Kokisá mposa na yo ya elimo
1 Liyangani ya etúká “Basakoli ya Bokonzi ya molende” oyo tolingi kosala, ekopesa biso libaku malamu mpenza ya kokokisa mposa na biso ya elimo. Kaka ndenge ezalaka mpo na bilei kitoko, programɛ yango ekoleisa biso na elimo na “maloba ya kondima.” (1 Tim. 4:6) Ekopesa biso likoki ya kopusana pene na Yehova. Mpe tokoki kolikya kozwa toli mpe bilendiseli oyo ekosalisa biso tóyika mpiko soki tokutani na mikakatano na bomoi na biso. Yehova alaki biso ete: “Nakopesa yo mayele mpe nakolakisa yo nzela ekoki na yo kotambola. Nakopesa yo toli wana nazali kotala yo.” (Nz. 32:8) Topambolami mpenza ndenge azali kotambwisa biso na bolingo nyonso na bomoi na biso! Tótalela sikoyo mwa makambo oyo tokoki kosala mpo tózwa mpenza litomba na mateya ya liyangani yango.
2 Tosengeli kobongisa motema na biso: Mokomoko na biso azali na mokumba ya kobatela motema na ye ya elilingi. (Mas. 4:23) Yango esɛngaka ete tómipesa disipilini mpe tómitalela na ndenge ebongi mpenza. Liyangani ezali ntango ya kokanisa malamumalamu likoló ya boyokani na biso na Yehova, ezali mpe ntango ya “kotalatala na kati ya mobeko ya kokoka oyo ezali ya bonsɔmi.” Mpo na kobongisa motema na biso ekoka ‘kondima ete liloba epikama,’ tosengeli kolela epai na Yehova ete amekameka biso mpo atala ‘nzela nyonso mabe’ oyo ezali kati na motema na biso, oyo esengeli kosembolama, mpe akamba biso na “nzela ya seko.”—Yak. 1:21, 25, NW; Nz. 139:23, 24.
3 Tóyoka mpe tókanisa malamumalamu: Ntango Malia atyaki likebi mingi na makambo oyo Yesu azalaki koloba, Yesu akumisaki ye na maloba oyo: “Malia aponi oyo malamu, mpe ekobɔtɔlama na ye te.” (Luka 10:39, 42) Soki biso mpe tozali na elimo ya ndenge wana, tokopesa nzela te ete makambo ezangi ntina elongola likebi na biso. Tokosala nyonso mpo tózwa esika ya kofanda mpe tótya likebi na boumeli ya programɛ mobimba. Tokosolola to mpe tokotambola mpambampamba te mpe tokokeba ete tólongola te likebi ya bato mosusu na nzela ya batelefone na biso ya mabɔkɔ, bamasini ya kokanga fɔtɔ mpe bakamera.
4 Ntango tozali kolanda masukulu, ezali malamu kozwa banɔti ya mikuse mpo esalisa biso tólanda malamu lolenge oyo lisolo mokomoko ezali kosalema. Tosengeli koyokanisa mateya oyo tozali koyoka na oyo toyebi. Kosala bongo ekosalisa biso tókanga ntina na yango mpe tóbosana yango te. Ntango tokotalela lisusu banɔti na biso, tosengeli kosala yango nde na mokano ya kosalela makambo oyo tokomaki. Mokomoko na biso akoki komituna boye: ‘Ndenge nini makambo yango etali boyokani na ngai na Yehova? Mbongwana nini nasengeli kosala na bomoi na ngai? Ndenge nini nakoki kosalela makambo oyo na boyokani na ngai elongo na basusu? Ndenge nini nakoki kosalela yango na mosala ya kosakola?’ Tósolola elongo na basusu makanisi oyo tosepeli mpenza na yango. Kosala bongo ekosalisa biso tólanda kobatela maloba ya Yehova ‘na kati ya motema na biso.’—Mas. 4:20, 21.
5 Tósalela makambo oyo toyekoli: Nsima ya liyangani moko ya etúká, ndeko moko oyo azalaki na liyangani yango alobaki ete: “Programɛ yango etalelaki mpenza mokomoko na biso, elendisaki moto na moto atalela ezalela ya motema na ye mpe oyo ya bato ya libota na ye, mpe esalisaki moto na moto ayeba kopesa lisalisi oyo esengeli na bolingo nyonso mpe na kolanda lolenge oyo Makomami esɛngi. Esalisi ngai nayeba lisusu malamu ete nazali na mokumba ya kosalisa mpenza lisangá.” Ntembe ezali te ete mingi kati na biso basilá mpe koyoka ndenge wana. Kasi, ntango tosilisi liyangani, tosengeli kosuka kaka te na koyoka ete tolendisami mpe tozwi lisusu makasi. Yesu alobaki ete: “Soki boyebi makambo wana, esengo na bino soki bozali kosala yango.” (Yoa. 13:17, NW) Kozanga kozela, tosengeli kosalela makambo oyo tomoni ete etaleli mpenza biso. (Filp. 4:9) Soki tolingi kokokisa mpenza mposa na biso ya elimo, tosengeli kosala bongo.
[Etanda na lokasa 5]
Manyolá likoló na makambo oyo oyoki:
■ Ndenge nini yango etali boyokani na ngai na Yehova?
■ Ezali kotinda ngai na kosala nini na boyokani na ngai na basusu?
■ Ndenge nini nakoki kosalela yango na bomoi na ngai mpe na mosala na ngai ya kosakola?