Makalelo owomihedha malobelo awo

1. Yehova anafuna wi adharaaye yerege ddi? (Osugwe fotu.)

WAHOWELAGA otodoliwa ni wavedaga dhoholela onavedesa nikavihero nawani? Nihinona yowakula ya nikoho nna. Iyo podi omwaddamela Yehova wodhela nlobelo. Teto, siyeyo nneresihuna nasegedheya. Oliye anafuna wi nilobelege malabo aamatene, obe ‘nididelege olobela.’ (1 Tes. 5:17) Iyo nihikanna ofuru wolobela wa Yehova wihina nimulobe dhoholela wodhela muselu bu muselu nnahowelihu mwigumini mwehu. (Pro. 3:5, 6) Mwebaribarene Yehova Mulugu oovaha. Ethu enoniha eyo, sowihina oliye ohuwoga wi iyo podi olobela wa oliye mudhidhi waamutene.

2. Ohudhera wula nnoone ddi?

² Nlobelo nvaho wathima Yehova anivahiliye. Mbwenye mwaha opinyaminyeya ni mabasa a kadda labo podi okala ethu yorusa ofwanya mudhidhi wi nlobele. Teto, podi wera onofuna osaddula makalelo awo olobela. Ebaribariya sowihina Bibiliya podi onikavihera epaddi yela. Ohudhera wula nnere woona makalelo owaaja mudhidhi wihina nilobele niharaga yotajhiha ya Yesu. Teto, nnere woona muselu tanu dhathima nnahowelihu olabihedha nalobelaga, dhinanikavihere osaddula makalelo ehu olobela.

YESU AHAAJA MUDHIDHI WIHINA ALOBELE

3. Yesu anonne ddi wodhela malobelo?

³ Yesu ahinona wi Yehova onowavaha thima malobelo. Ahinathi odha velaboni yavati, Yesu owoona makalelo Yehova awaakuliye malobelo aadhaaraye ororomeleya. Motajhiha, Yesu aali epaddi ya Yehova mudhidhi awakulaga malobelo a Ana, Davidi, Eliyaji ni amodhaya. (1 Sam. 1:10, 11, 20; 1 Reis 19:4-6; Sal. 32:5) Kahiyo ebewene Yesu ahudhihiliye anamahara aye wihina edidele olobela eroromelaga wi Yehova anere wawakula! — Mat. 7:7-11.

4. Yesu anihiyedhe yotajhiha baani?

⁴ Wodhela malobelo aweriyena wa Yehova, Yesu ohuhiya yotajhiha wihina iyo niharege. Egumi yaye yaatene agaali velaboni yavati, Yesu oolobelesa dila dhowinjhivadhene. Oliye ohowela waaja mudhidhi wihina alobele, mwaha mudhidhi wamutene oliye akala oopinyaminyeyene mwaha wa muthithi waathu wamwapela. (Mar. 6:31, 45, 46) Oliye oovenyesa mambeseene wihina akale yeka ni ande olobela. (Mar. 1:35) Nlabo nimodha Yesu ahilobela emahiyu yantero ahinathi werana yothoma yathima. (Luc. 6:12, 13) Emahiyu Yesu ahinathi opiwa, naarive anonaga wi eere wonihiwa goyi, oliye olobela dila dhowinjhivadhene. — Mat. 26:39, 42, 44.

5. Nnande aavi omutajhiha Yesu wodhela makalelo ehu olobela?

⁵ Yotajhiha ya Yesu enonihudhiha wihina naarive nigapinyaminyeye ni mabasa, nnohowela waaja mudhidhi wihina nilobele. Ndala ninga Yesu, nnohowela waaja mudhidhi wihina nilobele podi okala mambeseene obe nihinathi ogona. Neragana ndo, nnomoniha Yehova wihina nnovaha thima nvaho wa malobelo. Murogola dhaala anithaniwa Lynne kanadduwala makalelo atamaleliye agahudhere wodhela olobela. Oliye anowoga egihina: “Nganonne wihina podi owoga ni Yehova mudhidhi bu mudhidhi, miyo obajha omoona Yehova ninga mukwaaga ni mwaha wa eyo miyo waaja makalelo osaddula makalelo aaga olobela.” Mohanganyedha, owinjhiva wa iyo nniwoona ndo. Vano, nnafuna none muselu mitanu dhathima nnahowelihu olabihedha nalobelaga.

