“Lisalisi na ngai ekouta epai ya Yehova”

Bilenge oyo basanzolaka Yehova bazalaka na bomoi ya malamu

ELENGE mobali moko alobaki boye: “Nalingi kozala na bomoi ya malamu!” Kasi ndenge nini elenge akoki kozala na bomoi ya malamu? Biblia epesi eyano ya polele: “Awa ozali nanu elenge, kanisaka Moto oyo asalá yo.”​—Mosakoli 12:1, Bible na lingala ya lelo oyo.

Kosanzola Yehova mpe kosalela ye ezali kaka mpo na mikóló te. Samwele, mwana ya Elekana ná Hana, azalaki naino mwana moke ntango akendaki kosalela Yehova na tabenakle. (1 Samwele 1:19, 20, 24; 2:11) Mwana moko ya mwasi Moebele alakisaki kondima na ye epai ya Yehova ntango apesaki likanisi ete Namana, mokonzi ya basoda ya Sulia akende epai ya mosakoli Elisa mpo abikisa ye na maladi ya maba. (2 Mikonzi 5:2, 3) Nzembo 148:7, 12 elendisi bilenge mibali mpe basi básanzola Yehova.a Yesu azalaki kaka na mbula 12 ntango amonisaki ete azalaki kosepela mpenza na mosala ya Tata na ye. (Luka 2:41-49) Ntango bana mosusu bamonaki Yesu na tempelo, lokola bateyaki bango Makomami, babelelaki boye: “Bikisá, tobondeli yo, Mwana ya Davidi!”​—Matai 21:15, 16.

Bilenge oyo bazali kosanzola Yehova lelo oyo

Lelo oyo, bilenge mingi oyo bazali Batatoli ya Yehova basepelaka na makambo oyo bateyaka bango mpe babangaka te koyebisa yango bato mosusu, ezala na kelasi to na bisika mosusu. Tótalela bandakisa mibale.

Na Grande-Bretagne, Stephanie, elenge moko ya mbula 18 mpe baninga na ye ya kelasi bazalaki kolobela likambo ya kolongola zemi mpe makambo mosusu. Molakisi alobaki ete bato mingi bakómi kondima kolongola zemi mpe ata elenge mwasi moko te akoki koloba ete ezali mabe. Ntango baninga na ye nyonso ya kelasi bandimaki makanisi ya molakisi, Stephanie amonaki ete asengeli komonisa likanisi na ye oyo euti na Biblia. Stephanie azwaki libaku ya koloba ntango molakisi atunaki ye likanisi na ye. Atako azalaki kobanga mwa moke na ebandeli, Stephanie asalelaki libaku yango mpo na komonisa likanisi ya Biblia. Alobaki makambo oyo ezali na Exode 21:22-24 mpe alimbolaki ete soki ezali malamu te kosala mabe na mwana oyo azali na libumu, boye, kolongola zemi eyokani te na mokano ya Nzambe.

Molakisi yango, oyo azali mpe mokonzi na lingomba, atángá naino vɛrsɛ yango te. Litatoli ya Stephanie epesaki ye nzela ya kosolola masolo ndenge na ndenge ya Biblia na baninga na ye ya kelasi. Elenge moko ya mwasi akómá kozwa nimero nyonso ya Linɔ́ngi ya Mosɛnzɛli mpe ya Lamuká!, bilenge mosusu mibale bakendaki na liyangani ya etúká ya Batatoli ya Yehova mpo na kotala Stephanie ntango azwaki batisimo.

Na ekólo Suriname, na Amerika ya Sudi, Vareta, mwana moko ya mbula 6 azwaki libaku ya kosanzola Nzambe ntango molakisi na ye akutanaki na likambo moko oyo maloba ya Biblia ekokaki kobɔndisa ye mpo na yango. Molakisi yango alekisaki mikolo misato azalaki koya te; ntango ayaki, atunaki bana-kelasi soki bayebi mpo na nini azalaki koya te. Batunaki ye ete, “Ozalaki maladi?” Molakisi alobaki ete: “Te, yaya na ngai ya mwasi akufaki, mpe nazali na mawa mingi. Yango wana bósala makɛlɛlɛ te.”

Na nsima ya midi, ntango Vareta azongaki na ndako, wana mama na ye azalaki kolala mwa moke, ye azalaki kotalatala mitó ya makambo ya bazulunalo ya kala. Nsukansuka, amonaki Linɔ́ngi ya Mosɛnzɛli ya 15 Yuli 2001 oyo ezalaki na motó ya likambo “Bomoi mosusu ezalaka nsima ya liwa?” Asepelaki mingi, alamusaki mama na ye mpe alobaki ete, “Mama, Mama, talá! Namoni zulunalo oyo ezali kolobela liwa, nakopesa yango molakisi na biso!” Batindelaki molakisi zulunalo yango ná mokanda ya Vareta. Akomaki boye: “Zulunalo oyo ezali mpo na yo. Na Paladiso, okokutana na yaya na yo ya mwasi mpo Yehova akosaka te. Alaki ete akosala paladiso, na likoló te, kasi awa na mabelé.” Molakisi amonisaki botɔndi mpo na masolo yango oyo elendisaki ye mingi.

Bazali kobongisa avenire na bango

Yehova azali “Nzambe ya esengo,” mpe alingaka ete bilenge bázala na esengo. (1 Timote 1:11) Liloba na ye elobi boye: “Yo elenge, sepela na bolenge na yo. Zala na esengo na tango ozali nanu elenge.” (Mosakoli 11:9, Bible na lingala ya lelo oyo) Yehova amonaka mosika mpe ayebaka mbuma oyo misala ya malamu to ya mabe ekoki kobota. Yango wana, Liloba na ye epesi bilenge toli oyo: “Kanisá [Mozalisi] na yo na mikolo ya bolenge na yo, naino mikolo mabe eyei te, naino [bambula] ekómi te wana okolobaka ete, Nazali na esengo na yango te.”​—Mosakoli 12:1.

Yehova alingaka ete bilenge básepela mpenza na bomoi na bango oyo ezali likabo na ye. Soki bilenge bazali kobosana Nzambe te mpe bazali kosanzola ye, bakozala na bomoi ya malamu mpe ya esengo. Ata ntango bakutani na mikakatano, bakoki koloba na elikya ete: “Lisalisi na ngai ekouta epai ya Yehova.”​—Nzembo 121:2, NW.

[Maloba na nse ya lokasa]

[Likanisi ya paragrafe na lokasa 9]

“Bósanzola [Yehova] awa na mokili, . . . bino bilenge mpe baseka lokola.”​—NZEMBO 148:7, 12

[Etanda na lokasa 8]

YEHOVA ASUNGAKA BILENGE

“Yo ozali elikya na ngai, ee Nkolo; nandimi yo, ee [Yehova], longwa na bolenge na ngai.”​—Nzembo 71:5.

“[Nzambe] oyo azali kotondisa bomoi na yo na oyo ezali malamu; azali ntango nyonso kozongisa bolenge na yo lokola oyo ya mpɔngɔ.”​—Nzembo 103:5, NW.