Ntango ya kolendisana mpenza
1 Mokolo moko te elekaka kozanga ete kondima ya basaleli ya Yehova ekutana na komekama. Lokola Zabolo ayebi ete atikali lisusu na ntango mingi te, azali kobundisa biso etumba ya nsuka mpo abebisa bosembo na biso epai ya Yehova. (Emon. 12:12) Ezali mpenza na ntina mingi ete ‘tókoba kozwa nguya na kati ya Nkolo mpe na kati ya nguya ya bokasi na ye’ mpo ‘tókoka kopika pende na mokolo ya mabe mpe, nsima wana [tokosilisa] kosala makambo nyonso malamumalamu, tótɛlɛma ngwi.’—Ef. 6:10, 13, NW.
2 Koyangana elongo na basambeli mosusu ya Yehova ezali ebongiseli oyo euti epai na ye mpo na kosalisa biso tózwa nguya. Ntoma Paulo ayebaki malamu ntina ya ebongiseli yango. Azalaki na mposa makasi ya kozala elongo na bandeko na ye baklisto mosusu, mpo ete bákoka “kolendisana” mpe ‘bákóma makasi.’ (Lom. 1:11, 12, NW) Mpo na kopesa biso makasi ya kosala mokano ya Nzambe, Lisangani ya Mikóló-Bakambi esili kozwa bibongiseli ya bolingo mpenza mpo na kopesa biso libaku ya kozwa litomba na bilendiseli oyo tokopesana na liyangani ya etúká “Basakoli ya Bokonzi ya molende,” oyo ezali koya.
3 Okozwa litomba soki okei na liyangani yango: Omityela mokano ya kozala wana mikolo nyonso misato. Tokozwa “litomba” soki tokokóma liboso ete loyembo ya ebandeli eyembama mpe soki tokotikala tii na nsuka, mpo na kondima “Amen” na motema mobimba, na libondeli ya nsuka. (Yis. 48:17, 18) Mpo na bandeko mingi, ekosɛnga bázwa liboso bibongiseli na mosala oyo basalaka mpo bázwa ntango ya koyangana mikolo nyonso misato. Ya solo, ekoki kozala mpasi mpo na kondimisa mokonzi na yo ya mosala apesa yo mwa konje; kasi Yehova asili kolaka biso ete akosalisa biso mpo tósala mokano na ye. (1 Yoa. 5:14, 15) Soki tozwi naino te bibongiseli ya nsuka mpo na transport na biso mpe bisika oyo tokolala, oyo nde ntango ya kosala yango; tókanisa te ete makambo wana ekosalema yango moko. Tokoki kotyela Yehova motema ete akopambola milende oyo tozali kosala mpo tóyangana na mikolo yango nyonso misato.—Mas. 10:22.
4 Bandá kokanisa bilendiseli oyo okozwa kuna: “Na mayangani nyonso nakɔtá, oyo nde eleki!” Esilá kokómela yo, na nsuka ya liyangani moko oloba ndenge wana? Mpo na nini olobaki bongo? Ezali mpo ete, lokola tozali bato ya kozanga kokoka, tokoki mokemoke kolɛmba mpe kozala na mposa bálendisa biso na elimo. (Yis. 40:30) Ndeko mwasi moko alobaki ete: “Mokili oyo elɛmbisaka ngai, mpe mayangani esalisaka ngai nabongisa lisusu miso na ngai ya elimo; epesaka ngai lisusu makasi ya elimo oyo nazali na mposa na yango. Emonani lokola ete bilendiseli eyaka kaka na ntango oyo nazali na mposa na yango mingi koleka.” Ekoki kozala ete yo mpe osilá koyoka kaka bongo.
5 Eloko elendisaka biso ezali kaka te masukulu mpe mituna-lisolo oyo toyokaka kuna, kasi mpe makambo mosusu ya ntina oyo tomonaka na mayangani na biso. Ndeko moko alobaki ete: “Likambo oyo nasepelaka na yango mingi ezali nde ndenge oyo bamonisaka polele mpenza ndenge ya kosalela mitinda ya Biblia. Badrame mpe ezali na ntina mingi mpamba te emonisaka biso ndenge oyo tokoki kozwa litomba na bandakisa ya bato ya kala, ezala ya mabe to ya malamu. Likambo mosusu oyo nazelaka na esengo ezali kobima ya mikanda ya sika mpe soki nazwi yango, natikaka kotánga yango te ntango nazongi na ndako.”
6 Na boumeli ya “ntango ya mpasi” oyo tozali, mayangani ezali ebongiseli moko ya ntina mingi oyo euti na Yehova. (2 Tim. 3:1) Esalisaka biso tólanda toli oyo epemami: “Bólala mpɔngi te, bótɛlɛma ngwi na kati ya kondima, bómitambwisa lokola mibali, bózala makasi.” (1 Kol. 16:13, NW) Yango wana, tiká ete tózala na mokano ya kozangisa ata eteni moko te ya liyangani mpe tólendisana mpenza na liyangani na biso ya etúká “Basakoli ya Bokonzi ya molende”!
[Etanda na lokasa 3]
Omibongisa mpo oyangana mikolo nyonso misato
■ Sɛngá konje na mosala.
■ Yebisá bábombela yo esika ya kolala na engumba oyo liyangani ekosalema
■ Bongisá transport na yo mpo na kokende na liyangani.