ພະເຢໂຫວາໃຫ້ກຳລັງກັບຄົນທີ່ເມື່ອຍແລະໝົດແຮງ
ຂໍ້ພະຄຳພີປະຈຳປີ 2018: “ຄົນທັງຫຼາຍທີ່ຄອງຫາ [“ວາງໃຈ,” ລ.ມ.] ພະເຢໂຫວາກໍຈະມີເຫື່ອແຮງມາໃໝ່.”—ເອຊາອີ 40:31
1. ເຮົາຕ້ອງຮັບມືກັບບັນຫາໃດແດ່ ແຕ່ເປັນຫຍັງພະເຢໂຫວາຈຶ່ງພໍໃຈໃນຜູ້ຮັບໃຊ້ທີ່ສັດຊື່ຂອງພະອົງ? (ເບິ່ງຮູບທຳອິດ)
ການໃຊ້ຊີວິດໃນທຸກມື້ນີ້ບໍ່ແມ່ນເລື່ອງງ່າຍ. ຕົວຢ່າງເຊັ່ນ: ພີ່ນ້ອງທີ່ຮັກຂອງເຮົາຫຼາຍຄົນກຳລັງທຸກໃຈກັບຄວາມເຈັບປ່ວຍຮ້າຍແຮງ. ບາງຄົນອາຍຸຫຼາຍຢູ່ແລ້ວກໍຍັງຕ້ອງເບິ່ງແຍງຍາດພີ່ນ້ອງທີ່ເຖົ້າແກ່ອີກ. ບາງຄົນຕ້ອງສູ້ຊົນເພື່ອຫາລ້ຽງຄອບຄົວຕົວເອງ. ພວກເຮົາຮູ້ວ່າຫຼາຍຄົນໃນພວກເຈົ້າບໍ່ໄດ້ປະສົບກັບບັນຫາຢ່າງດຽວເທົ່ານັ້ນ ແຕ່ຕ້ອງຮັບມືກັບຫຼາຍບັນຫາໃນເວລາດຽວກັນ. ບັນຫາເຮັດໃຫ້ເຈົ້າຕ້ອງເສຍເວລາ ເຫື່ອແຮງ ແລະເງິນຄຳ. ແຕ່ເຈົ້າກໍຍັງໝັ້ນໃຈວ່າພະເຢໂຫວາຈະຊ່ວຍເຈົ້າ. ເຈົ້າຮູ້ວ່າສະພາບການຈະດີຂຶ້ນເພາະນີ້ຄືສິ່ງທີ່ພະເຢໂຫວາໄດ້ສັນຍາໄວ້. ພະອົງຄົງຈະພໍໃຈທີ່ເຈົ້າມີຄວາມເຊື່ອຫຼາຍຂະໜາດນີ້ແທ້ໆ!
2. ເອຊາອີ 40:29 ໃຫ້ກຳລັງໃຈເຮົາແນວໃດ? ແຕ່ເຮົາອາດເຮັດຫຍັງທີ່ຜິດພາດຮ້າຍແຮງ?
2 ເຈົ້າເຄີຍຮູ້ສຶກບໍວ່າບັນຫາທີ່ເຈົ້າປະສົບມັນຍາກຈົນຈະທົນບໍ່ໄຫວແລ້ວ? ຖ້າເຄີຍ ເຈົ້າກໍບໍ່ແມ່ນຜູ້ດຽວທີ່ຮູ້ສຶກແບບນັ້ນ. ຜູ້ຮັບໃຊ້ທີ່ສັດຊື່ຂອງພະເຈົ້າບາງຄົນໃນອະດີດກໍເຄີຍຮູ້ສຶກແບບນັ້ນຄືກັນ. (1 ກະສັດ 19:4; ໂຢບ 7:7) ແຕ່ອັນໃດຊ່ວຍເຂົາເຈົ້າໃຫ້ອົດທົນໄດ້? ເຂົາເຈົ້າວາງໃຈວ່າພະເຢໂຫວາຈະໃຫ້ກຳລັງເຂົາເຈົ້າ. ຄຳພີໄບເບິນບອກວ່າ: ‘ຄົນທີ່ເມື່ອຍຢູ່ພະອົງໃຫ້ມີແຮງ’ ຫຼືໃຫ້ມີກຳລັງ. (ເອຊາອີ 40:29) ໜ້າເສົ້າໃຈແທ້ໆທີ່ຜູ້ຮັບໃຊ້ຂອງພະເຈົ້າບາງຄົນໃນທຸກມື້ນີ້ຄິດວ່າທາງອອກທີ່ດີທີ່ສຸດທີ່ຈະອົດທົນກັບບັນຫາໄດ້ຄືການຢຸດຮັບໃຊ້ພະອົງຊົ່ວຄາວ. ເຂົາເຈົ້າຮູ້ສຶກວ່າການຮັບໃຊ້ພະເຢໂຫວາເປັນພາລະແທນທີ່ຈະຮູ້ສຶກວ່າເປັນພອນຈາກພະອົງ. ດັ່ງນັ້ນ ເຂົາເຈົ້າຈຶ່ງເຊົາອ່ານຄຳພີໄບເບິນ ເຊົາໄປປະຊຸມ ແລະເຊົາໄປປະກາດ. ນີ້ເປັນສິ່ງທີ່ຊາຕານຢາກໃຫ້ເຂົາເຈົ້າເຮັດ.
