ກິດຈະການຂອງອັກຄະສາວົກ
2 ເມື່ອຮອດເທດສະການເພັນເຕກອດ+ ລູກສິດທັງໝົດກໍມາລວມກັນຢູ່ບ່ອນດຽວ. 2 ທັນໃດນັ້ນ ມີສຽງຈາກຟ້າຄືກັບສຽງພາຍຸ. ສຽງນັ້ນດັງສະໜັ່ນໄປທົ່ວເຮືອນທີ່ເຂົາເຈົ້ານັ່ງຢູ່.+ 3 ເຂົາເຈົ້າເຫັນບາງສິ່ງຄືກັບແປວໄຟເຊິ່ງມີຮູບຮ່າງຄືກັບລີ້ນ ລອຍຢູ່ເທິງແຕ່ລະຄົນ. 4 ເຂົາເຈົ້າຈຶ່ງໄດ້ຮັບພະລັງບໍລິສຸດ+ແລະເລີ່ມເວົ້າພາສາຕ່າງໆຕາມທີ່ພະລັງນັ້ນໃຫ້ເວົ້າ.+
5 ຕອນນັ້ນ ມີຄົນຢິວທີ່ນັບຖືພະເຈົ້າຈາກທຸກປະເທດທົ່ວໂລກມາຢູ່ເມືອງເຢຣູຊາເລັມ.+ 6 ຕອນທີ່ສຽງນັ້ນດັງຂຶ້ນ ຄົນຫຼາຍແທ້ຫຼາຍວ່າກໍມາຫຸ້ມເບິ່ງ ທັງສົງໄສແລະແປກໃຈ ຍ້ອນແຕ່ລະຄົນໄດ້ຍິນພວກລູກສິດເວົ້າພາສາຂອງເຂົາເຈົ້າ. 7 ເຂົາເຈົ້າຮູ້ສຶກງຶດແລະເວົ້າວ່າ: “ເບິ່ງແມ້ ຄົນເຫຼົ່ານີ້ເປັນຄົນຄາລີເລ+ບໍ່ແມ່ນບໍ? 8 ເປັນໄປໄດ້ແນວໃດທີ່ພວກເຮົາໄດ້ຍິນເຂົາເຈົ້າເວົ້າພາສາຂອງພວກເຮົາ?* 9 ພວກເຮົາມີທັງຄົນປາເທຍ ຄົນເມເດຍ+ ແລະຄົນເອລາມ.+ ບາງຄົນມາຈາກເມໂຊໂປຕາເມຍ ຢູດາຍ ກາປາໂດເກຍ ປົນໂຕ ແລະແຂວງອາຊີ*+ 10 ຟີເຄຍ ປຳຟີເລຍ ເອຢິບ ແລະສ່ວນຕ່າງໆຂອງລີເບຍໃກ້ກັບກີເຣເນ ແລະຄົນທີ່ມາຈາກເມືອງໂຣມ ທັງຄົນຢິວກັບຄົນທີ່ປ່ຽນມາຖືສາສະໜາຢິວ.+ 11 ບາງຄົນເປັນຄົນກະເຣເຕແລະຄົນອາຣັບ. ພວກເຮົາໄດ້ຍິນຄົນເຫຼົ່ານີ້ເວົ້າເຖິງສິ່ງອັດສະຈັນຕ່າງໆທີ່ພະເຈົ້າເຮັດໃນພາສາຂອງພວກເຮົາ.” 12 ເຂົາເຈົ້າກໍສົງໄສຫຼາຍແລະພາກັນເວົ້າວ່າ: “ເກີດຫຍັງຂຶ້ນຢູ່ນີ້?” 13 ສ່ວນບາງຄົນກໍເຍາະເຍີ້ຍວ່າ: “ພວກນີ້ເມົາເຫຼົ້າແລ້ວ.”
