‘Tólanda ntango nyonso oyo ezali malamu’
1 Bomoi ya moklisto esɛngaka ‘kolanda ntango nyonso oyo ezali malamu epai na bato nyonso.’ (1 Tes. 5:15, NW) Na ntango ya mayangani na biso ya etúká, tozalaka na mabaku mingi ya kosala ata mwa likambo moko ya malamu mpo na basusu. Na bantango wana, bato mingi batalaka biso, mpe bato nyonso oyo tokutanaka na bango to tosololaka na bango bazwelaka biso makanisi ya mabe to ya malamu na kotalela ndenge oyo tosalelaka bango makambo. Mpo tóbatela lokumu na biso ya Batatoli ya Yehova, tosengeli komonisa na misala na biso ete ‘tokumisaka bato ya lolenge nyonso.’ (1 Pet. 2:17, NW) Yango ezali mpe kosɛnga ete ‘tótyaka likebi, na kobanzabanza kaka na makambo na biso moko te, kasi na kobanzabanza mpe na makambo ya bamosusu.” (Filp. 2:4, NW) Tótalela ndenge nini tokoki kosalela toli yango na likambo etali kobongisa bisika ya kolala mpo na bandeko na ntango ya liyangani.
2 Na ntango ya liyangani, mbala mingi esɛngaka ete bandeko mingi oyo bautaka mosika bálala epai ya bandeko mosusu. Bamosusu baponaka ntango mosusu kokende kofanda epai ya bandeko na bango ya mosuni mpo bákoka koyebisa bango nsango malamu, ata mpe kobengisa bango na liyangani. Na ntembe te, basengeli kozwa longonya mpo na yango. (1) Ezala esika nini toponi kofanda, ekozala malamu te tótya makambo na biso oyo ezali kosɛnga mbongo na motó ya moto oyo ayambi biso. Liboso ya kokende na liyangani, ekozala malamu tóbongisa libela oyo nyonso tokozala na mposa na yango, na ndakisa biloko ya kolya mpe mbongo ya kofuta transport soki esɛngi bongo. (2) Ekozala malamu te soki bandeko bayambi biso epai na bango mpo na liyangani tóumela mikolo mosusu na nsima soki ntina ya malonga ezali te. Soki tolandi toli oyo, tokomonisa ete tozali kosepela na boboto oyo bamoniseli biso. (3) Tóbosana te ete tozali bapaya, mpe tókɔta te na makambo na bango mpe liboso ya kosalela biloko na bango, tósɛnga ndingisa. Tosengeli kolanda etinda oyo ezali na Matai 7:12.
3 Tóteya bana na biso ndenge ya kosala malamu: Na bantango mosusu, bana oyo mikóló bakɛngɛlaki bango malamu te na esika ya liyangani, bapesaki ndakisa ya malamu te. (Mas. 29:15) Baboti mosusu batikaka bana na bango básala oyo balingi, kozanga kokɛngɛla bango. Yango wana, bana mosusu batambolaka mpambampamba na ntango programɛ ezali koleka, balandaka te mpe basalaka makɛlɛlɛ ezangi ntina. Esengeli te kotikela bango nzela bákendaka twalɛti mpambampamba ntango masolo ezali kosalema. Bana basengeli kozala esika moko na baboti na bango, mwana na mwana asengeli kozala na Biblia na ye mpe na mwa kaye ya moke mpo na kozwa banɔti; yango ekosalisa bango báyoka mpe báyekola kobanga Yehova. (Det. 31:12) Ata na ndako oyo bayambi libota moko na ntango ya liyangani, baboti basengeli kokɛngɛla bana na bango, bana basengeli komonisa bizaleli oyo esɛngami na bilenge baklisto; na ndenge yango, bakokumisa nkombo ya Yehova.
4 Baboti, liboso ya kokende na liyangani, ezali malamu bófanda elongo na bana na bino mpe bótalela lisusu bizaleli oyo baklisto basengeli kozala na yango bisika nyonso mpe ntango nyonso. (Ef. 6:4) Na ndakisa, bómonisa bango ete bolingo ya solosolo ya baklisto “emitambwisaka na ndenge ya nsɔni te, elukaka matomba na yango moko te, esilikaka te.” (1 Kol. 13:5, NW) Mikóló bakoki lisusu kopesa kilo na maloba yango soki bazali kopesa ndakisa malamu oyo ekoki komonana na bato nyonso. Bana, bokoki kolanda oyo ezali malamu soki bozali kotosa baboti na bino, soki bozali komonisa limemya mpo na ndako mpe biloko ya moto oyo ayambi bino, mpe soki bozali komitya na esika ya bato oyo bazali na bino esika moko. (Kols. 3:20) Ntango biso nyonso tozali kosala makasi lokola moto moko mpo na kosalela bato nyonso malamu, tozali ‘kokómisa kitoko mateya ya Mobikisi na biso, Nzambe, na makambo nyonso.’—Tito 2:10, NW.
5 Etamboli na biso ya malamu ebotaka mbuma malamu epai ya baoyo nyonso bazali kotala biso, ata mpe epai ya baoyo basepelaka na biso te ezala mpo na ntina nini. Na likambo nyonso oyo tokosala na esika ya liyangani mpe na engumba oyo liyangani ezali kosalema—ezala kotambola na balabala, kolya elongo na baninga, kominanola na ndako ya moto oyo ayambi biso, to komeka kopesa litatoli ya libaku malamu—elobeli mpe misala na biso ya boklisto esengeli komonisa ete tolingi kolanda oyo ezali malamu.
[Etanda na lokasa 4]
Kobosana te:
■ Zalá na motema molai mpe na limemya mpo na bandeko na yo mpe mpo na moto oyo ayambi yo.
■ Landá malako oyo epesami na baoyo bazali na mikumba, mpo na bolamu ya bayangani nyonso.
■ Koluka te ete moto oyo ayambi yo akabelaka yo kaka to atika yo ofanda lisusu mwa mikolo epai na ye nsima ya liyangani.
■ Landelá malamumalamu makambo oyo bana na yo bazali kosala.