Bózala bato bakoki mpenza mpe bazali na kondima makasi

Mateya oyo eyei na ntango ebongi mpo na kosunga bilenge

EPAFALA, moklisto moko ya ekeke ya liboso, akendaki mobembo na Loma. Kasi, mbala mingi azalaki kokanisa mboka na ye Kolose, oyo ezalaki na Asie Mineure. Asakolaki nsango malamu kuna mpe, na ntembe te, asalisaki bato mosusu ya Kolose na kokóma bayekoli ya Yesu Klisto. (Bakolose 1:7) Epafala azalaki komibanzabanza mingi mpo na baninga na ye bandimi na Kolose, mpamba te, na Loma epai azalaki, ntoma Paulo akomelaki bango boye: “Epafala . . . atindeli bino mbote, [azali] ntango nyonso kobunda mpo na bino na kati ya mabondeli na ye, ete nsukansuka bózala bato oyo bakoki mpenza mpe bazali na kondima makasi na mokano mobimba ya Nzambe.”​—Bakolose 4:12, NW.

Lelo oyo mpe, batata mpe bamama baklisto babondelaka mingi mpo na bolamu ya elimo ya bana na bango. Baboti yango basalaka makasi mpo na kosalisa bana na bango bálinga Nzambe na mitema na bango mpenza, mpo kondima na bango ekóma makasi.

Bilenge baklisto mingi basɛngaki lisalisi mpo na kolonga mikakatano oyo bazali kokutana na yango na kelasi mpe na bisika mosusu. Elenge mwasi moko ya mbula 15 alobaki boye: “Mikakatano ezali se kobakisama. Bomoi ezali mpenza kobangisa. Tozali na mposa ya lisalisi!” Mposa ya bilenge yango ekokisamaki? Nzambe ayokaki mpenza mabondeli ya baboti oyo babangaka ye? Ɛɛ! Na lisalisi ya “moombo ya sembo mpe ya mayele,” bazwaki mateya euti na Biblia. (Matai 24:45) Lisolo oyo elobeli mwa mikanda oyo esalisaki bilenge mingi na kozala “bato oyo bakoki mpenza mpe bazali na kondima makasi.” Tólobela naino mikanda yango mosusu.

“Bótala . . . Batatoli ya sika 15 000!”

Na sanza ya Augusto 1941, bato 115 000 bayanganaki na Saint Louis, na etúká ya Missouri, na États-Unis, na liyangani ya etúká ya Batatoli ya Yehova oyo ezalaki monene koleka mayangani nyonso oyo basalaki liboso. Mokolo ya nsuka ya liyangani yango, “Mokolo ya Bana,” bana soki 15 000 bafandaki liboso ya ebaelo mpo na kolanda malamu Joseph Rutherford oyo asalaki lisolo oyo ezalaki na motó ya likambo ete “Bana ya Mokonzi.” Na nsuka ya lisolo na ye, Ndeko Rutherford, na ntango wana azalaki na mbula 71, alobaki na mongongo ya tata oyo azali kosolola na bana na ye ete:

“Bino bana nyonso oyo bondimi . . . kotosa Nzambe mpe Mokonzi oyo ye aponi, nasɛngi na bino bótɛlɛma.” Bana nyonso batɛlɛmaki mbala moko. Ndeko Rutherford alobaki ete: “Bótala, batatoli ya sika ya Bokonzi koleka 15 000!” Bato babɛtaki mabɔkɔ makasi. Molobi abakisaki ete: “Bino nyonso oyo bokosala nyonso oyo bokoki mpo na koyebisa basusu bokonzi ya Nzambe . . . , nasɛngi bino bóloba Ɛɛ.” Bana balobaki na mongongo makasi ete “Ɛɛ!” Na nsima alakisaki mokanda ya sika oyo ezalaki na motó ya likambo ete Bana, mpe bato babɛtaki mabɔkɔ, lisusu mingi mpenza.

Nsima ya lisolo wana ya kitoko, bilenge basalaki molɔngɔ moko molai mpo na koleka na ebaelo, epai Ndeko Rutherford azalaki kopesa mokomoko na bango mokanda yango ya sika. Bato batangisaki mpisoli ya esengo. Ndeko moko oyo azalaká na liyangani yango alobaki boye: “Kaka moto oyo azali na motema ya libanga nde alelaki te na esengo ya komona bilenge bazali [komonisa] elikya mpe kondima mobimba epai ya Yehova, Nzambe na bango.”