MUSELU MITANU DHATHIMA NNAHOWELIHU OLABIHEDHA NAALOBELAGA

6. Mowiwanana ni Apocalipse 4:10, 11, Yehova anafwanelela wakela ddi?

⁶ Omuthithimihege Yehova. Juwawu ahikanna yowoona yootikiniha awooniliye anamaholela owakwana makumi menli nennayi (24) odhulu emulabelaga Yehova. Aliwa yoomuthithiha Mulugu yegihina oliye dinafwanelela ‘othithimihiwa, orihiwa ni kopolo.’ (Omwileri Apocalipse 4:10, 11.) Angero ororomeleya ehikanna dhithu dhowinjhiva dhinathukulela omuthithimiha ni omuriha Yehova. Aliwa eli odhulu vamodha nuliye ni ehimunona pamadhene. Angero ala, enowanda wonelamo pamadhene dhikalelo dha Yehova wodhela dhithu apaddusiye. Teto, yasugwaga dhithu dhatedhene aneriyena, eyo enowathukulela aliwa ofunagave omuthithimiha. — Jó 38:4-7.

7. Dhithu baani dhinanithukulela omuthithimiha Yehova?

⁷ Iyo nnofuna omuthithimiha Yehova naalobelaga wodhela omwaddela dhithu dhinanthukulela omutikina ni omuriha. Wamuhudheraga Bibiliya, osayele wonelamo dhikalelo dha Yehova dhinathabwa wudhivela. (Jó 37:23; Rom. 11:33) Voharela omwaaddele Yehova mwahaya bwaddi ogamudhivela oliye mwaha okanna dhikalelo ndha. Makalelo mamodha omuthithimiha Yehova fuudhela omutamalela wodhela dhatedhene ananereliye ni anawereliye addibilihu. Yehova annave onibarela ni onisamalela. — 1 Sam. 1:27; 2:1, 2.

8. Dhithu baani dhinanithukulela omutamalela Yehova? (1 Tessalonicenses 5:18)

⁸ Omutamalelege Yehova. Iyo nihikanna dhithu dhowinjhiva dhinanithukulela omutamalela Yehova naalobelaga. (Omwileri 1 Tessalonicenses 5:18.) Iyo podi omutamalela Yehova wodhela dhithu dhatedhene dhapama ninnihuna; ebaribari wihina nvaho dhatedhene dhapama dhinadhela wa Yehova. (Tia. 1:17) Motajhiha, iyo podi omutamalela wodhela dhithu dhatedhene dhowoma apaddusiliye. Teto podi olobela wa Yehova omutamalelaga wodhela egumi anivahiliye, amudhihu, akwihu ni wodhela ejhehedho yosogolo anivahiliye. Teto, nihidduwalaga omutamalela Yehova wodhela gari anivahiliye yowandana ni oliye.

9. Mwahaya bwaddi sapama ohuddiwala omutamalela Yehova?

⁹ Podi weera, nnohowela waaja mudhidhi wihina nuubuwele dhithu dhatedhene ninnihuna wihina nimutamalele Yehova. Ebaribari wi athu owinjhiva a malabo yala kinonne otamalela. Aliwa enolabihedha mudhidhi wewa yilibihedhaga wihina ekanne ele enafuniwa, ohiya otamalela wodhela ele enniwana. Nahiya mubuwelo ola onivolowela, iyo podi obajha olobela wa Yehova nikalaga omulobave baahi. Wihina eyo yahipadduwe, sapama ohidduwala omutamalela Yehova wodhela dhithu dhatedhene ananereliye. — Luc. 6:45.

10. Otamalela wimukavihere aavi murogola dhaala naarive afwanyiwaga makathamiho? (Osugwe fotu.)

¹⁰ Okala athu ootamalela podi onikavihera wawanana makathamiho. Kasugwa yopadduwa ya murogola Kyung-sook, enafwanyeya va Sentinela a 15 a Janeiro a 2015. Amediku omwaddela wi ohukanna kanser owopiha. Oliye onowoga egi: “Giwalimi wodhela oredda ola, gahithabwa wukuuwa, yakala ninga egumaaga yere omala, gahisegedheya vanlubale.” Yamukavihere ddi murogola ola wanda owanana oredda ole? Oliye osoriha wi kadda emahiyu ahinathi ogona, oliye owaaja mburo womaleya wi alobele wa Yehova amutamalelaga wodhela dhithu tanu dhamukavihera nlabo nenne. Ndo, oliye ookala ofwaseyene ni ookanna efunelo yoomwaddela Yehova wi onomudhivela vanlubale. Murogola ola wonelamo wi Yehova onowakavihera adhaari aye ororomeleya yafwanyiwaga makathamiho orusa, teto ehikalawo mareeliho owinjhiva okwaranya makathamiho enanifwanya. Ndala ninga murogola Kyung-sook, nihikanna dhithu dhowinjhiva dhinanithukulela omutamalela Yehova, naarive nifwanyiwaga makathamiho mudhidhi yola. Olobela wa Yehova ni omwaddela wi onomutamalela wodhela dhatedhene anuwereliye, podi wukavihera ovilela ni okanna monelo wapama wodhela makathamiho enuufwanya.

