Tokosala mosala yango lisusu?—Libyangi mosusu mpo na babongisi-nzela basungi​—Eteni 1

¹ Mosala nini tokosala lisusu? Tokosala mosala ya mobongisi-nzela mosungi na eleko ya Ekaniseli? Siplemá ya Mosala na biso ya Bokonzi ya Mársi 1997 ebendaki likebi na biso na lisolo ya ntina oyo ezalaki na motó na likambo ete: “Tozali koluka babongisi-nzela basungi 100 000.” Tomindimisaki ete bokotosa libyangi yango. Ntango lapolo ya mosala ya Apríli 1997 esalamaki, tozalaki na esengo ya koyeba ete basakoli 3 965 (to basakoli 122 na Burundi, basakoli 444 na Congo-Brazzaville mpe basakoli 3 399 na Congo-Kinshasa) basalaki mosala ya mobongisi-nzela mosungi, atako etumba ezalaki kongala! Soki tobakisi babongisi-nzela ya sanza na sanza 5 339 mpe babongisi-nzela minene 86 oyo bapesaki lapolo na sanza yango, tokomona ete basakoli pene na 16 likoló na mokama (Burundi, basakoli 12 likoló na mokama; Congo-Brazzaville, basakoli 21 likoló na mokama) basalaki mosala ya mobongisi-nzela na Congo-Kinshasa. Tokosala yango lisusu na eleko oyo ya Ekaniseli?

² Tozali kopesa longonya mingi na baoyo nyonso basalaki milende mpenza mpo na kokolisa mosala na bango ya kosakola na eleko ya Ekaniseli na mbula oyo eleki. Na ntembe te, bino nyonso baoyo bosalaki yango bopusamaki na bolingo ya solo mpo na Yehova mpe mpo na bazalani na bino. (Luka 10:27; 2 Pet. 1:5-8) Basakoli oyo bazali na bizalela bikeseni na bomoi bamibongisaki malamu mpo na kosangana na mosala ya mobongisi-nzela mosungi. Na lisangá moko, basakoli 51 bazalaki babongisi-nzela basungi na sanza moko, kati na bango bankulutu, mama moko oyo azalaki na mwana moke ya mwasi ya mbula moko na sanza misato, ndeko mwasi moko oyo atikaki mosala na ye ya liboso mpe azwaki mosala oyo azalaki kosala bobele ndambo ya mokolo mpo azala mobongisi-nzela, mpe ndeko mwasi moko mobange oyo asalaki mosala ya mobongisi-nzela mpo na mbala ya liboso. Mokɛngɛli ya zongazonga yango akomaki ete: “Milende minene misalemi na mosala ya kosakola. . . . Yango ebimisi matomba malamu bobele na teritware te, kasi mpe masangá matondi na esengo. Bandeko bazali kosepela na lolenge bakómi koyebana malamumalamu bango na bango mpe komona matomba malamu na mosala ya kosakola.”

³ Bilenge bazongaki nsima te na Apríli ya mbula oyo eleki. Mosakoli moko, elenge mwasi ya mbula 13, oyo azwaki naino batisimo te, azalaki kozela na motema lukuluku mokolo oyo akomipesa epai na Yehova mpe akozwa batisimo. Nsima ya batisimo na ye na sanza ya Febwáli ya mbula oyo eleki, akomaki maloba oyo malandi mpo na komonisa mposa na ye ya kozala mobongisi-nzela mosungi na Apríli: “Lokola eloko moko ezalaki kopekisa ngai lisusu te, natondisaki formilɛrɛ kozanga kokakatana. . . . Soki libyangi na bino ya bolingo nyonso mpo na kosala mosala ya mobongisi-nzela epesamaki te, mbɛlɛ makambo ya kitoko mpenza oyo tokutani na yango elingaki kosalema te. Nazali kotɔ́nda Yehova na lolenge apesi ngai libaku ya kozala kati na basakoli 100 000 oyo bayanoli na libyangi yango.” Ndeko mwasi yango amipesi mokano ya kosala lisusu mosala yango.

