Liyangani ya zongazonga ya mbala oyo

Toyebi ete ebongi tólinga Yehova Nzambe mpe tósambela bobele ye moko. Kasi, mokili ezali koluka kobenda biso ete tóbebisa boyokani na biso elongo na ye. (Yoa. 17:14) Mpo bolingo na biso mpo na Yehova etikala makasi mpe mpo na kolendisa biso tóboya makambo ya mokili oyo ekoki kotya elimo na biso na likama, liyangani ya zongazonga mpo na mobu ya mosala 2001 ekozala na motó ya likambo oyo: “Tólinga Nzambe​—Kasi makambo ya mokili te.”​—1 Yoa. 2:15-17.

Soki tolingi Yehova makasi, yango ekotinda biso tópesa litatoli mpo na ye. Ata bongo, mosala ya kosakola ezalaka pɛtɛɛ te mpo na ebele ya basaleli ya Nzambe. Na kati ya lisolo “Bolingo mpo na Nzambe ezali kotinda biso na kosakola,” tokoyeba ndenge oyo basakoli mingi basili kolonga ezaleli ya nsɔninsɔni mpe mikakatano mosusu mpe bamipesi mingi na mosala yango.

Lokola bizaleli ya mokili oyo ezali se kobeba, yango ezali na bopusi nini likoló na biso? Makambo oyo ezalaki kotalelama kala lokola makambo ya mabe lelo oyo ezali komonana lisusu mabe te. Lisukulu oyo ezali na motó ya likambo “Bino baoyo bolingaka Yehova, bóyina oyo ezali mabe” mpe masukulu-matongani oyo ezali na motó ya likambo ete “Makambo ya mokili​—Ndenge nini totalelaka yango?” ekolendisa ekateli na biso ya koboya bamposa ya mabe.

Eteyelo ya mosala ya Teokrasi mpe Likita ya Mosala oyo ekosalema lokola ndakisa ekozala mpe na kati ya programɛ yango, bakisa mpe lisolo mokuse na Linɔ́ngi ya Mosɛnzɛli oyo ebongisami mpo na pɔsɔ yango. Lisukulu ya bato nyonso oyo ezali na motó ya likambo “Ndenge nini bolingo mpe kondima ezali kolonga mokili?,” ekolendisa biso tólanda ndakisa ya Yesu mpo na kotɛmɛla bopusi ya mokili. (Yoa. 16:33) Okosala malamu mpenza soki okobengisa bato oyo oyekolaka na bango Biblia báya na liyangani. Moto nyonso oyo alingi kozwa batisimo asengeli koyebisa yango epai ya mokɛngɛli-mokambi nokinoki mpo ete bibongiseli ezwama mpo na likambo yango.

Liyangani ya zongazonga ya mbala oyo, ekobenda likebi na biso mingimingi mpo na koyeba esika nini tosengeli mpenza komonisa bolingo mpo na kozwa mapamboli ya Yehova. Kozangisa ata mokolo moko te ya liyangani yango!