Etamboli oyo epesaka Nzambe nkembo

1. Mpo na nini ezalaka mpasi te bato báyeba ete Batatoli ya Yehova bazali na liyangani ya etúká?

¹ Ntango tosalaka mayangani ya etúká, ezalaka mpasi te bato báyeba ete tozali na liyangani. Na bingumba mingi epai mayangani ya etúká esalemaka, nsango etambolaka ete liyangani ekozala mpe bato ya esika yango bamonaka ebele ya bapaya oyo balati bamakarɔ. Makambo oyo elandi, oyo tosengeli kobosana te, ekosalisa biso tópesa Nzambe nkembo na etamboli na biso na engumba oyo liyangani ekosalema.—1 Pe. 2:12.

2. Ndenge nini tokoki kopesa Nzambe nkembo na molato na biso oyo ebongi na engumba oyo liyangani ekosalema?

² Molato oyo ebongi: Mbala mingi, molato na biso oyo eleki ndelo te ntango tokei na liyangani, esepelisaka bato oyo batalaka biso. Kasi, ndenge oyo tolataka na bangonga mosusu, ntango tokei kolya na restora, kosomba biloko mpe bongo na bongo, ekoki kotinda bato bátalela biso na ndenge ya malamu to ya mabe. Atako tokolata te lokola na liyangani, bilamba oyo tolati esengeli kozala oyo ebongi, ya lokumu mpe ya bongobongo te. Bato oyo bazali kotala biso basengeli komona bokeseni kati na biso mpe bato oyo bazali Batatoli te. (Rom. 12:2) Lisusu, tosengeli kolata makarɔ na biso ya liyangani, mpo yango ekomonisa ete liyangani ezali, ekoki kobimisa mabaku ya kopesa litatoli mpe kosalisa bandeko mosusu báyeba biso.

3. Ndenge nini tokoki komonisa motema molai mpe bokonde?

³ Motema molai mpe bokonde: Na eleko oyo bato mingi na mokili balukaka kaka matomba na bango moko mpe bazangi botɔndi, ekozala mpenza esengo mpo na bato oyo bazali kotala biso, na ndakisa basali ya otɛlɛ mpe ya restora, bámona motema molai mpe bokonde na biso! (2 Tim. 3:1-5) Ntango tozali kokanga bisika ya kofanda to tozali na molɔngɔ mpo na kozwa mikanda oyo ebimi sika, tosengeli koluka kaka matomba na biso moko te, kasi mpe oyo ya moto mosusu. (1 Ko. 10:23, 24) Mobali moko oyo ayanganaki mpo na mbala ya liboso na liyangani ya etúká asepelaki mpe alobaki boye: “Nayebaka lisusu ata diskur moko te oyo esalemaki mokolo yango, kasi bizaleli ya Batatoli ya Yehova etikalá mpenza na makanisi na ngai.”

4. Mpo na nini tosengeli kotalela soki tokoki komipesa na bolingo na biso moko mpo na kosala misala na liyangani?

⁴ Komipesa na bolingo na biso moko: Eyebani ete bakristo ya solo bamipesaka na bolingo na bango moko. (Nz. 110:3) Yo mpe okoki komipesa na bolingo na yo moko mpo na kopesa mabɔkɔ na misala ya liyangani? Na liyangani moko ya etúká, bandeko mibali mpe basi pene na 600 bamipesaki mpo na kotya bopɛto liboso liyangani esalema. Etuluku moko ya basali balobaki ete: “Naino tomoná likambo ya boye te! Okondima te ete bato nyonso oyo basali mosala yango kozanga kozwa lifuti.” Tozali kozela na esengo liyangani ya etúká 2013 oyo ekopesa biso libaku ya koyoka mpe koyekola mateya ya Nzambe, mpe kopesa ye nkembo.

Makambo oyo tosengeli kobosana te mpo na Liyangani ya etúká 2013

◼ Manaka: Mikolo nyonso misato programɛ ekobanda na ngonga ya 8:20 na ntɔngɔ. Kasi, na bingumba ya minene lokola: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpe Tshikapa, programɛ ekobanda mikolo nyonso na ngonga ya 9:20 na ntɔngɔ. Baporte ya sika ya liyangani ekofungwama na ngonga ya 7:00 na ntɔngɔ na bisika oyo liyangani ekobanda na 8:20, mpe na 8:00 na ntɔngɔ, na bisika oyo ekobanda na 9:20. Ntango prezida ayebisi ete miziki elingi kobanda, biso nyonso tosengeli kozwa bisika ya kofanda mpo programɛ ebanda na ndenge ebongi. Mokolo ya mitano mpe ya pɔsɔ, liyangani ekosuka na ngonga ya 15:55, mpe mokolo ya lomingo ekosuka na ngonga ya 14:40. Na bingumba oyo totángi awa likoló ekosuka ngonga moko na nsima.

◼ Kokanga bisika ya kofanda: Tokoki kokanga bisika ya kofanda kaka mpo na bato ya ndako na biso, to baoyo toyei na bango motuka moko, to mpe baoyo toyekolaka na bango Biblia.—1 Ko. 13:5.

◼ Bilei ya midi: Tolendisi bino bómema bilei ya pɛpɛlɛ kasi oyo etongaka nzoto, na ndakisa mampa, bitabe, nguba, mikate to gato. Esengeli komema mai, tii to kafe, to masanga ya sukali na milangi oyo ekoki kopasuka te mpo ezokisa bato te. Epekisami komema masanga ya makasi na liyangani. Soki tomemi biloko na biso moko ya kolya, mai, mpe masanga ya sukali, tokobima kosomba yango epai ya batɛkisi na libándá te. Koboya kosomba biloko epai ya batɛkisi ya libándá ekomonisa mpenza ete tozali pɛto. (Liyebisi: Batɛkisi ya biloko ya kolya basengeli te kokɔta na esika ya liyangani ata na ngonga nini.—Yoa. 2:13-17.)

