki kokanisa ndenge mosusu oyo bokoki kosala elongo na kati ya libota na bino? Bokoki kozala na elikya ete kosala elongo ekosalisa libota na bino ekola lisusu na elimo.

[Elilingi na lokasa 28]

Kobongisa liboso ndenge ya kobanda masolo na mosala ya kosakola esalisaka moto ayeba kosakola