⁴ Ntango mosusu ozalaki kati na basakoli 3 965 oyo basalaki mosala ya mobongisi-nzela mosungi na sanza ya Apríli ya mbula oyo eleki, to kati na basakoli 6 721 na Máí, to lisusu kati na basakoli 8 685 na Yúni. Okosala yango lisusu na mbula oyo? Soki ozwaki likoki ya kosala mosala ya mobongisi-nzela mosungi na ntango ya Ekaniseli na mbula oyo eleki te, okoki kosala yango na mbula oyo, boye te? Tokoleka motángo ya basakoli 8 260, oyo bazalaki babongisi-nzela basungi na Yúni 1997 (to basakoli 141 na Augústo 1997 na Burundi; basakoli 444 na Apríli 1997 na Congo-Brazzaville)? Ezalaki motángo ya babongisi-nzela basungi oyo elekaki mitángo nyonso na teritware na biso mobimba.

⁵ Tómipesa na sanza ya Apríli mpe na sanza ya Máí: Na mbula oyo, Ekaniseli ekosalema na mokolo ya pɔsɔ mwa 11 Apríli; na bongo, sanza oyo ya Apríli ebongi mpenza mpo na kokolisa mosala na biso ya kosakola. (2 Kol. 5:14, 15) Na boumeli ya mikolo 11 ya liboso ya sanza oyo, tokosala mpenza molende mpo na kobyanga bato mingi koleka mpo ete báyangana na Ekaniseli. Soki ozali kokana kozala mobongisi-nzela mosungi, tolɔmbi yo ete otondisa formilɛrɛ sikawa, liboso mpenza na dati oyo olingi kobanda.​—1 Kol. 14:40.

⁶ Ekoki kozala mpasi mingi te na basakoli oyo bazali banakelasi mpe baoyo basalaka misala ete bázala babongisi-nzela basungi na Máí mpo ete sanza yango ezali na bawikende mitano mobimba. Na kolekisáká ngonga zomi na wikende mokomoko kati na bawikende yango mitano, okotikala bobele na ngonga zomi oyo okokabola na boumeli ya sanza mobimba mpo na kokokisa ngonga 60 oyo esɛngami.

⁷ Na Máí mpe na Yúni, tokolakisa zulunalo Linɔ́ngi ya Mosɛnzɛli mpe Lamuká! Yango esengeli kolendisa mingi kati na biso ete tóbanda mosala ya mobongisi-nzela. Mpo na nini tolobi bongo? Mpo ete kolakisa bazulunalo ezali mpasi te (awa mpe ntalo na yango ekiti) mpe ezali likambo ya esengo mpo na kolakisa yango. Bazulunalo yango ibongi mpenza mpo na lolenge nyonso ya mosala na biso ya kosakola: na ndako na ndako mpe na bamagazini, na litatoli na balabála, na baparking mpe na mabaku mosusu ya litatoli ya libaku malamu. Mpe lisusu mpo ete, Linɔ́ngi ya Mosɛnzɛli mpe Lamuká! ezali kolongisa mateya ya solo ya Bokonzi ya Nzambe. Bazulunalo ezali kobenda likebi likoló na kokokisama ya bisakweli ya Biblia oyo ezali komonisa ete Bokonzi ya Nzambe esili kotyama. Bazulunalo yango ezali mpe kobongola bomoi ya batángi na yango mpo ete ezali kolobela makambo oyo bato bazali na yango mpenza mposa. Soki tokanisi likoló na bopusi malamu oyo bazulunalo yango ezali kosala na bomoi na biso, tokopusama ete tókabola yango mingi koleka na sanza ya Máí mpe ya Yúni.

