Hozaraina Amin’ny Novambra ny Vaovao Momba Ilay Fanjakana
1. Inona avy no fanontanian’ny olona momba ny maty, ary ahoana no hamaliana an’izany amin’ny Novambra?
1 Na dia tsy mitovy aza ny fivavahan’ny olona, dia mihevitra ny fahafatesana ho fahavalo daholo izy ireo. (1 Kor. 15:26) Maro no manontany tena hoe mankaiza ny maty ary mbola hihaona amin’izy ireny ve izy ireo. Hozarain’ny fiangonana rehetra maneran-tany àry ilay Vaovao Momba Ilay Fanjakana No. 38 hoe Mbola ho Velona Indray ve ny Maty? Hanomboka amin’ny 1 Novambra izany ary haharitra iray volana. Hatao toy ny taratasy mivalona hafa io Vaovao Momba Ilay Fanjakana No. 38 io aorian’izay.
2. Hoatran’ny ahoana no nanaovana ny Vaovao Momba Ilay Fanjakana No. 38?
2 Hoatran’ny ahoana no nanaovana azy? Natao azo aforitra manaraka ny lavany ilay Vaovao Momba Ilay Fanjakana No. 38, mba ho hita eo ivelany ilay lohateny mahaliana sy ilay hoe “Ahoana no havalinao? Eny, Tsia, Angamba.” Rehefa sokafan’ilay olona ilay izy, dia ho hitany hoe inona no lazain’ny Baiboly mba hamaliana an’ilay fanontaniana eo amin’ny lohateny, sy ny vokatr’izany eo aminy. Ho hitany ao koa hoe nahoana no tena azo inoana izay lazain’ny Baiboly. Misy fanontaniana hosaintsainina any amin’ny faran’ilay Vaovao Momba Ilay Fanjakana, ary misy fampirisihana azy hitady fanazavana fanampiny.
3. Ahoana no hizarana ny Vaovao Momba Ilay Fanjakana No. 38?
3 Ahoana no hizarana azy? Mitovy amin’ny fizarana fanasana amin’ny Fahatsiarovana sy fivoriambe ny fizarana azy. Ny anti-panahy no hanome toromarika momba ny fiasana ny faritanin’ny fiangonana, ka izay voalazan’ny taratasy nomena azy ireo tamin’ny 1 Aprily 2013 no harahiny. Raha misy fiangonana kely faritany, dia azony anontaniana izay fiangonana be faritany eo akaikiny raha azony ampiana. Tadidio hoe izay ilainao mandritra ny herinandro ihany no tokony halainao. Raha vita ny faritany nefa mbola tsy mifarana ilay ezaka manokana, dia azo zaraina eny an-dalana ilay Vaovao Momba Ilay Fanjakana No. 38. Raha lany alohan’ny fotoana koa ilay izy, dia afaka manolotra an’izay ananany ao amin’ny tahiriny ny fiangonana. Tsy hifantoka amin’ny fanombohana fampianarana isika ny asabotsy voalohany amin’io volana io fa amin’ilay ezaka manokana. Raha azo atao, dia tokony hanolotra gazety koa isika rehefa faran’ny herinandro. Inona no ataonao dieny izao mba hahafahanao handray anjara feno amin’io ezaka manokana io?