Mwahaya bwaddi nigahowela omoova Yehova?

1-2. Mowiwanana ni Salmo 25:14, akala nnofuna okanna wandana woliba ni Yehova ddiniyani nnahowelihu werana?

ATHU yandana dhikalelo baani dhathima enahoweliwa okanna? Podi wera we wawoge wi athu yandana enohowela odhivelana ni okaviherana mmodha ni mukwaye. Mwebaribarene we kuwawoge wihina woova sili ekalelo yathima athu yandana. Mbwenye ninga enoniha yolebela vithukuliwe ohudhera wula, ale enafuna okanna wandana wooliba ni Yehova enohowela ‘omoova oliye.’ — Omwileri Salmo 25:14.

² Naarive akala nnamulabela Yehova muwari mwa yakadhene obe naari, iyo aatene nnohowela omoova mwamakalelo apama. Mbwenye omoova Yehova winatapulela ddi? Nnahudhere aavi omoova Yehova? Ni ddiniyani nnahudherihu wodhela omoova Yehova ni musadoro Obadiya, namakutha Jeyoyada ni mwene Jeyowaji?

OMOOVA MULUGU ENATAPULELA DDI?

3. Kawogamo makalelo woova winanibareliwa.

³ Iyo aatene nanona wihina enere opadduwa ethu yabure nnowova. Ekalelo ela yowoova, podi onikavihera werana dhothoma dhapama. Motajhiha, mwaha iyo woovaga omotha neddaga vego vooterenya nnokala pasope wihina nahixerenguwe ni nahimothe. Mwaha woova oporosiwa, iyo noona ethu yowopiha nnothawa. Teto mwaha woova omuyelela mukwihu, nnowerana dhatedhene wihina nihiwoge obe naherena ethu yamusuve murima mukwihu.

4. Saddana anafuna wihina nubuwelege ddi?

⁴ Saddana onafuna wihina iyo nimoovege Yehova mwamakalelo abure. Saddana anafuna wihina iyo nikanne mubuwelo mmodhave anna Elifaji wihina Yehova anakala ootakaleliwene mudhidhi wamutene, namawelihedha kunyawunya ni kinenyeya omuhagalasa. (Jó 4:18, 19) Yofunaya sowihina nithabwege omoova Yehova omagomihedhowa nihiye omulabela. Wihina nahimothele murako ola, nnohowela okanna monelo wapama wodhela omoova Yehova.

5. Omoova Mulugu enatapulela ddi?

⁵ Omoova Yehova winatapulela omudhivela vanlubale oliye ni oherana ethu-sithu yanonge wandana ninnihuna ni oliye. Motajhiha, ela yaali ekalelo ‘yoomoova Mulugu’ anna Yesu. (Heb. 5:7) Oliye kamoona Yehova ninga muthu owoopiha. (Isa. 11:2, 3) Mwebaribarene oliye omudhivela vanlubale Yehova ni oofuna omwiwelela. (João 14:21, 31) Ndala ninga Yesu, iyo nnomuriha ni nnomutikina Yehova. Mwaha nihinona wi oliye dodhivela, dathotho, dowogowa ni dakopolo dhatedhene. Teto iyo nihinona wihina Yehova ononidhivela vamlubale ni dhatedhene nnerihuna podi omuukula obe omuhagalasa. — Sal. 78:41; Pro. 27:11.

OHUDHERE OMOOVA MULUGU

6. Nnahudhere aavi omoova Yehova? (Salmo 34:11)

⁶ Iyo kannabaliwa nnonaga makalelo omoova Mulugu, enohoweleya ohudhera makalelo ala omoova Mulugu. (Omwileri Salmo 34:11.) Ethu emodha enaanikavihere werana eyo fusugwa dhopaddusa. Noonaga dhithu ‘dhipaddusile Yehova,’ obe dhopaddusa nnowona wi oliye dathotho, dakopolo ni ononidhivela vanlubale. (Rom. 1:20) Murogola dhaala anithaniwa Adrienne ohuwoga egihina: “Goonaga dhithu dhatedhene Yehova apaddusiliye ni makalelo oliye aliye a thotho ginowonelamo wi mwebaribarene oliye ohunona ele eli yapama wa miyo. Akala oliye digipaddusile, mwahaya bwaddi miyo gere werana ethu yanonge wandana wehu? Miyo kaginafuna werana ethu-sithu yanonge wandana ginnimina ni Yehova.” Onoonamo aavi sumana yela osayele mudhidhi wihina opendde yopaddusa modha ya Yehova? Werana eyo, enere wukavihera wenjhedhedha nriho ni odhivela onniwena ni Yehova. — Sal. 111:2, 3.

