Ezali nde na moto oyo ayokaka mabondeli?

“Nazalaki kondima te ete Nzambe azalaka. Kasi ata bongo, nazalaki ntango mosusu kobondela. Nazalaki koyeba mpenza te soki moto moko azalaki koyoka mabondeli na ngai, kasi nazalaki na mposa ete moto moko ayoka yango. Nazalaki na esengo te mpe bomoi na ngai ezalaki na ntina te. Nazalaki kobanga kondima ete Nzambe azali mpo nazalaki kokanisa ete kaka bato mpamba nde bandimelaka Nzambe.”​—PATRICIA,a IRLANDE.

YO MPE ozalaka na makanisi ndenge moko na Patricia? Okobaka kobondela ata soki ondimaka mpenza te ete Nzambe azalaka? Soki ezali bongo, ozali yo moko te. Talá makambo oyo elandi.

◼ Ntango batunaki bato 2 200 ya ekólo Angleterre soki bandimaka ete ezali na Nzambe oyo akelá mokili mpe ayokaka mabondeli, kaka bato moke (22%) nde bandimaki ete azali. Ata bongo, bato mingi (55%) na kati ya bato yango babondelaka na bantango mosusu.

◼ Ankɛtɛ moko oyo esalemaki epai ya bato 10 000 ya bakontina minei emonisaki ete na kati ya bato oyo balobaki ete Nzambe azalaka te, bato mosusu kati na bango (30%) balobaki ete babondelaka.

Mpo na nini batyaka ntembe?

Allan, moto moko ya ekólo Angleterre, alobi boye: “Nazalaki koloba liboso ete nandimelaka Nzambe te mpo nazalaki kokanisa ete mangomba esalemá kaka mpo na kokonza bato mpe koluka mbongo. Nazalaki mpe kokanisa boye: Soki Nzambe azalaka, makambo ya kozanga bosembo elingaki kozala mingi boye te. Kasi, na bantango mosusu, nazalaki kofanda kimya mpe kobondela ‘moto moko oyo nayebi te’. Nazalaki mpe komituna boye: ‘Nautá wapi?’”

Moto nyonso oyo akanisaka boye, azalaka na bantina oyo etindaka ye andima te ete Nzambe apesaka eyano na mabondeli. Bato mingi batyaka ntembe mpo bazwi te biyano na mituna lokola oyo:

◼ Mozalisi azalaka?

◼ Mpo na nini mbala mingi mangomba nde esalaka makambo mingi ya mabe?

◼ Mpo na nini Nzambe atiki ete bampasi ezala?

Soki ozwi biyano na mituna wana, okobanda kobondela na motema na yo mobimba?

[Maloba na nse ya lokasa]