◼ Bopɛto: Mbala mingi, emonanaka ete baoyo basombaka biloko ya kolya libándá babwakaka nkasa to sashɛ na mabele. Yango wana, esika ya liyangani etondaka na bapapye, basashɛ, babushɔ ya milangi mpe biloko mosusu. Soki moto moko amoni malamu asomba biloko ya kolya libándá, asengeli kobwaka nkasa to sashɛ na bisika oyo ebongisami mpo na kobwaka bosɔtɔ, kasi na mabele te. Soki tomoni papye to sashɛ na mabele, tosengeli kolɔkɔta yango mpe kobwaka yango na bisika oyo ebongisami mpo na kobwaka bosɔtɔ. Bandeko, tobondeli bino ete biso nyonso tósala mpenza milende mpo na kobatela esika na biso ya liyangani pɛto, ezala na kati to na libándá. Moto nyonso oyo azali na liyangani asengeli koyeba ete bopɛto ezali na ntina mingi. Soki moto mokomoko apesi mabɔkɔ, esika ya liyangani ekobanda kotikala pɛto mikolo nyonso. Tolingi komonisa bizaleli ya Nzambe oyo tosambelaka, oyo azali mosantu.—1 Pe. 1:15, 16; Kob. 19:10; Mib. 23:14.

◼ Makabo: Tokoki komonisa botɔndi na biso mpo na nyonso oyo esalemi mpo na kobongisa liyangani soki topesi makabo ya bolingo malamu mpo na mosala ya kosakola na mokili mobimba, na liyangani. Soki moto alingi kopesa likabo na nzela ya chèque, akokoma yango na nkombo ya “Association ‘Les Témoins de Jéhovah.’”

◼ Makama mpe lisalisi ya nokinoki: Soki moto moko abɛli na mbalakaka to azwi likama na esika ya liyangani, esengeli naino koyebisa moko ya bandeko oyo bazali kopesa bisika ya kofanda; ye akoyebisa mbala moko bandeko ya departema ya lisalisi ya nokinoki mpo bátala soki moto yango azali na maladi ya ndenge nini mpe ndenge oyo bakoki kosalisa ye.

◼ Bankisi: Soki omɛlaka nkisi oyo monganga akɔmelá yo, kobosana te komema oyo osengeli na yango, mpamba te nkisi yango ekozala te na esika ya liyangani. Esengeli kobwaka bantonga ya bato oyo babɛlaka maladi ya diabɛti mpe bantonga nyonso mosusu na esika oyo ebongisami mpo na yango, kasi te na bisika ya kobwaka bosɔtɔ na liyangani, mpamba te ekoki kobimisa likama.

◼ Kokanga bafɔtɔ: Soki bolingi kokanga bafɔtɔ ntango liyangani ezali kosalema, bósalela mwinda (flash) ya aparɛyi te. Tosɛngi bino bóbengisa te na esika ya liyangani bato oyo basalaka mombongo ya kokanga bafɔtɔ. Soki bomoni bango na esika ya liyangani bazali koluka bakiliya, bókangisa bafɔtɔ epai na bango te.—Yoa. 2:13-17.

◼ Formilɛrɛ Veuillez suivre l’intérêt (S-43): Mbala nyonso oyo tokutani na moto oyo asepeli na nsango malamu ntango tozali kopesa litatoli ya libaku malamu na liyangani, tosengeli kotondisa formilɛrɛ Veuillez suivre l’intérêt (S-43). Basakoli basengeli komema formilɛrɛ yango moko to mibale na liyangani. Bokoki kopesa baformilɛrɛ oyo botondisi na bandeko oyo batalelaka mikanda na liyangani to na sɛkrɛtɛrɛ ya lisangá na bino.—Talá Mosala na biso ya Bokonzi ya Novɛmbɛ 2009, lokasa 4.

◼ Na restora: Tókumisa Yehova na etamboli na biso ya malamu na barestora. Tótika mwa mbongo mpo na mosali ya restora, soki esalemaka bongo.

◼ Na bisika oyo tokolala:

Tosɛngi bino bótosa motángo ya bato oyo nkolo-ndako ayebisi mpo na shambre moko.
Soki omoni ete okofanda lisusu te na esika oyo osɛngaki, osengeli koyebisa yango nokinoki.
Liboso ya kolamba, tuná naino nkolo-ndako to ndeko oyo azali kopesa bisika ya kolala na Ndako ya Bokonzi nini okoki kosala mpo makambo nyonso eleka malamu.
Salelá malamu eloko nyonso oyo bapesi yo ndingisa ya kosalela. Esengeli kosala makambo nyonso na bokatikati.
Esika na yo ya kolala ezalaka ntango nyonso pɛto mpe na molɔngɔ. Yango etali mpe Ndako ya Bokonzi, oyo ekoki kokóma esika ya kolala mpo na bandeko oyo bakouta na masangá ya mosika.
Monisá mbuma ya elimo ntango ozali elongo na basusu, ezala ndeko oyo ayambi yo na ndako na ye to bandeko mosusu oyo ozali kolala esika moko na bango.—Gal. 5:22, 23.

◼ Basali ya bolingo malamu: Ndeko nyonso oyo alingi kopesa mabɔkɔ na misala ya liyangani asengeli kokende na departema ya basali ya bolingo malamu. Mwana oyo akokisi naino mbula 16 te akoki mpe kopesa mabɔkɔ soki azali kosala elongo na moboti na ye to na ndeko mosusu oyo azali kokɛngɛla ye, to mpe mokóló moko oyo moboti ya mwana andimi ete akokɛngɛla ye.