Kotosa ntango oyo bapesi mpe kokabola yango malamu

ATAKO eloko ya libosoliboso balukaka na masukulu ezali mateya ya malamu, kotosa ntango oyo bapesi yo ezali mpe na ntina mingi. Toyebi ngonga oyo makita na biso esengeli kobanda mpe ngonga oyo esengeli kosila. Mpo na kotosa ngonga wana, ezali kosɛnga ete moto na moto oyo azali na lisolo atosa ntango oyo bapesi ye.

Na ntango Biblia ezalaki naino kokomama, bato bazalaki na ndenge na bango ya kotalela makambo mpe yango ekeseni na ndenge oyo bato ya bamboka mingi ya mikolo oyo batalelaka makambo. Na ntango wana ya kala, soki otuni moto tokómi ngonga nini, akopesa yo ngonga ya sikisiki mpenza te, na ndakisa, bazalaki koloba boye: tokómi “pene na ngonga ya misato” to ezali “soki ngonga ya zomi.” (Mat. 20:3-6; Yoa. 1:39) Bazalaki mpenza te komitungisa mpo na kotya ngonga ya sikisiki mpo na misala na bango ya mokolo na mokolo. Na bamboka mosusu lelo oyo mpe bato bamitungisaka te mpo na ngonga.

Nzokande, ata soki mimeseno ya mboka na biso to bato ya mboka na biso basepelaka mpenza te kolandela ngonga, biso tokoki kozwa bolamu soki toyekoli kolandela yango malamumalamu. Ntango bandeko mingi bazwi masolo ya kosala, esengeli bátosa ntango oyo epesami mpo na lisolo mokomoko. Na likambo etali ntango oyo bapesi biso mpo na masolo tozwi, tokoki kosalela etinda oyo elobi ete: “Tiká makambo nyonso esalema na ndenge ya lokumu mpe na molɔngɔ.”​—1 Kol. 14:40.

Oyo okoki kosala mpo na kotosa ntango oyo bapesi yo. Mpo na kotosa ngonga, esengeli komibongisa malamumalamu. Baoyo bamonaka mpasi mpo na kotosa ngonga ezalaka mingimingi bato oyo bayaka kosala masolo na bango kozanga komibongisa malamu. Ekoki kozala ete batyelaka mayele na bango motema koleka ndelo. To mpe bazelaka kaka soki bamoni ntango etikali moke nde babandi komibongisa. Mpo na kotosa ntango oyo bapesi yo, ezali kosɛnga naino oyeba motuya ya mokumba oyo ozwi mpe ondima kobongisa yango malamumalamu.

Okosala nini soki bapesi yo mokumba ya kotánga? Ya liboso, talá toli oyo ezali na Liteya 4 tii na Liteya 7, oyo elobeli ndenge ya kotánga kozanga kokakatana, kopema, konyata maloba ya ntina, mpe kobimisa makanisi ya ntina polele. Na nsima, salelá toli oyo bapesi kuna ntango ozali kotánga na mongongo makasi makambo oyo basɛngaki yo otánga. Talá soki okosala ntango boni. Soki ntango oyo bapesi yo eleki, ekosɛnga otánga mwa nokinoki lisusu. Tángá noki na bisika oyo ezali na ntina mingi mpenza te, pemá mpe kende malɛmbɛ na bisika oyo makanisi ya ntina mingi ezali mpo na kobimisa yango polele. Salá bongo mbala na mbala. Soki okómi kotánga kozanga kokakatana, ekozala mpasi te mpo na kotosa ngonga.

Okosalela plan na lisolo na yo? Soki bongo, ezali na ntina te okoma makambo ebele ebele to makambo nyonso oyo okoloba, kaka mpo olekisa ngonga te. Na Liteya 25, omonaki ndenge ya kosalela plan malamu. Simbá makambo oyo mitano: (1) Bongisá mateya oyo omoni ya malamu, kasi ezala ebele ebele te. (2) Fandisá makanisi ya ntina polele na kati ya bɔɔngɔ na yo, kasi kokanga bafraze mobimba na motó te. (3) Komá na plan na yo ntango boni okosala na eteni mokomoko ya lisolo na yo to ntango boni okolekisa banda na ebandeli ya lisolo tii na esika boye to boye. (4) Ntango ozali kobongisa lisolo, luká koyeba makanisi nini okoki kotika soki omoni ete obandi kolekisa ngonga. (5) Meká lisolo yango na ndako mbala na mbala.

Komeka lisolo na yo mbala na mbala ezali na ntina. Ntango ozali komeka, talá soki ozali kotosa ngonga ya eteni mokomoko. Zongelá lisolo na yo mbala na mbala tii ntango okobanda kosilisa yango kozanga kolekisa ntango oyo bapesi yo. Koluka te kolongola makanisi ebele na lisolo. Bombá mwa miniti mosusu pembeni, mpamba te koloba liboso ya bato esɛngaka maloba mwa mingi koleka na ndako, ntango ozali komeka yo moko.

Ndenge ya kokabola lisolo na yo na biteni. Mpo na koyeba kotosa ntango, ezali kosɛnga kokabola malamu lisolo na yo na biteni. Eteni ya katikati esengeli kozwa ntango mingi. Yango nde esika makanisi ya ntina ya lisolo na yo ezali. Maloba ya ebandeli ya lisolo na yo esengeli kozwa kaka mwa ntango oyo ekoki mpo na kokokisa makambo misato oyo balobeli na Liteya 38. Eteni ya katikati esengeli kozala molai mingi te, mpo soki eleki molai okozanga ntango ya kosukisa lisolo na ndenge ya malamu, ndenge Liteya 39 emonisi yango.

Soki okosala makasi mpo na kotosa ntango, okomona ndenge lisolo na yo ekobonga mpe ekomonisa ete ozali komemya bandeko mosusu oyo bakosala masolo nsima na yo mpe ozali komemya lisangá mobimba.