3. (ກ) ເຮົາຈະບໍ່ໃຫ້ຊາຕານເຮັດໃຫ້ເຮົາມີຄວາມເຊື່ອໜ້ອຍລົງໄດ້ແນວໃດ? (ຂ) ບົດຄວາມນີ້ເຮົາຈະຮຽນຫຍັງ?
3 ຊາຕານບໍ່ຢາກໃຫ້ເຮົາເຂັ້ມແຂງ. ມັນຮູ້ວ່າເຮົາຈະເຂັ້ມແຂງຂຶ້ນຖ້າເຮົາທຸ່ມເທໃຫ້ກັບວຽກຮັບໃຊ້ພະເຢໂຫວາ. ດັ່ງນັ້ນ ຖ້າເຈົ້າຮູ້ສຶກໝົດແຮງຫຼືທໍ້ໃຈ ຢ່າຟ້າວຖິ້ມພະເຢໂຫວາ ຂໍໃຫ້ເຈົ້າພະຍາຍາມສະໜິດກັບພະອົງໃຫ້ຫຼາຍຂຶ້ນ. ຄຳພີໄບເບິນບອກວ່າ: “ພະອົງຈະເຮັດໃຫ້ພວກເຈົ້າໝັ້ນຄົງ ພະອົງຈະເຮັດໃຫ້ພວກເຈົ້າເຂັ້ມແຂງ.” (1 ເປໂຕ 5:10, ລ.ມ.; ຢາໂກໂບ 4:8) ໃນບົດຄວາມນີ້ ເຮົາຈະໄດ້ຮຽນຈາກເອຊາອີ 40:26-31 ວ່າພະເຢໂຫວາຈະຊ່ວຍໃຫ້ເຮົາເຂັ້ມແຂງຂຶ້ນໄດ້ແນວໃດ. ຈາກນັ້ນ ເຮົາຈະໄດ້ເບິ່ງສອງສະຖານະການທີ່ອາດເຮັດໃຫ້ເຮົາຮັບໃຊ້ພະເຢໂຫວາໜ້ອຍລົງ ແລະເຮົາຈະຮຽນຮູ້ວ່າການໃຊ້ຫຼັກການໃນຄຳພີໄບເບິນຊ່ວຍເຮົາໃຫ້ອົດທົນໄດ້ແນວໃດ.
ຄົນທີ່ວາງໃຈພະເຢໂຫວາຈະມີເຫື່ອແຮງມາໃໝ່
4. ເຮົາໄດ້ຮຽນຫຍັງຈາກເອຊາອີ 40:26?
ພະເຢໂຫວາຈະໃຫ້ກຳລັງກັບເຈົ້າເພື່ອເຈົ້າຈະອົດທົນກັບບັນຫາແຕ່ລະຢ່າງໄດ້
4 ອ່ານເອຊາອີ 40:26. ບໍ່ມີໃຜສາມາດນັບດາວທັງໝົດທີ່ມີໃນເອກະພົບໄດ້. ນັກວິທະຍາສາດເຊື່ອວ່າສະເພາະດາວໃນກາເລັກຊີຂອງເຮົາອາດມີເຖິງ 400 ຕື້ດວງ ແຕ່ພະເຢໂຫວາກໍຍັງຕັ້ງຊື່ໃຫ້ດາວທຸກດວງ. ເລື່ອງນີ້ສອນຫຍັງເຮົາກ່ຽວກັບພະເຢໂຫວາ? ຖ້າພະອົງສົນໃຈດາວທຸກດວງທີ່ບໍ່ມີຊີວິດ ແລ້ວພະອົງຈະສົນໃຈເຈົ້າສ່ຳໃດ! ເຈົ້າຮັບໃຊ້ພະອົງບໍ່ແມ່ນຍ້ອນຖືກບັງຄັບ ແຕ່ຍ້ອນເຈົ້າຮັກພະອົງ. (ຄຳເພງ 19:1, 3, 14) ພະເຈົ້າຜູ້ເປັນພໍ່ທີ່ຮັກຮູ້ທຸກຢ່າງກ່ຽວກັບຕົວເຈົ້າ. ຄຳພີໄບເບິນບອກວ່າ: ພະເຢໂຫວາ ‘ນັບຜົມທີ່ຫົວຂອງທ່ານໄວ້ແລ້ວທຸກເສັ້ນ.’ (ມັດທາຍ 10:30) ພະເຢໂຫວາຢາກໃຫ້ເຮົາຮູ້ວ່າພະອົງ “ຮູ້ດີວ່າຄົນບໍ່ມີຕຳໜິຕ້ອງເຈິກັບອັນໃດແດ່.” (ຄຳເພງ 37:18, ລ.ມ.) ເຫັນໄດ້ແຈ້ງວ່າພະເຢໂຫວາຮູ້ດີວ່າເຈົ້າກຳລັງປະສົບກັບບັນຫາຫຍັງແລະພະອົງຈະໃຫ້ກຳລັງກັບເຈົ້າເພື່ອເຈົ້າຈະອົດທົນກັບບັນຫາແຕ່ລະຢ່າງໄດ້.
5. ເຮົາໝັ້ນໃຈໄດ້ແນວໃດວ່າພະເຢໂຫວາສາມາດໃຫ້ກຳລັງກັບເຮົາໄດ້?