14 ແລ້ວເປໂຕກໍຢືນຂຶ້ນພ້ອມກັບອັກຄະສາວົກ* 11 ຄົນ+ແລະເວົ້າກັບຄົນອື່ນໆດ້ວຍສຽງດັງວ່າ: “ຄົນຢູດາຍແລະທຸກຄົນທີ່ຢູ່ໃນເມືອງເຢຣູຊາເລັມ ຂໍໃຫ້ຕັ້ງໃຈຟັງເລື່ອງທີ່ຂ້ອຍຈະເວົ້າ. 15 ຄົນເຫຼົ່ານີ້ບໍ່ໄດ້ເມົາເຫຼົ້າຄືກັບທີ່ພວກເຈົ້າຄິດ ເພາະຕອນນີ້ຫາກໍ 9 ໂມງເຊົ້າ.* 16 ສິ່ງທີ່ພວກເຈົ້າເຫັນເປັນໄປຕາມທີ່ໂຢເອນພະຍາກອນໄວ້ວ່າ 17 ‘ພະເຈົ້າບອກວ່າ “ໃນສະໄໝສຸດທ້າຍ ເຮົາຈະເອົາ*ພະລັງຂອງເຮົາໃຫ້ຄົນທຸກປະເພດ. ພວກລູກຊາຍແລະລູກສາວຂອງເຈົ້າຈະພະຍາກອນ. ຄົນໜຸ່ມຈະເຫັນນິມິດແລະຜູ້ເຖົ້າຈະຝັນເລື່ອງພິເສດ.+ 18 ແມ່ນແຕ່ທາດຜູ້ຊາຍແລະທາດຜູ້ຍິງຂອງເຮົາ ເຮົາກໍຈະເອົາພະລັງຂອງເຮົາໃຫ້ເຂົາເຈົ້າໃນມື້ນັ້ນ ແລະເຂົາເຈົ້າຈະພະຍາກອນ.+ 19 ເຮົາຈະເຮັດໃຫ້ມີສິ່ງທີ່ອັດສະຈັນຢູ່ເທິງຟ້າແລະຢູ່ໃນໂລກ ມີເລືອດ ມີໄຟ ແລະມີຄວັນຫຼາຍໆລອຍຂຶ້ນໄປ. 20 ຕາເວັນຈະມືດ ເດືອນຈະເປັນສີແດງຄືກັບເລືອດ ກ່ອນວັນທີ່ຍິ່ງໃຫຍ່ແລະງົດງາມຂອງເຮົາເຢໂຫວາ*ຈະມາຮອດ. 21 ທຸກຄົນທີ່ອ້ອນວອນໂດຍອອກຊື່ຂອງພະເຢໂຫວາ*ຈະລອດ.”’+
22 ຄົນອິດສະຣາເອນ ຂໍໃຫ້ຕັ້ງໃຈຟັງເດີ້. ພວກເຈົ້າກໍຮູ້ແລ້ວວ່າ ພະເຈົ້າໄດ້ໃຊ້ພະເຢຊູຄົນນາຊາເຣັດໃຫ້ເຮັດການອັດສະຈັນແລະສະແດງປາຕິຫານຕ່າງໆໃຫ້ພວກເຈົ້າເຫັນ ເພື່ອພິສູດວ່າພະເຢຊູແມ່ນຜູ້ທີ່ເພິ່ນສົ່ງມາ.+ 23 ພະເຢຊູຜູ້ນີ້ແຫຼະທີ່ພວກເຈົ້າຈັບແລະຢືມມືຄົນຊົ່ວຂ້າເພິ່ນໂດຍຄຶງໄວ້ເທິງເສົາ+ ຕາມທີ່ພະເຈົ້າຕັ້ງໃຈໄວ້ແລະພະເຈົ້າກໍຮູ້ລ່ວງໜ້າ.+ 24 ແຕ່ພະເຈົ້າປຸກພະເຢຊູໃຫ້ຟື້ນຄືນມາ+ແລະປົດປ່ອຍເພິ່ນຈາກຄວາມຕາຍ ຍ້ອນເປັນໄປບໍ່ໄດ້ທີ່ເພິ່ນຈະຖືກຄວາມຕາຍຂັງໄວ້.