MWAHA WOOSOMIYA 47
Ninhala ulipihaca cani waafenta wihu mayamunneehu?
“Nhihiyerere waafenta akhunaninyu, kontha nifento ninkhuma wa Nluku.”—1 JO. 4:7.
NCIPO 109 Niphentaneke ni Murima Wotheene
NINHALA WIITTHUCANI?a
1-2. a) Nlattuni apostolu Paulu wenryaawe wiira nifento phiri nuulupale uvikana waamini ni niweherero nihu? b) Makohoni anhaleehu woopela mwaha?
UKATI apostolu Paulu wuulumilyaawe waamini, niweherero ni nifento, uyo aheera wiira itthu ‘yuulupale cinene nikhanle nifento.’ (1 Akor. 13:13) Masi nlattuni Paulu wenryaawe commo? Uyo enre commo kontha uhoolo, citthu Nluku cikhuluvelihilyaawe cinaarwaa wiirannya. Ceerannyaaka, hi ninaahala uhiya waamini ni uweherera nnyo citthunnyo kontha ciheerannya. Masi hi khaninhala uhiya unfenta Yehova ni waafenta akhwiihu. Uhiya commo, nifento nihu ninhala uvira nitepaka winciva.
2 Ukhala wiira nifento khaninhala uhiya ukhalana ifayita cinene muukumini wihu, nhina ula mwahoola, ninaahala waakhula makoho mararu. Noopacera: nlattuni ninlamuliyeehu waafenta akhunanihu? Nonayeeli: ninhala woonihera cani wiira ninawaafenta akhunanihu? Noneeraru: ninhala ulipihaca cani ufentana wihu?
NLATTUNI NINLAMULIYEEHU WAAFENTA AKHUNANIHU?
3. Kontha isiyani ninlamuliyeehu ufentana?
3 Nlattuni ikhanlyaaya itthu yofayita waafenta akhunanihu? Ikhanle itthu yofayita kontha naafentaka akhunanihu ninawoonihera wiira nikhanle makristau eekhweeli. Yesu ahowiirela attharyaawe co: “Mwafentanaka, atthu otheene anaahala ucuwela wiira nyuuva nkhanle attharyaaka.” (Joau 13:35) Ciicammo, nifento ninaanikavihera wiiwanana. Paulu heera wiira ‘nifento ninawaataaniha.’ (Akol. 3:14) Masi ihaavo-tho itthu ikhwaawe yofayita cinene innikurumica ufentana. Apostolu Joau hantikha co: “Ule nonfenta Nluku haana anfentaka ciicammo munnaawe.” (1 Jo. 4:21) Naafentaka akhunanihu ninaathoonyera wiira ninanfenta Nluku.
4-5. Nlattanihere mananna unfenta Nluku uhinhiyanaaya nuwaafenta mayamunneehu.
4 Unfenta wihu Nluku khunhiyana ni waafenta mayamunneehu ni mayanuunwiihu. Manannani? Muupuwele mananna nrima wo mwiirutthuni wihu cinvaraaya nteko nkhayi nimiphantte cikiina co mwiirutthuni. Ukati nkiina, mameetiku yapheelaka woona wakhala wiira nrima wa ntthu nowerennya unaavara nteko saana, ayo anomphima mmoononi paahi. Iyo itthwiiyo inniitthuciha isiyani nhina nifento?
5 Mameetiku anomphima nretta mmoononi wiira acuwele wakhala wiira nrimaawe nkumi awula mena. Inanna imocaaru, hiiva ciicammo napheelaka ucuwela wakhala wiira ninanfenta cinene Nluku, nihaana noonaka wakhala wiira ninnaafenta akhunanihu awula mena. Noonaka wiira hi khaninaafenta akhunanihu, iyo itthwiiyo atthunaka inthoonyera wiira ciicammo khaninonfenta Nluku. Masi wakhalaka wiira ninawaafenta mayamunna, iyo inthoonyera wiira ciicammo ninanfenta Yehova.
