ບົດທີ 9
ຂ້ອຍຈະຕ້ານທານການລໍ້ໃຈໄດ້ແນວໃດ?
ນາງຄາເຣັນຢູ່ໃນງານກິນລ້ຽງໄດ້ບໍ່ຮອດສິບນາທີກໍເຫັນຊາຍໜຸ່ມສອງຄົນເຂົ້າມາພ້ອມກັບຖົງເຈ້ຍຂະໜາດໃຫຍ່ຫຼາຍຖົງ. ສິ່ງທີ່ຢູ່ໃນຖົງເຫຼົ່ານັ້ນແນມເຫັນໄດ້. ກ່ອນໜ້ານັ້ນ ລາວໄດ້ຍິນສອງຄົນນັ້ນເວົ້າວ່າ: “ຈະມີເຫຼົ້າມີເບຍເຫຼືອເຟືອ” ໃນງານລ້ຽງນີ້.
ທັນໃດນັ້ນ ຄາເຣັນກໍໄດ້ຍິນສຽງທີ່ຄຸ້ນຫູມາຈາກທາງຫຼັງລາວ. “ຢືນຢູ່ລ້າໆເຮັດຫຍັງ ໂຕເຮັດໃຫ້ງານລ້ຽງໝົດຄວາມມ່ວນຊື່ນ” ຄາເຣັນປິ່ນມາພໍ້ນາງເຈດຊີກາໝູ່ຂອງຕົນເຊິ່ງກຳລັງຖືເບຍສອງແກ້ວທີ່ຫາກໍເປີດຝາ. ເຈດຊີກາຍື່ນແກ້ວໜຶ່ງມາຕໍ່ໜ້າຂອງຄາເຣັນແລະເວົ້າວ່າ: “ຢ່າເວົ້າໄດ໋ວ່າເຈົ້າອາຍຸນ້ອຍໂພດທີ່ຈະມ່ວນຈັກເລັກຈັກໜ້ອຍ!”
ຄາເຣັນຢາກປະຕິເສດ. ແຕ່ຄວາມກົດດັນໃຫ້ຄ້ອຍຕາມມີພະລັງຫຼາຍກວ່າທີ່ລາວຄິດ. ເຈດຊີກາເປັນໝູ່ ແລະຄາເຣັນບໍ່ຕ້ອງການໃຫ້ໝູ່ຄິດວ່າລາວເປັນໂຕເຮັດໃຫ້ງານລ້ຽງ “ໝົດຄວາມມ່ວນຊື່ນ” ຕາມທີ່ເຈດຊີກາເວົ້າ. ນອກຈາກນັ້ນ ເຈດຊີກາເປັນໝູ່ທີ່ນິດໄສດີ. ແລະຖ້າເຈດຊີກາດື່ມ ເປັນຫຍັງລາວຈະດື່ມບໍ່ໄດ້? ຄາເຣັນບອກຕົວເອງວ່າ ‘ມັນເປັນພຽງແຕ່ເບຍແກ້ວດຽວ. ມັນບໍ່ຄືກັບການໃຊ້ຢາເສບຕິດແລະມີເພດສຳພັນ.’
ເມື່ອອາຍຸຍັງນ້ອຍ ການລໍ້ໃຈມາໃນຫຼາຍທາງ. ຫຼາຍຄັ້ງ ການລໍ້ໃຈແມ່ນກ່ຽວກັບເພດກົງກັນຂ້າມ. ທ້າວຣາມອນອາຍຸ 17 ປີເວົ້າວ່າ: “ພວກຜູ້ຍິງຢູ່ໂຮງຮຽນເກັ່ງຫຼາຍ. ເຂົາເຈົ້າຢາກຈັບບາຍແລະຢາກຮູ້ວ່າຂ້ອຍຈະຍອມໃຫ້ຫຼາຍສ່ຳໃດ. ພວກເຂົາເຈົ້າບໍ່ຍອມເຊົາ!” ນາງດີນນາອາຍຸ 17 ປີໄດ້ປະສົບວ່າມັນເປັນແນວນັ້ນແທ້. ລາວເລົ່າວ່າ: “ຊາຍໜຸ່ມຄົນໜຶ່ງຍ່າງມາຫາຂ້ອຍແລະເອົາແຂນກອດຂ້ອຍໄວ້. ຂ້ອຍເອົາກຳປັ້ນຊົກແຂນລາວແລະເວົ້າວ່າ: ‘ເຈົ້າກຳລັງເຮັດຫຍັງ ຂ້ອຍບໍ່ໄດ້ຮູ້ຈັກເຈົ້າຊ້ຳ!’”
