Osepelaka mpenza na makambo ya bulɛɛ?
1 Soki batuni biso soki tosepelaka na makambo ya bulɛɛ, na ntembe te tokoyanola nokinoki ete ɛɛ tosepelaka na yango! Makambo nini ya bulɛɛ oyo euti na Nzambe tosepelaka na yango?
2 Tosepelaka mpenza na boyokani malamu oyo tozali na yango na Tata na biso ya likoló! Apesi biso elikya ete soki ‘tobɛlɛmi epai na ye, ye mpe akobɛlɛma epai na biso.’ (Yak. 4:8) Soki mbeka ya lisiko ya Yesu Klisto ezalaki te, mbɛlɛ moto moko te akokaki kozwa bomoi ya seko. (Yoa. 3:16) Tozali na botɔndi mozindo mpo na yango mpe tobondelaka mokolo na mokolo mpo na komonisa ete tosepelaka mingi na likabo wana ya ntina mingi oyo euti na Nzambe.
3 Liloba ya Nzambe oyo epemami, Biblia Mosantu, ezali mpe bulɛɛ mpo na biso, bakisa mpe ebongiseli ya Yehova awa na mabele. Soki tozali kotosa mitinda ya Biblia, tozali kolendisa bolingo na bandeko na biso, tozali kolanda malamumalamu malako ya Teokrasi mpe tozali kosala na boyokani na bato oyo bazali kokamba biso, tokomonisa ete tosepelaka mingi na bibongiseli oyo ezali kouta epai ya Yehova.—1 Pet. 1:22.
4 Na nzela ya moombo ya sembo mpe ya mayele, tozali kozwa bilei ya elimo mingi. Yango ekomonana mpe na mbula oyo na liyangani ya etúká “Batosi ya Liloba ya Nzambe.” Kuna tokozwa malako ya ntina mingi mpe tokozala na baninga ya malamu oyo tozali mpenza na mposa na bango. Ndenge nini tokoki komonisa ete tosepeli mpenza na ebongiseli wana ya bulɛɛ?
5 Kotyola ndako ya Yehova te: Nehemia apesaki toli epai ya baoyo basalaki makasi mpo na kotonga bifelo ya Yelusaleme ete ‘bátyola ndako ya Nzambe na bango te.’ (Neh. 10:39, NW) Lelo oyo, “Ndako” ya Yehova ezali bibongiseli oyo atii mpo na losambo. Liyangani na biso ya etúká ezali kati na bibongiseli yango. Mpo tótyola ebongiseli yango te, tosengeli kozala wana na kati ya bayangani mpe kotya likebi mpenza, na yango tokomonisa epai ya Yehova ete tozali kotalela bibongiseli na ye ete ezali na ntina mingi. (Ebe. 10:24, 25) Bibongiseli nini tosengeli kozwa banda sikoyo mpo na komonisa ete tozali mpenza kosepela na likambo wana ya bulɛɛ?
6 Zalá na liyangani mikolo nyonso misato: Mokomoko kati na biso asengeli komibongisa mpo na koyangana mikolo nyonso misato na liyangani. Ozali komibongisa mpo ete okómaka na liyangani mikolo nyonso na ngonga malamu mpe ozala wana tii na libondeli ya nsuka na mokolo ya lomingo? Soki ezali bongo, okozwa mapamboli mingi. Ekoki kozala ntango nyonso pɛtɛɛ te mpo na koyangana na liyangani. Ekoki kosɛnga osala makasi mpo mosala na yo ya mosuni epekisa yo te koya na liyangani. Ekozala ntango nyonso pɛtɛɛ te mpo na kozwa motuka to bisi mpo na kosala mobembo. Kasi kotika te ete makambo oyo nyonso elɛmbisa yo mpe ozanga na liyangani.
7 Talelá bandakisa ya malamu oyo: Ntango bazalaki kokende na liyangani ya etúká na mbula eleki, etuluku moko ya bandeko oyo bafandaka na ekólo moko ya Afrika epai bitumba ezali, bakutanaki na basoda. Basoda yango batunaki bandeko ete: “Bozali banani mpe bozali kokende wapi?” Bandeko bazongisaki ete: “Tozali Batatoli ya Yehova mpe tozali kokende na liyangani ya etúká.” Soda moko alobaki na bango ete: “Bino Batatoli ya Yehova, bóbanga eloko moko te. Bókende na bino mpe bokosala liyangani na bino kozanga ete eloko moko epekisa bino. Kasi, bókeba mpo bokokutana na basoda mingi. Bótambolaka ntango nyonso na katikati ya nzela! Ata soki bomoni bato mingi, bino bólanda kaka kotambola na katikati ya nzela!” Bandeko basalaki bongo mpe bakómaki na esika ya liyangani kozanga likama. Bandeko yango bapambolamaki mpamba te bamonisaki ete bazali kosepela mpenza na makambo ya bulɛɛ.
8 Ndenge moko na bandeko na biso na bikólo mosusu ya Afrika, biso mpe tokutanaka na mikakatano. Kasi, ntembe ezali te ete tokoki komekola kondima na bango mpe kozwa ekateli ya koyangana mikolo nyonso ya liyangani na biso ya etúká. Soki esengeli ete oboya kosala makambo mosusu mpo na liyangani, talelá Yehova mpo na kozwa lisalisi, oyeba ete akopambola milende na biso ya koyangana na liyangani mobimba.
9 Zwá mapamboli: Tozali na mposa makasi ya Liloba ya Nzambe mpo toyebi ete na nzela na yango tokoki kokola tii na lobiko. (1 Pet. 2:2) Soki toyangani na liyangani ya etúká mpe toyoki mateya oyo ekopesama kuna, yango ekosalisa mokomoko na biso akóma na kondima makasi na Liloba yango mpe na bongo tokozala na makoki ya kotɛmɛla Satana ntango azali kobundisa biso. Soki tosali bongo, tokomonisa epai ya Yehova mpe epai ya bato oyo bazali kotala biso ete tozali mpenza kosepela na makambo ya bulɛɛ “tozali kati na baoyo bazongaka nsima te kasi tozali kati na baoyo bazali na kondima mpo na kobatela molimo na bomoi.”—Ebe. 10:39, NW; Ebe. 12:16; Mas. 27:11.
10 Tokoki kozela Yehova Nzambe na motema likoló ete afungola maninisa ya lola mpe asopela biso mapamboli ya elimo. (Mki. 3:10) Omityela mokano ya kozala na liyangani ya etúká “Batosi ya Liloba ya Nzambe” banda na ebandeli ya programɛ na mokolo ya mitano na ntɔngɔ tii ntango bakosala libondeli ya nsuka mpe bakoloba “Amen!” na mokolo ya lomingo na nsima ya nzanga. Okozala na esengo mingi mpo na milende oyo osalaki!