OHUDHERA 53
Addibila — munande aavi okala alobwana owithwelavo epaddi yomuzimuni?
‘Okale akopolo ni okale mulobwana.’ — 1 REIS 2:2.
JHIBO 135 Mwanaga okale a enonelo
DHITHU NNAAHUDHERIHUa
1. Ethu baani mulobwana anahoweliye werana egi akale mukiristawu owithwelavo epaddi yomuzimuni?
MWENE Davidi ahimulaga mwanaye Salomawu: ‘Okale akopolo ni okale mulobwana.’ (1 Reis 2:1-3) Yolaga ela, enowapatha vanlubale azombwe aatene enafuna okala makiristawu owithwelavo epaddi yomuzimuni. Wihina ekale makiristawu owithwelavo epaddi yomuzimuni aliwa enohowela ohudhera wawiwelela malamulo a Mulugu ni waparihedha mabasa malagano a mBibiliyani mwigumini mwewa. (Luc. 2:52) Mwahaya bwaddi sathima vanlubale azombwe eli makiristawu enohowela wilibihedha okala athu owithwelavo epaddi yomuzimuni?
2-3. Mwahaya bwaddi sathima muzombwe okala mukiristawu owithwelavo epaddi yomuzimuni?
2 Mulobwana aali mukiristawu ohukanna mutholo dhowinjhiva dhathima vemudhini ni mmulogoni. Akala oli muzombwe, podi wera uhambela wubuwela wodhela mutholo onafuniwe okanna osogolo. Podi wera ohukanna yoluba yowavolowela mabasa a mudhidhi wamutene okala mudhaari ookavihera vasogolova okala namaholela mulogo. Teto podi wera onowubuwela otela ni okanna ahima. (Efé. 6:4; 1 Tim. 3:1) Wihina wande wakwanihedha pamadhene mutholo ndha, onohowela wilibihedha wihina okale mukiristawu owithwelavo epaddi yomuzimuni.b
3 Ethu baani enukavihere okala mukiristawu owithwelavo epaddi yomuzimuni? Dhihikalawo dhithu dhathima onahoweliwe ohudhera werena. Mbwenye ki ethu baani onahoweliwe werana ovanene wihina wande wakwanihedha mutholo bu mutholo onafuniwe okanna osogolo?
ETHU BAANI ONAHOWELIWE WERANA WEGI OKALE MUKIRISTAWU OWITHWELAVO EPADDI YOMUZIMUNI
Otajhiha dhikalelo dha Yesu dhinere wukavihera okala mukiristawu owithwelavo epaddi yomuzimuni (Osugwe ddima 4)
4. Onaafwanye waani dhotajhiha dhapama onahoweliwe ohara? (Osugwe fotu.)
4 Osakule dhotajhiha dhapama wihina ohare. Bibiliya ohukanna dhotajhiha dhowinjhiva azombwe enahoweliwa ohara. Dhotajhiha ndha dha mBibiliyani saalobwana yamudhivela Yehova ni yandile wakwanihedha mutholo dhohiyanahiyana wihina esamalele nlogo na Yehova. Teto we podi ofwanya dhotajhiha dhapama ni makiristawu owithwelavo epaddi yomuzimuni vemudhini vawo ni mmulogoni. (Heb. 13:7) Teto we podi ohara yotajhiha yapama ya Yesu Kiristu. (1 Ped. 2:21) Wahudheraga dhotajhiha ndha, opwasedhe woona dhikalelo dhapama athu ala yonihiliwa. (Heb. 12:1, 2) Wamala, osayele makalelo owatajhiha alobwana ala.