5 ອ່ານເອຊາອີ 40:28. ພະເຢໂຫວາເປັນແຫຼ່ງຂອງພະລັງງານທັງໝົດ. ລອງຄິດເຖິງປະລິມານຂອງພະລັງງານທີ່ພະອົງໃຫ້ກັບດວງຕາເວັນ. ນັກຂຽນເລື່ອງວິທະຍາສາດຊື່ວ່າ ເດວິດ ໂບດາເນສບອກວ່າ: ທຸກໆວິນາທີດວງຕາເວັນຈະຜະລິດພະລັງງານມະຫາສານໄດ້ຫຼາຍເທົ່າກັບການລະເບີດຂອງລູກລະເບີດປະລະມານູຫຼາຍຕື້ເທື່ອ. ນັກວິໄຈອີກຄົນໜຶ່ງຄຳນວນວ່າພະລັງງານທີ່ດວງຕາເວັນຜະລິດມາພຽງວິນາທີດຽວກໍສາມາດເຮັດໃຫ້ຄົນທົ່ວໂລກມີພະລັງງານໄຟຟ້າພຽງພໍທີ່ຈະໃຊ້ໄດ້ເຖິງ 200.000 ປີ! ດັ່ງນັ້ນ ແນ່ນອນວ່າພະເຢໂຫວາຜູ້ໃຫ້ພະລັງງານກັບດວງຕາເວັນສາມາດໃຫ້ກຳລັງກັບເຮົາໄດ້ຕອນທີ່ເຮົາຕ້ອງອົດທົນກັບບັນຫາຕ່າງໆ.
6. ແອກຂອງພະເຍຊູແບກງ່າຍແນວໃດແລະການຮູ້ເລື່ອງນີ້ສົ່ງຜົນຕໍ່ເຮົາແນວໃດ?
6 ອ່ານເອຊາອີ 40:29. ການຮັບໃຊ້ພະເຢໂຫວາເຮັດໃຫ້ເຮົາມີຄວາມຍິນດີຫຼາຍ. ພະເຍຊູບອກກັບລູກສິດຂອງເພິ່ນວ່າ: “ຈົ່ງເອົາແອກຂອງເຮົາແບກໄປ” ແລະເພິ່ນເວົ້າຕື່ມວ່າ: “ທ່ານທັງຫຼາຍຈະພົບຄວາມເຊົາເມື່ອຍໃນຈິດໃຈຂອງທ່ານ. ເຫດວ່າແອກຂອງເຮົາກໍງ່າຍແລະເຄື່ອງແບກຂອງເຮົາກໍເບົາ.” (ມັດທາຍ 11:28-30) ນີ້ເປັນເລື່ອງຈິງ! ບາງເທື່ອເຮົາອາດຮູ້ສຶກເມື່ອຍກ່ອນທີ່ຈະອອກໄປປະຊຸມຫຼືປະກາດ. ແຕ່ເມື່ອປະຊຸມຫຼືປະກາດແລ້ວ ເຮົາຮູ້ສຶກສົດຊື່ນແລະພ້ອມຫຼາຍຂຶ້ນທີ່ຈະຮັບມືກັບບັນຫາ. ແມ່ນແລ້ວ ແອກຂອງພະເຍຊູກໍແບກງ່າຍແທ້ໆ.
7. ຂໍໃຫ້ເວົ້າເຖິງປະສົບການທີ່ສະແດງໃຫ້ເຫັນວ່າມັດທາຍ 11:28-30 ເປັນຄວາມຈິງ.
7 ຂໍໃຫ້ເຮົາມາເບິ່ງປະສົບການຂອງພີ່ນ້ອງຍິງຄົນໜຶ່ງ. ລາວຕ້ອງທົນກັບພະຍາດອ່ອນເພຍຊຳເຮື້ອ ພະຍາດຊຶມເສົ້າ ແລະອາການປວດຫົວຮຸນແຮງ. ບາງຄັ້ງຈຶ່ງຍາກຫຼາຍທີ່ລາວຈະໄປຮ່ວມປະຊຸມ. ແນວໃດກໍຕາມ ມື້ໜຶ່ງຫຼັງຈາກທີ່ລາວໄດ້ພະຍາຍາມເຂົ້າຮ່ວມປະຊຸມ ລາວບອກວ່າ: “ຄຳບັນລະຍາຍໃນມື້ນັ້ນເປັນເລື່ອງກ່ຽວກັບຄວາມທໍ້ໃຈ ພີ່ນ້ອງບັນລະຍາຍຢ່າງເຫັນອົກເຫັນໃຈແລະເຂົ້າໃຈຄວາມຮູ້ສຶກຂອງຄົນທີ່ທໍ້ໃຈຈົນເຮັດໃຫ້ຂ້ອຍຮ້ອງໄຫ້ອອກມາ. ຂ້ອຍຮູ້ສຶກເລີຍວ່າການປະຊຸມເປັນສິ່ງທີ່ຈຳເປັນສຳລັບຂ້ອຍ.” ລາວມີຄວາມສຸກຫຼາຍທີ່ໄດ້ພະຍາຍາມໄປປະຊຸມໃນມື້ນັ້ນ!
8, 9. ໂປໂລໝາຍຄວາມວ່າແນວໃດເມື່ອລາວບອກວ່າ: “ເມື່ອໃດທີ່ຂ້ອຍອ່ອນແອ ຂ້ອຍພັດຍິ່ງເຂັ້ມແຂງຂຶ້ນ”?