ເຈົ້າກໍເຊັ່ນກັນອາດປະເຊີນກັບການລໍ້ໃຈ ແລະເບິ່ງຄືວ່າຄວາມກົດດັນມີບໍ່ຢຸດຢ່ອນ. ການລໍ້ໃຈທີ່ບໍ່ຢຸດຢ່ອນເປັນຄືກັບການເຄາະປະຕູຢ່າງຕໍ່ເນື່ອງເຖິງແມ່ນມີປ້າຍຂຽນໃສ່ປະຕູວ່າ: “ກະລຸນາຢ່າລົບກວນ.” ເຈົ້າຖືກລໍ້ໃຈຫຼາຍເກີນໄປບໍ? ຍົກຕົວຢ່າງ ມີສິ່ງໃດຕໍ່ໄປນີ້ທີ່ລໍ້ໃຈເຈົ້າ?
◻ ການສູບຢາ
◻ ການເບິ່ງຮູບລາມົກ
◻ ການດື່ມເຄື່ອງດື່ມປະເພດເຫຼົ້າ
◻ ການມີເພດສຳພັນ
◻ ການໃຊ້ຢາເສບຕິດ
◻ ອື່ນໆ ․․․․․
ຖ້າເຈົ້າໝາຍ ✔ ໃນຂໍ້ໃດຂໍ້ໜຶ່ງທີ່ຢູ່ທາງເທິງນັ້ນ ຢ່າສະຫລຸບວ່າເຈົ້າບໍ່ອາດເປັນຄລິດສະຕຽນໄດ້. ເຈົ້າສາມາດຮຽນຮູ້ທີ່ຈະຄວບຄຸມຄວາມປາຖະໜາທີ່ຜິດແລະຕ້ານທານການລໍ້ໃຈ. ໂດຍວິທີໃດ? ຖືວ່າເປັນປະໂຫຍດທີ່ຈະສຳນຶກວ່າອັນໃດຢູ່ເບື້ອງຫຼັງການລໍ້ໃຈ. ຂໍໃຫ້ພິຈາລະນາສາມປັດໄຈຕໍ່ໄປນີ້.
1. ຄວາມບໍ່ສົມບູນແບບ. ທ່າອຽງທີ່ຈະເຮັດສິ່ງທີ່ຜິດເປັນເລື່ອງທຳມະດາຂອງມະນຸດທີ່ບໍ່ສົມບູນແບບທຸກຄົນ. ແມ່ນແຕ່ອັກຄະສາວົກໂປໂລເຊິ່ງເປັນຄລິດສະຕຽນທີ່ອາວຸໂສກໍໄດ້ຍອມຮັບວ່າ: “ເມື່ອຂ້າພະເຈົ້າຢາກເຮັດສິ່ງທີ່ຖືກຕ້ອງ ສິ່ງຊົ່ວກໍຢູ່ໃນຕົວຂ້າພະເຈົ້າ.” (ໂລມ 7:21, ລ.ມ.) ເຫັນໄດ້ແຈ້ງວ່າເປັນບາງຄັ້ງຄາວແມ່ນແຕ່ຜູ້ທີ່ສັດຊື່ທີ່ສຸດກໍຍັງສຳນຶກເຖິງ “ຄວາມຄຶດຢາກໄດ້ຂອງເນື້ອໜັງ . . . ແລະຄວາມຄຶດຢາກໄດ້ຂອງຕາ.” (1 ໂຢຮັນ 2:16) ແຕ່ການໝົກມຸ້ນຕໍ່ກັບສິ່ງລໍ້ໃຈຢ່າງບໍ່ຢຸດຢ່ອນຍ່ອມເຮັດໃຫ້ເຫດການຮ້າຍແຮງຂຶ້ນ ເພາະຄຳພີໄບເບິນກ່າວວ່າ: “ເມື່ອໄດ້ປະຕິສົນທິແລ້ວ ຄວາມຄຶດຢາກໄດ້ນັ້ນບັງເກີດການຜິດ.”—ຢາໂກໂບ 1:15.