5. Onande aavi okanna ekalelo yopendda, ki mwahaya bwaddi eyo sathima? (Salmo 119:9)
5 Okanne ni ‘Okoye . . . enonelo ya kadda labo.’ (Pro. 3:21) Mulobwana anonne opendda anowabiha wubuwela ahinerena ethu-sithu. Bumwahaya wilibihedhe wihina okanne ni onone olabihedha ekalelo ela yopendda. Mwahaya bwaddi? Mwaha wihina mwilaboni alobwana owinjhiva enahara mubuwelo wewa baahi obe enahara ndhe murima wewa onafuniwa baahi. (Pro. 7:7; 29:11) Ohiya eyo, dhithu dhinonihiwa mutelevizorini, mwinternetini, nfilimeni ni mu redes sociais podi ovolowela mubuwelo wawo vamodha ni dhowera dhawo. Ki vano, onande aavi okanna ekalelo ela yopendda? We podi okanna ekalelo ela wodhela obajha wahudhera malagano a mBibiliyani ni wubuwela makalelo malagano ayo enukaviheriwa mwigumini mwawo. Wamala, walabihedhe malagano ayo weragana yothoma si yothoma enafuna omuhagalasa Yehova. (Omwileri Salmos 119:9.) Wanda okanna ekalelo ela yathima yowanda olabihedha malagano a mBibiliyani wihina werena yothoma, eyo ethu yathima vanlubale enafuna wukavihera okala mukiristawu owithwelavo epaddi yomuzimuni. (Pro. 2:11, 12; Heb. 5:14) Kabeni noone makalelo oolabihedha opendda winukaviheriwa mwa dhipaddi ndha biili: (1) waweddihaga arogola, (2) weragana dhothoma dhawo wodhela makalelo oowara ni owisamalela.
6. Opendda winamukavihere aavi muzombwe wariha arogola?
6 Opendda winere wukavihera waariha ahiyana. Kahiyo ethu yabure ddibila onfunaga murogola ni osayela omunona pama. Mbwenye muzombwe ahinera dhithu ni marulu ni anubuwela pama ahinathi werana yothoma si yothoma kanerena ethu sithu enamuthukulele mwana muhiyana wubuwela wihina oliye anonfuna, wula ahinna efunelo yomutela. (1 Tim. 5:1, 2) Teto akala oliye ohukanna omwenddi ni murogola, oliye anere wilibihedha wihina anatakalihe emuthu ya murogola ole newene kanarumedhe okala abili baahi ahiliwo muthu owasugwera. — 1 Cor. 6:18.
7. Opendda winamukavihere aavi muzombwe eragana yothoma wodhela makalelo aye oowara ni owisamalela?
7 Makalelo mamodha muzombwe anafuniye woniha wihina anowubuwela pama ahinathi werana yothoma eli wodhela makalelo aye oowara ni owisamalela. Malabo owinjhivene, makalelo oowara ni owisamalela enapanddiwa ni ennavuwihiwa ni athu yahinaariha malagano a Yehova obe enathukula egumi yonyakavala. Makalelo owubuwela oonyakavala aathu ayo enowoneya pamadhene wodhela owara guwo dhomaga obe dhihinooniha akala salobwana obe sahiyana. Muzombwe anilibihedha wihina akale mukiristawu owithwelavo epaddi yomuzimuni aasakulaga ethu anafuniye owara, anohowela wahara malagano a mBibiliyani vamodha ni dhotajhiha dhapama mmulogoni. Oliye podi wikoha egi: ‘Dhosakula dhaaga dhinowoniha wi gili muthu athotho ni ginothuwathuwela mubuwelo waathu amodha? Makalelo aaga oowara ni owisamalela enoweriha wihina athu amodha egonege ninga mudhaari a Yehova?’ (1 Cor. 10:31-33; Tito 2:6) Muzombwe anubuwela pama wodhela muselu ndha anerege orihiwa ohiya mmulogoni baahi, mbwenye ni Yehova ali Babihu oodhulu.
8. Ethu baani muzombwe anahoweliye werana wihina akale muthu oororomeleya?
8 Okale muthu oororomeleya. Muzombwe ali oororomeleya anosamalela pamadhene mutholo dhaye obe neere dhatedhene. (Luc. 16:10) Wubuwele yotajhiha yapama ya Yesu. Yesu kaapwaza mutholo dhaye. Ohiya eyo, oliye owakwanihedha mutholo dhatedhene Yehova anvahiliye, naarive dhirusaga werana eyo. Oliye owadhivela athu— thabwathabwa anamahara aye — oliye ahiivahedha wihina avelele egumaye wihina awobole. (João 13:1) We podi omutajhiha Yesu wodhela olaba nuviheya wihina wakwanihedhe mutholo bu mutholo onakeliwe. Akala kunonne pamadhene ethuya yowerana, okale owiyeviha ni olobe nikavihero na addibila enonne wapara mabasa ale pamadhene. Kuhagalalege nindhe onandiwe baahi. (Rom. 12:11) Ohiya eyo wakwanihedhe mutholo dhawo, weragana eyo wubuwelege wi ‘kahi a muthu, mbwenye ba Yehova.’ (Col. 3:23) Ebaribari wihina kulogomane, bumwahaya waanone manddile awo teto waviriganiha orumedhege dhoviriganiha dhawo. — Pro. 11:2.
