Објавување на „зборовите на пророштвото“
1 Живееме во време кога се исполнуваат пророштвата од книгата Откровение. Многумина сакаат да го разберат значењето на вознемирувачките настани што се случуваат. Тие можат да извлечат корист ако „ги слушаат зборовите“ на пророштвото од Откровение (Откр. 1:3). Во текот на март имаме прилика да им помагаме со тоа што ќе им ја нудиме книгата Откровение. При тоа треба да задржиме на ум дека проблемите со кои се соочува човештвото денес, се проречени во Откровението. Тогаш, што можеме да кажеме?
2 Следниов пристап може да биде делотворен:
◼ „Војни, глад и болести го измачуваат човештвото во овој XX век. Што мислите, зошто е така кога човекот постигнал толку голем технолошки напредок? [Дозволи одговор.] Многумина се изненадени кога ќе дознаат дека овие услови биле проречени во Библијата. Веројатно Ви е познат изразот ‚четири јавачи на Апокалипсата‘. Она што го кажува Библијата за овие јавачи е всушност едно пророштво што се исполнува во светските настани денес. [Отвори ја книгата Откровение кај 16. поглавје и покажи му ги илустрациите на страниците 91-97.] Иако ова пророштво претскажува време на голема болка, тоа дава и надеж. [Прочитај Откровение 6:2 во 3. пасус.] Јавачот на белиот коњ е Исус Христос. Тој ветил дека ќе го победи злото и ќе донесе свет на среќа и мир, преку Царството за кое нѐ поучил да се молиме.“ Ако постои интерес, понуди ја книгата.
3 Можеби ова прашање ќе отвори една осмислена дискусија:
◼ „Што мислите, што е потребно за да се отстранат лошите услови во светот? [Дозволи одговор.] Повеќето луѓе се согласуваат дека постои потреба од драстични промени доколку овој свет има намера да опстане. Библијата покажува дека Бог знае како да ги реши нашите проблеми и тој ветил дека ќе ни помогне.“ Сврти во книгата Откровение, на 171. страница и прочитај Откровение 11:15 од 1. пасус. Сврти кај илустрациите на 302. и 308. страница, и укажи на благословите што ќе бидат постигнати кога Христос ќе владее во Царството. Потоа објасни како може станарот лично да извлече корист.
4 Можеби ќе сакаш да кажеш нешто слично на ова:
◼ „Многу луѓе кои ја прочитале библиската книга Откровение, увиделе дека е тешко да се разбере. Таа опишува мноштво необични и значајни настани. Оваа книга, Откровение — Близу е неговата величествена кулминација!, стих по стих ја разгледува целата книга Откровение и покажува како влијае врз нас лично исполнувањето на нејзините пророштва.“ Отвори ја книгата на 15. страница, 2. пасус, и укажи на Откровение 1:1, што е напишано со масни букви. Објасни дека конкретни коментари од овој вид се дадени за секој стих од книгата Откровение и дека информациите ќе му помогнат и нему да ги разбере овие значајни пророштва. Понуди ја книгата ако постои поволна реакција.
5 Доколку човекот е зафатен или не си сигурен дека доволно се интересира, можеш да му оставиш списание или трактат. Кога ќе дојдеш повторно, ако покажува интерес, можеш да му ја понудиш книгата.
6 Пораката што ја содржи Откровението се однесува на сето човештво. Затоа, треба секој да ги чуе зборовите од пророштвото. Да сториме сѐ што можеме за да ја објавиме оваа важна порака.