6. Nlattuni ninlamuliyeehu wiikurumica noonaka wiira waafenta wihu mayamunna uhoririyaca? (Nwehe 1 Joau 4:7-9, 11.)
6 Noonaka wiira waafenta wihu mayamunna uhololovaca, iyo ikhanle iretta yuulupale. Kontha isiyani? Kontha iyo inoonihera wiira upatthaniihu ni Yehova uhololovaca. Apostolu Joau hoonihera iyo itthwiiyo sana-saana. Uyo enre co: “Ule hinonfenta munnaawe nomoonaawe, khawanoorannya unfenta Nluku, ule himmoonaawe.” (1 Jo. 4:20) Isiyani nineetthuceehu? Hi ninhala untteeliha nrima Yehova ‘naafentanaka.’—Nsome 1 Joau 4:7-9, 11.b
NINHALA WOONIHERA CANI WIIRA NINAWAAFENTA AKHUNANIHU?
7-8. Manannani ninhaleehu uthoonyera wiira ninaafentana?
7 Ahaavo mapuro menci mbiiblyani nimphwanyeehu weeriyaka wiira nihaana nifentanaka. (Joau 15:12, 17; Aroo. 13:8; 1 Atesal. 4:9; 1 Pet. 1:22; 1 Jo. 4:11) Masi, nifento ikhanle ikhalelo yo wanrimani wihu ni ihinkhitiryaawe woona pinaatamu nkhunanihu. Vano, ninhala uwoonihera cani akhunanihu wiira ninawaafenta? Ninhala uwoonihera nimoolumweehu ni nicitthu cimpankeehu.
8 Ahaavo mananna menci hiiva owoonihera wiira ninawaafenta mayamunneehu ni mayanuunwiihu. Moone ala manannaala: “Muulumelane ikhweeli.” (Zakar. 8:16) “Nkhalakhale ninnema.” (Mark. 9:50) “Nhiweherere wiira akhwiinyu apacere wuuttitthimihani, masi mpacere nyuuva waattitthimiha akhwiinyu.” (Aroo. 12:10) “Mwaakhelelane.” (Aroo. 15:7) “Nhihiye ulevelelana.” (Akol. 3:13) “Nhihiye uvilelana.” (Akalas. 6:2) “Nhihiye umaalihana.” (1 Atesal. 4:18) “Nhihiyerere . . . ulipihana.” (1 Atesal. 5:11) “Nlompelane.”—Tiya. 5:16.
Ninhala unkavihera cani munneehu ri nimasakha? (Nwehe iparaagarafu 7-9)
9. Kontha isiyani unaareera cinene waamaaliha mayamunneehu? (Nwehe ciicammo ilatarato.)
9 Nttwee noopele mwaha inanna imoca ninlamuliyeehu uwoonihera akhunanihu wiira ninawaafenta. Nhina iparaagarafu ivinre, nihoona wiira Paulu enre: “Mmaalihane.” Nlattuni ikhanlyaaya itthu yofayita cinene waamaaliha mayamunneehu ni mayanuunwiihu? Ilivuru imoca intaphulela moolumo o mbiiblyani ihohimya wiira nuulumo “umaalihana” nantikhilyaawe Paulu maanaaya wiira “urwaa mpaka nipuro niryaawe ntthu amphwanyile masakha ni ukhala nkhayi nuuyo wiira ninlipihe.” Naamaalihaka mayamunneehu, hi ninawaavara moono wiira naakavihere uvilela masakha ni arwee uhoolo munttalani weekumi. Khula ikwaha inkhaleehu nkhayi ni munneehu awula nuunwiihu ukati unonlaawe nlattu wo masakha ankhumelenle, hi ninaamoonihera wiira ninanfenta.—2 Akor. 7:6, 7, 13.