OHUDHERE WERANA DHITHU DHINUKAVIHERE
9. Mwahaya bwaddi muzombwe anohowela ohudhera werana ethu enamukavihere?
9 Wihina okale mukiristawu owithwelavo epaddi yomuzimuni, onere ohowela ohudhera dhithu dhinukavihere. Dhithu ndho dhinere wukavihera wanda osamalela mutholo mmulogoni ni wanda wafwanya mabasa enukavihere wisamalela wamwinnyo ni wasamalela amudhawo, teto dhinere wukavihera okanna wandana wapama ni athu amodha. Vano kabeni nnone dhithu onahoweliwe ohudhera werana.
Wanona wileri ni oleba pama, onere wikavihera wa mwinnyo ni onere wanda okavihera mulogo (Osugwe ddima 10-11)
10-11. Muzombwe anona wileri ni oleba pama aniikavihere aavi, ki anaakavihere aavi mulogo? (Salmo 1:1-3) (Osugwe fotu.)
10 Ohudhere wileri ni oleba pama. Bibiliya anihina wawileri ni wapendda madhu a Mulugu malabo aamatene winomukavihera mulobwana okala oohagalala ni dhaye omweddelaga pama. (Omwileri Salmos 1:1-3.) Omwileri Bibiliya malabo aamatene winere wukavihera onona pamadhene mubuwelo wa Yehova. Ni makalelo yayo, onerege wubuwela pamadhene, onerege onona opendda ni oparihedha mabasa dholaga dha mBibiliyani. (Pro. 1:3, 4) Mulobwana anonne werana eyo anookavihera vanlubale mulogo. Nimakalelo baani?
11 Mulogo onowahowela addibila enonne ohudhiha pama wihina ehudhihe ni evahege dholaga dhinakumela mBibiliyani. (Tit 1:9) Wanona wileri ni oleba pama, onerege wanda wegeredha pamadhene mwaha dhawo ni dhowakula dhawo mmutugumanoni dhinalibihe nroromelo naaddibila. Teto onerege wanda olebela dhithu dhathima onahudheriwe mmutugumanoni weragana ohudhera wawo wavayeka ni wavuruwanaga mwaha wakala omutugumanoni obe omusonkanoni. Dhithu ndho onafuniye olebelaga dhinere wukavihera olibiha nroromelo nawo ni walibiha athu amodha.
12. Ddiniyani enukavihere wanda othapanya ni athu amodhaya?
12 Onone othapanya pama ni athu amodha. Mukiristawu anohowela ohudhera othapanya ni makalelo apama. Mulobwana anone othapanya pama anopwasedha ovuruwana ni anowanda wonelamo mubuwelo dha athu amodha. (Pro. 20:5) Oliye anowanda wonelamo makalelo anawoga muthuya, makalelo winakala wintoni waye ni makalelo anaddiginyiye madaye. We kunande ohudhera dhithu dhatedhene ndha wahipathaga mudhidhi wi okale ni athu. Akala onothabwesa othapanya ni athu olabihedhaga telefoni ninga emeyili obe mensaje, eyo kinukavihere wanda othapanya ni athu tho-tho. Bumwahaya osayelege makalelo wihina wande othapanya ni athu tho-tho. — 2 João 12.
Sathima ohudhera werana ethu-sithu enukavihere ofwanya mabasa apama (Osugwe ddima 13)
