Mitondra Fifaliana ny Fanaovana Fanomanana Mialoha
1 Mitondra fifaliana lehibe ho antsika ny fandraisana anjara amin’ny fanompoana eny amin’ny saha. (Sal. 89:15, 16). Mazava ho azy fa ny fanaovana fanomanana dia fanalahidy iray ahafahana mahita izany fifaliana izany amin’ny fomba feno. Arakaraka ny anomanantsika tsara no ahavitantsika zavatra betsaka kokoa, ary arakaraka ny ahavitantsika zavatra betsaka kokoa no itomboan’ny fifaliantsika.
2 Ampiasao ireo fitaovana omena: Atombohy amin’ny famakiana sy famakafakana ilay fanazavana ao amin’ny Fanompoantsika Ilay Fanjakana, ny fanaovanao fanomanana. Matetika izy io no manome fomba fampiseho voahevitra tsara izay natao hanampiana anao hampiseho mora foana sy amin’ny fomba mandaitra ny hafatra momba ilay Fanjakana. Hahita ohatra ny amin’ny fomba andresena fanoherana mahazatra ianao. Misy hevitra voafaritra tsara ny amin’ny fomba hanaovana fiverenana mitsidika mandaitra ho fikendrena ny hanomboka fampianarana Baiboly, atolotra ao. Azonao atao tsara ny mampifanaraka ireny fanoloran-kevitra ireny amin’ny hevitra izay manavanana anao ny mampiasa azy. Fanampin’izany, dia anananao ny boky Fanjohian-kevitra, izay manome fampidiran-dresaka ary koa famaliana fanoherana maro isan-karazany, ka manampy anao hanjary hahita vokatra kokoa eo amin’ny toe-javatra maro atrehinao.
3 Diniho ilay zavatra vita an-tsoratra hatolotrao, ary mifidiana hevitra mahaliana sy manaitra iray na roa izay azonao aseho amin’ilay tompon-trano. Mety hanome anao fahafahana hanombo-dresaka ny vaovao mampisaintsaina izay renao na novakinao. Eritrereto mialoha ireo fanoherana mahazatra izay azo inoana fa ho hitanao, ary eritrereto ny fomba amalianao azy ireny. Avy eo dia makà minitra vitsivitsy mba hanaovana fanazaran-tena ny amin’izay holazainao eny am-baravarana.
4 Atreho ny Fivoriana Momba ny Fanompoana rehetra: Mandritra ny Fivoriana Momba ny Fanompoana, dia mihainoa amim-pitandremana rehefa dinihina sy anaovana fampisehoana ireo fanoloran-kevitra aseho ao amin’ny Fanompoantsika Ilay Fanjakana. Raiso an-tsoratra ireo hevitra izay tsapanao fa azo ampidirina ao amin’ny fomba fampisehonao. Tadidio ny sasany amin’ireo toe-javatra mahazatra hitanao teny amin’ny fanompoana, ary mieritrereta fomba ahafahanao mitory amin’ny fomba mandaitra kokoa. Miresaha momba ireny zavatra ireny amin’ny mpitory hafa, aloha sy aorian’ny fivoriana.
5 Afaka matoky ianao fa raha “[voaomana, NW] ho amin’ny asa tsara rehetra” ianao, dia hahazo fifaliana sy fahombiazana lehibe kokoa eo amin’ny fanampiana ny hafa hahita ny lalan’ny fiainana. — 2 Tim. 2:21.