10. Woonihera uthunku ni waamaaliha mayamunneehu unvaranaca cani?
10 Ntthu amoonelaka uthunku nkhunanawe, naahala upheela ummaaliha ni upanka itthu wiira ankavihere. Maanaaya wiira woopacera, hiiva ninawoona uthunku, vano phinommaaliheehu ntthuuyo. Nttwee noone mananna apostolu Paulu coonihenryaawe mananna Yehova cinnoonelaawe uthunku ni cinnimaalihaawe. Paulu heera wiira Yehova khanle “Apaapeehu oowinciva uthunku ni Nluku rina mamaalihero otheene.” (2 Akor. 1:3) Niwehero no iyo iveeruswiiyo nhina Bíblia de Estudo nineera wiira Paulu wenryaawe “oowinciva uthunku,” aapheela uthoonyera mananna Yehova cinoonaawe uthunku. “Yehova neehaniya Apaapeehu oowinciva uthunku, kontha uyo naawoonela uthunku atthu cinene.” Phimaana, uyo ‘naanimaaliha mmasakhani wihu otheene.’ (2 Akor. 1:4) Toko maaci cinomphwanyihaaya ikuru ntthu ninvonle ntthona, Yehova naanimaaliha ni naaniphwanyiha ikuru yanikhumelelaka masakha. Ninhala untakiha cani Yehova wiira niwoonele uthunku akhunanihu ni naamaalihe? Inanna imoca yontakiha ukhanle wiitthuca woonihera ikhalelo cinnikavihera waamaaliha akhunanihu. Ikhaleloni cennyo?
11. Toko cinhimyaaya Akolosu 3:12 ni 1 Peturu 3:8, makhaleloni makhwaawe ninlamuliyeehu ukhalana wiira nihihiyerere waafenta ni waamaaliha mayamunneehu?
11 Isiyani inhala unikavihera ‘Uhihiya umaalihana’? Nihaana niitthucaka woonihera ikhalelo toko woona ikiriri, ufenta ni woonihera unamaana . (Nsome Akolosu 3:12; 1 Peturu 3:8.c) Ayo makhalelwaayo anhala unikavihera cani? Nawoonelaka ikiriri mayamunneehu, ninaahala upheela waamaaliha yaakhumelelaka masakha. Yesu aheera: “Malaku anooluma citthu cincanre ntthu wanrimani.” (Mat. 12:34, 35) Waamaaliha mayamunneehu ni mayanuunwiihu anaakhumelela masakha akhanle mananna o waathoonyihera wiira ninawaafenta.
NINHALA ULIPIHACA CANI UFENTANA WIHU?
12. a) Nlattuni nihinlamuliyeehu wiitthaala? b) Nikohoni ninhaleehu waakhula?
12 Otheene cihu khanimpheela ‘uhiya ufentana.’ (1 Jo. 4:7) Masi khaninlamuliya uliyala itthu Yesu yaahimilyaawe. Uyo enre wiira “nifento naatthu enci nanhala uririyaca.” (Mat. 24:12) Yesu khaaphenle uhimya wiira attharyaawe enci yanhala uhiya ufentana. Masi uyo aapheela unihimerya wiira nihaana uhiitthaala wiira nihaakhalakhalane mayamunneehu woohaafenta khampa atthu o ntuninyani cinkhalakhalaaya? Nuupuwelaka iyo itthwiiyo, niikohe co: Ninhala ucuwela cani wakhala wiira waafenta wihu mayamunneehu uholipa awula uhoririyaca?
13. Isiyani inhala uwiiriha mayamunneehu ukupaleela wiira ninawaafenta?
13 Inanna imoca yoocuwelela wakhala wiira waafenta wihu mayamunna uholipa ukhanle wuupuwela mananna cinaatafitiihu yakhumelelaka itthu. (2 Akor. 8:8) Iyo itthwiiyo inawoonannya nawehaka moolumo a apostolu Peturu, aneera: “Mooniherane nifento nuulupale, kontha nifento ninaakhuneela matampi menci.” (1 Pet. 4:8) Ayo moolumwaayo anthoonyera wiira ukati akhunanihu unvonyihaaya itthu phuukati unttehiyaaya waafenta wihu ni phuukati unoonannyaaya wakhala wiira ninawaafenta cinene awula mena.