8 ອ່ານເອຊາອີ 40:30. ເຮົາອາດມີຄວາມສາມາດຫຼາຍຢ່າງ ແຕ່ເຮົາກໍບໍ່ສາມາດເຮັດທຸກຢ່າງໄດ້ດ້ວຍກຳລັງຂອງເຮົາເອງ ເຊິ່ງນີ້ເປັນສິ່ງທີ່ເຮົາທຸກຄົນຕ້ອງຮຽນຮູ້. ໂປໂລມີຄວາມສາມາດຫຼາຍຢ່າງ ແຕ່ລາວກໍບໍ່ສາມາດເຮັດທຸກຢ່າງທີ່ລາວຢາກເຮັດ. ຕອນທີ່ລາວບອກກັບພະເຢໂຫວາວ່າລາວຮູ້ສຶກແນວໃດ ພະອົງບອກລາວວ່າ: “ເມື່ອເຈົ້າອ່ອນແອ ພະລັງອຳນາດຂອງເຮົາກໍສະແດງໄດ້ຢ່າງເຕັມທີ.” ໂປໂລເຂົ້າໃຈທີ່ພະເຢໂຫວາບອກ. ລາວຈຶ່ງເວົ້າວ່າ: “ເມື່ອໃດທີ່ຂ້ອຍອ່ອນແອ ຂ້ອຍພັດຍິ່ງເຂັ້ມແຂງຂຶ້ນ.” (2 ໂກລິນໂທ 12:7-10, ລ.ມ.) ລາວໝາຍຄວາມວ່າແນວໃດ?
9 ໂປໂລສຳນຶກວ່າລາວບໍ່ສາມາດເຮັດທຸກຢ່າງໄດ້ດ້ວຍກຳລັງຂອງຕົວເອງ. ລາວຕ້ອງການຄວາມຊ່ວຍເຫຼືອຈາກຜູ້ທີ່ມີພະລັງອຳນາດຫຼາຍກວ່າ. ພະລັງບໍລິສຸດຂອງພະເຈົ້າສາມາດເຮັດໃຫ້ໂປໂລມີກຳລັງຫຼາຍຂຶ້ນຕອນທີ່ລາວຮູ້ສຶກອ່ອນແອ ແລະເຮັດສິ່ງຕ່າງໆໄດ້ຫຼາຍຂຶ້ນ. ພະລັງຂອງພະເຈົ້າຍັງຊ່ວຍໂປໂລໃຫ້ມີກຳລັງເຮັດສິ່ງທີ່ລາວບໍ່ສາມາດເຮັດໄດ້ດ້ວຍຕົວເອງ. ເຮົາກໍເປັນແບບນີ້ໄດ້ຄືກັນ ເມື່ອພະເຢໂຫວາໃຫ້ພະລັງບໍລິສຸດກັບເຮົາ ເຮົາກໍຈະເຂັ້ມແຂງຂຶ້ນແທ້ໆ!
10. ພະເຢໂຫວາຊ່ວຍດາວິດແນວໃດໃຫ້ຮັບມືກັບບັນຫາທີ່ລາວປະສົບ?
10 ດາວິດຜູ້ຂຽນພະທຳຄຳເພງປະສົບດ້ວຍຕົວເອງເລື້ອຍໆວ່າພະລັງບໍລິສຸດຂອງພະເຈົ້າເຮັດໃຫ້ລາວເຂັ້ມແຂງໄດ້. ລາວຮ້ອງເພງວ່າ: “ເພາະພະອົງຊ່ວຍ ຂ້ອຍຈຶ່ງຈັດການກອງໂຈນໄດ້ ແລະເພາະພະເຈົ້າໃຫ້ພະລັງ ຂ້ອຍຈຶ່ງກະໂດດຂ້າມກຳແພງໄດ້.” (ຄຳເພງ 18:29, ລ.ມ.) ຄືກັບທີ່ເຮົາບໍ່ສາມາດປີນຂ້າມກຳແພງທີ່ສູງໄດ້ ບາງຄັ້ງບັນຫາທີ່ເຮົາປະສົບກໍໃຫຍ່ເກີນກວ່າທີ່ເຮົາຈະແກ້ໄຂໄດ້ດ້ວຍຕົວເອງ. ດັ່ງນັ້ນ ເຮົາຈຶ່ງຕ້ອງໃຫ້ພະເຢໂຫວາຊ່ວຍ.
11. ພະລັງບໍລິສຸດຊ່ວຍເຮົາແນວໃດໃຫ້ອົດທົນກັບບັນຫາທີ່ເຮົາປະສົບ?
11 ອ່ານເອຊາອີ 40:31. ນົກແອ້ວຫຼືນົກອິນຊີບໍ່ສາມາດບິນຢູ່ເທິງທ້ອງຟ້າໄດ້ດ້ວຍກຳລັງຂອງຕົວມັນເອງເທົ່ານັ້ນ ແຕ່ແຮງລົມຈາກກະແສລົມອຸ່ນທີ່ພັດຂຶ້ນໄດ້ຊ່ວຍໃຫ້ມັນລອຍຢູ່ເທິງທ້ອງຟ້າໄດ້. ນີ້ເຮັດໃຫ້ນົກອິນຊີສາມາດບິນໄປໄດ້ໄກແລະປະຢັດພະລັງງານ. ດັ່ງນັ້ນ ເມື່ອເຈົ້າປະສົບກັບບັນຫາເກີນກວ່າທີ່ຈະຮັບມືໄດ້ ຂໍໃຫ້ເຈົ້າຄິດເຖິງນົກອິນຊີ. ເຈົ້າຕ້ອງອະທິດຖານຂໍພະເຢໂຫວາໃຫ້ກຳລັງກັບເຈົ້າໂດຍທາງ ‘ຜູ້ຊ່ວຍຄືພະລັງບໍລິສຸດ.’ (ໂຢຮັນ 14:26, ລ.ມ.) ເຮົາສາມາດຂໍພະລັງບໍລິສຸດຈາກພະເຢໂຫວາໄດ້ຕະຫຼອດ 24 ຊົ່ວໂມງທຸກມື້. ເຮົາອາດຂໍໃຫ້ພະເຢໂຫວາຊ່ວຍເຮົາໂດຍສະເພາະເມື່ອເຮົາມີບັນຫາກັບພີ່ນ້ອງໃນປະຊາຄົມ. ແຕ່ເປັນຫຍັງຈຶ່ງມີບັນຫາເກີດຂຶ້ນ?