⁸ Balapolo ezali komonisa ete masangá mingi etondi na bazulunalo na mabombo na bango. Tómonisa ete tozali kotalela na motuya ntango mpe makoki oyo mapesami mpo na kosala bazulunalo yango na kokaboláká yango mpo ebeba na mabombo te. Tómikundola mpe ete bankóto ya bato ya mitema sembo bazali na mposa ya bazulunalo yango mpo na koyeba solo. (Yoa. 8:31, 32) Na bongo, tozali kolendisa baoyo nyonso batalelami na likambo yango, mingi mpenza bakɛngɛli na mosala ya kosakola, basaleli na misala oyo bazali na mokumba ya bazulunalo mpe batambwisi ya boyekoli ya mokanda, ete bápesa ndakisa na oyo etali kosilisa bazulunalo na mabombo. Tósala makasi na likambo yango na kozaláká babongisi-nzela basungi.

⁹ Mpo na kobongisa kokabolama monene ya bazulunalo yango, ekozala malamu bótalela lisusu masolo oyo mazali na motó na likambo ete “Linɔ́ngi ya Mosɛnzɛli mpe Lamuká!—Bazulunalo oyo eyebisaka solo na ntango na yango,” oyo mabimisamaki na Linɔ́ngi ya Mosɛnzɛli ya 1 Yanuáli 1994, mpe lisolo na motó na likambo ete “Tóbongisa lolenge na biso ya kolakisa bazulunalo,” oyo ebimisamaki na Mosala na biso ya Bokonzi ya Novɛ́mbɛ 1996.

¹⁰ Bankulutu bazali kopesa ndakisa: Mpo na kosalisa basakoli mingi oyo bazalaki babongisi-nzela basungi na eleko ya Ekaniseli na mbula oyo eleki, bankulutu ya lisangá moko baponaki mokolo moko ya pɔsɔ na sanza lokola mokolo ya sipesiale mpo na mosala ya kosakola na lisangá mobimba. Baponaki ngonga motoba ikeseni na boumeli ya mokolo yango, kopesáká bongo libaku na basakoli nyonso ete básangana na kopesa litatoli na mitindo ndenge na ndenge. Ezalaki, na ndakisa, kosakola na bisika ya mombongo, kopesa litatoli na balabála, kosala bozongeli ya sika na ndako na ndako, kopesa litatoli na telefone mpe na nzela ya mikanda. Basakoli 117 basanganaki na mosala ya kosakola na boumeli ya mokolo yango mobimba. Balekisaki ngonga 521 na mosala ya kosakola mpe motángo ya bazulunalo, ya mwa babuku mpe ya babuku oyo bakabolaki ezalaki 617! Kati na bato oyo basepelaki, mingi bayanganaki na makita na Mwalomingo mpe yango ematisaki mpenza motángo ya bayangani na lisukulu ya bato nyonso mpe na boyekoli ya Linɔ́ngi ya Mosɛnzɛli.

¹¹ Na sanza ya Apríli mpe ya Máí, pɔsɔ na pɔsɔ, na likita nyonso ya mosala, esengeli kokundwela basangani ya lisangá ntango mpe esika oyo makita mpo na mosala ya kosakola ekosalema pɔsɔ na pɔsɔ, mingi mpenza soki bankulutu bakamati bibongiseli mosusu ya sika. Soki likoki ezali, babongisi-nzela ya sanza na sanza mpe basakoli mosusu oyo bazali babongisi-nzela basungi te basengeli kosimba bibongiseli yango oyo bikamatami mpo na mosala ya kosakola na bituluku. (Kolandana na yango na sanza ya Máí.)

¹² Mokɛngɛli na mosala ya kosakola akokutana na ndeko oyo azali na mokumba ya kokabola teritware mpo ete akamata elongo na ye bibongiseli ya kosakola na bateritware oyo basalelaka mobimba te. Basakoli basengeli koluka mpenza kokutana na bato oyo bazalaki na ndako te mpe kopesa litatoli na balabála mpe na bamagazini. Ebongi kolendisa mosala ya kosakola na mpokwa. Esengeli kosala komande ya bazulunalo mingi mpo na sanza ya Máí mpe ya Yúni na ntina ete mosala ya kosakola esalema mingi.