11. Yesu nuuhogolowela odhulu, mwahaya bwaddi anamahara aye yohowela oliba murima?

¹¹ Omulobe Yehova oliba murima wi wande olaleya. Ohalaga mudhidhi vang’ono wi Yesu ahogolowele odhulu, oliye wawubusedha anamahara aye wi yohowela ovaha onamoona wodhela oliye ‘okumana oJeruzale, oJudeya watewene ni oSamariya ofiyedha wigomele elabo.’ (At. 1:8; Luc. 24:46-48) Nuuvira mudhidhi, anamaholela gereja a maJudewu wamaga arumiwi abiili, Peduru ni Juwawu ni wathukulela Osinediriyu. Wewule, aliwa wakoddiha olaleya ofiyedha wathuusa. (At. 4:18, 21) Ki vano Peduru ni Juwawu yerile ddi?

12. Mowiwanana ni Atos 4:29, 31, ethu baani anamahara a Yesu yeriliwana?

¹² Peduru ni Juwawu nuuthusiwa ni anamaholela gereja a maJudewu, aliwa wawakula yegi: ‘Mpendde mwaannya akala sapama vamentoni va Mulugu wuvuruwanani nyu ohiya onvuruwana Mulugu. Mbwenye iyo, kannahiye wawaddela athu amodha dhithu nonilihu ni dhithu niwalihu.’ (At. 4:19, 20) Vano Peduru ni Juwawu nuukumihiwa, anamahara a Yesu olobela wa Yehova elobaga wi aakavihere odhowagave yeragana efunelo yaye. Aliwa olobela yegi: ‘Mwavahe kopolo adhaari enyu wihina edhowegeve yawogaga madhu enyu nuuliba murima.’ Yehova ahaakula nlobelo nna na vati va murima. — Omwileri Atos 4:29, 31.

13. Nnahudhera ddi ni yopadduwa ya ddibila Jin-hyuk?

¹³ Naarive anamathonga enikoddihaga olaleya, iyo podi ohara yotajhiha ya arumiwi wodhela odidela olaleya. Siyeyo yapadduwe ni ddibila anithaniwa Jin-hyuk. Oliye omagiwa nanamathonga mwaha ohivolosiha mpulitikani. Agaali mukambura, oliye ahivahiwa mutholo wowasamalela anyakambura akwaye, mbwenye aliwa omwaaddela wi aawogege baahi ni anyakambura yahowelaga ethu-sithu. Aliwa omukoddiha ddibila Jin-hyuk owoga muselu bu muselu ni anyakambura, thabwathabwa muselu dha mBibiliyani. Vano, oliye olobela wa Yehova alobaga oliba murima ni okanna ekalelo yapama wihina ande olaleya akanna ofuru. (At. 5:29) Ddibila ola onowoga egi: “Yehova owawakula malobelo aaga wodhela ogivaha oliba murima ni enonelo. Miyo obajha ohudhiha kadda kambura gaviriimi mutala mitanu baahi. Vano nimahiyu gowaaleba makarta wihina gaavahedhe anyakambura nlabo noharela.” Nihiyoya podi okanna ebaribari wihina Yehova aneere onikavihera wihina nidhowegeve nlaleyaga. Ndala niga ddibila Jin-hyuk, ndidele olobela wa Yehova nilobaga oliba murima ni enonelo.

14. Enaanikavihere ddi wawanana makathamiho ehu? (Salmo 37:3, 5)

¹⁴ Omulobe nikavihero Yehova wihina wande owanana makathamiho. Owinjhiva wa iyo ninna wawanana makathamiho orusa, ohiya epaddive yomaningoni, nnofwanyiwa epaddi ya mubuwelo. Amodha ehaayelela athu yathabwiwa wadhivela, amodha enna ofwanyiwa makathamiho orusa vamuralani, amodha enna oharahariwa ni makathamiho mamodha. Teto yothabwaya, peeno dhithu ninga mutipa ni koddo dhinna othabwiha dhithudha okala dhorusa. Bumwahaya onfugulele Yehova murima wawo, omwaaddele dhatedhene dhinupadduwela, ninga wathapanyaga ni mukwawo. Kuwanganyedhe, ororomele wihina Yehova ‘aneere wukavihera.’— Omwileri Salmo 37:3, 5.