12, 13. (ກ) ເປັນຫຍັງບາງເທື່ອຄລິດສະຕຽນຈຶ່ງມີບັນຫາກັນ? (ຂ) ເລື່ອງຊີວິດຂອງໂຢເຊບສອນຫຍັງເຮົາກ່ຽວກັບພະເຢໂຫວາ?
12 ເຮົາອາດມີບັນຫາກັບພີ່ນ້ອງຍ້ອນວ່າເຮົາທຸກຄົນບໍ່ສົມບູນແບບ. ບາງຄັ້ງເຮົາອາດຮູ້ສຶກບໍ່ພໍໃຈກັບສິ່ງທີ່ຄົນອື່ນເວົ້າຫຼືເຮັດ ຫຼືເຮົາອາດເຮັດໃຫ້ຄົນອື່ນບໍ່ພໍໃຈ. ເລື່ອງນີ້ຖືວ່າເປັນການທົດສອບອີກຢ່າງໜຶ່ງທີ່ຍາກສຳລັບເຮົາ. ແຕ່ມັນກໍເປັນໂອກາດທີ່ດີທີ່ເຮົາຈະໄດ້ສະແດງຄວາມພັກດີຕໍ່ພະເຢໂຫວາ. ແລ້ວເຮົາຈະເຮັດຢ່າງນັ້ນໄດ້ແນວໃດ? ໂດຍການພະຍາຍາມຮຽນຮູ້ທີ່ຈະເຮັດວຽກຮ່ວມກັບພີ່ນ້ອງດ້ວຍຄວາມສາມັກຄີ. ພະເຢໂຫວາຮັກເຂົາເຈົ້າເຖິງວ່າເຂົາເຈົ້າຈະບໍ່ສົມບູນແບບແລະເຮົາເອງກໍຕ້ອງເຮັດຄືກັນ.
ພະເຢໂຫວາບໍ່ໄດ້ປະຖິ້ມໂຢເຊບແລະພະອົງກໍຈະບໍ່ປະຖິ້ມເຈົ້າຄືກັນ (ເບິ່ງຂໍ້ 13)
13 ພະເຢໂຫວາຍອມໃຫ້ຜູ້ຮັບໃຊ້ຂອງພະອົງຖືກທົດສອບ. ເຮົາຮູ້ເລື່ອງນີ້ໄດ້ຈາກຊີວິດຂອງໂຢເຊບ. ເມື່ອໂຢເຊບຍັງໜຸ່ມ ອ້າຍຄົນລະແມ່ອິດສາລາວຈົນຂາຍລາວໃຫ້ເປັນທາດແລະລາວກໍຖືກພາໄປເອຢິບ. (ຕົ້ນເດີມ 37:28) ພະເຢໂຫວາເຫັນທຸກສິ່ງທີ່ເກີດຂຶ້ນແລະບໍ່ຕ້ອງສົງໄສເລີຍວ່າພະອົງຕ້ອງຮູ້ສຶກເຈັບປວດທີ່ເຫັນໂຢເຊບທີ່ເປັນທັງເພື່ອນແລະຜູ້ຮັບໃຊ້ທີ່ສັດຊື່ຖືກປະຕິບັດຢ່າງໂຫດຮ້າຍ. ແຕ່ພະເຢໂຫວາກໍບໍ່ໄດ້ຢຸດສິ່ງຕ່າງໆທີ່ເກີດຂຶ້ນ. ເມື່ອໂຢເຊບຖືກກ່າວຫາວ່າພະຍາຍາມຂົ່ມຂືນເມຍຂອງໂປຕີຟາແລະຖືກຈັບຂັງຄຸກ ພະເຢໂຫວາກໍຍັງບໍ່ໄດ້ຊ່ວຍລາວ. ນີ້ໝາຍຄວາມວ່າພະອົງປະຖິ້ມໂຢເຊບແລ້ວບໍ? ບໍ່ເລີຍ ຄຳພີໄບເບິນບອກວ່າ: “ພະເຢໂຫວາສະຖິດຢູ່ກັບລາວ ແລະໄດ້ໂຜດໃຫ້ການທີ່ລາວໄດ້ກະທຳນັ້ນຈຳເລີນບໍລິບູນ.”—ຕົ້ນເດີມ 39:21-23
14. ການເຮັດຕາມທີ່ຄຳພີໄບເບິນບອກວ່າ ‘ຢ່າຄຽດ’ ມີປະໂຫຍດແນວໃດ?