¹³ Basakoli mingi bakoki kokokisa masɛngami: Na formilɛrɛ ya mosala ya mobongisi-nzela mosungi, tozali kotánga na molɔngɔ ya liboso ete: “Mpo na bolingo na ngai epai na Yehova mpe mposa na ngai ya kosalisa basusu ete báyeba ye mpe mikano na ye mitondi na bolingo, nalingi kokolisa mosala na ngai ya kosakola na kosɛngáká mosala ya mobongisi-nzela mosungi.” Bolingo mpo na Yehova mpe mposa na biso mpo na kosalisa basusu na elimo ezali bizaleli ya ntina oyo epusi biso ete tómipesa na Yehova. (1 Tim. 4:8, 10) Na oyo etali masɛngami mpo na kondimama lokola mobongisi-nzela mosungi, osengeli kozwa batisimo, kozala na etamboli malamu mpe na likoki ya kolekisa ngonga 60 na mosala ya kosakola na boumeli ya sanza. Wana mokomoko kati na biso azali kotalela ezalela na ye mpenza, bamoko kati na biso baoyo basalá naino te mosala ya mobongisi-nzela mosungi bakoki komeka kosala yango na mbula oyo, na sanza ya Máí mpe ya Yúni?

¹⁴ Bato mingi kati na masangá bakososola ete bango mpe bakoki kosala lokola babongisi-nzela basungi soki bamoni basusu oyo bazali na mikakatano lokola bango basɛngi mosala yango. Bayekoli, mibange, bato oyo basalaka, kati na bango bankulutu mpe basaleli na misala, mpe basusu, basili kolonga kosala mosala ya mobongisi-nzela mosungi. Na sanza moko oyo asalaki mosala ya mobongisi-nzela mosungi, mwasi moko mama ya bana mibale akokisaki ngonga 60, akabolaki bazulunalo 108, mpe abandaki boyekoli ya Biblia 3, atako azalaki na mosala oyo ezalaki kozwa ye ntango mingi. Lolenge nini akokaki kosala yango? Na ntango ya bopemi na mosala na eleko ya midi, azalaki kosakola na teritware oyo ezalaki pembeni, azalaki kopesa litatoli na baparking, na balabála mpe na kokomáká mikanda. Pɔsɔ na pɔsɔ, na mokolo na ye ya bopemi, azalaki kobima na mosala ya kosakola elongo na bandeko ya lisangá. Atako na ebandeli azalaki kokanisa ete akokoka te kozala mobongisi-nzela mosungi, kasi na elendiseli ya basusu mpe na manaka malamu, alongaki mikakatano yango.

¹⁵ Yesu andimisaki bayekoli na ye ete: “Ekanganeli na ngai ezali ya bopɔlɔ mpe mokumba na ngai ezali pɛpɛlɛ.” (Mat. 11:30, NW) Mokapo oyo ezalaki motó na likambo ya lisolo moko ya ntina kati na Linɔ́ngi ya Mosɛnzɛli ya 15 Augústo 1995. Yango elobelaki ndeko mwasi moko oyo mosala na ye ya mosuni ezalaki mokakatano monene mpo na ye. Kasi alongolaki nde motema ete mosala ya mobongisi-nzela mosungi ezalaki mpo na ye te? Soko moke te. Kutu amibongisaki sanza na sanza mpo na kozala mobongisi-nzela mosungi. Mpo na nini? Asosolaki ete mosala ya mobongisi-nzela ezali kosalisa ye mpo ete azala mpenza na bokatikati. Kosunga bato mpo báyeba solo ya Biblia mpe komona bango kobongola bomoi na bango mpo ete bándimama na Nzambe ezalaki kopesa ye esengo mingi kati na bomoi na ye atako azalaki na makambo mingi ya kosala.​—Mas. 10:22.

