Yoká likebisi!

MOKOLO ya 3 Yuni 1991, lokito moko makasi eyokanaki na Ngomba Fugen na Japon mpe pɔtɔpɔtɔ ya mɔ́tɔ makasi na mputulu ebandaki kobima na ngomba yango. Pɔtɔpɔtɔ ezalaki kokita na ngomba mpe ebomaki bato 43. Bato mosusu, atako bakufaki te, kasi bazikaki makasi. Bamosusu bazalaki kobelela ete: “Bópesa ngai mai, bópesa ngai mai.” Bapolisi na bato oyo basalaka mosala ya koboma mɔ́tɔ basalaki nokinoki mpo na kosalisa bango.

SOKI pɔsɔ mibale liboso na yango, mwa mɔ́tɔ ezalaki komonana na nsɔngɛ ya Ngomba Fugen; elingi koloba ete bakonzi na bato oyo bazalaki kofanda pembeni, bayebaki ete likama ezali koya. Pɔsɔ mobimba na mwa mikolo liboso likama ebima, bayebisaki bato bálongwa pembeni ya ngomba mpe bákende kofanda mosika. Mokolo moko liboso mɔ́tɔ ebanda kobima na ngomba yango, bapolisi batyaki ndelo moko mpe basɛngaki na bapanzi-nsango bákatisa ndelo yango te. Kasi, mokolo oyo ngomba ebandaki kobimisa mɔ́tɔ, bato 43 oyo bakufaki bazalaki na esika ya likama.

Mpo na nini bato wana nyonso bakɔtaki mpe bafandaki na esika oyo epekisamaki? Basali-bilanga mosusu oyo batikaki bandako na bango bazongaki lisusu mpo na kotala biloko mpe bilanga na bango. Bato misato oyo bayekolaka makambo etali bangomba oyo ebimisaka mɔ́tɔ bazalaki na mposa bápusana penepene mpenza mpo na komona malamu ndenge makambo ekoleka mpo na kokolisa mayele na bango. Bapanzi-nsango mosusu mpe bato oyo bakangaka fɔtɔ bakatisaki ndelo oyo etyamaki mpamba te bazalaki na mposa ya komona malamu ndenge makambo ekoleka mpe bázala bato ya liboso oyo bakolobela yango. Basɔfɛlɛ misato ya taksi oyo bamemaki bapanzi-nsango bazalaki mpe kuna. Bapolisi mpe bato oyo babomaka mɔ́tɔ bazalaki kuna mpo na kosala mosala na bango. Moto na moto azalaki na likambo na ye oyo etindaki ye akatisa ndelo oyo etyamaki, mpe nsuka na yango, ememelaki bango liwa.

Ozali na esika ya likama?

Ekoki kozala ete tofandi pembeni ya ngomba oyo ebimisaka mɔ́tɔ te. Kasi, tokosala nini na ntango toyebi ete likama moko monene ezali koyela biso, likama oyo ekoki kozwa bato nyonso na mokili? Mokanda moko ya bisakweli oyo tokoki kotyela motema elobi na biso ete likama moko ezali koya na mokili mobimba. Elobeli mpo na likama yango ete: “Moi ekoyinda mpe sanza ekopesa pole na yango te mpe minzoto ikokweakwea longwa na likoló, mpe nguya na lola ikotetema. . . . Mabota nyonso ya mokili bakolela.” (Matai 24:29, 30) Balobi ete “mabota nyonso ya mokili” ekomona makambo oyo ekosalema na likoló mobimba. Na maloba mosusu, esakweli yango elobeli likama moko oyo ekobimela mokomoko na biso.

Mokanda yango ya bisakweli oyo tokoki kotyela motema ezali nde Biblia. Kutu, lisolo mobimba epai bavɛrsɛ oyo totángi ezali, elimboli makambo oyo ekosalema liboso ete likama yango eya. Lokola mwa mɔ́tɔ mpe bilembo mosusu esalisaki bakonzi ya mboka Shimabara na koyeba bisika oyo bato bakoki kozala na likama, Biblia eyebisi biso makambo mingi oyo elakisi ete tosengeli kokeba mpe komibongisa mpo na kobika. Tokoki kozwa liteya na likambo oyo esalemaki na Ngomba Fugen mpe komona ete likama ezali koya, ezali lisɛki te.

[Maloba mpo na kolimbola eutelo ya bafɔtɔ na lokasa 3]

Yomiuri/Orion Press/Sipa Press