15. Malobelo podi onikavihera nimakalelo baani ovilela nafwanyiwaga makathamiho? Owoge yotajhiha.

¹⁵ Enaanikavihere ‘wavilelana makathamiho’ fuuhuselela olobela. (Rom. 12:12) Yehova ohaanona makathamiho enaafwanya adhaari aye ‘onowavuruwana yalobaga nikavihero ni onowawobola.’ (Sal. 145:18, 19) Kristie, murogola dhaala anna yaka 29, uhonelamo wi eyo ebaribari. Nubajha okala muredda oliye wambela wukuuwa vanlubale. Vasogolova oliye woonelamo wi amaye ehikanna oredda wowopiha. Murogola ola onowoga egi: “Miyo galobelesa mudhidhi waamutene wa Yehova, gilobaga wihina agivahe kopolo wi gande wawanana makathamiho ale kadda labo navira. Ohiya eyo, miyo kagajhombesa omutugumanoni ni gowerana ohudhera waaga wavayeka. Malobelo yahigikavihera wagonjhiha makathamiho yagifwanya mudhidhi yole woorusa. Miyo gahikanna ebaribari wi Yehova kadha agisukuma. Opendda wodhela Yehova wogikavihera okala opwaseyene. Naarive ngali muredda, gowonelamo wi Yehova anna wawakula malobelo aaga, wakala ninga enre ogivaha murenddele ni opwaaseya.” Kanidduwale wi Yehova ‘ohunona wawobola ale enamwebedha nuuroromeleya.’ — 2 Ped. 2:9.

16. Mwahaya bwaddi nigahowela nikavihero na Yehova wihina naande okala oolibeene nafwanyiwa yoweha?

¹⁶ Omulobege nikavihero Yehova wihina wande okala oolibeene wafwanyaga dhoweha. Iyo nli athu ohilogomana, mwaha wa yeyo, nnohowela malabo amatene wilibihedha wihina naherena ele eli yabure. Mbwenye Saddana anere werana dhatedhene wi antotele makathamiho mwigumini mwehu wodhela onithukulela werena ele eli yabure. Ethu emodha analabihedhiye wihina aneehe si yaredhelo yonyakavala. Makalelo ala owaredha podi onithukulela odhaliha mubuwelo wehu ni dhithu dhonyakavala. Teto, bu mubuwelo yola wanthukulele werana yothega yowopiha ni oyelela wandana wehu ni Yehova. — Mar. 7:21-23; Tia. 1:14, 15.

17. Wamala olobela wa Yehova olobaga nikavihero, ethu baani onahoweliwe werana voharela? (Osugwe fotu.)

¹⁷ Nafunaga ogonjhiha yoweha yanthukulele werana ethu yabure, nnohowela oloba nikavihero na Yehova. Yesu ahiwoga wodhela muselu yola mudhidhi alobelaga. “Kamunihiye omorela muwehiwani, mbwenye munobole mwa dhotakala.” (Mat. 6:13) Yehova onofuna onikavihera, mbwenye iyo nnohowela oloba nikaviherona. Teto, nnohowela werana dhithu dhiniwanana nindhe nlobilihu. Nnohowela werana dhatedhene nnandihu wihina nisukume mubuwelo ni dhithu dha elabo ela ya Saddana. (Sal. 97:10) Namwilerigi ni naamuhudheraga Bibiliya, nnodhaaliha mubuwelo wehu ni dhithu dhapama ni dhowogowa. Odhowa omutugumanoni ni wapara mabasa olaleya, winere onikavihera obarela mubuwelo wehu. Nimakalelo yala, Yehova anere wakwanihedha mpaganyo waye wohunihiya wehiwa ni dhithu nahinandihu ovilelana. — 1 Cor. 10:12, 13.

18. Ethu baani iyo aatene nnahowelihu odhowagave neragana?

¹⁸ Ola mudhidhi kadda muthu wa iyo nnahowelihu omuloba Yehova wihina anikavihere odhowagave nikalaga ororomeleya malabo yala orusa. Kadda labo naajege mudhidhi wihina nilobele wa Yehova ni murimihu wamutene. Yehova anafuna wihina ‘ninfugulele murima dhehu.’ (Sal. 62:8) Omutamalelege ni omuthithimihege Yehova wodhela dhithu dhatedhene uwereliye. Omulobe nikavihero wihina okale oliba murima wakala mmalaleyelo. Malabo amatene omulobege Yehova wihina ukavihere wawanana makathamiho ni wanda ogonjhiha yoweha si yoweha enufwanye osogolo. Kuhiye ethu newene muthu wuhiha olobela wa Yehova. Mbwenye podi wera onowikoha, Yehova anawaakula aavi malobelo ehu? Ohudhera winaharela nnere woona yowakula ya nikoho nna nathima.