Makambo oyo tosengeli kobosana te mpo na Liyangani ya etúká
Manaka: Mikolo nyonso misato programɛ ekobanda na 8:20. Kasi, na bingumba minene lokola: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpe Tshikapa, programɛ ekobanda mikolo nyonso na 9:20. Bato bakobanda kokɔta na bisika ya liyangani na ngonga ya 7:00 na bisika oyo liyangani ekobanda na 8:20 mpe na 8:00 na bisika oyo ekobanda na 9:20. Ntango prezida ya liyangani ayebisi ete miziki elingi kobanda, biso nyonso tosengeli kozwa bisika ya kofanda mpo programɛ ebanda na ndenge ebongi. Mokolo ya mitano mpe ya pɔsɔ, liyangani ekosuka na ngonga ya 15:55 mpe mokolo ya lomingo ekosuka na ngonga ya 14:40. Na bingumba oyo totángi awa likoló ekosuka ngonga moko na nsima.
‘Tókumisa Yehova na loyembo’: Basaleli ya Nzambe na ntango ya kala bakumisaki Yehova na loyembo mpe tii lelo oyo, miziki ezali na esika ya ntina mingi na losambo ya solo. (Nz. 28:7) Eteni mokomoko ya liyangani ya etúká ebandaka na miziki. Yango ezali te miziki oyo ebongisami mpo ebɛtaka na nsense, kasi ebongisami nde mpo tóyekola makambo etali Yehova mpe tósambela ye. Na yango, ntango prezida alobi ete miziki elingi kobanda, tosengeli kofanda mpe kolanda yango na botɔndi nyonso na esika ya kobɛta masolo. Kosala bongo ekomonisa ete tozwi na motuya milende ya bandeko oyo babɛtaka miziki na orchestre ya Watchtower. Mbala mibale na mbula, bandeko mibali mpe basi yango bafutaka tike na mbongo na bango moko mpo na kokende na Patterson, na New York, kobɛta miziki ya kitoko mpo na kosepelisa biso. Nsima ya koyoka miziki yango na likebi, biso nyonso tosengeli kosangisa mingongo mpo na kokumisa Yehova na koyemba nzembo ya Bokonzi.
Kokanga bisika ya kofanda: Tokoki kokanga bisika ya kofanda kaka mpo na bato ya ndako na biso, to baoyo toyei na bango motuka moko, to mpe baoyo toyekolaka na bango Biblia.
Molato oyo ebongi: Molato na biso na ntango ya liyangani esengeli kozala oyo ebongi, ya kolekisa ndelo te, mpe lokola oyo ya bato ya mokili te. (1 Tim. 2:9) Ata mokolo oyo toyei na otɛlɛ to mokolo oyo tokobima mpe ntango tozali kozwa mopɛpɛ liboso to nsima ya liyangani, tosengeli kolata malamu mpe kobongisa nzoto na ndenge ebongi. Yango ekosala ete tóyoka nsɔni te kolata makarɔ na biso ya liyangani mpe tópesa litatoli soki libaku emonani. Ndenge oyo tokomonana na miso ya bato mpe etamboli na biso ya malamu na liyangani ekobenda likebi ya bato ya mitema sembo na nsango ya Biblia oyo ebikisaka mpe yango ekosepelisa Yehova.—Sef. 3:17.
Salelá baaparɛyi na bonkonde: Tokomonisa bonkonde na ntango ya liyangani soki totye telefone, tablɛti to aparɛyi mosusu na ndenge oyo ekolongola te likebi ya basusu. Soki tozali kosalela kamera to aparɛyi mosusu ya kokɔtisa mingongo to tablɛti ntango liyangani ezali kosalema, tosengeli kokeba ete epekisa te basusu komona malamu. Tokomonisa mpe bonkonde soki toboyi kotinda mpambampamba bamesaje na telefone to kosalela Internet na ntango ya liyangani. Tosɛngi bino bóbengisa te bato oyo basalaka mombongo ya kokanga bafɔtɔ na esika ya liyangani. Soki bomoni bango na esika ya liyangani bazali kosɛnga ete bákanga bino fɔtɔ, bóboya.—Yoa. 2:13-17.
