Mituna ya batángi

Mpo na nini Batatoli ya Yehova bakendaka bitumba te?

Banda kala, Batatoli ya Yehova na mokili mobimba bakɔtaka na bitumba te, ezala etumba kati na bikólo to kati ya bato ya ekólo moko. Eleki mbula 50, buku moko (Australian Encyclopædia) elobaki boye: “Batatoli ya Yehova bakɔtaka ata moke te na bitumba.”

Ntina ya libosoliboso oyo Batatoli baboyaka kokɔta na bitumba ezali ete kosala bongo eyokani te na lisosoli na bango. Lisosoli na bango eteyami na mitinda oyo Yesu Klisto apesaki mpe na ndakisa na ye. Yesu ateyaki bayekoli na ye bálingaka bazalani na bango. Apesaki mpe etinda oyo: “Bókoba kolinga banguna na bino, kosala malamu na bato oyo bayinaka bino.” (Luka 6:27; Matai 22:39) Ntango moyekoli na ye moko asalelaki mopanga mpo na kobatela ye, Yesu alobaki na ye boye: “Zongisá mopanga na yo na esika na yango, mpo baoyo nyonso bakamataka mopanga bakokufa na mopanga.” (Matai 26:52) Na yango, na maloba mpe na ndakisa na ye, Yesu amonisaki polele ete bayekoli na ye basengeli te kosimba mandoki mpo na kobunda.

Ntina mosusu oyo Batatoli ya Yehova bakendaka bitumba te ezali ete bazali na lisangá oyo bandimi na yango bazali na bikólo nyonso ya mokili. Kokende etumba ekotinda bango bábunda na bandeko na bango mpe yango eyokani te na etinda ya Yesu ya kozala na ‘bolingo na kati bango.’​—Yoane 13:35.

Batatoli ya Yehova basukaka kaka te na kolobela bolingo, kasi bamonisaka yango mpenza. Na ndakisa, tótalela ezaleli na bango na Etumba ya Mibale ya mokili mobimba, oyo ebandaki na 1939 tii na 1945. Na États-Unis, Batatoli ya Yehova koleka 4 300 bakɔtaki bolɔkɔ mpo baboyaki kosala mosala ya soda. Na Angleterre, Batatoli ya Yehova koleka 1 500, kati na bango basi koleka 300 bakɔtaki bolɔkɔ mpo baboyaki misala oyo ezalaki na boyokani na bitumba. Na Allemagne, na boyangeli ya Banazi, Leta atindaki ete Batatoli koleka 270 bábomama mpo baboyaki kosimba mandoki. Batatoli koleka 10 000 batindamaki na bolɔkɔ to mpe na bakaa ya bakangami. Na Japon mpe Batatoli bakutanaki na minyoko ya makasi. Bato nyonso oyo bakufelaki bandeko na bango na Etumba ya Mibale ya mokili mobimba​—to na bitumba mosusu—​basengeli koyeba ete ata Motatoli ya Yehova moko te abomaki bato na bitumba wana.

Ndenge oyo Batatoli ya Yehova batalelaka bitumba emonisami na maloba ya nsuka oyo Wolfgang Kusserow alobaki. Na 1942, Banazi bakataki motó ya elenge yango ya Allemagne oyo azalaki na mbula 20, mpamba te aboyaki kokende na etumba. (Yisaya 2:4) Elenge yango alobaki boye liboso ya tribinale ya basoda: “Nabokwamaki na libota ya Batatoli ya Yehova, bateyaki ngai maloba ya Nzambe oyo ezali na Makomami Mosantu. Mobeko mosantu oyo eleki monene, oyo Nzambe apesi bato ezali ete: ‘Osengeli kolinga Nzambe na yo koleka eloko mosusu nyonso mpe mozalani na yo lokola yo moko.’ Mobeko mosusu elobi ete: ‘Osengeli koboma te.’ Bokanisi ete Mozalisi na biso apesaki mibeko yango epai ya banzete?”​—Malako 12:29-31; Exode 20:13.

Batatoli ya Yehova bandimaka ete kaka Yehova, Nzambe Mozwi-ya-Nguya nyonso, nde akotya kimya ya libela awa na mabelé. Bazalaka na elikya ete akokokisa elaka na ye ya ‘kosilisa bitumba kino nsuka ya mokili.’​—Nzembo 46:9.