2. ອິດທິພົນພາຍນອກ. ການລໍ້ໃຈມີຢູ່ທຸກຫົນທຸກແຫ່ງອ້ອມຮອບຕົວເຈົ້າ. ນາງທູດີບອກວ່າ: “ຢູ່ໂຮງຮຽນແລະຢູ່ບ່ອນເຮັດວຽກ ຜູ້ຄົນມັກເວົ້າແຕ່ເລື່ອງເພດຕະຫຼອດເວລາ. ທາງໂທລະພາບແລະໃນພາບພະຍົນ ເຮັດໃຫ້ເບິ່ງຄືວ່າເລື່ອງເພດເປັນຕາໜ້າຫຼົງໄຫຼເປັນຕາໜ້າຕື່ນເຕັ້ນ. ເຈົ້າເກືອບຈະເບິ່ງບໍ່ເຫັນຜົນເສຍຫາຍໃດໆເລີຍ!” ທູດີຮູ້ຈາກປະສົບການຂອງຕົນເອງວ່າອິດທິພົນຈາກໝູ່ແລະຈາກສື່ສານມວນຊົນມີພະລັງຂະໜາດໃດ. ລາວເລົ່າວ່າ: “ຂ້ອຍຄິດວ່າຕົນເອງໄດ້ພົບຮັກແທ້ແລ້ວຕອນອາຍຸ 16 ປີ. ແມ່ໄດ້ນັ່ງລົມກັບຂ້ອຍແລະບອກວ່າຖ້າຂ້ອຍຍັງປະພຶດຕົວແບບນີ້ ໃນທີ່ສຸດຂ້ອຍຈະຖືພາ. ຂ້ອຍຕົກໃຈທີ່ແມ່ເວົ້າແບບນັ້ນ! ສອງເດືອນຕໍ່ມາຂ້ອຍກໍຖືພາ.”
3. “ຄວາມຄຶດຢາກໄດ້ແຫ່ງຄົນໜຸ່ມ.” (2 ຕີໂມເຕ 2:22) ຂໍ້ຄວາມນີ້ສາມາດໝາຍເຖິງຄວາມປາຖະໜາອັນໃດກໍຕາມທີ່ໜຸ່ມສາວມັກຈະປະສົບເຊັ່ນ ຄວາມຕ້ອງການໃຫ້ເປັນທີ່ຍອມຮັບຫຼືຄວາມຕ້ອງການທີ່ຢາກສະແດງວ່າຕົນເອງເປັນຜູ້ໃຫຍ່ແລ້ວ. ຄວາມປາຖະໜາເຫຼົ່ານີ້ໃນຕົວມັນເອງແລ້ວບໍ່ມີຫຍັງຜິດ ແຕ່ຖ້າບໍ່ຄວບຄຸມກໍສາມາດເຮັດໃຫ້ຕ້ານທານການລໍ້ໃຈໄດ້ຍາກ. ຕົວຢ່າງເຊັ່ນ ຄວາມຕ້ອງການທີ່ຢາກສະແດງວ່າຕົວເອງບໍ່ແມ່ນເດັກນ້ອຍອີກຕໍ່ໄປອາດກະຕຸ້ນເຈົ້າໃຫ້ປະຕິເສດຫຼັກສິລະທຳທີ່ດີເຊິ່ງໄດ້ຮັບການສັ່ງສອນຈາກຄອບຄົວ. ນັ້ນຄືສິ່ງທີ່ເກີດຂຶ້ນກັບທ້າວສະຕີບຕອນອາຍຸໄດ້ 17 ປີ. ລາວເລົ່າວ່າ: “ຂ້ອຍຕໍ່ຕ້ານພໍ່ແມ່ແລະເຮັດທຸກສິ່ງທຸກຢ່າງທີ່ພໍ່ແມ່ສອນຂ້ອຍວ່າຢ່າເຮັດ ສິ່ງທັງໝົດນີ້ເກີດຂຶ້ນພາຍຫຼັງທີ່ຮັບບັບເຕມາໄດ້ບໍ່ດົນປານໃດ.”
