Kobosana te kobondelaka mpo na basusu

1. Ndenge nini toyebi ete mabondeli na biso ezali na ntina mpo na Yehova?

LIBONDELI ezali ebongiseli moko ya kokamwa mpenza. Kanisá naino: Yehova atikaka baanzelu bákokisa misala mosusu. (Nz. 91:11) Apesá mpe Mwana na ye mikumba mosusu ya minene. (Mat. 28:18) Bongo mokumba ya koyoka mabondeli? Yehova apesá yango moto mosusu te; ye moko nde asalaka yango. Yehova, “Moyoki ya libondeli,” ye moko nde ayokaka biso.—Nz. 65:2.

2. Ndakisa nini ntoma Paulo atikelá biso?

² Ya solo, tokoki kobondela Yehova na motema mobimba mpo na mitungisi na biso, kasi tosengeli mpe kobondela mpo na basusu. Ntoma Paulo azalaki kosala yango. Na ndakisa, akomelaki lisangá ya Efese boye: “Nazali kokoba kotánga bino na mabondeli na ngai.” (Ef. 1:16) Paulo azalaki mpe kobondela mpo na moto mokomoko. Na ndakisa, ayebisaki Timote ete: “Nazali kotɔnda Nzambe, . . . nakanisaka yo ntango nyonso na mabondeli na ngai butu moi.” (2 Tim. 1:3) Paulo ye moko mpe azalaki na mikakatano oyo akokaki kobondela mpo na yango. (2 Ko. 11:23; 12:​7, 8) Atako bongo, azalaki kozwa ntango ya kobondela mpo na basusu.

3. Mpo na nini tokoki kobosana kobondela mpo na basusu?

³ Na bantango mosusu tobosanaka kobondela mpo na basusu. Mpo na nini? Ndeko mwasi moko na nkombo Sabrinaa apesi ntina moko. Alobi boye: “Tozalaka na makambo mingi ya kosala mbangumbangu. Tokoki kotya likebi kaka na makambo na biso moko mpe kobondela kaka mpo na bamposa na biso.” Yango mpe nde ekómelaka yo? Soki bongo, lisolo oyo ekoki kosalisa yo. (1) Ekomonisa mpo na nini ezali na ntina kobondela mpo na basusu mpe (2) ekolobela makanisi mpo na ndenge oyo okoki kosala yango.

MPO NA NINI KOBONDELA MPO NA BASUSU?

4-5. Na ndenge nini kobondela mpo na basusu ezalaka “na nguya mingi”? (Yakobo 5:16)

⁴ Kobondela mpo na basusu “ezalaka na nguya mingi.” (Tángá Yakobo 5:16.) Kobondela mpo na basusu ekoki mpenza kosalisa bango na likambo oyo bazali na yango? Ɛɛ. Ntango Yesu ayebaki ete mosika te ntoma Petro akowangana ye, alobaki: “Nasali libondeli mpo na yo mpo kondima na yo elɛmba te.” (Luka 22:32) Paulo mpe ayebaki ete libondeli ekoki kosalisa mingi. Ntango bakangaki ye na bolɔkɔ na Roma atako asalaki mabe te, akomelaki Filemo boye: “Nazali na elikya ete, na nzela ya mabondeli na bino, bakotika ngai mpo na bolamu na bino.” (Flm. 22) Esalemaki mpe bongo; eumelaki te, babimisaki Paulo na bolɔkɔ mpe azongelaki mosala ya kosakola.

⁵ Kasi, yango elingi koloba te ete mabondeli na biso ezali mpo na kotya Yehova mbamba. Ayokaka mitungisi ya basaleli na ye, mpe na bantango mosusu amonaka malamu asalela bango likambo oyo basɛngi. Koyeba likambo yango ekoki kolendisa biso tóbondelaka Yehova na molende mpo na likambo oyo tozali na yango, mpe na nsima kotya motema mpe kotika nyonso na mabɔkɔ na ye.—Nz. 37:5; talá mpe 2 Bakorinti 1:11.

