Aoka isika hahatakatra ny hevitr’ireo zava-miseho amin’izao fotoana izao
1 “Miova ny fisehoan’izao tontolo izao”. (1 Kor. 7:31, MN). Hita taratra eo amin’ireo zava-miseho haingana dia haingana izany. Miaraka amin’izay rehetra mitranga ao anatin’ny fandaminan’i Jehovah, midika inona ho an’ny tenanao manokana izany? — Lioka 21:28.
2 Ny fahatanterahan’ny faminanian’ny Baiboly amin’izao taonjato faha-20 izao dia manaporofo fa tonga eo amin’ny androny farany ny fandehan-javatra ratsy manontolo. (Matio 24:3-14; Lioka 21:7-11). Nilaza i Jesosy fa “tsy ho lany ity taranaka ity mandra-pahatongan’izany rehetra izany.” (Lioka 21:32). Moa ve ianao mahatakatra ny dikan’izany ho an’ireo olona ao amin’ny faritaninao izay mbola tsy niandany tamin’i Jehovah? Raha izany no izy, inona no vokatr’izany eo amin’ny asa fanompoana ataonao? — Lioka 21:34-36.
3 Ampio Ny Hafa Dieny Mbola Misy Ny Fotoana: Nampirisika ny mpianany hanararaotra ireo toe-javatra mbola mety ho amin’ny fampahafantarana ny vaovao tsara i Jesosy. (Jaona 9:4). Namerina izany anatra izany ny apostoly Paoly rehefa nampirisika ireo rahalahy tany Kolosia izy mba ‘hanohizan’izy ireo handeha amim-pahendrena eo anatrehan’izay any ivelany, amin’ny fakana ny fotoana mety avy amin’ireo ampiasaina amin’ny asa hafa’. — Kol. 4:5, MN.
4 Nisy nanaraka ny anatry ny apostoly mba hakana ny fotoana ilaina avy amin’ireo ampiasaina amin’ny asa hafa ary tonga mpitory maharitra mandavantaona. Nisy tanora maro be nanomboka ny asan’ny mpitory maharitra mandavantaona raha mbola tany an-tsekoly izy ireo ary nahomby tsara tamin’ny fanaovana izany. Ireo tanora any an-tsekoly dia afaka maka ny fotoana mety avy amin’ireo ampiasaina amin’ny asa hafa mba hanampiana ireo iray kilasy aminy hahatakatra ny hevitr’izay mitranga amin’izao andro izao ary ny fanantenana mamirapiratra ny amin’ny hoavy eo ambanin’ny Fanjakan’Andriamanitra. — Mpit. 12:1.
5 Afaka mampiasa tsara ny fotoanantsika eo amin’ny asa fanompoana isika mandritra ny volana Oktobra amin’ny fanasongadinana ny gazety Mifohaza! amin’ny fahafahana rehetra. Afaka manome fahatakaran-javatra momba ny tena dikan’ireo zava-miseho amin’izao andro izao io zavatra vita an-tsoratra io. Atolory ireo olona feno fanahiana hitanao eo am-panaovana ny asa isan-trano izy io. Mandraisa fanapahan-kevitra mba hanolotra azy io amin’ireo mpiara-mianatra aminao na ireo olona any amin’ny toeram-piasanao. Asongadino ireo foto-kevitra izay mety hahaliana manokana ireo olona fantatrao.
6 Ahoana no ahafahana mampiasa ny foto-dresaka amin’ny volana? Rehefa avy nampahafantatra ny tenanao ianao, dia afaka manontany ilay tompon-trano hoe: “Nahoana isika, araka ny hevitrao, no mahita tarehin-javatra mahakivy maro be toy izao ankehitriny?” Rehefa avy namaly izy, dia azonao atao ny manampy hoe: “Miaiky ny Baiboly fa, ho an’ny olona maro be, dia tsy misy fanantenana sy mahakivy ny fiainana. Mariho izay voalaza eto amin’ny Mpitoriteny 2:17. [Vakio.] Miray hevitra amin’izay voalaza eto ve ianao? [Avelao izy hamaly.] Inona no holazainao fa hitondra fampiononana ho an’ny olona iray izay miatrika zava-manahirana maro? [Avelao izy hiteny.] Inty misy andinin-teny iray izay manome fomba fijery manorina momba ny fiainana. [Vakio ny Salamo 37:39, 40.] Izany no antony ampirisihan’ny Vavolombelon’i Jehovah ny olona hanana fampianarana ara-baiboly. Mariho, ohatra, ny foto-kevitra velabelarina ato amin’ny nomerao farany amin’ny gazety Mifohaza! navoakanay.” Avy eo, arakaraka ny fahalianana aseho, dia azonao atao ny mamantatra raha tokony hanolotra ny famandrihana na ireo gazety tsirairay ianao na raha hety kokoa ny hamelana fotsiny taratasy mivalona iray.
7 Tsy misy isalasalana fa fotoana mampientana eo am-panompoana an’i Jehovah izao. Enga anie izany hanosika antsika hampiasa tsara ireo fahafahana amin’ity volana ity mba hanampiana olona tso-po betsaka kokoa hahita ny tena hevitra fonosin’ireo zava-miseho amin’izao fotoana izao.