14 ອີກຕົວຢ່າງໜຶ່ງກໍຄືດາວິດ. ຄົນສ່ວນຫຼາຍອາດບໍ່ເຄີຍປະສົບກັບຄວາມໂຫດຮ້າຍແບບດາວິດ ແຕ່ໝູ່ຂອງພະເຈົ້າຄົນນີ້ບໍ່ປ່ອຍໃຫ້ຕົວເອງຈົມຢູ່ກັບຄວາມຄຽດແຄ້ນ. ລາວຂຽນວ່າ: ‘ຢ່າຄຽດແລະຈົ່ງປະຄວາມຄຽດຮ້າຍ ຢ່າເຄືອງໃຈແລ້ວໄປເຮັດຊົ່ວຮ້າຍ.’ (ຄຳເພງ 37:8) ເຫດຜົນສຳຄັນທີ່ສຸດທີ່ເຮົາຈະບໍ່ຄຽດຫຼືເຊົາຄຽດກໍຍ້ອນເຮົາຢາກຮຽນແບບພະເຈົ້າ. ພະອົງ “ບໍ່ໄດ້ລົງໂທດໃສ່ພວກເຮົາຕາມການບາບທັງຫຼາຍຂອງພວກເຮົາ” ແຕ່ພະອົງໃຫ້ອະໄພເຮົາ. (ຄຳເພງ 103:10) ນອກຈາກນັ້ນ ການບໍ່ເກັບຄວາມຄຽດແຄ້ນໄວ້ກໍມີປະໂຫຍດຫຼາຍ. ຕົວຢ່າງ: ການຄຽດໃຫ້ຄົນອື່ນອາດເຮັດໃຫ້ເກີດຄວາມດັນເລືອດສູງ ແລະອາດເຮັດໃຫ້ລະບົບທາງເດີນຫາຍໃຈມີບັນຫາ. ມັນຍັງສາມາດທຳລາຍຕັບແລະຕັບອ່ອນ ແລະອາດເຮັດໃຫ້ເກີດບັນຫາໃນລະບົບທາງເດີນອາຫານ. ເມື່ອເຮົາຄຽດໃຫ້ຄົນອື່ນເຮົາຈະຄິດຫາເຫດຜົນໄດ້ບໍ່ດີ ເຊິ່ງອາດເຮັດໃຫ້ເຮົາເວົ້າຫຼືເຮັດບາງຢ່າງທີ່ເຮັດໃຫ້ຄົນອື່ນຮູ້ສຶກເຈັບ ແລະເຮົາກໍຈະຮູ້ສຶກບໍ່ດີເປັນເວລາດົນ. ດັ່ງນັ້ນ ຈຶ່ງດີກວ່າທີ່ເຮົາຈະຄວບຄຸມອາລົມໄວ້. ຄຳພີໄບເບິນບອກວ່າ: “ໃຈທີ່ສະຫງົບເຮັດໃຫ້ສຸຂະພາບດີ.” (ສຸພາສິດ 14:30, ລ.ມ.) ແລ້ວເຮົາຈະເຮັດແນວໃດເມື່ອຄົນອື່ນເຮັດໃຫ້ເຮົາຮູ້ສຶກເຈັບ ແລະເຮົາຈະສ້າງສັນຕິສຸກກັບພີ່ນ້ອງໄດ້ແນວໃດ? ເຮົາສາມາດໃຊ້ຄຳແນະນຳທີ່ສະຫຼາດຈາກຄຳພີໄບເບິນໄດ້.
ເມື່ອພີ່ນ້ອງເຮັດໃຫ້ເຮົາຜິດຫວັງ
15, 16. ເຮົາຄວນເຮັດແນວໃດຖ້າພີ່ນ້ອງເຮັດໃຫ້ເຮົາຮູ້ສຶກເສຍໃຈ?
15 ອ່ານເອເຟດ 4:26. ເຮົາຈະບໍ່ຮູ້ສຶກແປກໃຈເລີຍຖ້າຄົນທີ່ເຮັດໃຫ້ເຮົາຮູ້ສຶກເສຍໃຈບໍ່ໄດ້ເປັນຜູ້ຮັບໃຊ້ພະເຢໂຫວາ. ແຕ່ເມື່ອພີ່ນ້ອງຄລິດສະຕຽນຫຼືຄົນໃນຄອບຄົວເວົ້າຫຼືເຮັດບາງຢ່າງທີ່ເຮັດໃຫ້ເຮົາເສຍໃຈ ເຮົາອາດຮູ້ສຶກຮັບບໍ່ໄດ້. ຖ້າເຮົາບໍ່ສາມາດລືມເລື່ອງທີ່ເກີດຂຶ້ນໄດ້ເດຈະເປັນແນວໃດ? ເຮົາຈະປ່ອຍໃຫ້ຕົວເອງຈົມຢູ່ກັບຄວາມຄຽດເຊິ່ງບາງເທື່ອອາດດົນເປັນເວລາຫຼາຍປີບໍ? ຫຼືເຮົາຈະເຮັດຕາມຄຳແນະນຳທີ່ສະຫຼາດຈາກຄຳພີໄບເບິນໂດຍຮີບຈັດການກັບບັນຫາບໍ? ແຮ່ງເຮົາຊັກຊ້າທີ່ຈະປັບຄວາມເຂົ້າໃຈກັບອີກຝ່າຍໜຶ່ງ ນັ້ນກໍແຮ່ງຍາກຂຶ້ນທີ່ເຮົາຈະສ້າງສັນຕິສຸກ.