6. Kobondela mpo na basusu ekoki kosala ete tótalelaka bango ndenge nini? (1 Petro 3:8)

⁶ Kobondela mpo na basusu ekosalisa biso ‘tóyokelaka bango mawa.’ (Tángá 1 Petro 3:8.) Koyokela moto mawa elimboli koyeba mpasi na ye mpe koluka kosala mwa likambo mpo na kosalisa ye. (Mrk. 1:​40, 41) Nkulutu moko na nkombo Michael alobi boye: “Ntango nazali kobondela mpo na bamposa ya basusu, esalisaka ngai nayeba malamu mikakatano oyo bazali na yango, mpe nakómaka kolinga bango mingi. Namiyokaka lisusu penepene na bango, ata soki mbala mosusu bango moko bazali koyeba te.” Nkulutu mosusu na nkombo Richard alobeli litomba mosusu. Alobi boye: “Ntango tobondeli mpo na moto moko, tokómaka na mposa ya koluka ndenge ya kosalisa ye.” Abakisi boye: “Ntango tosali likambo moko mpo na kosalisa moto oyo tozali kobondela mpo na ye, ezali lokola tosalisi na koyanola na mabondeli na biso mpo na ye.”

7. Ndenge nini kobondela mpo na basusu esalisaka biso tótalela mikakatano na biso moko na bokatikati? (Bafilipi 2:​3, 4) (Talá mpe bililingi.)

⁷ Kobondela mpo na basusu ekosalisa biso tótalela mikakatano na biso na ndenge oyo ebongi. (Tángá Bafilipi 2:​3, 4.) Biso nyonso tozali kokutana na bampasi mpo tofandi na mokili oyo eyangelami na Zabolo. (1 Yoa. 5:19; Em. 12:12) Ntango tokómi na momeseno ya kobondela mpo na basusu, tokobanda kobosana te ete “bampasi ya ndenge wana ezali mpe kokómela lisangá mobimba ya bandeko na [biso] na mokili.” (1 Pe. 5:9) Mobongisi-nzela moko na nkombo Katherine alobi boye: “Kobondela mpo na basusu ekundwelaka ngai ete basusu mpe bazali na mikakatano. Yango epekisaka ngai namitungisa koleka ndelo mpo na makambo na ngai moko.”

BAZALI NA MPOSA YA MABONDELI NA BISO

8. Tokoki kobondela mpo na banani?

⁸ Tokoki kobondela mpo na banani? Tokoki kobondela mpo na bato ebele na mbala moko; na ndakisa baoyo bazali kobɛla, bilenge oyo baninga bazali kotyola mpe kotya bango mbamba na eteyelo, to bandeko oyo bazali na mikakatano ya bobange. Bandeko mingi bazali kokutana na botɛmɛli, oyo euti na libota to na baguvɛrnema. (Mat. 10:​18, 36; Mis. 12:5) Esɛngaki na bandeko mosusu básundola bandako na bango mpo na yikiyiki ya politiki. Bandeko mosusu bakutanaki na makama oyo esalemaki. Mbala mosusu toyebi te bandeko oyo bazali na makambo ya ndenge wana. Kasi, ntango tozali kobondela mpo na bango, tozali komonisa ete tolandaka etinda ya Yesu oyo ete “bolinganaka.”—Yoa. 13:34.

9. Mpo na nini tosengeli kobondelaka mpo na baoyo bazali kokamba na ebongiseli ya Yehova mpe mpo na basi na bango?

⁹ Tokoki mpe kobondela mpo na bandeko oyo bazali kokamba na ebongiseli ya Yehova. Na ndakisa, bandeko ya Lisangani ya Mikóló-Bakambi ná basungi na bango, bandeko ya Komite ya filiale, bakɛngɛli na badepartema ya Betele, bakɛngɛli ya zongazonga, bankulutu ya masangá, mpe basaleli na misala. Bandeko yango mingi bazalaka mpe na mitungisi na bango moko wana bazali komipesa mpo na bolamu na biso. (2 Ko. 12:15) Na ndakisa, mokɛngɛli ya zongazonga moko na nkombo Mark alobi boye: “Moko ya mikakatano na ngai ya minene ezali kozala mosika na baboti na ngai oyo bakómi mibange. Bango mibale bazali nzoto malamu te. Atako yaya na ngai ya mwasi ná mobali na ye bakokisaka bamposa na bango, esalaka ngai mpasi ndenge nazali na likoki te ya kosala mingi mpo na bango.” Tóyeba to te mitungisi oyo bandeko yango oyo basalaka mosala makasi bazali na yango, ekozala malamu tókoba kobondela mpo na bango. (1 Tes. 5:​12, 13) Tokoki mpe kobondela mpo na basi ya bandeko yango, mpo bapesaka mibali na bango mabɔkɔ na bosembo nyonso mpo bákoba na mikumba na bango.

