2 Timote
2 Kõn men in, nejũ, kwõn kajoorl̦o̦k wõt kõn jouj eo el̦ap im ej pãd ilo Christ Jesus; 2 men ko kwaar roñ jãn ña im elõñ kar ri-kam̦ool kaki, kwõn katakin em̦m̦aan ro retiljek kõn men kein, innem rein renaaj bareinwõt erom ro rekkar ñan aer katakin ro jet. 3 Ãinwõt juon rũttarin̦ae em̦m̦an an Christ Jesus, kwõn m̦õn̦õn̦õ in eñtaan kõn wãween ko rekanooj in kaeñtaanan. 4 Juon eo ej bõk jerbalin rũttarin̦ae eban bõk kun̦aan* ilo jerbal ko jet ilo mour ñan koorl̦o̦k jããn* el̦aññe ekõn̦aan bwe eo ear kadel̦o̦ñe bwe en juon rũttarin̦ae en m̦õn̦õn̦õ ippãn. 5 Im ilo iien iukkure ko, jabdewõt eo ej jiãe, eban bõk an kũrawũn el̦aññe ejjab l̦oori kakien ko. 6 Juon ri-kallib eo ear lukkuun kate jerbal enaaj aikuj e eo m̦oktata ej bõk leen jikin kallib eo an. 7 Kwõn ekkeini am̦ kõl̦mãnl̦o̦kjen̦ kõn men kein ij jiroñ eok kaki; Irooj enaaj kõm̦m̦an bwe kwõn mel̦el̦e* men otemjej.
8 Keememej bwe Jesus Christ ear jerkak jãn mej im ej nejin* Devid ekkar ñan ennaan eo em̦m̦an ij kwal̦o̦k kake, 9 eo ij iioon eñtaan im ij kalbuuj kake ãinwõt ñe ña juon ri-nana. Meñe ãindein, ak ejjel̦o̦k emaroñ liãpe naanin Anij. 10 Eñin unin, ij wõnm̦aanl̦o̦k wõt im kijenmej ilo men otemjej kõn wõt ro em̦õj kããlõt er kõnke ren bareinwõt bõk lo̦mo̦o̦r ikijjeen Christ Jesus, im ren bõk aiboojoj ñan indeeo. 11 Jemaroñ lukkuun lõke naan kein: Em̦ool bwe ñe jenaaj mej ippãn, jenaaj bareinwõt mour ippãn; 12 ñe jenaaj kijenmej wõt, jenaaj bareinwõt tõl ãinwõt kiiñ ippãn; im ñe jenaaj kõjekdo̦o̦ne, enaaj bareinwõt kõjekdo̦o̦n kõj; 13 ñe jejjab tiljek, enaaj tiljek wõt, kõnke ejjab maroñ kõjekdo̦o̦n e make.
14 Wõnm̦aanl̦o̦k wõt im kakeememej er kõn men kein, kakapilõk* er im̦aan mejãn Anij bwe ren jab akwããl kõn naan, bwe men in ejjel̦o̦k tokjãn ñan jidik, kõnke ej kõjorrããn* ro rej roñjake. 15 Kwõn lukkuun kate eok bwe Anij en buñbũruon ippam̦, juon ri-jerbal eo ejjab jook kõn jerbal ko an, im ejim̦we an katakin kõn naan eo em̦ool. 16 Ijoke kwõn jab roñjake kõnono ko rewaan im rej kõjekdo̦o̦n men eo eokkwõjarjar, kõnke men kein renaaj kõm̦m̦an an l̦apl̦o̦k wõt men ko renana Anij ediki, 17 im naan ko aer renaaj ajeeded ãinwõt kinej ko rem̦õñãñe. Haimeniõs im Pailitõs rej jet iaan rein. 18 L̦õm̦arein rar el̦l̦o̦k jãn m̦ool eo, im rej ba bwe em̦õj an jino wal̦o̦k jerkakpeje eo, im rej ko̦kkure tõmak eo an ro jet. 19 Jekdo̦o̦n ñe ear wal̦o̦k men in, ak pedped eo epen an Anij ej jutak wõt, im em̦õj jiil̦i kõn naan kein, “Jeova* ejel̦ã wõn ro rej doon,” im, “Aolep ro rej kũr etan Jeova* rej aikuj jol̦o̦k kõm̦m̦an ko renana.”
20 Ilo juon em̦ ekilep, ewõr jãpe* ko kõm̦m̦an jãn gold im jelba im bareinwõt al̦al̦ im kũl̦e. Jet iaaer rej ñan jerbal ko raorõk, ak ko jet rej ñan jerbal ko rettã. 21 Kõn men in, jabdewõt eo ej kattol̦o̦ke jãn jãpe kein im rej ñan jerbal ko rettã, innem enaaj juon kein jerbal* ñan men ko raorõk, naaj kokkwõjarjare, enaaj wõr tokjãn ñan karo eo an, im enaaj pojak ñan aolep jerbal ko rem̦m̦an. 22 Kõn men in, kwõn ko jãn m̦õm̦ ko an jo̦dikdik, bõtab kwõn kobal̦o̦k ippãn ro rej kũr etan Irooj kõn juon bõro erreo, im jibadek wãnõk, tõmak, yokwe, im aenõm̦m̦an.
23 Bareinwõt, kwõn kõjparok eok jãn iakwããlãl ko ejjel̦o̦k tokjãer bwe kwõjel̦ã bwe rej kõm̦m̦an poktak. 24 Juon eo ej ri-kõm̦akoko an Irooj ejjab aikuj kõm̦m̦an poktak, bõtab ej aikuj kwal̦o̦k jouj* ñan aolep, juon eo ekkar bwe en katakin, im en bõbraik e make ñe rej kõm̦m̦an bõd n̦ae e. 25 Bareinwõt ilo jouj, en kajim̦we ro rej jum̦ae, innem bõlen Anij emaroñ kõtl̦o̦k bwe ren ukel̦o̦k* bwe ren maroñ bõk jel̦ãl̦o̦kjen̦ eo ejim̦we kõn m̦ool eo, 26 im en ruj l̦õmn̦ak ko aer bwe ren maroñ rõl̦o̦k jãn aujiid ko an Tepil̦ eo, ilo aer kile bwe rar po ippãn ñan kõm̦m̦ani kõn̦aan ko an.