Na liyangani monene wana, bilenge 1 300 bazwaki batisimo mpo na komonisa ete bamipesaki na Yehova. Mingi na bango bazali sembo tii lelo oyo. Bamosusu bazali kosunga na masangá na bango, bamosusu bazali kosala na Babetele, to bazali kosala lokola bamisionɛrɛ na mikili ya bapaya. Ya solo, “Mokolo ya Bana” mpe mokanda Bana esimbaki mpenza mitema ya bilenge mingi!

“Ezali lokola nde eyaka kaka na ntango oyo ebongi mpenza”

Na boumeli ya bambula ya 1970, Batatoli ya Yehova babimisaki mikanda mosusu misato oyo esimbaki mitema ya bamilio ya bilenge. Ezali mikanda oyo: Boyoka Moteyi Monene, Votre jeunesse​—Comment en tirer le meilleur parti, na Mokanda mpo na Masolo ya Biblia. Na 1982, zulunalo Lamuká! ekómaki kobimisa masolo mpo na bilenge na motó ya likambo ete “Mituna oyo bilenge batunaka . . . ” Bilenge mpe mikóló basepelaki na masolo yango. Elenge moko ya mbula 14 alobaki ete: “Butu nyonso napesaka Nzambe matɔndi mpo na masolo yango.” Elenge mosusu ya mbula 13 alobaki boye: “Nalingaka masolo yango, ezali lokola nde eyaka na ntango oyo ebongi mpenza.” Baboti na bankulutu na masangá balobaka ete masolo yango eyaki na ntango ebongi mpe epesaka matomba mingi.

Ntango tokómaki na 1989, masolo soki 200 na molɔngɔ ya masolo “Mituna oyo bilenge batunaka . . . ” esilaki kobima na Lamuká! Na liyangani ya etúká ya mbula wana oyo ezalaki na motó ya likambo ete “Bizaleli ya moto na Nzambe,” babimisaki mokanda Mituna oyo bilenge batunaka​—Biyano bibongi. Mokanda yango elendisaki bilenge ete bábatela kondima makasi? Bilenge misato bakomaki boye: “Mokanda yango esalisi biso na kososola mikakatano na biso mpe koyeba ndenge ya kolonga yango. Tozali kopesa bino matɔndi mingi na ndenge bozali komibanzabanza mpo na bolamu na biso.” Bilenge mosusu mingi ya mokili mobimba bazali na makanisi yango.

“Esilisi nzala na biso”

Na 1999, Batatoli ya Yehova babimisaki esaleli mosusu mpo na koteya bilenge na ntango oyo ebongi: ezali kasɛti-video Mituna oyo bilenge batunaka​—Ndenge nini nakoki kozwa baninga ya malamu? (na Lingelesi) Bato basepelaki na yango mpenza. Elenge moko ya mbula 14 alobaki boye: “Kasɛti yango ekɔteli ngai mpenza na motema.” Mama moko oyo azali kobɔkɔla bana na ye ye moko alobaki boye: “Tokobanda kosalela kasɛti yango mbala na mbala na boyekoli na biso.” Elenge mwasi moko alobaki ete: “Ezali mpenza esengo na koyeba ete Moninga na biso ya motema, Yehova, alingaka mpe amibanzabanzaka mpo na bilenge oyo bazali na kati ya lisangá na ye na mokili mobimba.”

Kasɛti yango ememi matomba nini? Yoká oyo bilenge balobaki: “Esalisaki ngai nakeba na baninga na ngai, esalisi ngai namesana mpe na bato mosusu na kati ya lisangá, mpe nazala moninga ya Yehova.” “Esalisaki ngai na koboya kolanda makambo ya baninga na ngai.” “Epesi ngai lisusu makasi na ekateli na ngai ya kosalela Yehova na makasi na ngai mobimba.” Mobali moko na mwasi na ye bakomaki boye: “Topesi bino matɔndi oyo euti mpenza na motema na biso mpo na ‘bilei’ yango. Esilisi nzala na biso.”

Moombo ya sembo mpe ya mayele akokisi mpenza mokumba na ye ya kopesa bilei ya elimo na ntango oyo ebongi na baoyo bakondima yango. Ezali mpe esengo mingi na komona ndenge oyo mateya yango oyo euti na Makomami ezali kosalisa bilenge “bázala bato oyo bakoki mpenza mpe bazali na kondima makasi na mokano mobimba ya Nzambe”!