+ 25 ດາວິດໄດ້ເວົ້າກ່ຽວກັບພະເຢຊູວ່າ ‘ລູກຄິດເຖິງພະເຢໂຫວາ*ຕະຫຼອດ. ພະອົງຢູ່ເບື້ອງຂວາມືຂອງລູກ ລູກຈຶ່ງບໍ່ຢ້ານຫຍັງ. 26 ລູກມີຄວາມສຸກແລະເວົ້າດ້ວຍຄວາມດີໃຈ ແລະຈະຢູ່ຢ່າງມີຄວາມຫວັງ. 27 ພະອົງຈະບໍ່ປະລູກໄວ້ໃນບ່ອນຝັງສົບ* ແລະພະອົງຈະບໍ່ຍອມໃຫ້ຄົນທີ່ພັກດີຕໍ່ພະອົງເຫັນຄວາມເນົ່າເປື່ອຍ.+ 28 ພະອົງເຮັດໃຫ້ລູກຮູ້ຫົນທາງຂອງຊີວິດ ແລະເຮັດໃຫ້ລູກມີຄວາມສຸກທີ່ໄດ້ຢູ່ນຳພະອົງ.’*+
29 ພີ່ນ້ອງເອີ້ຍ ຂ້ອຍຂໍເວົ້າກົງໆກັບພວກເຈົ້າເລື່ອງດາວິດທີ່ເປັນປູ່ຍ່າຕານາຍຂອງພວກເຮົາ. ລາວຕາຍແລະຖືກຝັງໄວ້.+ ບ່ອນຝັງສົບຂອງລາວກໍຢູ່ໃນເມືອງຂອງພວກເຮົາຈົນຮອດທຸກມື້ນີ້. 30 ດາວິດເປັນຜູ້ພະຍາກອນແລະຮູ້ວ່າພະເຈົ້າສາບານໄວ້ວ່າ ເພິ່ນຈະແຕ່ງຕັ້ງລູກຫຼານຄົນໜຶ່ງຂອງລາວໃຫ້ນັ່ງເທິງບັນລັງຂອງລາວ.+ 31 ດາວິດຈຶ່ງຮູ້ລ່ວງໜ້າແລະບອກເລື່ອງການຄືນມາຈາກຕາຍຂອງພະຄລິດວ່າ ພະອົງຈະບໍ່ປະພະຄລິດໄວ້ໃນບ່ອນຝັງສົບ* ແລະຮ່າງກາຍຂອງເພິ່ນຈະບໍ່ເນົ່າເປື່ອຍ.+ 32 ພະເຈົ້າປຸກພະເຢຊູຜູ້ນີ້ໃຫ້ຄືນມາຈາກຕາຍແລ້ວ. ພວກເຮົາທຸກຄົນເປັນພະຍານຮູ້ເຫັນໃນເລື່ອງນີ້.+ 33 ພະເຢຊູຂຶ້ນໄປສະຫວັນແລະນັ່ງຢູ່ເບື້ອງຂວາມືຂອງພະເຈົ້າ.+ ເພິ່ນໄດ້ຮັບພະລັງບໍລິສຸດຈາກພະເຈົ້າຜູ້ເປັນພໍ່ຕາມທີ່ພະເຈົ້າສັນຍາໄວ້.+ ພະເຢຊູຈຶ່ງເອົາພະລັງບໍລິສຸດນັ້ນໃຫ້ພວກເຮົາຕາມທີ່ພວກເຈົ້າໄດ້ຍິນແລະໄດ້ເຫັນເລື່ອງນີ້. 34 ດາວິດບໍ່ໄດ້ຂຶ້ນໄປສະຫວັນ ແຕ່ລາວບອກວ່າ ‘ພະເຢໂຫວາ*ເວົ້າກັບຜູ້ເປັນນາຍຂອງຂ້ອຍວ່າ “ນັ່ງຢູ່ເບື້ອງຂວາມືຂອງເຮົາກ່ອນ 35 ຈົນກວ່າເຮົາຈະປາບພວກສັດຕູຂອງເຈົ້າໃຫ້ເປັນບ່ອນວາງຕີນຂອງເຈົ້າ.”’+ 36 ດັ່ງນັ້ນ ຂໍໃຫ້ຄົນອິດສະຣາເອນທຸກຄົນຮູ້ວ່າພະເຢຊູຜູ້ນີ້ແຫຼະທີ່ພວກເຈົ້າໄດ້ປະຫານເທິງເສົາ.+ ເພິ່ນແມ່ນຜູ້ທີ່ພະເຈົ້າແຕ່ງຕັ້ງໃຫ້ເປັນທັງຜູ້ເປັນນາຍ+ແລະພະຄລິດ.”