7. Malobelo enaanikavihere aavi omoova Yehova?

⁷ Olobela wa Yehova dila dhowinjhivadhene makalelo mamodha owenjhedhedha omoova wehu Yehova. Iyo nalobelaga nnomoona Yehova vakukuvene. Nalobelaga wa Yehova nlobaga kopolo wihina nande ovilela, nnowona nikavihero naaye ni nnowona wi oliye dakopolo dhatedhene. Naamutamalelaga Yehova wodhela mukutho wa mwanaye, nnowubuwela makalelo oliye ananidhiveliye. Teto naamulobaga nikavihero Yehova mudhidhi nnafwanyiwihu makathamiho, nnowonelamo wihina oliye dathotho. Malobelo ninga yaala, enowenjhedhedha nriho nehu ni Yehova ni enolibiha yothoma yehu yoherana ethu yanonge wandana wehu nuliye.

8. Enaanikavihere ddi ohuyelela omoova Yehova?

⁸ Wihina nihiyelele omoova Yehova nnohowela omuhudhera Bibiliya ni efunelo yohudhera dhotajhiha dhapama ni dhabure. Vano nnafuna niwoge wodhela dhotajhiha dha adhaari abiili a Yehova — Obadiya asamalela nyumba ya mwene Akabe ni namakutha Jeyoyada. Nindo nnere owoga wodhela yotajhiha ya mwene oojuda Jeyowaji aamulabele Yehova vano vasogolova ohiya.

OKALE OOLIBA MURIMA NINGA OBADIYA

9. Omoova Yehova wamukavihere addi Obadiya? (1 Reis 18:3, 12)

⁹ Dila yoobajha Bibiliya anawogiye wodhela Obadiyab anihina: ‘Obadiya oomoova vanlubale Yehova.’ (Omwileri 1 Reis 18:3, 12.) Omoova wula Yehova wamukavihere addi Obadiya? Nihinona wihina oliye aali muthu oororomeleya. Bumwahaya mwene adhe amuthomege ninga musadoro wihina asamalelege nyumba ya mwene. (Omusugwe Neemias 7:2.) Teto woova wula wahimukavihera Obadiya oliba murima, mwebaribarene oliye eere ohowela ekalelo ela. Mwahaya bwaddi? Mwaha wi mwene athonga mudhidhi yole aali Akabe. ‘Oliye aherana dhithu dhamutakalela Yehova opitha amwene aatene ethongile oliye ahinakale mwene.’ (1 Reis 16:30) Ohiya eyenove, mwadha Akabe Jezabel amwebedha Bahali, teto oomwidda vanlubale Yehova, mwaha wa yeyo oliye ahixixa omariha webedha webaribari wa mahimo kumi waamwana Ezarayeli. Oliye ahifiyedha wapa anamavuhulela owinjhiva a Yehova. (1 Reis 18:4) Mohanganyedha Obadiya amulabela Yehova mudhidhi worusa.

10. Oliba murima wamukavihere Obadiya wera ddi?

¹⁰ Oliba murima wamukavihere Obadiya wera ddi? Jezabel nuwambela waharahara ni wapa anamavuhulela a Yehova, Obadiya ahakoya anamavuhulela a Yehova owakwana 100 ni wagawa ‘makuru menli, wula 50 wula 50 ni wavaha Yoojha ni manjhe.’ (1 Reis 18:13, 14) Mwebaribarene Jezabel ahaanone, Obadiya eere opiwa. Mohanganyedha Obadiya ahikanna woova mwaha wi oliye kaafuna okwa. Mbwenye odhivela anniyena ni Yehova naale yamulabela Yehova waali winlubale ofiyedha oliye ohela egumaye vang’ovini.

11. Peeno adhaari a Yehova enamutajhiha aavi Obadiya? (Osugwe fotu.)

¹¹ Peeno adhaari a Yehova owinjhiva enakala mburo mabasihu enakoddihiwiwa. Ndala ninga Obadiya, addibila ala enoodidela waariha anamathonga mbwenye kinadduwala onvaha Yehova ele anafwaneleliye — omwebedha oliye baahi. (Mat. 22:21) Aliwa enowoniha wi enomoova Mulugu wodhela omwiwelela oliye ohiya athu. (Atos 5:29) Aliwa enoodidela olaleya ni woona mutugumano vamodha. (Mat. 10:16, 28) Ohiya eyenove, aliwa enowerana dhatedhene enandiwa wihina addibila ni arogola ekanne yojha yomuzimuni enahoweliwa. Kasugwa yotajhiha ya Henri. Oliye anakala murudda dhaala wAfrika mabasihu yakoddihiwiwa. Mudhidhi yole, Henri ahiivahedha wihina aavahedhele addibila marevista. Oliye onowoga egi: “Miyo gili muthu oomaala, bumwahaya gihikanna ebaribari wi odhivela winlubale ginnimina ni Yehova bugikavihere oliba murima.” Onoona wi onowanda okala ooliba murima ninga Henri? Hee, wamoovaga Yehova mwamakalelo apama.

