“Nsango malamu” esakolami na bisanga ya Australie oyo ezali mosika na nɔrdi

YESU alobaki boye: “Nsango malamu oyo ya bokonzi ekosakolama na mabele mobimba esika bato bafandi.” (Matai 24:14) Batatoli ya Yehova batosaka mitindo yango ya Yesu mpe balukaka komemela bato nsango ya Biblia, ata soki bato yango bafandi wapi. (Matai 28:19, 20) Basalaka mosala yango na bolingo na bango moko, na bantango mosusu bakutanaka na mikakatano mpe basalelaka mbongo na bango moko.

Na ndakisa, Nathan ná Carly babongisaki bomoi na bango mpo bákende kosakola epai ya bato oyo bafandi mosika na bisanga oyo ezali na détroit de Torres. Na 2003, momonisi moko ya biro ya filiale ya Batatoli ya Yehova na Australie asɛngaki bango bákende na Esanga Thursday kosala elongo na lisangá ya kuna. Esanga yango ezali kaka moko na bisanga mikemike oyo etandami lokola mayaka ya langi ya mai ya pondu na kati ya mai ya bule ya Mbu Pacifique oyo ekaboli Australie ná Nouvelle-Guinée.

Na 2007, libota yango esombaki Teisan-Y, mwa masuwa moko ya kala oyo basalá na mabaya, oyo bazalaki koluka na yango mayaka ya korai. Na mbongo na bango moko, babongisaki masuwa yango mpe babandaki kosala mibembo mpo na kosakwela bato ya bisanga zomi oyo eleki mosika, kasi bazalaki kofanda na Esanga Thursday. Makambo oyo elandi ezali “mokanda ya masolo ya mibembo” oyo basalaki na masuwa.

Yanuali 2008: Lelo, nakɔti na mwa bwato mpo na kokende na Bamaga kozwa Batatoli motoba oyo bazali kuna​—mobembo ya kilomɛtrɛ 80 na kokende mpe kozonga. Tozali sikoyo na Teisan-Y, tozali kokende na bisanga Warraber mpe Poruma. Batɔnɔ etondi na mazuti​—litrɛ 5 500, litrɛ moko na dolare 2. Masuwa yango ezali kotambola malɛmbɛ mingi, kaka soki kilomɛtrɛ 10 na ngonga mobimba. Kasi mopɛpɛ ezali malamu, ezali koningisa mai ya mbu kaka moke.

Ntango tokómi, totɛlɛmi mwa mosika na libongo, tokɔti na bwato elongo na bandeko mosusu oyo bazalaka na bandeko na bango na esanga ya Warraber, mpe tokutani na moko na bakonzi ya esanga yango mpo na kosɛnga ye ndingisa ya kosakola. Ye nde pastɛrɛ na lingomba ya kuna kasi apesi biso nzela ya kosolola na bafandi ya esanga yango. Tosali ndenge moko mpe na Esanga Poruma mpe bapesi biso ndingisa ya kosakola. Bato bazali koyamba biso na boboto mpe bazali mpenza na mposa ya kotánga mikanda na biso. Tobandi koyekola Biblia na bato mingi.

Aprili 2008: Tokani kokende na Dauan, Saibai, mpe Boigu​—bisanga misato oyo eleki mosika—​pembeni na ndelo ya Papouasie-Nouvelle-Guinée (PNG). Mipɛpɛ ekómi mpenza mabe, bongo tokei nde na Esanga Mabuiag. Esanga yango ezali kaka na kilomɛtrɛ 70 longwa na libongo ya esanga oyo tofandaka, kasi tokosala kilomɛtrɛ 140 ntango tokobalukabaluka mpo na koluka nzela na bangomba ya mabanga oyo ezali na mai.

Mbonge moko ya makasi elongolaki bwato na Teisan-Y. Tobalolaki masuwa lisusu katikati ya mbonge minene ya mai mpo na kokanga bwato yango lisusu. Bato mingi na kati ya masuwa bakómi kobela.

Na Mabuiag, tozwi ndingisa ya kosakola kuna, mpe bato ya esanga yango bayambi biso na esengo mingi mpe eumeli te, tobosani kutu mpasi oyo tozalaki koyoka. Mwasi moko asepeli mingi koyoka nsango na biso mpe andimi mikanda mosusu mpo alakisa yango na bibliotɛkɛ ya esanga yango, epai asalaka.

Mai tii Ɔkɔtɔbɛ 2008: Lokola mipɛpɛ ezali malamu te, tozali kokoka kokóma na bisanga te. Tosaleli ntango yango mpo na kosakola na esika oyo tofandi, mpo na kosala mosala, mpe kobongisa masuwa.

Masuwa ezali kosɛnga mosala mingi, yango wana tokei na Weipa, libongo oyo ezali monene mpe tobimisi masuwa na mai mpe tokɔtisi yango na remorque moko monene. Ezali pɛtɛɛ na koloba, kasi kosala nde likambo! Batatoli ya Yehova ya kuna bapesaki ntango na bango mpo na kosalisa biso na misala, na ndakisa misala ya kobongisa batiyo (plomberie), ya kotya langi, mpe ya mabaya. Basusu bamemeli biso bilei. Basusu mpe bapesi biso biloko mosusu mpo na mobembo na biso ya kosakola ya mbala ekoya. Mpo na koyamba oyo bayambi biso mpe lisalisi oyo bapesi biso, mwaye ya koloba ezali te.