16 ຖ້າພີ່ນ້ອງເຮັດໃຫ້ເຈົ້າເສຍໃຈແລະເຈົ້າຢຸດຄິດເລື່ອງນັ້ນບໍ່ໄດ້ເດ? ເຈົ້າຈະເຮັດແນວໃດເພື່ອສ້າງສັນຕິສຸກກັບລາວ? ທຳອິດເຈົ້າຕ້ອງອະທິດຖານເຖິງພະເຢໂຫວາ. ຂໍພະອົງຊ່ວຍເຈົ້າໃຫ້ລົມກັບພີ່ນ້ອງດີໆ. ຂໍໃຫ້ຈື່ວ່າພີ່ນ້ອງຄົນນັ້ນກໍເປັນໝູ່ຂອງພະເຢໂຫວາຄືກັນ. (ຄຳເພງ 25:14) ພະເຢໂຫວາຮັກລາວ. ພະອົງປະຕິບັດກັບໝູ່ຂອງພະອົງດ້ວຍຄວາມເມດຕາແລະພະອົງກໍຄາດໝາຍໃຫ້ເຮົາເຮັດແບບນັ້ນຄືກັນ. (ສຸພາສິດ 15:23; ມັດທາຍ 7:12; ໂກໂລດ 4:6) ຢ່າງທີສອງ ຄິດໃຫ້ຮອບຄອບວ່າຈະເວົ້າຫຍັງກັບພີ່ນ້ອງຄົນນັ້ນ. ຢ່າຄິດເອງວ່າລາວຕັ້ງໃຈເຮັດໃຫ້ເຈົ້າຮູ້ສຶກເຈັບ. ບາງເທື່ອອາດເປັນຄວາມຜິດພາດຫຼືເຈົ້າອາດເຂົ້າໃຈຜິດ. ຂໍໃຫ້ເຕັມໃຈຍອມຮັບວ່າເຈົ້າເອງກໍອາດມີສ່ວນເຮັດໃຫ້ເກີດບັນຫາ. ເມື່ອໄປລົມກັບລາວເຈົ້າອາດເລີ່ມເວົ້າວ່າ: “ຂ້ອຍອາດຄິດຫຼາຍເກີນໄປ ແຕ່ຕອນທີ່ເຈົ້າເວົ້າກັບຂ້ອຍມື້ວານນີ້ ຂ້ອຍຮູ້ສຶກ . . . ” ແຕ່ຖ້າການລົມກັນບໍ່ໄດ້ຊ່ວຍໃຫ້ເຈົ້າກັບພີ່ນ້ອງມີສັນຕິສຸກເດ ຂໍໃຫ້ເຈົ້າພະຍາຍາມຕໍ່ໆໄປ. ໃຫ້ອະທິດຖານເພື່ອລາວ ຂໍພະເຢໂຫວາອວຍພອນລາວແລະຊ່ວຍເຈົ້າໃຫ້ຄິດເຖິງຂໍ້ດີຂອງລາວ. ຖ້າເຈົ້າເຮັດແບບນີ້ ເຈົ້າໝັ້ນໃຈໄດ້ວ່າພະເຢໂຫວາຈະພໍໃຈໃນຄວາມພະຍາຍາມທີ່ຈິງໃຈຂອງເຈົ້າໃນການສ້າງສັນຕິສຸກກັບພີ່ນ້ອງເຊິ່ງເປັນໝູ່ຄົນໜຶ່ງຂອງພະອົງ.
ເມື່ອເຮົາຮູ້ສຶກຜິດກັບສິ່ງທີ່ເຮົາເຮັດໃນອະດີດ
17. ເມື່ອເຮົາເຮັດຜິດ ພະເຢໂຫວາຊ່ວຍເຮົາແນວໃດໃຫ້ກັບມາມີສາຍສຳພັນກັບພະອົງຄືເກົ່າ? ແລະເປັນຫຍັງເຮົາຕ້ອງຕອບຮັບຄວາມຊ່ວຍເຫຼືອ?
17 ບາງຄົນຮູ້ສຶກວ່າຕົວເອງບໍ່ສົມຄວນທີ່ຈະເປັນຜູ້ຮັບໃຊ້ພະເຢໂຫວາຍ້ອນເຄີຍເຮັດບາບຮ້າຍແຮງ. ຄວາມຮູ້ສຶກຜິດອາດເຮັດໃຫ້ເຮົາບໍ່ມີຄວາມສະຫງົບໃຈ ຄວາມຍິນດີ ແລະໝົດແຮງ. ກະສັດດາວິດຕ້ອງຕໍ່ສູ້ກັບຄວາມຮູ້ສຶກຜິດແບບນັ້ນ ລາວບອກວ່າ: “ເມື່ອຂ້ອຍງຽບ ກະດູກຂອງຂ້ອຍກໍຜຸເພາະຂ້ອຍທຸກທໍລະມານຕະຫຼອດທັງວັນ. ຂ້ອຍໜັກໃຈຫຼາຍທັງເວັນທັງຄືນເພາະພະອົງບໍ່ພໍໃຈ.” ໜ້າດີໃຈທີ່ດາວິດມີຄວາມກ້າຫານທີ່ຈະເຮັດສິ່ງທີ່ພະເຢໂຫວາຢາກໃຫ້ຜູ້ຮັບໃຊ້ຂອງພະອົງເຮັດ. ລາວຂຽນວ່າ: “ໃນທີ່ສຸດຂ້ອຍກໍສາລະພາບບາບຕໍ່ພະອົງ . . . ແລະພະອົງກໍຍົກໂທດໃຫ້ຂ້ອຍ.” (ຄຳເພງ 32:3-5, ລ.ມ.) ຖ້າເຈົ້າເຮັດຜິດຮ້າຍແຮງ ພະເຢໂຫວາພ້ອມທີ່ຈະໃຫ້ອະໄພ ພະອົງຢາກຊ່ວຍເຈົ້າໃຫ້ກັບມາມີສາຍສຳພັນທີ່ດີກັບພະອົງຄືເກົ່າ. ແຕ່ເຈົ້າຕ້ອງຕອບຮັບການຊ່ວຍເຫຼືອທີ່ພະອົງຈັດກຽມໄວ້ໃຫ້ຜ່ານທາງຜູ້ເຖົ້າແກ່ໃນປະຊາຄົມ. (ສຸພາສິດ 24:16; ຢາໂກໂບ 5:13-15) ດັ່ງນັ້ນ ຢ່າລໍຊ້າ! ຊີວິດຕະຫຼອດໄປຂອງເຈົ້າຂຶ້ນຢູ່ກັບການເຮັດແບບນີ້. ແຕ່ຖ້າເຈົ້າຍັງຮູ້ສຶກຜິດຫຼັງຈາກທີ່ເຈົ້າໄດ້ຮັບການອະໄພບາບດົນແລ້ວເດ ເຈົ້າຄວນເຮັດແນວໃດ?