ວິທີຕ້ານທານ
ເຫັນໄດ້ແຈ້ງວ່າອິດທິພົນທີ່ກ່າວເຖິງຂ້າງເທິງມີພະລັງຫຼາຍ. ແນວໃດກໍຕາມ ເຈົ້າສາມາດ ຕ້ານທານການລໍ້ໃຈໄດ້. ໂດຍວິທີໃດ?
• ທຳອິດ ຈົ່ງລະບຸການລໍ້ໃຈທີ່ຕ້ານທານໄດ້ຍາກທີ່ສຸດ. (ເຈົ້າອາດໄດ້ເຮັດຂັ້ນຕອນນີ້ແລ້ວໃນໜ້າ 65.)
• ຕໍ່ຈາກນັ້ນ ໃຫ້ຖາມຕົວເອງວ່າ ‘ການລໍ້ໃຈນີ້ສ່ວນຫຼາຍມັກເກີດຂຶ້ນເມື່ອໃດ?’ ໃຫ້ໝາຍ ✔ ໃສ່ຂໍ້ໃດຂໍ້ໜຶ່ງຕໍ່ໄປນີ້
◻ ເມື່ອຢູ່ໂຮງຮຽນ
◻ ເມື່ອຢູ່ຕາມລຳພັງ
◻ ເມື່ອເຮັດວຽກ
◻ ອື່ນໆ ․․․․․
ການຮູ້ວ່າເມື່ອໃດ ທີ່ມັກຈະເກີດການລໍ້ໃຈຍັງອາດຊ່ວຍເຈົ້າໃຫ້ຫຼີກລ່ຽງທີ່ຈະບໍ່ຕ້ອງປະເຊີນການລໍ້ໃຈເລີຍ. ຕົວຢ່າງເຊັ່ນ ຂໍໃຫ້ພິຈາລະນາສາກເຫດການໃນຕອນຕົ້ນຂອງບົດນີ້. ອັນໃດເປັນສິ່ງທີ່ເຕືອນຄາເຣັນວ່າຈະມີເລື່ອງຫຍຸ້ງຍາກໃນງານກິນລ້ຽງທີ່ລາວເຂົ້າຮ່ວມ?
․․․․․
ລາວຈະບໍ່ຖືກລໍ້ໃຈເລີຍຖ້າລາວໄດ້ເຮັດຫຍັງ?
․․․․․
• ຕອນນີ້ເຈົ້າໄດ້ລະບຸການລໍ້ໃຈແລະຮູ້ວ່າການລໍ້ໃຈມັກເກີດຂຶ້ນເມື່ອໃດ ດັ່ງນັ້ນເຈົ້າພ້ອມແລ້ວທີ່ຈະລົງມືຈັດການ. ສິ່ງສຳຄັນອັນດັບທຳອິດຄືໃຫ້ຫາທາງລົດຫຼືກຳຈັດໂອກາດທີ່ຈະປະເຊີນການລໍ້ໃຈ. ໃຫ້ຂຽນສິ່ງທີ່ເຈົ້າອາດເຮັດໄດ້.