14. Toko cinhimyaaya 1 Peturu 4:8, inannani yo nifento ninlamuliyeehu woonihera. Ntakihere.
14 Nttwee nuulume itthu ikhwaawe Peturu yaahimyalyaawe. Wuupaceroni iveerusu 8, unaahimiya mananna cinlamuliyaaya ukhala nifento nihu. Wiiriye nihaana nikhalaka “nifento nuulupale.” Nuulumo “nuulupale” Peturu nantikhilyaawe ninaaca itthu yowaatapuwa. Ni mphantte wonayeeli wo iyo iveeruswiiyo unaahimya isiyani inhaleehu upanka wakhalaka wiira nihaana nifento nuulupale. Wiiriye wiira nno nifentonno ninaahala ukhuneela awula uhiwacera citthu cinvonyihaaya mayamunneehu. Unkhala toko nifento niri khampa ikuwo yowaatapuwa. Ni hi ninaacisa iyo ikuweeyo phanceraka utaphula cinene mpaka wankhuneelaaya kahi itampi imoca awula piili, masi “itampi cinci.” Ala manannaala, ukhuneela maanaaya wiira ulevelela. Khampa ikuwo cinkhuneelaaya itthu yoonanaraca awula yoohilokaloka, nifento nihu pooti ukhuneela citthu cinvonyaaya mayamuneehu ni matampyaaya.
15. Wakhalaka wiira waafenta wihu mayamunna uholipa, isiyani inhaleehu ukhitiri upanka? (Nwehe Akolosu 3:13.)
15 Nifento nihu nihaana nikhalaka noolipa wankhitiriihu ulevelela uvonya wo mayamunna. Hataa ukhalaka wiira ukati nkiina unaanirika upanka iyo itthwiiyo. (Nsome Akolosu 3:13.d) Ukati unaaleveleleehu akhunanihu, ninawoonihera wiira nifento nihu nikhanle noolipiha ni ninantteeliha nrima Yehova. Masi isiyani inhala unikavihera uhiya uttuli citthu mayamunneehu cinvonyaaya?
Khampa cinnicivelaaya usunka ifootu cooreera ni ufuttha coohiloka, unaanicivela wuupuwelela citthu comaana ciniirannyenle nimayamunneehu. Masi ninawiikurumica uliyala itthu yoohinamaana yuulumilyaaya awula yaanipankilyaaya (Nwehe iparaagarafu 16-17)
16-17. Isiyani-tho inhala unikavihera uleva citthu cinvonyaaya akhunanihu? Ntakiheroni ninnikavihera ucuweleeha iyo itthwiiyo? (Nwehe ciicammo ilatarato.)
16 Nihaana uweheeha makhalelo omaana mayamunna arinaaya, uhiya uweheeha paahi citthu cinvonyaaya. Atthunaka nyuuva nnaarwaa ufestani yankaani itthenkacilyaaya mayamunna. Nyuuva nnaathukathuka nimayamunna ni wiimaleloni nnaakumiha ifootu niikhurupu yotheene. Masi nnaalakela-tho ulatha ifootu piili wiira imoceeyo yaahilokeke, atthunaka piilinnyo cinaahala ukhuma ratta. Vano nrina ifootu tthaaru. Ukati wowoona nnyo ifootunnyo, nyuuva nnawoona wiira ifootu imoceeyo, haavo munna hikhumile ratta nfootunimmo. Mwaahala upankani iyo ifootwiiyo? Nyuuva nnaafutta, kontha nnaacuwela wiira cihaavo piili cikhumile saana, uyo munnooyo khumenlyaawe narenre ni athyaaka sana-saana.
