Biso basakoli tosengeli kobondelaka
1. Likambo nini ezali na ntina mingi mpo tókokisa mosala na biso?
1 Tokoki te kokokisa mosala ya kosakola na makasi na biso moko. Yehova apesaka biso makasi mpo na kokokisa mosala yango. (Flp. 4:13) Atindaka baanzelu na ye mpo na kosalisa biso tókutana na bampate. (Em. 14:6, 7) Yehova nde akolisaka mboto ya solo oyo tolonaka mpe tosopelaka mai. (1 Ko. 3:6, 9) Ezali na ntina mingi ete biso basakoli tóbondelaka Tata na biso ya likoló!
2. Tokoki kobondela mpo na makambo nini?
2 Mpo na biso moko: Tosengeli kobondelaka mbala nyonso oyo tobimi na mosala ya kosakola. (Ef. 6:18) Tokoki kobondela mpo na makambo nini? Tokoki kobondela mpo tósepela na teritware na biso mpe tózala na mpiko. (Mis. 4:29) Tokoki kosɛnga Yehova asalisa biso tókutana na bato ya mitema sembo oyo tokoki koyekola na bango Biblia. Soki batuni biso motuna, tokoki kosala libondeli ya mokuse na nse ya motema mpo na kosɛnga Yehova asalisa biso tópesa eyano ya malamu. (Neh. 2:4) Tokoki mpe kosɛnga bwanya mpo tókoba kotya mosala ya kosakola na esika ya liboso. (Yak. 1:5) Longola yango, Yehova asepelaka ntango tozali kotɔnda ye mpo na libaku malamu ya kozala basakoli.—Kol. 3:15.
3. Ndenge nini kobondela mpo na basusu esalisaka mpo mosala na biso ya kosakola ekende liboso?
3 Mpo na basusu: Tosengeli mpe kobondelaka mpo na basusu, ata mpe kotánga bankombo ya baninga na biso basakoli na mabaku oyo ebongi kosala yango. (Yak. 5:16; Mis. 12:5) Maladi ezali kopekisa yo osakolaka mingi? Boye bondeláká mpo na baninga na yo basakoli oyo bazali nzoto kolɔngɔnɔ. Yebá ete mabondeli oyo ozali kosala mpo na bango ekoki mpenza kosalisa bango! Ebongi mpe kobondela mpo ete bakonzi ya Leta bázwa te bikateli oyo ekobebisa mosala na biso ya kosakola, mpo bandeko na biso ‘bákoba kofanda na kimya mpe na mobulu te.’—1 Tim. 2:1, 2.
4. Mpo na nini tosengeli kotingama na mabondeli?
4 Kosakola nsango malamu na mabele mobimba oyo bato bafandi ezali mokumba monene mpenza. Soki tozali ‘kotingama na mabondeli,’ Yehova akosalisa biso tókokisa yango.—Rom. 12:12.