Ozali komikundola?

Osepelaki na botángi ya banimero ya Linɔ́ngi ya Mosɛnzɛli oyo euti kobima? Na bongo, talá soki okoki kopesa biyano na mituna milandi:

• Polyglotte de Complute ezalaki nini, mpe mpo na nini ezalaki na ntina mingi?

Ezalaki Biblia oyo ezalaki na minɔkɔ ebele, kasi na buku kaka moko, oyo ekabwanaki na milɔngɔ; esangisaki makomi ya malamu mpenza ya Liebele, ya Grɛki, ya Latin, mpe mwa ndambo ya makomi ya Aramɛyɛ. Polyglotte ezalaki buku mosusu ya sika oyo ebakisamaki na milende oyo ezalaki kosalema mpo na kobongisa mpe kobatela makomi ya Grɛki mpe ya Liebele.​—15/4, nkasa 28-31.

• Ndenge nini bato bakoki kosepelisa Nzambe?

Lokola Yehova azali mpenza moto ya solo, azali na likoki ya kokanisa, kosala, mpe azali na bizaleli mpe na motema, azali na makambo oyo alingaka mpe oyo aboyaka. Azali “Nzambe ya esengo” mpe azalaka na esengo ya kokokisa mokano na ye. (1 Timote 1:11; Nzembo 104:31) Ntango tozali koyeba malamumalamu ndenge oyo Nzambe atalelaka makambo, tokoyeba mpe oyo tokoki kosala mpo na kosepelisa motema na ye.​—15/5, nkasa 4-7.

• Mpo na nini Davidi atikaki ete mwasi na ye Mikala azala na ekeko?

Ntango Mokonzi Saulo alukaki koboma Davidi, Mikala akamataki ekeko moko, oyo mbala mosusu ezalaki lokola moto na molai mpe na monene, mpe atyaki yango likoló ya mbeto mpo Davidi azwa ntango ya kokima. Ekoki kozala ete azalaki na ekeko wana mpo azalaki kotyela Nzambe motema mobimba te. Ekoki kozala ete Davidi ayebaki te ete Mikala azalaki na ekeko yango to ayebaki kasi, lokola azalaki mwana ya Mokonzi Saulo, atikaki ete azala na yango. (1 Ntango 16:25, 26)​—1/6, nkasa 29.

• Na mobeko oyo Nzambe apesaki mpo na makila, alingaki kobenda likebi na biso na likambo nini?

Na likambo oyo Nzambe alobaki mpo na makila na nsima ya Mpela, na Mibeko ya Moize mpe na mobeko oyo ezali na Misala 15:28, 29, alingaki kobenda likebi na biso na mbeka oyo epesamaki na makila ya Yesu. Masumu na biso ekoki kolimbisama mpe kimya ekoki kozonga kati na biso na Nzambe kaka na lisalisi ya makila ya Yesu. (Bakolose 1:20)​—15/6, nkasa 14-19.

• Biblia elobeli makamwisi boni ya Yesu?

Baevanzile elobeli makamwisi 35 ya Yesu. Kasi motángo nyonso ya makamwisi na ye, ná oyo Biblia elobeli te, eyebisami te. (Matai 14:14)​—15/7, lokasa 5.