13. Ethu baani emodhaya yapama muzombwe anahoweliye ohudhera werana? (1 Timóteo 5:8) (Osugwe fotu.)
13 Ohudhere wisamalela weka. Mukiristawu owithwelavo epaddi yomuzimuni anohowela onoona wisamalela yeka vamodha ni osamalela emudhaye. (Omwileri 1 Timóteo 5:8.) Dhilabo dhimodha, azombwe podi wahudhera wapara mabasa ni makolo ewa obe ni mmudhi mmodhaya. Mbwenye dhilabo dhimodha, muzombwe podi ohudhera wapara mabasa mudhidhi agaali oskola ahudheraga. Naarive nigahudhenre mabasaya mwamakalelo ohiyana-hiyana, sathima vanlubale ohudhera ethu enafuna wukavihera waafwanya mabasa. (At. 18:2, 3; 20:34; Efé. 4:28) Wilibihedhe ononiwa ninga muthu anonne wapara mabasa nuviheya ni anamariha ele anambeliye. Werana eyo, enere wukavihera waafwanya mabasa nudhowagave waparaga mabasaya. Dhikalelo ni dhithu onahoweliwe werana nonilihu ofiyedha ddima dhivirile sathima ni podi omukavihera mukiristawu wanda wakwanihedha mutholo bu mutholo anafuniye okanna osogolo. Kabeni noone mutholo ndha.
WIWEGEREDHE WIHINA WANDE WAKWANIHEDHA MUTHOLO ONAFUNIWE OKANNA OSOGOLO
14. Muzombwe anaande aavi wiwegeredha wihina avolowele mabasa a mudhidhi wamutene?
14 Olaba ninga mudhaari a mudhidhi wamutene. Addibila owinjhiva owithwelavo epaddi yomuzimuni yambele wapara mabasa a mudhidhi wamutene egaali azombwe. Okala piyonero podi omukavihera muzombwe onona waweddiha pama athu aatene ni, onona olabihedha korowa anakeliye ni ohinonga bure-bure. (Fil. 4:11-13) Makalelo apama owawambela mabasa amudhidhi wamutene fuudhela okala piyonero ookavihera. Addibila owinjhiva ehivira mudhidhi wowinjhiva elabaga ninga apiyonero ookavihera, vano eyo yahakavihera okala owiwegeredhene wihina ekale piyonero a mudhidhi wamutene. Mabasa opiyonero podi wuvaha ofuru wowinjhiva wowapara mabasa a mudhidhi wamutene, ninga motajhiha, olaba ninga namamaga Nyumba dhOmwene obe betelita.
15-16. Ddiniyani enaamukavihere muzombwe okala mudhaari ookavihera obe namaholela mulogo?
15 Okala mudhaari ookavihera obe namaholela mulogo. Alobwana aatene mmulogoni enofwanelela okanna yoluba yowakavihera addibila ni arogola, elabaga ninga anamaholela mulogo. Bibiliya anihina alobwana enilibihedha wihina ekanne mutholo ola ennawilibihedha wihina yapare ‘mabasa apama.’ (1 Tim. 3:1) Mbwenye ddibila ahinathi wambela olaba ninga namaholela mulogo, anarajhiha olaba ninga mudhaari ookavihera. Adhaari ookavihera enowakavihera anamaholela mulogo osamalela mutholo dhohiyana-hiyana mmulogoni. Teto anamaholela mulogo vamodha ni adhaari ookaviheraya athu owiyeviha enalabela addibila ni arogola teto enowapara mabasa oolaleya nuviheya. Azombwe podi woniha dhikalelo dhoolaba ninga mudhaari ookavihera ni othomiwa ninga adhaari ookavihera naarive agaali muzombwene. Teto mudhaari ookavihera anoniha dhikalelo dhapama podi othomiwa ninga namaholela mulogo naarive aganna yaka 20.
16 Ethu baani onahoweliwe werana wegi okale mudhaari ookavihera obe namaholela mulogo? Bibiliya anowoga lista na dhikalelo onahoweliwe okanna. Mbwenye kudduwale wihina dhikalelo ndho onohowela woniha mwaha odhivela onniwena ni Yehova ni emudhaawo vamodha ni mmulogoni mwawo. (1 Tim. 3:1-13; Tito 1:6-9; 1 Ped. 5:2, 3) Wilibihere ni murima wawo wamutene wihina wande wonelamo makalelo owoniha dhikalelo ndha. Ohiya eyo, olobele wa Yehova omulobaga wihina ukavihere okana dhikalelo ndha.c
Yehova anafuna wihina mulobwana ootela amudhivelege mwariye vamodha ni anaaye ni asamalelege epaddi yomwilini ni yomubuweloni. Mbwenye thabwathabwa, epaddi yomuzimuni (Osugwe ddima 17)