18. ຕົວຢ່າງຂອງໂປໂລຊ່ວຍຄົນທີ່ຮູ້ສຶກວ່າຕົວເອງບໍ່ສົມຄວນເປັນຜູ້ຮັບໃຊ້ຂອງພະເຢໂຫວາແນວໃດ?
18 ບາງເທື່ອໂປໂລກໍຮູ້ສຶກທໍ້ໃຈຍ້ອນບາບທີ່ລາວເຄີຍເຮັດໃນອະດີດ. ລາວບອກວ່າ: “ຂ້ອຍຕ່ຳຕ້ອຍທີ່ສຸດໃນພວກອັກຄະສາວົກ ແລະຂ້ອຍບໍ່ເໝາະທີ່ຈະຖືກເອີ້ນວ່າອັກຄະສາວົກດ້ວຍຊ້ຳ ເພາະຂ້ອຍເຄີຍຂົ່ມເຫງປະຊາຄົມຂອງພະເຈົ້າ.” ເຖິງວ່າໂປໂລຈະຮູ້ສຶກແບບນັ້ນ ແຕ່ລາວກໍບອກວ່າ: “ແຕ່ຂ້ອຍໄດ້ເຮັດໜ້າທີ່ນີ້ເພາະຄວາມກະລຸນາທີ່ຍິ່ງໃຫຍ່ຂອງພະເຈົ້າ.” (1 ໂກລິນໂທ 15:9, 10, ລ.ມ.) ພະເຢໂຫວາຮູ້ວ່າໂປໂລບໍ່ສົມບູນແບບ. ແຕ່ພະອົງກໍຍອມຮັບສິ່ງທີ່ລາວເປັນແລະຢາກໃຫ້ລາວໝັ້ນໃຈວ່າພະອົງຮັບໄດ້. ຖ້າເຈົ້າຮູ້ສຶກເສຍໃຈແທ້ໆໃນສິ່ງທີ່ເຈົ້າເຄີຍເຮັດໃນອະດີດແລະໄດ້ອະທິດຖານບອກພະເຢໂຫວາໄປແລ້ວກ່ຽວກັບເລື່ອງນີ້ ແລະໃນກໍລະນີທີ່ຈຳເປັນເຈົ້າກໍໄດ້ລົມກັບຜູ້ເຖົ້າແກ່ໃນປະຊາຄົມແລ້ວ ພະເຢໂຫວາຈະໃຫ້ອະໄພເຈົ້າຢ່າງແນ່ນອນ. ຂໍໃຫ້ເຊື່ອວ່າພະເຢໂຫວາໃຫ້ອະໄພເຈົ້າແລ້ວຄືທີ່ພະອົງເວົ້າແທ້ໆ.—ເອຊາອີ 55:6, 7
19. ຂໍ້ພະຄຳພີປະຈຳປີ 2018 ແມ່ນຫຍັງ ແລະເປັນຫຍັງຂໍ້ນີ້ຈຶ່ງສຳຄັນ?
19 ເຮົາມີຊີວິດທີ່ໃກ້ຈະເຖິງຈຸດຈົບຂອງລະບົບນີ້ແລ້ວ ເຮົາຈຶ່ງຄາດໝາຍໄດ້ວ່າຈະມີບັນຫາຫຼາຍຢ່າງ. ແຕ່ເຮົາຄວນຈື່ໄວ້ວ່າພະເຢໂຫວາຜູ້ດຽວທີ່ໃຫ້ ‘ຄົນທີ່ເມື່ອຍມີແຮງ’ ແລະ ‘ຄົນທີ່ຫິວອ່ອນ [“ໝົດແຮງ,” ລ.ມ.] ມີກຳລັງຫຼາຍຂຶ້ນ.’ ພະອົງສາມາດໃຫ້ທຸກສິ່ງທີ່ເຈົ້າຈຳເປັນຕ້ອງມີເພື່ອຈະຮັບໃຊ້ພະອົງຕໍ່ໄປຢ່າງສັດຊື່. (ເອຊາອີ 40:29; ຄຳເພງ 55:22; 68:19) ລະຫວ່າງປີ 2018 ເຮົາຈະຄິດເຖິງຄວາມຈິງທີ່ສຳຄັນນີ້ທຸກຄັ້ງທີ່ເຮົາມາຫໍປະຊຸມເມື່ອເຫັນຂໍ້ພະຄຳພີປະຈຳປີທີ່ວ່າ: “ຄົນທັງຫຼາຍທີ່ຄອງຫາ [“ວາງໃຈ,” ລ.ມ.] ພະເຢໂຫວາກໍຈະມີເຫື່ອແຮງມາໃໝ່.”—ເອຊາອີ 40:31