¹⁶ Mapamboli oyo moto akoki kozwa na kozaláká mobongisi-nzela eleki mikakatano oyo mizalaka liboso na ye mpe mbongwana oyo ye asengeli kosala. Ndeko mwasi moko akomaki na ntina na mosala na ye ya mobongisi-nzela mosungi ete: “Yango esalisaki ngai ete natalela bobele makambo na ngai moko te kasi namipesa mpe mingi koleka mpo na kosalisa basusu. . . . Nazali kosɛnga na baoyo nyonso bazali na likoki ya kosala mosala yango ete básala yango.”

¹⁷ Mosala yango esɛngaka manaka malamu: Na lokasa 7 ya Mosala na biso ya Bokonzi ya Apríli 1998, tozongeli bandakisa ya manaka oyo mabimisamaki na Mosala na biso ya Bokonzi ya Mársi 1997. Ntango mosusu, moko na manaka yango ebongi na yo. Ntango ozali kotalela yango, talelá misala na yo ya mokolo na mokolo na boumeli ya sanza. Ezali na makambo oyo okoki kosala yango liboso ya kobanda mosala ya mobongisi-nzela to okoki kotika yango mpo na mwa ntango kino okokokisa yango nsima? Okoki kolongola mwa ntango kati na ntango oyo olekisaka mpo na kominanola mpe mpo na makambo mosusu oyo osepelisaka nzoto? Na esika ete omona bobele ngonga 60 oyo osengeli kokokisa na nsuka ya sanza, bongisá nde manaka na yo mpo na koyeba ngonga boni okoki kosala mokolo na mokolo to pɔsɔ na pɔsɔ. Osengeli bobele na ngonga 2 na mokolo to na ngonga 15 na pɔsɔ mpo na mosala ya mobongisi-nzela mosungi. Talá bandakisa ya manaka mpe tyá elembo na biki na manaka oyo ebongi na yo mpe na libota na yo.

¹⁸ Lolenge bandeko bandimaki makasi libyangi ya kosala mosala ya mobongisi-nzela mosungi mpe milende oyo basalaki mpo na mosala ya kosakola na eleko ya Ekaniseli na mbula oyo eleki, ekolisaki esengo ya ndeko mwasi moko mobongisi-nzela ya sanza na sanza oyo alobaki ete: “Natɔndi bino mingi mpo na bolingo oyo bosili komonisa na kolendisáká bandeko ete básala makasi mingi koleka mpo na kozala babongisi-nzela basungi. . . . Manaka ndenge na ndenge oyo botyaki esalisi bandeko mingi oyo basalá naino te mosala ya mobongisi-nzela mosungi báyeba ete bakoki kosala yango. . . . Nazali na esengo mingi ya kozala na lisangá ya Yehova mpe komona litambwisi ya bolingo oyo moombo ya sembo mpe ya mayele azali kopesa biso.”

¹⁹ Masese 21:5 (NW) endimisi biso ete: “Myango na moto na etingya ekobimisa solo litomba.” Masese 16:3 elendisi biso ete: “Pesá misala na yo epai na [Yehova] mpe mikano na yo mikobongisama.” Ɛɛ, na kobondeláká mpenza Yehova mpo na likatami na biso mpe na kotyáká elikya mobimba epai na ye ete akosunga biso ete tókokisa yango, tokoki kozala na elikya ete mikano na biso mpo na mosala ya mobongisi-nzela mosungi mikokokisama. Ekoki kosalema ete, na boumeli ya sanza moko to sanza mibale ya mosala ya mobongisi-nzela mosungi, tómona ete manaka na biso mazali kotambola malamu mpenza, na bongo tokoki kopusama na kokoba mosala yango na kotyáká elembo na esika moko ya formilɛrɛ ya mobongisi-nzela mosungi epai tozali kotánga ete: “Tyá elembo awa soki olingi kosala sanza na sanza mosala ya mobongisi-nzela mosungi kino ntango okotika.”