Bilei ya midi: Tolendisi bino bómema bilei ya pɛpɛlɛ kasi oyo etongaka nzoto, na ndakisa mampa, bitabe, nguba, mikate to gato. Esengeli komema mai, kafe, tii, to masanga ya sukali na milangi oyo ekoki kopasuka te mpo ebimisa likama te. Epekisami komema masanga ya makasi to oyo ezali na alkole na liyangani. Soki tomemi biloko na biso moko ya kolya mpe ya komɛla, tokobima te libándá kosomba yango epai ya batɛkisi. Koboya kosomba biloko epai ya batɛkisi ya libándá ekomonisa mpenza ete tozali pɛto. (Liyebisi: Batɛkisi ya biloko ya kolya basengeli te kokɔta na esika ya liyangani ata na ngonga nini.—Yoa. 2:13-17).
Makabo: Tokoki komonisa botɔndi na biso mpo na nyonso oyo esalemi mpo na kobongisa liyangani soki topesi makabo ya bolingo malamu na esika ya liyangani, mpo na mosala ya kosakola na mokili mobimba. Soki moto alingi kopesa likabo na nzela ya chèque, akokoma yango na nkombo ya “Association ‘Les Témoins de Jéhovah.’”
Bankisi: Soki omɛlaka nkisi oyo monganga akomelá yo, kobosana te komema oyo osengeli na yango, mpamba te nkisi yango ekozala te na esika ya liyangani. Esengeli kobwaka bantonga ya bato oyo babɛlaka maladi ya diabɛti mpe bantonga nyonso mosusu na esika oyo ebongisami mpo na yango, kasi te na bisika ya kobwaka bosɔtɔ na liyangani, mpamba te ekoki kobimisa likama.
Makama mpe lisalisi ya nokinoki: Soki moto moko abɛli na mbalakaka to azwi likama na esika ya liyangani, esengeli naino koyebisa moko ya bandeko oyo bazali kopesa bisika ya kofanda; ye akoyebisa mbala moko bandeko ya departema ya lisalisi ya nokinoki mpo bátala soki moto yango azali na maladi ya ndenge nini mpe ndenge oyo bakoki kosalisa ye.
Formilɛrɛ Veuillez suivre l’intérêt (S-43): Mbala nyonso oyo tokutani na moto oyo asepeli na nsango malamu ntango tozali kopesa litatoli ya libaku malamu na liyangani, tosengeli kotondisa formilɛrɛ Veuillez suivre l’intérêt (S-43). Bokoki kopesa baformilɛrɛ oyo botondisi na Departema ya mikanda na liyangani to na sɛkrɛtɛrɛ ya lisangá na bino.
Na restora: Kumisá Yehova na etamboli na yo ya malamu na restora. Latá na ndenge oyo ebongi na ministre mokristo. Tikelá mosali ya restora mwa mbongo mpo na mosala na ye, soki esalemaka bongo.
Na bisika oyo tokolala:
Tosɛngi bino bótosa motángo ya bato oyo nkolo-ndako ayebisi mpo na shambre moko.
Soki omoni ete okofanda lisusu te na esika oyo osɛngaki, yebisá yango nokinoki.
Liboso ya kolamba, tuná naino nkolo-ndako to bandeko oyo bazali kopesa bisika ya kolala na Ndako ya Bokonzi nini okoki kosala mpo makambo nyonso eleka malamu.
Salelá malamu eloko nyonso oyo bapesi bapaya ndingisa ya kosalela. Esengeli kosala makambo nyonso na bokatikati.
Esika na yo ya kolala ezalaka ntango nyonso pɛto mpe na molɔngɔ. Yango etali mpe Ndako ya Bokonzi, oyo ekoki kokóma esika ya kolala mpo na bandeko oyo bakouta na masangá ya mosika.
Monisá mbuma ya elimo ntango ozali elongo na basusu, ezala ndeko oyo ayambi yo na ndako na ye to bandeko mosusu oyo ozali kolala esika moko na bango.—Gal. 5:22, 23.
Basali ya bolingo malamu: Ndeko nyonso oyo alingi kopesa mabɔkɔ na misala ya liyangani asengeli kokende na Departema ya basali ya bolingo malamu. Mwana oyo akokisi naino mbula 16 te akoki mpe kopesa mabɔkɔ soki azali kosala elongo na moboti na ye to na ndeko mosusu oyo azali kokɛngɛla ye, to mpe na mokóló moko oyo moboti ya mwana andimi ete akokɛngɛla ye.