OKALE OOROROMELEYA NINGA NAMAKUTHA JEYOYADA

12. Nimakalelo baani Jeyoyada ni mwadhiye etonyihedhiwa okala oororomeleya wa Yehova?

¹² Namakutha Jeyoyada oomoova vanlubale Yehova, siyeyo yamukavihere okala oororomeleya ni obarela webedha webaribari. Eyo yahoneya mudhidhi Ataliya mwana Jezabel nuubajha othonga oJuda wula ahinna oneti. Athu yoomoova vanlubale Ataliya, aliwa yahikanna razawu. Oliye aali muthu abure ni anrima ni afuna wihina akale musano ofiyedha wapa adhule wihina akwanihedhe ele afuniye! (2 Cró. 22:10, 11) Mbwenye mudhule mmodha — Jeyowaji, ahivuluwa mwaha Jeyozabeyate mwadha Jeyoyada ahimukoya. Oliye ni mamune yahimukoya mwaana ole ni yahimusamalela. Nimakalelo yala, aliwa yahibarela nihimo na mamwene naadhele wa Davidi. Jeyoyada aali oororomeleya wa Yehova ni kahiile wihina omoova Ataliya wimuhihe werana ele eli yapama. — Pro. 29:25.

13. Mudhidhi Jeyowaji aganna yaka kumi nabiili, Jeyoyada onihile aavi okala oororomeleya wa Yehova?

¹³ Jeyowaji aganna yaka tanu nabiili, Jeyoyada ahitonyihedhave okala oororomeleya wa Yehova. Oliye aheriha wihina Jeyowaji mudhule Davidi akale mwene. Dhithudha dhahere dhiheedda pama mohanganyedha Jeyoyada eere opiwa. Mbwenye nnikavihero na Yehova dhatedheene dhaheedda pama. Nnikavihero na naalevita vamodha ni anamaholela amodha, Jeyoyada aheriha wihina Jeyowaji akale mwene ni wihina Ataliya apiwe. (2 Cró. 23:1-5, 11, 12, 15; 24:1) Vano Jeyoyada ‘werana nipangano ni Yehova, mwene ni nlogo wihina yonihe wi yeerege odhowave ekalaga nlogo na Yehova.’ (2 Reis 11:17) ‘Oliye ahapweha anamasugwera mulago dhatedhene dha nyumba ya Yehova wihiha athu ootakala yahivolowege.’ — 2 Cró. 23:19.

14. Mwaha Jeyoyada omuthithimihagave Yehova aarelihiwe aavi?

¹⁴ Yehova ahiwoga egi: ‘Miyo ginaamurihe ole anaagirihe.’ Siyeyo oliye eriliyena ni Jeyoyada. (1 Sam. 2:30) Motajhiha, Oliye ohupweha yopadduwa ya Jeyoyada mBibiliyani wihina iyo nihudhere nuliye. (Rom. 15:4) Teto Jeyoyada nuukwa, Oliye ahikanna ofuru wookoyiwa ‘Luwani ya Davidi, mmasiye yakoyiwa mamwene, mwaha wi oliye aherana dhithu dhapama wIzarayeli mowiwanana ni efunelo ya Yehova ni nyumba yaye.’ — 2 Cró. 24:15, 16.

15. Yotajhiha ya Jeyoyada enanihudhiha ddi? (Osugwe fotu.)

¹⁵ Thalako ya Jeyoyada podi onikavihera wenjhedhedha omoova wehu Yehova. Anamaholela mulogo podi omutajhiha Jeyoyada wodhela osayela makalelo oobarela mulogo. (Atos 20:28) Anakalaba podi ohudhera ni yotajhiha ya Jeyoyada wodhela omoova Yehova ni okalave oororomeleya. Oliye kadha anisukuma. Teto azombwe podi ohudhera ni yotajhiha ya Yehova wodhela waariha ni waweddiha pama ale eli apogo, ndala ninga Yehova eriliyena ni Jeyoyada, thabwa-thabwa ale enamulabela Yehova yaka dhowinjhivadhene. (Pro. 16:31) Teto iyo aatene podi ohudhera ni malevita ni anamaholela yamukavihere Jeyoyada. Nnere wakavihera ale enaniholela wodhela wawiwelela ni murima wehu waatene. — Heb. 13:17.