17. Muzombwe anaande aavi wiwegeredha wihina akale mulobwana ootela ni musolo avade apama? (Osugwe fotu.)
17 Okala mulobwana ootela ni musolo weemudhi. Mowiwanana ni madhu a Yesu, makiristawu amodha owithwelavo omuzimuni yere osakula okala addiye. (Mat. 19:12) Mbwenye we wathoma ootela, onere okanna mutholo wolaba ninga mulobwana otela vamodha ni musolo weemudhi. (1 Cor. 11:3) Yehova anafuna wihina mulobwana amudhivelege mwariye ni amusamalelege epaddi yomwilini, yomubuweloni, ni yomuzimuni. (Efé. 5:28, 29) Dhikalelo dhatedhene ni dhithudha onahoweliwe ohudhera werana nonilihu muwari mwa yohudhera ela, ninga onona opendda waariha ahiyana, okala oororomeleya, dhinere wukavihera we okala mulobwana ootela apama. Nimakalelo yaala, onere okala owiwegeredhene wihina okale mulobwana ootela ni musolo weemudhi apama.
18. Muzombwe anaande aavi wiwegeredha wihina akale baabi?
18 Okala baabi. Wamala otela, podi wera onere okala baabi. Ethu baani onahudheriwe ni Yehova wodhela okala baabi apama? Dhithu dhowinjhiva. (Efé. 6:4) Yehova kaakanna manyazo owoga ni mwanaye Yesu Kiristu, wihina omudhivela ni omurumedha. (Mat. 3:17) Wakala baabi, kudduwale owoga ni mwanawo wihina onomudhivela vanlubale. Teto mwanawo erana dhithu dhapama omuthethelege. Abaabi enamutajhiha Yehova enowakavihera aniwa wihina ekale makiristawu owithwelavo epaddi yomuzimuni. We podi wiwegeredha wi okale baabi apama wodhela obajha ovanene waweddiha amudhawo nuudhivela vamodha ni addibila mmulogoni ni wodhela wawaddela aliwa wihina onowadhivela ni onowavaha thima. (João 15:9) Si dhithu dhendha dhinukavihere osogolo, wakala mulobwana ootela obe baabi. Mbwenye mudhidhi oyo wahinathi ofiya, okanne ebaribari wihina we ohukanna thima vamentoni va Yehova vemudhini wawo ni mmulogoni.
ETHU BAANI ONAHOWELIWE WERANA OVANENE?
Azombwe owinjhiva enaparihedha mabasa dhithu ehudhenriwa mBibiliyani ehanda okala makiristawu owithwelavo epaddi yomuzimuni (Osugwe ddima 19 ni 20)
19-20. Ddiniyani enakavihere azombwe okala makiristawu owithwelavo epaddi yomuzimuni? (Osugwe fotu yavakapani.)
19 Azombwe, munohowela wilibihedha vanlubale wihina mukale makiristawu owithwelavo epaddi yomuzimuni. Onohowela ohara dhotajhiha dhapama, okanna ekalelo yopendda, okala muthu oororomeleya, ohudhera werana dhithu dhinukavihere mwigumini mwawo ni wiwegeredha wihina wande wakwanihedha mutholo onafuniwe okanna osogolo.
20 Podi wera onothuwathuwa wubuwelaga mutholo onafuniwe okanna osogolo, mbwenye kuthuwathuwe, we onere wanda wakwanihedha mutholo dhawo. Kudduwale wihina Yehova anofuna vanlubale wukavihera. (Isa. 41:10, 13) Teto addibila ni arogola a mmulogoni enere wukavihera. Wanda okala mulobwana Yehova anafuniye wihina okale, egumawo enere okala yoriha ni yohagalasa vanlubale. Nnowudhivelani vanlubale nyu azombwe, mukanne ebaribari wihina Yehova aneere wureelihani vanlubale mwilibihedhaga wihina mukale makiristawu owithwelavo epaddi yomuzimuni. — Pro. 22:4.
JHIBO 65 Nididelege weedda ni kopolo!
a Mmulogoni enohoweleyamo alobwana owithwelavo epaddi yomuzimuni. Ohudhera wula, nnere woona makalelo baani azombwe enandiwa okala makiristawu owithwelavo epaddi yomuzimuni.
b Osugwe “Wonelamo pama” ohudhera ovirile.