10-11. Yehova asepelaka na mabondeli oyo tosalaka mpo na bandeko mingi? Limbolá.

¹⁰ Ndenge tomoni yango, mbala mingi tobondelaka mpo na bandeko mibali mpe basi ebele na mbala moko. Na ndakisa, ata soki tozali na moto moko te na makanisi, tokoki kosɛnga Yehova asalisa baoyo bazali na bolɔkɔ to abɔndisa baoyo babungisi na liwa moto oyo balingaka. Nkulutu moko na nkombo Donald alobi boye: “Tozali na bandeko mibali mpe basi mingi mpenza oyo bazali kokutana na mikakatano, mpe na bantango mosusu tosalaka libondeli mpe tokɔtisaka baoyo nyonso bazali konyokwama.”

¹¹ Yehova asepelaka na mabondeli ya ndenge wana? Mpo na nini te? Tókende tózonga, toyebi te bamposa ya sikisiki ya ndeko mokomoko. Na yango, ezali mabe te kosala mabondeli oyo ekokɔtisa bamposa ya bandeko ebele na mbala moko. (Yoa. 17:20; Ef. 6:18) Mabondeli ya ndenge wana emonisaka ete tolingaka “lisangá mobimba ya bandeko.”—1 Pe. 2:17.

KOTÁNGA BANKOMBO YA BATO NA MABONDELI NA BISO

12. Ndenge nini koyeba kosalela miso ekoki kosalisa biso na mabondeli na biso?

¹² Yebá kosalela miso. Longola kobondela mpo na bandeko ebele na mbala moko, ebongi mpe kotángaka bankombo ya bato na mabondeli na biso. Ezali na moto moko na lisangá na bino oyo aumeli na maladi? Ezali na elenge moko oyo alɛmbi nzoto, mbala mosusu mpo bazali kotya ye mbamba na eteyelo? Ezali na ndeko oyo azali kobundana ye moko mpo na kobɔkɔla mwana “na disiplini mpe na mateya ya Yehova”? (Ef. 6:​4, msl.) Soki oyebi kosalela miso, okoyeba komitya na esika ya basusu, mpe yango ekopesa yo mpenza mposa ya kobondela mpo na bango.b—Rom. 12:15.

13. Ndenge nini tokoki kobondela mpo na bandeko oyo toyebani na bango te?

¹³ Tángáká bankombo ya bato na mabondeli na yo. Tokoki kosala yango ata mpo na bandeko oyo tokutaná na bango naino te. Na ndakisa, kanisá bandeko oyo bazali na bolɔkɔ na bisika lokola Crimée, Érythrée, Russie mpe na Singapour. Na jw.org, okoki komona bankombo ya bandeko oyo bazali na bolɔkɔ.c Mokɛngɛli ya zongazonga moko na nkombo Brian alobi boye: “Namoni ete kokoma nkombo ya ndeko oyo azali na bolɔkɔ mpe na nsima koloba yango na mongongo makasi esalisaka ngai nakanisa ndeko yango mpe natánga nkombo na ye na mabondeli na ngai moko.”

14-15. Nini ekoki kosalisa biso tósɛngaka makambo ya sikisiki?

¹⁴ Sɛngáká makambo ya sikisiki. Michael, oyo tolobelaki liboso, apesi likanisi oyo: “Ntango nazali kotánga na jw.org masolo ya bandeko oyo bazali na bolɔkɔ, namekaka kokanisa ndenge oyo nalingaki komiyoka soki nazalaki na esika na bango. Na ndakisa, soki ezalaki ngai, nakomitungisa mpo na mwasi na ngai, mpe nakosala nyonso mpo azala na oyo esengeli. Yango epesaka ngai likambo ya sikisiki oyo nakoki kosɛnga na mabondeli na ngai mpo na bandeko oyo babalá mpe bazali na bolɔkɔ.”—Ebr. 13:​3, msl.