․․․․․
(ຕົວຢ່າງ ຖ້າຫຼັງຈາກເລີກໂຮງຮຽນເຈົ້າຕ້ອງພໍ້ກັບໝູ່ເພື່ອນນັກຮຽນທີ່ຮຽນຢູ່ໂຮງຮຽນດຽວກັນເຊິ່ງຍົວະເຈົ້າໃຫ້ສູບຢານຳ ເຈົ້າກໍອາດປ່ຽນເສັ້ນທາງເມືອເຮືອນເພື່ອຫຼີກລ່ຽງການພໍ້ກັບເຂົາເຈົ້າ. ຖ້າເຈົ້າໄດ້ຮັບສື່ລາມົກທາງອິນເຕີເນັດຢູ່ເລື້ອຍໆ ເຈົ້າກໍອາດຕັ້ງລະບົບກັ້ນຂໍ້ມູນຈາກແຫຼ່ງທີ່ສົ່ງຫຼືເຄືອຂ່າຍທັງໝົດທີ່ຄ້າຍຄືກັນນັ້ນ. ເຈົ້າອາດຕ້ອງລະວັງເລືອກຄຳສັບຢ່າງເຈາະຈົງຫຼາຍຂຶ້ນເມື່ອໃຊ້ໂປແກຣມເຮັດການຄົ້ນຄວ້າທາງອິນເຕີເນັດ.)
ແນ່ນອນວ່າ ເຈົ້າບໍ່ສາມາດຫຼີກລ່ຽງການລໍ້ໃຈໄດ້ທັງໝົດ. ບໍ່ຊ້າກໍໄວ ເຈົ້າອາດຕ້ອງປະເຊີນກັບການລໍ້ໃຈທີ່ມີແຮງຊັກຈູງຫຼາຍເປັນພິເສດໃນເວລາທີ່ບໍ່ໄດ້ຄາດຄິດ. ເຈົ້າຈະຈັດການແນວໃດ?
ຈົ່ງກຽມພ້ອມ
ເມື່ອພະເຍຊູ “ຖືກຊາຕານລໍ້ໃຈ” ພະອົງປະຕິເສດໂດຍທັນທີ. (ມາລະໂກ 1:13, ລ.ມ.) ຍ້ອນຫຍັງ? ຍ້ອນວ່າພະອົງເຂົ້າໃຈແລ້ວໃນປະເດັນທີ່ຖືກຍົກຂຶ້ນມາ. ພະເຍຊູຕັດສິນໃຈແລ້ວວ່າຈະເຊື່ອຟັງພໍ່ຂອງຕົນຕະຫຼອດເວລາ. (ໂຢຮັນ 8:28, 29) ພະອົງໝາຍຄວາມເຊັ່ນນັ້ນແທ້ໆເມື່ອກ່າວວ່າ: “ເຮົາໄດ້ລົງມາຈາກສະຫວັນເພື່ອຈະໄດ້ກະທຳບໍ່ໃຊ່ຕາມນ້ຳໃຈຂອງເຮົາເອງ ແຕ່ວ່າຕາມນ້ຳໃຈຂອງພະເຈົ້າທີ່ໄດ້ໃຊ້ເຮົາມາ.”—ໂຢຮັນ 6:38.
ໃນໜ້າຕໍ່ໄປ ໃຫ້ຂຽນເຫດຜົນສອງຢ່າງວ່າເປັນຫຍັງເຈົ້າຄວນຕ້ານທານການລໍ້ໃຈທີ່ພໍ້ເລື້ອຍທີ່ສຸດ ແລະໃຫ້ຂຽນສອງວິທີທີ່ສາມາດເຮັດໄດ້ເພື່ອຈະຊ່ວຍເຈົ້າໃຫ້ຕ້ານທານການລໍ້ໃຈ.