KUMUTAJHIHE MWENE JEYOWAJI

16. Ddiniyani enatonyihedha wihina Jeyowaji kamoova Yehova nimurima waaye waatene?

¹⁶ Jeyoyada ahimukavihera mwene Jeyowaji okala muthu apama. (2 Reis 12:2) Bumwahaya Jeyowaji agaali muzombwe oofuna omuhagalasa Yehova. Mbwenye Jeyoyada nuukwa, Jeyowaji wambela olekethiwa naathu yahamwiwelela Yehova. Yokumelelavoya? Oliye wambela webedha dhikwamuthu ni dhipwathapwatha aliwa yebedhesiwa. (2 Cró. 24:4, 17, 18) Eyo yahimukuula vanlubale Yehova. Naarive dhigaali ndo, Yehova ‘owaruma anamavuhulela yaali vaari vewa wihina emuhogolowele oliye . . . , mbwenye aliwa kayafuna wavuruwana.’ Aliwa kiyafuna onvuruwana Zakariya mwana Jeyoyada aali pirimwaaye Jeyowaji aali namakutha ni namavuhulela a Yehova. Yahere ehikala emudhi ya Zakariya Jeyowaji kaakalewo. Mbwenye oliye kaatamalele opama eereliwiye, oliye oruma wihina Zakariya apiwe. — 2 Cró. 22:11; 24:19-22.

17. Mwaha Jeyowaji ohumoova Yehova ddiniyani yampadduwele?

¹⁷ Jeyowaji kamoova Yehova mwamakalelo apama, mwaha wa yeyo oliye ahifwanyiwa makathamiho owinjhiva. Yehova ahiwoga egi: ‘Ale enaagirehe edduni, enere ototiwa manyazo.’ (1 Sam. 2:30) Omagomihedhowa, naarive Jeyowaji aganna ‘anyakoddo owinjhiva,’ oliye ahigonjhiwa ni anyakoddo vang’ono aakudda Siriya, ‘aliwa omporosa vanlubale.’ Vano, akudda siriya nudhowa, mbwenye egamporose vanlubale, adharaaye ompa mwaha oliye ahimpa Zakariya. Oliye anoniwe ninga mwene abure, vano oliye nuukwa odhowa okoyiwa Sidade ya Davidi, mbwenye kakoyiwe ‘mmahameni a mamwene.’ — 2 Cró. 24:23-25; osugwe “filho de Baraquias” va nota de estudo na Matewuji 23:35, mbwenye ni ezugu.

18. Mowiwanana ni Jeremias 17:7, 8, ddiniyani nnahowelihu werana wihina nihikale ninga Jeyowaji?

¹⁸ Yotajhiha ya Jeyowaji enanihudhiha ddi? Musisi dha muthanko dhahitibeleya pama, muthankoya onohowela oseyihiwa ni ethu-sithu wihina wahimothe. Mbwenye ethu ele eseyihiwiwana yavenyihiwavo, nipevo nadhaaga muthanko ole onere omotha. Emodhave empadduwele Jeyowaji. Oliye akaviheriwa ni Jeyoyada, mbwenye Jeyoyada nuukwa teto mwaha olekethiwa naapostata Jeyowaji ahimotha epaddi yaye yomuzimuni vano ohiya okala oororomeleya wa Yehova. Nladdaniho nna nnowoniha wi iyo kanimwebedhege Yehova mwaha wi makolo ehu ni addibila mmulogoni enowerana emodhave ni enonikongomedha omwebedha oliye. Akala nnafuna wi nikanne wandana woliba ni Yehova, nnohowela olibiha odhivela ni omoova wehu Yehova, wodhela omuhudhera Bibiliya, opendda ndhe dhinilerihu ni olobela.— Omwileri Jeremias 17:7, 8; Col. 2:6, 7.

19. Yehova ananiloba ddi?

¹⁹ Mwebaribarene dhithu dhinaniloba Yehova kadhinarusa. Ethu oliye anafuniye siila enafwanyeya va Eclesiastes 12:13, anihina: ‘Omoovege Mulugu eebaribari ni wawiwelelege malamulo aye, mwaha ola mutholo wa kadda muthu.’ Namoovaga Yehova, ndala ninga Obadiya ni Jeyoyada, nnere wanda owanana yoweha si yoweha enanifwanye osogolo. Kawo muthu newene ethu-sithu enanoonge wandana wehu ni Yehova.