37 ເມື່ອເຂົາເຈົ້າໄດ້ຍິນແບບນັ້ນກໍຮູ້ສຶກຄືກັບຖືກແທງຢູ່ຫົວໃຈ. ເຂົາເຈົ້າຈຶ່ງເວົ້າກັບເປໂຕແລະອັກຄະສາວົກຄົນອື່ນໆວ່າ: “ພີ່ນ້ອງເອີ້ຍ ພວກເຮົາຈະເຮັດແນວໃດດີ?” 38 ເປໂຕຕອບເຂົາເຈົ້າວ່າ: “ເພື່ອຄວາມຜິດຂອງພວກເຈົ້າຈະໄດ້ຮັບການຍົກໂທດ ພວກເຈົ້າຕ້ອງກັບໃຈ+ແລະຮັບບັບເຕມາ+ໃນນາມພະເຢຊູຄລິດ.+ ແລ້ວພວກເຈົ້າຈະໄດ້ຮັບພະລັງບໍລິສຸດເປັນຂອງຂວັນ. 39 ພະເຈົ້າສັນຍາເລື່ອງນີ້+ກັບພວກເຈົ້າແລະລູກຫຼານຂອງພວກເຈົ້າ ແລະຄົນທີ່ມາແຕ່ໄກໆ. ທຸກຄົນແມ່ນຜູ້ທີ່ພະເຢໂຫວາ*ພະເຈົ້າຂອງພວກເຮົາເອີ້ນໃຫ້ມາຫາເພິ່ນ.”+ 40 ແລ້ວເປໂຕກໍອະທິບາຍຕື່ມອີກຢ່າງລະອຽດແລະເຕືອນເຂົາເຈົ້າເລື້ອຍໆວ່າ: “ໃຫ້ແຍກໂຕອອກມາຈາກຄົນສະໄໝນີ້ທີ່ບໍ່ສັດຊື່ເພື່ອຈະບໍ່ຖືກທຳລາຍ.”+ 41 ຄົນທີ່ເຕັມໃຈຍອມຮັບສິ່ງທີ່ເປໂຕເວົ້າກໍຮັບບັບເຕມາ+ ແລະໃນມື້ນັ້ນມີຄົນເຂົ້າມາເປັນລູກສິດອີກປະມານ 3.000 ຄົນ.+ 42 ເຂົາເຈົ້າຕັ້ງໃຈຮຽນສິ່ງທີ່ພວກອັກຄະສາວົກສອນ. ເຂົາເຈົ້າຄົບຫາກັນ* ກິນເຂົ້ານຳກັນ+ ແລະອະທິດຖານນຳກັນສະເໝີ.+
43 ພວກອັກຄະສາວົກເຮັດການອັດສະຈັນແລະສະແດງປາຕິຫານຫຼາຍຢ່າງ+ ທຸກຄົນກໍເຫັນແລະຢ້ານຢຳພະເຈົ້າ. 44 ຜູ້ທີ່ເຂົ້າມາເປັນລູກສິດກໍຢູ່ນຳກັນ ແລະເອົາສິ່ງຂອງທີ່ເຂົາເຈົ້າມີມາລວມກັນເປັນກອງກາງ. 45 ເຂົາເຈົ້າຂາຍວັດຖຸສິ່ງຂອງ+ແລະດິນ ແລ້ວແບ່ງໃຫ້ທຸກຄົນຕາມຄວາມຈຳເປັນ.+ 46 ເຂົາເຈົ້າໄປລວມກັນຢູ່ວິຫານທຸກໆມື້ ກິນເຂົ້ານຳກັນຢູ່ເຮືອນຂອງພີ່ນ້ອງ ແລະເຕັມໃຈແບ່ງຂອງກິນໃຫ້ກັນຢ່າງມີຄວາມສຸກ. 47 ເຂົາເຈົ້າຍ້ອງຍໍສັນລະເສີນພະເຈົ້າ ແລະຄົນທົ່ວໄປກໍພໍໃຈເຂົາເຈົ້າ. ໃນແຕ່ລະມື້ ພະເຢໂຫວາ*ໄດ້ໃຫ້ຄົນເຂົ້າມາຮ່ວມກັບເຂົາເຈົ້າຫຼາຍຂຶ້ນ. ຄົນເຫຼົ່ານີ້ຈະໄດ້ຮັບຄວາມລອດ.+