ເຫດຜົນທີ່ຄວນຕ້ານທານການລໍ້ໃຈ:
1 ․․․․․
2 ․․․․․
ສິ່ງທີ່ສາມາດເຮັດໄດ້ເພື່ອຕ້ານທານການລໍ້ໃຈ:
1 ․․․․․
2 ․․․․․
ຂໍໃຫ້ຈື່ໄວ້ວ່າ ເມື່ອຍອມຕໍ່ການລໍ້ໃຈ ເຈົ້າກໍກາຍເປັນທາດຂອງຄວາມປາຖະໜາຂອງຕົວເອງ. (ຕິໂຕ 3:3) ເປັນຫຍັງຈຶ່ງປ່ອຍໃຫ້ຕົວເອງຖືກຄວບຄຸມດ້ວຍຄວາມປາຖະໜານັ້ນ? ໃຫ້ຄວາມອາວຸໂສຄວບຄຸມຄວາມປາຖະໜາແທນທີ່ຈະປ່ອຍໃຫ້ຄວາມປາຖະໜາຄວບຄຸມເຈົ້າ. (ໂກໂລດ 3:5) ແລະໃຫ້ອະທິດຖານຂໍເພື່ອເຈົ້າຈະເຮັດເຊັ່ນນັ້ນຕໍ່ໆໄປ.—ມັດທາຍ 6:13.a
ສາມາດອ່ານເພີ່ມເຕີມກ່ຽວກັບຫົວເລື່ອງນີ້ໃນບົດທີ 15 ຂອງເຫຼັ້ມທີ 2
ຮູ້ສຶກວ່າຕົວເອງອືດອາດຊັກຊ້າໃນມໍ່ໆນີ້ບໍ? ໃຫ້ຄົ້ນເບິ່ງວິທີທີ່ຈະປັບປຸງຊີວິດຂອງເຈົ້າແລະໄດ້ກຳລັງວັງຊາກັບຄືນມາອີກ!
[ຂໍ້ຄວາມໄຂເງື່ອນ]
a ຂໍໃຫ້ເບິ່ງໃນບົດທີ 33 ແລະບົດທີ 34 ຂອງປຶ້ມຫົວນີ້.
ຂໍ້ພະຄຳພີຫຼັກ
“ພະເຈົ້າເປັນສັດຊື່ທີ່ຈະບໍ່ອະນຸຍາດໃຫ້ທ່ານທັງຫຼາຍມີທົດລອງເກີນຈະທົນໄດ້ ແຕ່ວ່າກັບຄວາມທົດລອງນັ້ນພະອົງຈະໂຜດໃຫ້ມີທາງທີ່ໜີໄດ້.”—1 ໂກລິນໂທ 10:13.
ຄຳແນະນຳ
ໃຫ້ໃຊ້ “ແຜນການຮັບມືກັບຄວາມກົດດັນຈາກຄົນຮຸ່ນດຽວກັນ” ທີ່ຢູ່ໃນໜ້າ 132 ແລະ 133 ຂອງປຶ້ມຄຳຖາມທີ່ໜຸ່ມສາວຖາມ—ຄຳຕອບທີ່ໃຊ້ໄດ້ຜົນ ເຫຼັ້ມທີ 2 (ພາສາອັງກິດ) ເພື່ອວາງແຜນການຕອບຄືນທີ່ເຈົ້າສາມາດໃຊ້ໄດ້ເມື່ອບາງຄົນພະຍາຍາມລໍ້ໃຈເຈົ້າໃຫ້ເຮັດຜິດ.
ເຈົ້າຮູ້ບໍ . . .?
ພະເຈົ້າໄດ້ບອກໄວ້ລ່ວງໜ້າວ່າພະເຍຊູຈະພິສູດຕົວວ່າຈົງຮັກພັກດີ ແຕ່ບໍ່ໄດ້ໝາຍຄວາມວ່າພະເຍຊູເປັນຄືກັບຫຸ່ນຍົນເຊິ່ງຕັ້ງລະບົບໄວ້ເພື່ອໃຫ້ເຊື່ອຟັງ. ແທນທີ່ຈະເປັນແນວນັ້ນ ພະເຍຊູສາມາດເລືອກແນວທາງຂອງຕົນເອງ. ພະອົງໄດ້ເລືອກທີ່ຈະຈົງຮັກພັກດີ ບໍ່ແມ່ນຖືກກຳນົດໄວ້ກ່ອນ. ນັ້ນເປັນເຫດຜົນໜຶ່ງເຊິ່ງເຮັດໃຫ້ພະອົງອະທິດຖານຢ່າງຈິງຈັງເມື່ອຖືກທົດລອງ.—ເຫບເລີ 5:7.