²⁰ Yesu alobaki ete: “Ye oyo akondimaka ngai, misala mizali ngai kosala, akosala yango mpe lokola, mpe akosala yango koleka oyo.” (Yoa. 14:12) Na ntango na biso esakweli yango ezali kokokisama mpenza, ezali libaku malamu ete tózala basalani elongo na Nzambe. Sikawa ezali ntango ya kosakola nsango malamu na molende mingi koleka, kosaleláká ntango na biso malamu mpo na kokokisa mosala yango. (1 Kol. 3:9; Kols. 4:5) Kosala mbala na mbala mosala ya mobongisi-nzela mosungi, ntango nyonso oyo tozali na likoki, ezali lolenge malamu mpenza ya kokokisa mokumba na biso lokola basakoli ya Bokonzi. Tolingi mpenza komona molende oyo babongisi-nzela basungi bakomonisa, na mbula oyo, mpo na kopesa masanzoli na nkombo monene ya Yehova. (Nz. 27:6) Na kotaleláká matomba oyo tozwaki na eleko ya Ekaniseli na mbula oyo eleki, tokoki komituna ete, ‘Tokosala mosala yango lisusu?’ Tomindimisi na elikya ete tokosala yango!

[Etanda na lokasa 3]

Okoki kondimama lokola mobongisi-nzela mosungi?

“Atako ezalela na yo ezali boni, soki osili kozwa batisimo, soki ozali na etamboli malamu mpe soki ozali na likoki ya kopesa ngonga 60 na sanza mpo na mosala ya kosakola, mpe soki okanisi ete okoki kosala sanza moko to sanza mingi lokola pionnier auxiliaire, bankulutu ya lisanga na yo bakosepela mpo na kondima lisengi na yo na mosala oyo ya ntina.”​—Lisanga mpo na kokokisa mosala ya Nzambe, lokasa 114.

[Etanda na lokasa 7]

Manaka mpo na mobongisi-nzela mosungi

Bandakisa ya manaka mpo na kosala ngonga 15 na mosala ya kosakola na pɔsɔ

Ntɔngɔ​—Kobanda Mwayambo kino Mwapɔsɔ

Okoki kosalela Mwalomingo na esika ya mokolo mosusu nyonso

Mokolo Eleko Ngonga

Mwayambo Ntɔngɔ 2:30

Mwamibale Ntɔngɔ 2:30

Mwamisato Ntɔngɔ 2:30

Mwaminei Ntɔngɔ 2:30

Mwamitano Ntɔngɔ 2:30

Mwapɔsɔ Ntɔngɔ 2:30

Ngonga nyonso: 15

Mikolo mibale mobimba

Okoki kopona mikolo mibale oyo olingi kati na mikolo ya pɔsɔ

Mokolo Eleko Ngonga

Mwamisato Mokolo mobimba 7:30

Mwapɔsɔ Mokolo mobimba 7:30

Ngonga nyonso: 15

Mpokwa mibale mpe wikende

Okoki kopona kosakola na mpokwa ya mikolo mibale kati na mikolo ya pɔsɔ

Mokolo Eleko Ngonga

Mwayambo Mpokwa 1:30

Mwamisato Mpokwa 1:30

Mwapɔsɔ Mokolo mobimba 8

Mwalomingo Ndambo ya mokolo 4

Ngonga nyonso: 15

Mpokwa nyonso ya mikolo ya pɔsɔ mpe Mwapɔsɔ

Okoki kosalela Mwalomingo na esika ya mokolo mosusu nyonso

Mokolo Eleko Ngonga

Mwayambo Nsima ya nzánga 2

Mwamibale Nsima ya nzánga 2

Mwamisato Nsima ya nzánga 2

Mwaminei Nsima ya nzánga 2

Mwamitano Nsima ya nzánga 2

Mwapɔsɔ Mokolo mobimba 5

Ngonga nyonso: 15

Manaka ya ngai moko ya mosala ya kosakola

Otya yo moko bangonga boni okoki kosala mpe na eleko nini ya mokolo mokomoko

Mokolo Eleko Ngonga

Mwayambo

Mwamibale

Mwamisato

Mwaminei

Mwamitano

Mwapɔsɔ

Mwalomingo

Ngonga nyonso: 15