¹⁵ Ntango tokanisi ndenge oyo bandeko oyo bazali na bolɔkɔ balekisaka mokolo, tokoki mpe komona makambo mosusu ya sikisiki ya kosɛnga na mabondeli na biso mpo na bango. Na ndakisa, tokoki kobondela ete bakɛngɛli ya bolɔkɔ bázala na boboto mpe ete baoyo bazali na bokonzi bátika bandeko na biso básambela Yehova na bonsomi. (1 Tim. 2:​1, 2) Tokoki mpe kobondela ete ndakisa ya bosembo ya bandeko oyo bazali na bolɔkɔ elendisa kondima ya bandeko ya lisangá, to ete baoyo bazali bandimi te bámona etamboli malamu ya ndeko moko na bolɔkɔ mpe bándima nsango na biso. (1 Pe. 2:12) Makanisi yango ekosalisa biso mpe na mabondeli na biso mpo na bandeko oyo bazali koyika mpiko na mikakatano ya ndenge mosusu. Soki toyebi kosalela miso, tozali kotánga nkombo ya basusu, mpe tozali kosɛnga makambo ya sikisiki, tokomonisa ete ‘totondi na bolingo ya biso na biso.’—1 Tes. 3:12.

TÓZALA NA BOKATIKATI NA OYO ETALI MABONDELI NA BISO

16. Mpo na nini tosengeli kozala na bokatikati na oyo etali mabondeli na biso? (Matai 6:8)

¹⁶ Ndenge tomoni yango, mabondeli na biso mpo na moto ekoki kosalisa na kobongola likambo na ye. Kasi, tosengeli kozala na bokatikati. Ntango tozali kobondela, elimboli te ete tozali koyebisa Yehova likambo oyo ayebi naino te; tosengeli mpe te koyebisa ye ndenge ya malamu oyo akoki kosilisa likambo. Yehova ayebi makambo oyo basaleli na ye bazali na yango mposa liboso kutu bango moko báyeba yango, to biso tóyeba yango. (Tángá Matai 6:8.) Bongo mpo na nini tosengeli kobondela mpo na basusu? Longola bantina oyo tolobeli na lisolo oyo, kobondela mpo na basusu emonisaka ete totyelaka bato likebi. Bolingo etindaka biso tóbondelaka mpo na basusu. Mpe Yehova asepelaka komona basaleli na ye bazali komonisa bolingo na ye.

17-18. Mabondeli na biso mpo na basusu emonisaka nini? Pesá ndakisa.

¹⁷ Ata soki tomoni lokola mabondeli na biso esalisi te na likambo moko boye, tóyeba ete emonisaka ete tolingaka bandeko na biso, mpe Yehova amonaka yango. Tózwa ndakisa oyo: Kanisá ete mwasi ná mobali moko bazali na bana mibale ya mike, moko ya mwasi mpe mosusu ya mobali. Oyo ya mobali abɛli mpe alali na mbeto. Oyo ya mwasi ayebisi papa na bango: “Papa, salisá ndeko na ngai. Azali kobɛla mpenza!” Papa azali kosala nyonso oyo esengeli; alingaka mwana na ye ya mobali mpe azali kokipe ye. Kasi, na ntembe te papa yango asepeli mingi komona ndenge mwana na ye ya mwasi amibanzabanzaka mpo na ndeko na ye ya mobali ndenge asɛngi ye asalisa ye.

¹⁸ Yango nde Yehova alendisi biso tósalaka: tómibanzabanzaka mpo na basusu mpe tóbondelaka mpo na bango. Soki tozali kosala bongo, mabondeli na biso ekomonisa ete tozali na moimi te mpo totalaka mpe bolamu ya basusu mpe Yehova amonaka yango. (2 Tes. 1:3; Ebr. 6:10) Lisusu, ndenge toyekoli yango, na bantango mosusu mabondeli na biso mpo na moto ekoki kutu kosalisa na kobongola likambo ye. Yango wana, tóbosanaka ata moke te kobondelaka mpo na basusu.