ແຜນພາກປະຕິບັດ!
ເພື່ອເສີມສ້າງຄວາມຕັ້ງໃຈໃນການຕ້ານທານການລໍ້ໃຈ ຂ້ອຍຈະ ․․․․․
ບຸກຄົນ ສະຖານທີ່ ແລະສະພາບການຕ່າງໆທີ່ຂ້ອຍຈຳເປັນຕ້ອງຫຼີກລ່ຽງລວມມີ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ສິ່ງເນລະມິດສ້າງທີ່ສົມບູນແບບສາມາດຖືກລໍ້ໃຈໄດ້ບໍ?—ຕົ້ນເດີມ 6:1-3; ໂຢຮັນ 8:44.
• ເມື່ອເຈົ້າຕ້ານທານການລໍ້ໃຈ ຄວາມຊື່ສັດໝັ້ນຄົງຂອງເຈົ້າມີຜົນກະທົບແນວໃດຕໍ່ຄົນອື່ນ?—ສຸພາສິດ 27:11; 1 ຕີໂມເຕ 4:12.
[ຈຸດເດັ່ນໜ້າ 68]
“ສິ່ງທີ່ຊ່ວຍຂ້ອຍແມ່ນການຮູ້ວ່າຂ້ອຍມີບຸກຄົນທີ່ມີພະລັງຫຼາຍທີ່ສຸດໃນເອກະພົບຢູ່ຝ່າຍຂ້ອຍແລະຂ້ອຍສາມາດຂໍຄວາມຊ່ວຍເຫຼືອຈາກພະອົງໄດ້ທຸກເວລາ!”—ທ້າວ ຄລິດສະຕົບເຟີ
[ກອບ/ຮູບພາບໜ້າ 67]
ລອງເຮັດສິ່ງນີ້ເບິ່ງ!
ເອົາເຂັມທິດມາແລະປັບໜ້າເຂັມທິດໃຫ້ກົງກັບເຂັມທີ່ຊີ້ໄປທາງທິດເໜືອ. ຈາກນັ້ນໃຫ້ເອົາແມ່ເຫຼັກໄປວາງໄວ້ທາງຂ້າງເຂັມທິດ. ເກີດຫຍັງຂຶ້ນ? ເຂັມທິດບໍ່ໄດ້ຊີ້ໄປທິດທີ່ຖືກຕ້ອງອີກແລ້ວ. ເຂັມທິດພັດຊີ້ໄປຫາບ່ອນທີ່ແມ່ເຫຼັກວາງໄວ້.
ສະຕິຮູ້ສຶກຜິດຊອບເປັນຄືກັບເຂັມທິດ. ຖ້າໄດ້ຮັບການຝຶກຝົນຢ່າງຖືກຕ້ອງ ສະຕິຮູ້ສຶກຜິດຊອບຈະຊີ້ໄປໃນທາງທີ່ຖືກຕ້ອງແລະຊ່ວຍເຈົ້າໃຫ້ເຮັດການຕັດສິນໃຈທີ່ສະຫຼາດສຸຂຸມ. ແຕ່ການຄົບຫາທີ່ບໍ່ດີເປັນຄືແມ່ເຫຼັກທີ່ມີແຮງດຶງດູດເຊິ່ງສາມາດປ່ຽນທັດສະນະທາງດ້ານສິລະທຳຂອງເຈົ້າໄດ້. ເລື່ອງນີ້ສອນຫຍັງ? ຈົ່ງພະຍາຍາມຫຼີກລ່ຽງຜູ້ຄົນແລະສະຖານະການທີ່ອາດເຮັດໃຫ້ທັດສະນະທາງດ້ານສິລະທຳຂອງເຈົ້າເສື່ອມເສຍໄປ!—ສຸພາສິດ 13:20.
[ຮູບພາບໜ້າ 69]
ເມື່ອຍອມຕໍ່ການລໍ້ໃຈ ເຈົ້າກໍກາຍເປັນທາດຂອງຄວາມປາຖະໜາຂອງຕົວເອງ