Ndenge ya kolakisa bazulunalo

(Soki zulunalo ya Lingala ezali te bósalela ya Lifalanse)

Linɔ́ngi ya Mosɛnzɛli 15 Sɛt.

Lobelá nsango moko ya sika oyo balobi na zulunalo to na radio, oyo etungisi bato mingi na esika bofandi. Na nsima tuná boye: “Okanisi ete makambo vɛrsɛ oyo elobeli ezali mpenza oyo tozali komona lelo oyo? [Tángá 2 Timote 3:⁠1, mpe tiká ye apesa eyano.] Zulunalo oyo elobeli makambo oyo emonisi ete tozali na mikolo ya nsuka mpe emonisi oyo tosengeli kosala.”

Lamuká! Sɛt.

“Bato mingi bandimaka ete Nzambe nde akelá biso. Bamosusu balobaka ete moto moko te akelá biso. Yo okanisaka nini? [Tiká ye apesa eyano.] Talá maloba oyo ekoki kosalisa biso tozwá eyano ya malamu. [Tángá Yobo 12:​7, 8.] Lamuká! oyo elobeli makambo oyo tokoki koyekola soki totali ndenge oyo mokili ebongisamá mpe bwanya oyo ezali komonana na biloko oyo Nzambe akelá.”

Linɔ́ngi ya Mosɛnzɛli 1 Ɔkɔt.

“Minganga bazali kosala nyonso mpo na kosilisa maladi mpe kosalisa bato bázala na bomoi molai. Okanisi ete mokolo mosusu tokozala na bomoi libela na libela? [Tiká ye apesa eyano.] Talá ntina tozalaka na mposa makasi ya kozala na bomoi molai. [Tángá Mosakoli 3:11.] Zulunalo oyo elimboli ntina oyo Nzambe akelaki biso na mposa ya kozala na bomoi libela na libela.”

Lamuká! Ɔkɔt.

“Bato mingi balingaka kotala televizyo. Kasi, okanisi te ete tosengeli kopona makambo ya kotala? [Tiká ye apesa eyano. Na nsima tángá Masese 13:20.] Zulunalo oyo elobeli ndenge makambo oyo tomonaka na televizyo ekoki koteya biso to mpe kobebisa biso; epesi mpe makanisi oyo tokoki kolanda mpo tóponaka makambo ya kotala.”