Desɛmbɛ 2008: Lisusu tokani kokende na Dauan, Saibai, mpe Boigu. Mpo na kokima mipɛpɛ makasi, tozali kosalela radar na biso mpe mpo na kokima bangomba ya mabanga, tozali kosalela masini moko oyo elakisaka nzela. Ezwi biso ngonga 12 mpo na kokóma na Dauan, kasi ezali esanga moko kitoko oyo tomoná naino boye te. Bangomba milai ya mabanga ezipami na mapata. Bato ya Dauan basepeli mpenza koyoka biso, mpe tozwi bibongiseli ya kokoba masolo ya Biblia na telefone nsima ya kozonga epai na biso.

Mofandi moko ya kuna, mwasi moko na nkombo Lettie, azwaki bazulunalo na biso toyebi te soki ndenge nini mpe atindaki mikanda na biro ya filiale mpo na kosɛnga mikanda mosusu. Biro ya filiale na Australie etindelaki ye mikanda yango mpe etindelaki lisangá na biso mokanda mpo tómonana na ye, soki likoki ezali. Nsukansuka tomonaki Lettie mpe tozali na esengo ya kosala ata mwa moke mpo na kokokisa bamposa na ye ya elimo.

Na esanga ya Saibai, moko na bakonzi ya esanga aboyi kopesa biso ndingisa ya kosakola kuna. Kasi apesi ndingisa na bandeko oyo bazali na bandeko na bango na esanga yango bákende kotala bango mpe básolola na bango. Nazali na kɔntra na guvɛrnema mpo na kosala mosala ya kotya langi na bandako na Saibai, mpe yango esalisi biso tózwa mwa mbongo ya kofuta biloko mosusu.

Ndeko na biso moko ya mwasi na nkombo Tassie azali moto ya mboka moko na PNG, oyo ezali kaka kilomɛtrɛ 4 longwa na Saibai. Na boyokani oyo basalá na guvɛrnɛma ya Australie, bato ya PNG bakoki koya na Saibai mpe kosala mombongo. Tassie akutani na bato mingi ya mboka na ye mpe mikanda oyo azali na yango ekoki bato nyonso te. Banda Tassie akómá Motatoli ya Yehova, oyo nde mbala ya liboso oyo amoni bato ya mboka na ye. Tozongi na masuwa mpe tomemeli ye karto ya mikanda, oyo mingi ezali na monɔkɔ babengi Tok Pisin, oyo bato mingi ya PNG balobaka. Tassie alimboli nsango ya Biblia na etuluku ya bato koleka 30 ya PNG, mpe bato yango basepeli mingi mpe basilisi karto yango ya mikanda. Bakómaka na mboka oyo bafandi kaka na masuwa, na yango mbala mosusu Batatoli ya Yehova naino bakóma kuna te.

Kokóma na Boigu, esanga ya nsuka, ezali mpenza etumba. Tozali na kilomɛtrɛ 4 tii na libongo mpe mai ezali kaka mɛtrɛ 2,5. Masuwa ebendaka mai tii na mɛtrɛ 1,8. Ndeko moko ná ngai tozwi mwa bwato mpo na kotalatala esika yango mpe koluka nzela ya kokóma na esanga. Mbula ezali konoka makasi mpe topoli mpenza! Ezwi biso ngonga mibale mpo na komona nzela.

Ntango tokómi, bato ya esanga bakamwe mpe balobi na biso ete bakarte oyo nazali na yango ezali ya solo te mpe ete ata basoda oyo babatelaka bokula mpe basoda oyo batambolaka na mai bakɔtaka na esika wana te. Moko na bakonzi ya esanga aboyi kopesa biso ndingisa ya kosakola kasi andimi ete bandeko oyo bazali na bandeko na bango na esanga bákende kotala bango mpe básakwela bango. Totosi maloba ya mokonzi yango mpe totali kaka bandeko ya libota. Mobali moko andimi buku Biblia eteyaka mpenza nini?,a atángi yango na mbala moko, mpe abandi kokoma mituna na nsima ya Biblia na ye. Mobali yango asololi lisusu na Batatoli ntango ayei na esanga Thursday.

Yanuali 2009: Tozongi na bisanga Moa mpe Mabuiag kosolola lisusu na bato oyo basepelaki na nsango ya Biblia. Na bisanga yango mibale, bayambi biso na esengo mingi mpenza. Bato mingi ya mboka Saint-Paul na Esanga Moa bayebisi biso tóumela mingi te mpo na koya kotala bango lisusu. Moko na bakonzi ya esanga yango alobi ete tokoki kosakola na mboka ntango nyonso oyo tolingi.

Détroit de Torres ezali na bisanga 17 oyo bato bafandaka. Toyebi te soki tokokoka mpenza kokutana na moto nyonso oyo azali na bisanga yango. Kasi biso nyonso na lisangá ya bisanga ya Australie oyo ezali mosika na nɔrdi tozali na esengo ya kosala oyo tokoki mpo na kosanzola Mozalisi na biso monene, Yehova.

[Maloba na nse ya lokasa]

[Karte na lokasa 23]

(Mpo na komona yango, talà mokanda)

AUSTRALIE

Weipa

Bamaga

BISANGA YA DÉTROIT DE TORRES

PAPOUASIE-NOUVELLE-GUINÉE

[Eutelo ya bafɔtɔ]

Euti na NASA/​Visible Earth imagery

[Karte na nkasa 24, 25]

Bamaga

Esanga Thursday

Esanga Moa

Esanga Warraber

Esanga Poruma

Esanga Mabuiag

Esanga Saibai

Esanga Dauan

Esanga Boigu

PAPOUASIE-NOUVELLE-GUINÉE

[Eutelo ya bafɔtɔ]

Euti na NASA/​Visible Earth imagery

[Elilingi na lokasa 24]

Tosɛmi na Esanga Thursday

[Elilingi na lokasa 24]

Tozali kokende kotala bato na Esanga Saibai

[Elilingi na lokasa 25]

Azali kosakola nsango malamu na monɔkɔ ya Tok Pisin