17 Vano, nlattanihe nnyo ifootunnyo ni citthu ciirannyeele cinoopuweleenyu. Cihaavo citthu comaana ciwiirannyenleni nimayamunneenyu nyuuva cinoopuweleenyu. Masi atthunaka nnawuupuwela ikwaha imoca munneeyu awula nuunwiinyu oolumilyaawe itthu yowuuriipihani nrima. Nyuuva nnaapheela ukhanyerera wuupuwela iyo itthwiiyo? Nlattuni uhinfuttheenyu mmuru winyu iyo itthwiiyo toko caahaleenyu ufuttha ifootu yoohiloka? (Miru. 19:11; Efesu 4:32) Nyuuva mweekurumicaka wuupuwela paahi citthu comaana cuwiirannyenleni nkhayi nuuyo munnooyo, khannohala uwacera itthu yowuuriipihani nrima yoolumilyaawe. Citthu comaana cinoopuweleenyu phi citthu cinhaleenyu upheela usunka mmuru winyu.
NLATTUNI IKHANLYAAYA ITTHU YOFAYITA UFENTANA
18. Ula mwahoola uwiitthucihileni isiyani nhina mananna owaafenta mayamunneenyu?
18 Nlattuni nimpheeleehu ulipihaca ufentana wihu? Toko ciitthucileehu, naafentaka mayamunneehu ni mayanuunwiihu, hi ninawoonihera wiira ninanfenta Yehova. Ni ninhala waathoonyihera cani mayamunneehu wiira ninawaafenta? Inanna imoca ukhanle waamaaliha. Ni uwoonela uthunku phi itthu inhala unikavihera ‘uhihiya umaalihana.’ Masi ninhala ulipihaca cani ufentana wihu? Neekurumicaka cinene waalevelela mayamunneehu, hataa unirikaka waalevelela.
19. Kontha isiyani mahukwaala ikhanle itthu yofayita cinene uwoonihera nifento akhunanihu?
19 Nlattuni mahukwaala ikhanlyaaya itthu yofayita cinene ufentana? Apostolu Peturu ahohimya nlattuni, wiira wawe co: “Nihaattamela wuukhiceroni wo citthu cotheene . . . Phimaana, mooniherane nifento nuulupale.” (1 Pet. 4:7, 8) Ila ituninya yo masakheela ihanle vakaani uphiya umwiiso. Vano isiyani inhala uniirannyeela? Yesu ahaahimerya attharyaawe, eeraka co: “Nnaahala urusa nlaponi motheene, nlattu wo ncina naka.” (Mat. 24:9) Wiira nikhitiri uvilela iyo itthwiiyo, hi nihaana nihihiyereraka wiiwanana. Napankaka commo, Sotwani khanhala ukhitiri unimwalaniha, kontha ninhala ukhala owaatanaca nlattu woofentana, kontha “nifento ninawaataaniha.”—Akol. 3:14; Afili. 2:1, 2.
NCIPO 130 Nihaana nilevelelanaka
a Mahukwaala ikhanle itthu yofayita cinene waafenta mayamunneehu ni mayanuunwiihu. Kontha isiyani? Ni manannani ninhaleehu woonihera wiira ninawaafenta?
b 1 Joau 4:7 Mayamunna, nihihiye ufentana, kontha nifento ninkhuma wa Nluku, ni otheene ule nofenta yariye ni Nluku ni nancuwela Nluku. 8 Ule hinfenta, khanoncuwela Nluku, kontha Nluku nifento. 9 Coo phithoonyiheriyeehu nifento na Nluku: Nluku honveleeliha watuninyani mwanawe ompacera, wiira ula aniphwanyihe ukumi woohimala. 11 Asunnaka oofentiya, ukhala wiira Nluku honifenta ala manannaala, hiiva ciicammo nihaana nifentanaka.
c Akolosu 3:12 Phimaana, khampa atthu oothanliya ni Nluku, owaarya ni oofentiya, nthoonyere uthunku, unamaana, wiiyeviha, umaala ni uvilela. 1 Peturu 3:8 Woothikilela, otheene cinyu muupuwele inanna imocaaru, nwacerane, nthoonyere nifento no mayamunna, uthunku ni wiiyeviha.
d Akolosu 3:13 Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe. Toko Yehova cuulevelenlyaaweni niiraati, nyuuva nhaana mpankaka ciicammo.