Mu Meme Mañi ni Mañi ya Shwile Linyolwa
1 Sina ka mwa n’a bulelezi cimo mupolofita Amosi, lubasi lwa batu kacenu lu shwile ‘isi linyolwa la mezi, kono la ku utwa manzwi a [Jehova, NW].’ (Am. 8:11) Kuli lu tuse batu ba ba mwa muinelo wo wa linyolwa la kwa moya, lu ba bulelela ka za litukiso za Mulimu za ku liulula kwa sibi ni lifu batu ba ba ipeya ku utwa, ze talusizwe mwa kauhanyo ya mafelelezo ya Sinulo sina “nuka ya mezi a bupilo.” Lu na ni tohonolo ya ku mema mañi ni mañi ya shwile linyolwa la ku luka kuli a “nge fela kwa mezi a bupilo.” (Sin. 22:1, 17) Lu kona cwañi ku eza seo mwa February? Ka ku fa buka ifi kamba ifi ya makepe a’ 192 ye mu kana mwa ba ni yona. Ne mu kana mwa bata ku lika mitahisezo ye:
2 Bakenisa kuli batu ba bañata ba bilaela ka za buikangulo, mu kana mwa fumana muatumelo wo ku ba o buanyu:
◼ “Ba bañata ba bilaela ka za ku tula kwa pabalelo ye nde ya buikangulo. Mwendi mu kile mwa nahana ka za yona taba yeo. [Mu litele kalabo.] Kana ku na ni tatululo ye inelela ya bona butata bo? [Mu litele kalabo.] Ki ye tibelelo ye makaza.” Mu bale Sinulo 21:4. Buka ye [Mu bulele toho ya taba] i fa litaba ze tungile ka za lifasi l’a ka eza Mulimu, mo ku si ke kwa ba ni manyando.” Haiba ku konahala mu apule fa siswaniso se si bonisa paradaisi mi mu buhisane ka za yona. Mu fe buka yeo mi mu lukise ku kutela teñi.
3 Ha mu eza musipili wa makutisezo, mu kana mwa zwisezapili puhisano ya mina ka ku bulela kuli:
◼ “Nako ye felile, ne lu ambozi ka za tatululo ye inelela ya butata bwa makulanu. Kana mu nahana kuli nako ikaba teñi yeo mutu kaufela a si ke a kula? [Mu litele kalabo.] Mu lemuhe pulelo ye ye hoha mamelelo.” Mu bale Isaya 33:24. Cwale mu apule kwa tuto 5 mwa broshuwa ya Seo A Tokwa, mi mu buhisane maparagilafu 5-6, ili ku buza lipuzo za maparagilafu ao ze kwa makalelo a tuto yeo ni ku bala mañolo a bonisizwe a sikai. Mu bulele kuli ku felisa matuku ni lifu ki talelezo ya mulelo wa Mulimu wa pili kwa neku la lifasi-mubu. Mu lukise ku kutela teñi ili ku yo buhisana maparagilafu 1-4 ni 7 a mwa tuto ye swana.
4 Haiba taba ya mwa makande ye ama lifu la ka sipundumukela se i bile mwa lipilu za batu, mu kana mwa lika muatumelo wo:
◼ “Mu kana mu utwile ka za [mu bulele taba ya mwa makande]. Batu ha ba shwa mwa kozi, ba bañata ba kakanya ka za ku omba-omba ko ku kona ku fiwa mabasi a shwezwi. Mina mu nahana cwañi?” Mu litele kalabo. Cwale mu apule fa likepe le li swanela la buka ye mu sweli ku fa, mi mu bonise kezahalo ya ku zuha kwa bafu ye mwa siswaniso. Mu zwelepili ka ku bulela kuli: “Ba bañata ba komoka ku ituta kuli batu ba ba lukile hamoho ni ba ba si ka luka ba ka kutisezwa kwa bupilo mwa Paradaisi ya fa lifasi-mubu. [Mu bale Likezo 24:15 mi cwale mu taluse.] Buka ye i nyakisisa litaba ze ñwi ze ñata ili ze hoha mamelelo ka za mulelo wa Mulimu kwa neku la nako ya kwapili. Haiba mu bata ku ituta ze ñata ka za teñi, mu kana mw’a nga kopi ye.” Mu lukise ku kutela teñi, ni ku lemuha licisehelo ni lipilaelo luli za mutu y’o.
5 Ha mu kutela teñi, mu bise mutahisezo wa mina ku ba o swanela muñ’a ndu. Mwendi mu kona ku bulela kuli:
◼ “Ha ne lu ambolisani, ne ni itebuhile maikuto a mina ka za mulelo wa Mulimu kwa neku la lifasi-mubu. [Mu bulele hape maikuto a hae.] Ne ni zo bata litaba ze ni hupula kuli mu ka li tabela.” Mu apule fa tuto 5 ya mwa broshuwa ya Seo A Tokwa. Mu bale ni ku talusa maparagilafu a mwa tuto yeo a mañata ka mwa latela muñ’a ndu. Ha se mu tomile nako ya ku kutela teñi ili ku yo zwelapili ni tuto, mu taluse linako za mikopano ya puteho. Mu taluse ka za Mukopano wa Nyangela, mi mu mu meme ku fumaneha teñi.
6 Haiba mu lata mutahisezo o nolofalizwe wa ku fa trakiti, mu kana mwa bulela se:
◼ “Ni bata ku mi fa trakiti ye ye na ni toho ya taba ye li Ki Sepo Ifi ya Balatiwa Ba Ba Shwile?” Mu i fe muñ’a ndu, mi mu mu kupe ku latelela ha mu nze mu bala paragilafu ya pili. Mu mu fe sibaka sa ku alaba puzo ya mwa mubamba wa mafelelezo. Mu bale paragilafu ya bubeli, mi cwale mu apule fa siswaniso se si fa likepe le li swanela la buka ye mu sweli ku fa. Mu zwelepili ka ku bulela kuli: “Buka ye i fa litaba ze tungile ka za zuho ni lisepiso za kwapili ze ñwi ze makaza za mwa Bibele. Mu kana mw’a nga kopi ye.” Mu lukise musipili wa makutisezo.
7 Ku mema ba bañwi kwa luna ka cisehelo ku kana kwa ba susueza ku taha kwa mezi a bupilo, ao Jehova cwale a sweli ku fa. Kacwalo, haike lu bulelele mañi ni mañi ya shwile linyolwa kuli, “Taha!”—Sin. 22:17.